Levitico 9:3 - Biblia Mixe de Quetzaltepec

³ Tääts ja Israel ja'ayëty xy'ënëëmëty ets t'ëxta'atëty tu'uk yë tsajppax yä'äy mëti'ipë tyukwintsë'ëkëtëpën ja Tios mëëtkyëjxm ja poky ets tu'uk yë tsajpkaa ayääkë ets tu'uk yë kupixyny ayääkë mëti'ipë yë jyëmëjtëtyën tu'uk ets oyjyäty mëkjatyëty, yë'ëts yë Tios yajtukwino'ok yajtukwinxamëp.

Levitico 9:3 ပူးပေါင်းရင်းမြစ်များ

Esdras 6:17

Ma ja wintsë'kën tyajktën: jä'ä ja tsajpkaa u'unk tyaj'o'ktë nimëko'px; nimäjtsk mëko'px ja tsajppax ets taxk mëko'px ja kupixyny; ëpëky wiinkpë tsajppax nimajkmäjtsk, mëti'ipë ja Israel ja'ayëty nätyukunajxëtën, ja nimajkmäjtskpë y'aptëjk'atën, ma ja nëë poky të tuuntëkoytyën.

Apocalipsis 5:9

Ets ja jempyë ëy t'ëwtë: Mijts mpaat'ajtëp ets xy'ëxajëty yë noky apëtity mëti'ipë wëxtujkpëky nitsaaypyetyën, ets xyaj'ëwa'atsëty, jä'ä ko mijts të mwintsë'kën'aty, të xykyupety ja ja'ay ja pyoky ets ja Tios jyä'äy'atëtëty, ja ja'ay mëti'ipë tso'ontëpën ma ja it naaxwiinyëtën ets mëti'ipë kyajpxtëpën kanaakpëky ja aaw ayuk.

1 Pedro 2:24

Kristë ojts ja npoky'ajtëm tmënëjkx ma ja nyi'kx kyopkën jam kruutskëjxm ets jëtu'un nyäjxy ijxtëm jeexyë ja poky të nku'o'këmën ets ënät njuuky'ajtmëty mëtëy. Yë Kristë ojts tsyëtyuty wyintëkoy ets miits mtsoktë.

Tito 2:14

Ojts xykyu'o'këmë, tëë xyaj'ëwaatsë pëtsë'ëmëmë ma ja ëxëëkpën, nän tëë xyajwatsëmë ets të xykyajpn niwa'anëmë, mëët ko ja oypyë tsujpë ntu'unëmë.

Romanos 8:3

Tëë ja Tios tuny mëti'ipë ja ënä'ämën ka'ap myääyën tunëty, jä'ä ko ënäty ja myëk'ajtën kyujënäkyëty ets ko ja ja'ay ëmaay paki'ix yajpaatë. Paaty ja Tios ja y'u'unk të tkexy ets yaj'ijxy ijxtëm ja pokyjyä'äyën ets wyintsë'kën'atëty, tkunaxëty ja ja'ay ja pyoky, jëtu'un tyajkutëkoy ja poky ma ëëtsajtëmën.

Levitico 4:23

E ko tja'amyätsëty ko tëëtëm pyokytyuny, yë'ë yakëp tä ayajk ako'onën tu'uk yë tsajppax mëti'ipë oy mëkën ets kä'pxyën.

1 Pedro 3:18

Jä'ä ko ja Kristë ojts xykyu'o'k xykyutëko'oyëmë tu'k'okyë ko npokyjyä'äy'ajtëmë. Yë'ë ka'ap ijty tii poky tmëëtëty; yë'ë pokyjyä'äy ojts tku'ëyowë ets myajnëjkxa'anëtë ma Tiosën. Oy ojts ja Kristë y'ëk'ooky ko nyäpyëjktakë naaxwiinyëtë ja'ayën; ojts jyuukpyiky mëët ja juukyajtën ka'apë kyëxë'ëkyën.

2 Corintios 5:21

Kristë nitii poky ojts tkatuny, je'eyë ko ëëtskyëjxm ja Tios pyëjktakë ijxtëm jeexyë ja poky tmëët'atyën, jëtu'unts ja Tios xyaj'ëwaatsëpëtsë'emëty mëët ja Kristë.

Isaías 53:10

Ja Wintsën ojts mëk yaj'ëyoyë mëët ja pëjkën ijxën. E yë'ëkyëjxm ko nyäkyë'ëyajkë tä tu'uk wintsë'kënën, winë xëëw winë jëmëjt jyuuky'ata'any ets y'ixäämpy ja y'u'unk y'ok, mëët yë'ëkyëjxm nëjkx oy wyimpëtsëmy jyëjpëtsëmy mëti'ipë ja Wintsën të tuknipëjktaakën.

Esdras 10:19

ojts y'ëna'antë ko y'ëxmatsantëp ja tyo'oxytyëjkëty mëti'ipë ka'ap ja Wintsën t'ëwtatën ets ko ënäty tu'uk ja tsajppax ëna'k nyätyukniyajktu'uta'anëtë ko të pyok tyuntë.

