Lucas 6:23 - Biblia Mixe de Quetzaltepec

²³ Jotkujk itë ets xoonta'aktë ko jëtu'un myajtun myaj'ënëëmëtëty, jä'ä ko mëj myajkumaya'antë tsajpjotm; jä'ä ko ja y'aptëjkëty tääpë ja'ayëty mëti'ipë tyam juuky'ajtëpën näjyëtu'un ojts ëxëëk tuntë ja Tios ja kyäjpxynyajxpëtëjk.

Biblia Dc en Mixe de Quetzaltepec

²³ Jotkujk itë ets xoonta'aktë ko jëtu'un myajtun myaj'ënëëmëtëty, jä'ä ko mëj myajkumaya'antë tsajpjotm; jä'ä ko ja y'aptëjkëty tääpë ja'ayëty mëti'ipë tyam juuky'ajtëpën näjyëtu'un ojts ëxëëk tuntë ja Dios ja kyäjpxynyajxpëtëjk.

Lucas 6:23 ပူးပေါင်းရင်းမြစ်များ

Apocalipsis 21:7

Ya'atë kyuma'ayën'atëp pën ënäty mëtakpën, etsës yë'ë xyTios'atëty ets yë'ëjës n'u'unk'atëty.

Apocalipsis 3:12

Pën mëtakp, yë'ëjës npëjkta'akäämpy ijxtëm ja tëjk po'kxën maas ja nTios ja tyëjkën ets ni wintim nijëna'a jap kyajëwa'akëty. Nkëjxja'ajäämpyës ja Tios ja xyëëw ma yë'ëjën ets ja kajpn xëëw, ja jempyë Jerusalén mëti'ipë tsajpjotm yajpatpën ets nkëjxja'aja'anyës ja jempyë ja nxëëwës ma yë'ëjën.

Apocalipsis 3:5

Pën mëtaktëp, näjyëtu'un poop witxë y'ita'antë ets ka'apës ja xyëëw nyajtëkoyanëtë jap nokyjoty mëti'ipë ja juukyajtën myë'ijtypyën, ni'ikyës nkajpxkëxë'ëka'antë maajës yë nTeetyën ets ma ja anklëstëjkëtyën.

Hechos 5:41

Ënät ja ijxpëjkpëtëjk pyëtsëëmtë juntëjoty, akujk jotkujk tsyo'onëtë, jä'äkyëjxm ko ja Tios ënäty të tyajkutuky ets y'ëyo'onpaatëty ko ja Jesús tnikäjpxy tnimëtya'aktë.

Mateo 5:12

Xi'iktë xontë ets jotkujk yajpaatë, jä'ä ko mëj ja Tios mkumaya'anëtë; jä'ä ko näjyëtu'un ojts t'ixjëtit tpajëtitë ja Tios kyäjpxynyajxpëtëjk mëti'ipë tëëyëp juuky'ajtëpën ma ënäty miitsëty ka'ap mjuuky'atënëm.

Apocalipsis 2:26

Pën mëtakp ets tyuunpy ijxtëmës ntsokyën koonëm tpaatëty ja tiempo, yë'ëjës nmo'ojäämpy ja kutujkën ets ja mayjyä'äy t'ënä'ämëty.

Apocalipsis 2:17

Pën ja tyatsk tyukmëtoopy, wä'än tmëtoowkukë wi'ix ja Kënu'kxymyëkajtën t'ënëëmën ja mëpëjkpëtëjk. Pën mëtakp, ntukjë'kxäämpyës ja maná mëti'ipë yu'utsy ijtpën ets nän nmo'ojäämpyës tu'uk ja poop tsaa ma jap myinyën kuja'ay tu'uk ja xëëw jempyë, mëti'ipë ka'ap pën nijawën, yi'iyë nyija'ap mëti'ipë y'ëxajëpën.

