Lucas 8:34 - Biblia Mixe de Quetzaltepec

³⁴ Ja ja'ayëty mëti'ipë ënäty jam ëtsëm këwent'ajtëpën, ko jëtu'un t'ijxtë tyunyë jyätyë, ënät kyäktaaytyë ets ojts nyëjkxtë jam kajpntum ets nimëtyaktë.

Biblia Dc en Mixe de Quetzaltepec

³⁴ Ja ja'ayëty mëti'ipë ënety jam ëtsëm këwent'ajtëpën, ko jëtu'un t'ijxtë tyunyë jyätyë, ënät kyäktaaytyë ets ojts nyëjkxtë jam kajpntum ets nimëtyaktë.

Lucas 8:34 ပူးပေါင်းရင်းမြစ်များ

Marcos 5:14

Mëti'ipë ja ëtsëm kyëwent'ajtëpën ojts kyäkta'atë ets ojts tnimëtya'aktë jam naaxjotm kajpnjotm mëti'ipë ënäty të tyuny të jyätyën. Tääts ja ja'ay tnitso'ontë ets t'ixa'antë tii të tyuny të jyätyë.

Mateo 28:11

Tam ënäty ja to'oxytyëjk nyëjkxtë, ko ja soltaatëtëjkëty näjyëtu'un ojts nyëjkxtë jam kajpnjotm, mëti'ipë ënäty ja o'kpë jut të tkëwent'atën ets tukmëmëtyaktaaytyë ja teetytyëjkëty, wintsëntëjkëty mëti'ipë ënäty të tyuny të jyätyën.

Mateo 8:33

Ja ëtsëm këwent'ajtpë, ojts kyäkta'atë ets ko jya'ajtë ma ja kajpnën, ënät tnimëtyaktaaytyë tii ënäty të tyuny të jyätyën, näjyëtu'un wi'ix ënäty të jyatën ja ja'ay mëti'ipë ja ku'oypyë myëët'ajtëpën.

Lucas 8:33

Tääts ja ku'oypyë pyëtsëëmtë ma ja ja'ayën ets tuktëjkëtyë ja ëtsëm. Ënät ja may ëtsëm kyupëyë'knajxtaaytyë ja'awjoty ets nëëjoty kyëtaktaaytyë. Japts jyi'kxtaaytyë.

Lucas 8:35

Ojts ja ja'ay tnitsoontë ets t'ixa'antë tii të tyuny të jyätyë; ko jyajtë ma ja Jesús jamën ets t'ijxpatë ko tam ja ja'ay y'u'unyë mëti'ipë ënäty ja maykyu'oypyë të tmëët'atyën, wijy kejy, xoxy pëky; ënät ojts tsyë'ëkëtë.