Levitico 23:12

Näy jä'ä xëëw ma ënäty ja tsajpmok yajkë'ëyäkyën tu'k'atsumy, jä'ä nëjkx yajyäky tu'uk ja kupixyny, näjyëtu'un mëti'ipë tu'ukën yë jyëmëjt oypyë mëkpë, mëti'ipë yajnino'okëpën ets ja Tios jä'ä yajtukwintsë'ëkëty.

Levitico 16:15

E ko jëtu'un t'ëktuunta'ajëty, ënät ja tsajppax ok tyaj'ookëty, mëti'ipë ja naax kajpn jyä'ä'ajtypyën, mëët ma ja poky këtyey tuuntëkoy tkajpxtëkoytyën. Ënät ja nye'pny jap tmënëjkxëty jap wit'atëëytyuk jëxkë'p, jap ma kaaxë yajpaatyën ets tuknixijkxëty ja kaaxë akë'ë ets ja jyëjp, jëtu'un tä ënäty të tunyën mëët ja tsajpkaa ne'pny,

Levitico 16:5

Mäjtsk tmënëjkxëty ja tsajppax yä'äy, mëti'ipë ja Israel ja'ayëty tyuknikëpäjtu'utëpën ma ja nëë poky të tuntën ets tu'uk yë kupixyny yä'äy mëti'ipë nyino'okëpën.

Levitico 14:10

Kom tëtujk xëëw mäjtsk tyakëty yë tsajppax ets tëtujk tsim yë tsajpmokway, mëti'ipë nëjkx yaj'oytyunyën mëët yë on ets jëtu'un yë Tios yajmo'ojëty, tä tu'uk yë ayajk ako'onën ets tu'k a'ukën ja on.

Levitico 12:6

Ko ënäty të kyä'pxy ja xëëw po'o mapaat nyäyajwa'atsëtëtyën, pën yë'ë të tyajmëxu'unk'aty yë ye'etyëjk, ëkë pën to'oxytyëjk, yë'ë myënëjkxëp jam ma wit tëjkën tu'uk yë kupixyny tëëpë jyëmëjtën ets tmo'ojëty yë Tios no'oky xämy ets tu'uk yë pak ets tu'uk yë muuxy mëti'ipë tyukwintsë'ëkëpën ja Tios mëët pyokykyëjxm. Tëkokyë ya'atë yë'ë tyukë'ëtëjkëtya'ajëp yë teety,

Éxodo 12:5

Ja jëyujk mëti'ipë nëjkx xyaj'ooktën, yë'ë mëti'ipë ënäty ja jyëmëjt tu'uk të t'apetyën, yä'äypyë ets oypyë mëkpë; oy yë'ë'atëty yë kupixyny ëkë tsajppax.

Génesis 37:31

Ënät ojts twijtsë'ëktë ja José ja wyit ets tukkooytyääytyë yë tsajppax ne'pyny, mëti'ipë ënäty të tyaj'ooktën;

Levitico 9:2

Ets t'ënëmaay ja Aarón: Yaj'ook tu'uk yë tsajpkaayä'äy ayääkë ets xytyukwintsë'ëkëty yë Wintsën mëti'ipë ja nëë poky kyunaxëpën ets tu'uk yë kupixyny yä'äy mëti'ipë yajnino'okëpën ets jam xymyënëjkxëty ma ja Tiosën.

Levitico 9:4

Näyjyëtu'un t'ëxta'atëty tu'uk yë tsajpkaayä'äy ets tu'uk yë kupixyny yä'äy mëti'ipë yë Wintsën yajmo'ojëpën, mëëtkyëjxm ko ënäty ja näy'ëëw'oyë näykyajpx'oyë y'ity mëët yë'ë. Myëmintëp yë y'ääypyajk y'ujts pajk me'eypyë mëët yë on xyëpiny'atëty, jä'ä ko tyam nänyikëxë'ëkanëp yë Tios ma miitsëtyën.

Levitico 10:16

Ënät ja Moisés ojts tyajtëy pën maa ënäty yajpaaty ja tsajppax, mëti'ipë yakantëpën mëëtkyëjxm ja poky ets ojts yaj'ëtsoy ko tëë nanino'knëtë, ënät ojts tukjoot'anpëky ja Eleazar ets ja Itamar, ja nimäjtskpë të jyaakwë'ëmtën ja Aarón ja myaank ets t'ënëmaay:

Levitico 4:3

Pën yë'ë pokytyuunp yë teety wyintsën ets jëtu'un'äämpy ja naax kajpn tyaj'ëxëëktëkë, yë'ë yakëp tu'uk yë tsajpkaa u'unk, mëti'ipë oyën mëkën ets kä'pxyën jam ma Tiosën ets yë'ë ja nyëë pyoky tukunaxëty.