Apocalipsis 2:7

Pën yë tyatsk myëët'ajtypyën wä'än tmëtoowkukë wi'ix yë Kënu'kxymyëk'ajtën t'ënëëmën yë mëpëjkpëtëjk. Mëti'ipë mëtaktëpën ka'ap tii jyata'anëtë ko ënäty ja mëmäjtsk'okpë o'kën y'ity.

1 Pedro 4:13

Ni'ikyë mëpaat jotkujk myajpaatë ko xymyënax xyajnaxtëty ja ëyo'on jotmay mëti'ipë ja Kristë näjyëtu'un myënajx yajnajxën, ets näjyëtu'un mxoonta'aktëty ko ënäty nyikëxë'ëky ja mëj'ajtën oyajtën ko Kristë myinëty.

Santiago 1:2

Mëku'uktëjkëty, akujk jotkujk miits mnäjyawëtëty ko xymyënax xyajnaxtë ja ëyo'on jotmay kanaakjëjp.

Hechos 3:8

Tääts ja tekymya'at pyujtë'ky ets ye'eypyijky; ënät mëët tyëjkëtyë jap mëjtsajp tëkoty ye'epy ets tmëjja'aw tkënu'kxyja'awëy ja Tios jëtu'un pyujtnë y'äjtsnë.

2 Crónicas 36:16

Yë'ëjëty ka'ap tmëjpëjktaktë ja aaw ayuk, je'eyë tnëxik tukxiktë mëti'ipë ja Wintsën jyakajpxën; koonëm ja Wintsën yajxon tyajjoot'anpëjktë ets ka'ap ojts t'ëkjëkyäjpnë wi'ix jyotxäämëtyën.

2 Samuel 6:16

Ko jam jyä'äjty ja Wintsën ja kyaaxë ma ja David ja kyajpnën, ja David ja tyo'oxytyëjk mëti'ipë xyëëwajtypyën Mical, ënät ojts y'ijxwoony ma ja tyëjkën; ko t'ijxy ja David jyänty y'etsy jyänty pyuty jam Wintsën wyintum, yë Mical wiink ojts t'ixy.

Hebreos 11:26

Paaty tyimwinmaay nikë oy ko ja Yajnitsokpë tku'ëyowëty ets këtii ko tukjotkujk'atëty ja mëj'ajtën jaanty'ajtën mëti'ipë japën Egiptë, jä'ä ko ja wyinma'any ojts tpëjktä'äky ma ja kuma'ayënën mëti'ipë ja Tios yakäämpyën.

Hebreos 11:6

Ka'ap tjëkyepy oy nmëtu'unmëty yë Tios pën ka'ap ja mëpëjkën yajmëëtëty. Ko nmëwinkona'anmëty ja Tios, kopkpëky ko nmëpëjkmëty ko Tios jyääty ets ko tkumay mëti'ipë ixtaayëpën.

2 Timoteo 2:12

Pën nku'ëyo'owëm, näjyëtu'un mëët nyajkutuka'anëm. Pën nkuyu'tsëm, näjyëtu'un yë'ë xykyuyu'tsa'anëm.

Colosenses 1:24

Jotkujkës näjyawëty ko miits nku'ëyowëtë, jëtu'unës nyajkä'pxy ja ëyo'on maas ja njot nini'kxën, mëti'ipë ja Kristë kyayajka'pxën ma tku'ëyo'owëyën ja mëpëjkpëtëjkëty, mëti'ipë yë'ë nyi'kx'ajtyp kyopk'ajtypyën.

2 Corintios 12:10

Ets jotkujkës näjyawëty koos n'ëyoy, koos nyajwinkäjpxy nyajjëjpkäjpxy, koos nyaj'ixjëtity nyajpajëtity ets koos ëxëëk ja Kristë nkujatë. Koos npëkyë n'ixyë jääjës näjyawëty nmëktä'äky.

