Números 10:33 - Biblia Mixe de Quetzaltepec

³³ Ënät jam tsyo'ontë ma ja Wintsën ja kyopkën ets ojts tyu'uye'eytyë tëkëëk xëëw. Ja kaaxë mëti'ipë myë'ijtypyën ja käjpxytyu'unën mëët ja Wintsën, jëjp'am ënäty nyijkxy. T'ixta'ay yë'ë jëyëjp ja it naaxwiinyëtë ma jëtu'un pyo'kxtëtyën ja ja'ayëty.

Números 10:33 ပူးပေါင်းရင်းမြစ်များ

Deuteronomio 1:33

Oy yë'ë mjatu'uwinwowëtë ets të t'ixta'ay ja it naaxwiinyëtë ma mtsënaaytyaknpëktëtyën. Ko ënäty kyoots'aty, yë'ë mëët ja jëën tkutë'kxy ja në'ë tu'u, mëti'ipë mëpaat xypyanëjkxtën; e ko xyiiny'äty, yë'ë mëët ja yoots mtu'uwinye'eyëtë.

Éxodo 3:1

Yë Moisés yë'ë ënäty kyëwent'ajtëp ja myë't Jetro kyupixyny, mëti'ipë jam teety'ajtpën Madián, e tëkok ojts jam twojpnëjkxy ma të'ëts'it të'ëtsnaaxën, jam tyimja'ajty ma tu'uk ja mëj kopkën, mëti'ipë ja Tios jyä'ä'ajtypyën, jä'ä txëëwaty Horeb.

Hebreos 13:20

Ja Tios mëti'ipë yäjkpyën ja jotkujk'ajtën ets mëti'ipë ojts tyajjuukpyikyën ja Wintsën Jesús, jëtu'unpë yajpaatyën tä kupixyny këwent'ajtpën, mëti'ipë mëët ja nye'pny ja käjpxytyu'unën të tyaj'apaatën xëmëkyëjxm,

Ezequiel 20:6

Jä'ä xëëw ojts n'ënëëmëtës ko nyajpëtsëma'antës jap Egiptë ets nyanëjkxa'antës ma ja naax kajpnën mëti'ipës të ntuknipëjktaakëtën, tu'uk ja kajpn ma ja tsi'tsknëë ets ja uuxpa'ak jëtu'un pyëyi'ikyën tä nëëjën, ma tu'uk ja naax kajpnën mëti'ipë ni'ik oyën këtiinëm jyëtu'unëty wiinkëtypë kajpn.

Jeremias 6:16

Jëtu'un ja Wintsën ja nyaax kyajpn t'ënëmaay: Nëjkxtë jam muum mtänëtë në'ëjoty tu'ujoty ets xy'ixtëty ma patu'ujën; xyajnitëwëtëty mëti'ipë oyën, yë'ëts panëjkxtë ets mpo'kxtëty. E yë'ëjëty tyaa ojts y'ëna'antë: Ka'ap, ka'apës mpanëjkxa'antë.

Jeremias 3:16

E ko ënäty të mnimayëtë ets myäyëtë ja m'u'unk m'ëna'këty, ka'ap nëjkx ni pën t'ëkja'amyäjtsnë ja Wintsën ja kyaaxë mëti'ipë ja käjpxytyu'unën myë'ijtypyën, ni pën nëjkx tkamëmay tkamëtajy ets ni pën tkaja'amyätsa'any; jä'ä ko ka'ap nëjkx y'ëkopkpëky'ajnë. Ëjts Wintsën, ëjts ënaanp.

Isaías 66:1

Jëtu'un yë Wintsën y'ënä'äny: Ëjts jamës nkutujktakn tsajpjotm, e naaxkëjxy ntekyës jää nyaj'ijtyp. ¿Maas yë njëën ntëjk xynyakojtëty? ¿Maas xynyayajpo'kxa'antë?

Isaías 28:12

Jä'ä ko ojts tëëyëp yaj'ënëëmëtë: Tyaa ja jotkujk'ajtën, tyaa ja po'kxtakn; wä'än yaa tpo'kxtë mëti'ipë tëë y'ënu'kxëtën, E yë'ëjëty ka'ap ojts jyä'äkyukëtë.

Salmos 95:11

Paaty ojts npokyës etsës t'ënëmaaytyë, ko ka'ap jam tyëkëja'antë maas ja npo'kxtaknën.

