Levitico 9:23 - Biblia Mixe de Quetzaltepec

²³ Ënät ja Moisés mëët ja Aarón jap tyëjkëy ma ja wit tëjkën ma ja näpyaatë y'ityën. E ko ojts pyëtsëmtë, tääts ojts tkënu'kxtë ja Israel ja'ayëty, täänëm ja Tios nyänyikëxë'kë mëët yë mëj'ajtën ma ja naax kajpnën.

Levitico 9:23 ပူးပေါင်းရင်းမြစ်များ

2 Crónicas 7:1

Ko ja Salomón kyajpxtaktaay, ënät jam tsajpjotm tsyo'ony mëj jëën ets tukkëtäky ja jëyujk'ooky mëti'ipë ënäty jam të yajpëjktä'äkyën ma ja wintsë'kën yajyäkyën ja nino'okpyë, tä ja Wintsën ja tyëjk tyuktujky mëët ja myëj'ajt y'oyajtën,

Éxodo 16:10

Ma ënäty jam jëtu'un ja Aarón myëtyä'äkyën mëët yë Israel ja'ayëty, ënät jam nyajts'ijxëtyääytyë të'ëts'itum ets ojts ja Wintsën t'ijxëtë ja myëj'ajt y'oyajtën yootsjotm.

Éxodo 39:43

Ko ja Moisés t'ijxy, ko ja ja'ayëty mëj këjää të tyuntë, ënät ojts ni'ëmukë tkënu'kxta'ay.

Levitico 9:4

Näyjyëtu'un t'ëxta'atëty tu'uk yë tsajpkaayä'äy ets tu'uk yë kupixyny yä'äy mëti'ipë yë Wintsën yajmo'ojëpën, mëëtkyëjxm ko ënäty ja näy'ëëw'oyë näykyajpx'oyë y'ity mëët yë'ë. Myëmintëp yë y'ääypyajk y'ujts pajk me'eypyë mëët yë on xyëpiny'atëty, jä'ä ko tyam nänyikëxë'ëkanëp yë Tios ma miitsëtyën.

Levitico 9:6

Ënät ja Moisés y'ënäny: ya'atë jëtu'un yë Tios të tni'ënä'ämë, tuntë jëtu'un ets Tios nyänyikëxë'ëkëtëty ma miitsëtyën mëët tu'uk yë mëj'ajtën.

Números 14:10

Ko jëtu'un y'ënantë, ja yi'inëm ja ja'ay kyakuka'tsëtë. Ënät ja Tios ja myëj'ajt y'oyajtën ojts nyänyikëxë'ëkyë, ma ja tsajptëjkkopkën, mëti'ipë wit tëjkën ets ja Israel ja'ayëty ojts t'ixtë.

Números 16:19

Ja Coré tëë ënäty tyajtu'ukmujkta'ay ja ja'ay jam ma ja wit tëjkën ma ja näpyaatë y'ityën mëët yë Tios. Ënät ja Tios ojts ja myëj'ajt y'oyajtën jam nyänyikëxë'ëkyë ma ja mayjyä'äy yajpaatën.

Números 16:42

Yajxon yë Moisés ets Aarón tjantynyapikëtë. E yë'ëjëty jam ojts nyëjkxtë ma ja wit tëjkën ma ja näpyaatë y'ityën mëët ja Tios. Ënät ojts ja yoots jam kyëtä'äky wit tëjknëkëjxm ets ja Tios ja myëj'ajt y'oyajtën nyänyikëxë'kë.