Romanos 5:3

Ka'ap yi'iyë ntukxoontakmëty ja jotkujk'ajtën, näjyëtu'un ko n'ëyo'owmëty, jä'ä ko nnija'awëm ko ja ëyo'on yë'ë xyajmëkpëjkëm ets nmëmëtakmëty.

Hechos 14:10

Ënät mëk t'ënëmaay: Pëtë'ëk. Tuktanë yë mteky. Ënätyë ja ye'etyëjk pyëti'ky ets tyëjkëy ye'epyë.

Lucas 6:35

Mtsoktëp miits ja mmëtsip, tuntë ja oypyë, tuntë ja mëyajtën; tuk'ënu'kxtë winë mëku'uk ets këtii xyjyëjp'ixtëty ets jatëkok mooywyimpitëtëty. Jëtu'un miits mëj nëjkx myajkumaytyë ets nëjkx m'u'unk'atëtë ja Tios tsajpjotmëpë, jä'ä ko yë'ë oy Tyios'aty ma ja ja'ayëtyën mëti'ipë ka'ap tii tkukajpxën ets ëxëëkpë jyä'äy'ätyën.

Lucas 1:44

Je'eyës yë mkajpxpo'kxën të njamëtoy, ënätyë yë n'u'unkës të njawë y'ëti'itsy mëët ja xoontakën njootjotyës.

Lucas 1:41

Ko ja Isabel tmëtooy ja Maria kyajpxpo'kxyë, tää ojts ja y'u'unk tjawë y'ëti'itsy jyootjoty ets ja Isabel ja Kënu'kxymyëkajtën ojts tyukëtä'äkyë.

Jeremias 2:30

Nëkoopë ntëytyuuntës m'u'unk m'ëna'këty, ka'ap tja'akyujkëtyë mëti'ipës njatsojkën jeexyë tja'akyukëtën. Miitsëty kë'ëm, jëtu'un tä kaajën ojts xyaj'ooktë ja nkäjpxynyajxpës.

Isaías 35:6

Ja tekymya'at këjxmëty nëjkx pyujtë'ëktë ets ja uumtëjk nëkooyë nëjkx yaxnëtë jyojknëtë. Jam të'ëts'itjotm të'ëts naaxjotm jam'ataanp ja nëë, xii yaa muum ja nëë myuuta'any.

Nehemías 9:26

Je'eyëp ko yë'ëjëty ojts mkäjpxykyutëjyë ets ni'ikyë ojts je'eyë mkäjpxykyumëtoownajxënë ets ka'ap n'ëktuunëtë këwentë ja m'ënä'ämën mtëyajtën. Ja mtuunpë ets ja mja'ay mëti'ipë ja m'aaw m'ayuk jyanikäjpxypën je'eyë tyaj'o'k tyajtëkooytyë jä'ä ko ënäty tyukwinmëtowëtë ja nyëë pyokyëty, tääts jëtu'un'äämpy myajjoot'anpëjkë mëjwiin këjää.

2 Reyes 6:31

Ënät ja yajkutujkpë mëk yujk'ënany: Yë Wintsën yë'ëjës mëk xytyiytyunëp pën ëjts ka'apës tyam yë Elisejë yë kyëpajk nyajjënajkë, yë myaank yë Safat.

1 Reyes 22:27

Jëtu'un xy'ënëëmëtëty ko ëjtsës yam ni'ënä'ämëp ets tpëjkta'aktëty pujxn tëkoty ets ka'ap tmo'otëty yë kääky uuky, koonëmës nwinpitëty oy mëk maas tyam nëjkxyën tsiptuunpë.

1 Reyes 22:8

Tä ja yajkutujkpë jampë tyunyën Israel t'ëtsooy ja Josafat: Tä tu'uk mëti'ipë jyëkyejpy njaakyajtë'ëwmëty. Jä'ä txëëwaty Micaías, yë y'u'unk yë Imlá. Je'eyëp ko ëxëëkës tääpë ja'ay n'ixy, jä'ä ko ka'ap ninu'un tii oypyë tnikäjpxy, aakyë'ë ëxëëkpë nyikäjpxyp. E ja Josafat tyaa y'ëtsoowë: Këtii jëtu'un m'ëna'any.