1 Samuel 4:3

Ko yë Israel ja'ayëty jam wyimpijtë ma jyajta'aktën, ënät ja mëjja'aytyëjk y'ënantë: ¿Tii ko yë Wintsën të t'ëwa'atsy ets tyam o'ktëy njajtmëty ma filistejë ja'ayëtyën? Ja'amtë nyajtso'onëmë yë kaaxë jam Siló mëti'ipë ja käjpxytyu'unën myë'ijtypyën mëti'ipë ja Wintsën jyä'ä'ajtypyën. Yë'ë itkujky nyajnëjkxmëp ets xykyuwa'anmëty ma ja nmëtsip'ajtëmën.

Jueces 20:27

Jä'ä xëëw jä'ä jëmëjt ja Tios ja kyaaxë, mëti'ipë yë käjpxytyu'unën myëët'ajtypyën jam ënäty yajpaaty Betel, ets Finees yë'ë ënäty teety'ajtp, yë'ë myaank yë Eleazar, y'ok'u'unk yë Aarón ets ja Israel ja'ayëty tyajtëëwtë ja Wintsën: ¿M'ëwatsyp jatëkok etsës ntsiptuntëty mëët nmëku'ukëtyës, yë Benjamín ja'ayëty, ëkë yë'ë oy koos ntimy'ëxmatstëtyë? Tä ja Wintsën y'ëtsoowëtë: Nëjkx mëët mtsiptuntë, jä'ä ko jëpom miits nyajmëta'akantëp.

Josue 4:7

Tääts xy'ëtsowtëty: Ëk'ix u'unk, ya'atë yë'ë nyikäjpxyp, ko tëëyëp ma ja Wintsën ja kyaaxë ojts yajmënaxyën ma ja Jordán mëjnëëjën ojts mäjtskpëky nyäwyä'kxyë ets jëtu'un'äämpy ojts të'ëts wa'ats yajmënaxy. E tyaapë tsaa nipiiwpetypë y'ityën yë'ë ijtp ijxpät ets yaja'amyätsëty mëti'ipë ojts tëëyëp tyunyën jyätyën.

Deuteronomio 31:26

Ya'atë noky jam nëjkx xypyëjktä'äky kaaxëpë'am, mëti'ipë myë'ijtypyën ja käjpxytyu'unën. Yë'ë mtuk'ixtëp ets mtukja'amyätstëp ko ënäty ja ëxëëktu'un ëxëëkajpxën jä'ä xypyanëjkxtëjkënyëtë.

Deuteronomio 9:9

Ënätës jam npejty kopkkëjxm maas ojts n'ëxajën ja tsaatsetsy, ma ja Wintsën tkëxjaayën ja y'aaw y'ayuk, mëët ko ja käjpxytyu'unën tuuny mëët miitsëty. Jä'äjës jam njaak'ijty wëxtyikxy xyëëw wëxtyikxy tsyu'um.

Números 10:12

Tä ja Israel ja'ayëty tsyo'ontaaytyë ma ja të'ëts'it txëëwatyën Sinaí. Ja yoots jam ojts tyiiy'awë ma ja Parán të'ëts'itën.

Éxodo 19:3

Ënät jam ja Moisés pyejty kopkkëjxm ets jam nyäpyaata'anyë mëët ja Tios, jä'ä ko Tios ojts jam kë'ëm myëkäjpxyë kopkkëjxm ets y'ënëmaayë: Tukmëtow ya'atë aaw ayuk yë Jacob yë y'u'unk y'ëna'k, yë Israel ja'ayëty:

Isaías 11:10

Jä'ä xëëw yë Jesé mëti'ipë jëtu'un tä kepyjyi'tskën, ijxpäjtën nëjkx wyi'imy ma wiinkëtypë naax kajpnën; nëjkxëp nyiminyë wiinkëtypë naax kajpn, ja it naaxwiinyëtë ma tääpë kajpn yajpaatyën, mëj'äämpy nëjkx y'ity.

Jeremias 31:2

Jëtu'un yë Wintsën y'ënä'äny: Ëjts oyës ojts yë njot nwinma'any nyajkëxë'ëky jam të'ëts'itjotm mëët ja naax kajpn mëti'ipë kyukäktën ja o'kën. Ma ënäty ja Israel kajpn t'ixta'ayën ja po'kxtakn,