1 Reyes 21:20

Tä ja Ahab t'ëtsooy ja Elías: ¿Tyamës nijawë ko mijts, nmëtsiptëmës jëtu'un të xypyääty? Jëtu'un, tëë yam npaaty, jëtu'un y'ëtsooy ja Elías. Jä'ä ko mijts nitii oy xykyatuny, aakyë'ë mtuumpy ka'apë myëtëyëtyën Wintsën wyintum.

1 Reyes 19:14

Tä y'ëtsooy: Mijts Wintsën mëti'ipë maaytyääyëpën winë, yë'ëjës nmëkja'ap ets mëët yë'ë ko ni'ikyë paatyës yam nikäjpxy, ko yë Israel ja'ayëty tëë tja'atyëkooynyëtë ja käjpxytyu'unën mëti'ipë tyuuntën mëët mijts, tëë tjijtaaynyëtë ja mwintsë'këntyakn ma myajmëjjawën ets tëë tyaj'o'kta'atë ja mtuunpëtëjk. Ëjtsyë atu'uk të njaakwë'ëmyës juuky, e ëjts nän tääjës nyajpatity etsës näjyëtu'un xyaj'ooka'antë.

1 Reyes 19:10

Tä ja Elías y'ëtsooy: Mijts Wintsën mëti'ipë maaytyääyëpën winë, yë'ëjës nmëkja'ap ets yë'ë ko ni'ikyë, paatyës yam nikäjpxy ko yë Israel ja'ayëty tëë tja'atyëkooynyëtë ja käjpxytyu'unën mëti'ipë tyuuntën mëët mijts, tëë tjijta'atë ja mwintsë'këntyakn ma myajmëjjawën ets tëë tyaj'o'kta'atë ja mtuunpëtëjk. Ëjtsyë atu'uk të njaakwë'ëmyës juuky, ets nän tääjës nyajpaajëtity etsës näjyëtu'un xyaj'ooka'antë.

1 Reyes 19:2

Ënät ja Jezabel ënätyë tkejxy tu'uk ja kukäjpxy ma ja Elías jam yajpaatyën ets t'ënëëmëty: Pën mijts mxëëwajtyp Elías ëjts jä'äs nxëëwajtyp Jezabel. Ëjts mëj këjääjës yë wintsëntëjk xytyukpoky'atëty ko mijts ka'ap jëpom ya'atpë horë näjyëtu'un mjatëty mkëpätëty tä yë Baal yë myëtuunpëtëjk të xytyunyën.

1 Reyes 18:4

paaty ko ojts ja Jezabel may tyaj'ooky ja ja'ayëty mëti'ipë ja Wintsën myëtuuntëpën, yë Abdías, may ojts tyajtso'oky yë Wintsën mëtuunpëty, wëxtyikxy majkjaty tpëjktäky ets tyu'ty, yë'ë tyim yajkaay.

Salmos 58:11

Ënät ja käjpxy y'ëna'ana'any: Nik oy'ajtp ko oy winë ntu'unmëty. Jä'ä ko tää tu'uk yë Tios mëti'ipë winë nyipaye'epyën.

Malaquías 4:1

Yë Wintsën mëti'ipë maaytyääyëpën winë, jëtu'un y'ënä'äny: Jëtu'un yë xëëw po'o wyinkony tä tu'uk jëënjutën mëti'ipë no'kpën tsääpyën, ma nyitoya'antën jëtu'un tä aay pu'uxmën mëti'ipë nämyëja'awëtëpën ets ëxëëkja'aytyëjkëty. Jä'ä xëëw wa'ats nëjkx tyooytyëkoytyë ets nitii kyawë'ëma'any.