Levitico 8:21 - Biblia Mixe de Quetzaltepec

²¹ E ja jyot ets ja pyuuy yajxon ojts wa'ats tpujë mëët yë nëë ets jam tnino'ktaay ma ja wintsë'këntyaknën. Jëtu'un ja Tios tukwintsë'këy ja jok oypyë xyuuky jyokyën, tä ënäty ja Tios të tni'ënä'ämën.

Levitico 8:21 ပူးပေါင်းရင်းမြစ်များ

Efesios 5:2

Nätsyokëtë nixim niyam ijxtëm ja Kristë të xytsyojkëmën ets të nyäkyë'ëyäkyë ma të wyintsë'kën'atëtyën ëëts'ajtëmkyëjxm, jëtu'un tä ja wintsë'kënën mëti'ipë oy xu'kp jojkpën Tios wintum.

Éxodo 29:18

Tääts ënät ya'atë kupixyny y'ooky xynyino'okëty ma wintsë'këntyaknën, mëti'ipë yë Wintsën mtukmëjjawëpën, yë'ë ya'atë wintsë'kën nino'oky nixämpyë oypyë xyuuky jyokyën.

Levitico 2:9

Tääts ja teety wäänë jam tkëxpëkëty ja mookway ma ja wintsë'këntyaknën ets tyajnitoyëty, jä'ä wa'anëp tä ja potsyën ma ja wintsë'kën yajyäkyën, mëti'ipë ja ja'amyäjtsën mëët yajtunyën ets ja xu'kën jojkën janty'oy jam jya'tëty ma Tiosën.

Levitico 1:17

Tääts tsujkwa'kxëty këëkujkm ja muuxy ëkë ja kuuk, jäätsow tmatsëty ma kyäknën. Ka'ap timyajjënakëty ja kyäkn, tä tnino'okëty ma wintsë'këntyaknënën, jam ma ja ja'axy tyoyën ets jëtu'un ja Tios yajtukwintsë'ëkëty, tä tu'uk yë wintsë'kënën oypyë xyuuky jyokyën.

Génesis 8:21

Ko jyä'äjty ja xu'kën janty'oy jam Tios wyintum, ënät y'ënäny yë Wintsën: Nijëna'ajës yë naaxwiinyëtë jëtu'un nka'ëkpojknëty mëët ko ënäty yë naaxwiinyëtë ja'ay pyokymyëët'atë. Jä'ä ko yë naaxwiinyëtë ja'ay mutsknëm jëtu'un tmëtso'ontaakëtë tuuntëko'oy kajpxtëko'oyën. Yë jëyujkëty nän ka'apës nëjkx n'ëkyajkutëkooynyë, ijxtëm tyam të jyäty të kyëpetyën.

Éxodo 12:9

Nitu'kpoty xykyatsu'utstëty tsuxk ëkë nëëkë'ëw. Tu'kë'ëyë jëyujk tsu'utsy jëtu'unyë jëtu'un xytsyääytya'atëty mëët yë kyë'ë tyeky ets mëët yë kyëpajkëty tyiintsyëty.

Éxodo 40:16

Moisés ojts tuunta'ay winë tä ënäty ja Tios të tyuk'ëne'emyën.

Levitico 1:9

Pën ja jëyujk'ooky ënäty nino'oky yäjkpyën, yajxon tpujëty ja tyiinty ets ja y'ixpajk. Ja teety yë'ë nëjkx tnino'kta'ay ma ja wintsë'këntyaknën ets ja Tios yajtukwintsë'ëkëty tä tu'uk yë wintsë'kën oypyë xyuukyën.

Levitico 1:13

Ja teety mëti'ipë yäjkpyën ja wintsë'kën, jëyëjp tpujëty ja jëyujk tiinty ets ja jëyujk puuy ets tnino'okëty jam ma ja wintsë'këntyaknën mëti'ipë ja Tios tyukwintsë'ëkëpën, tä tu'uk yë ayajk ako'onën mëti'ipë oy xu'kp jojkpën.

Levitico 8:9

Tääts ojts tpëjktä'äky ja kyupit ma kyëpajkën ets wyimpoktuuy ojts tpëjktä'äky ja tsya'a mëti'ipë aak pu'ts pujxn mëët y'oytyunyëtyën, mëti'ipë kënu'kxëpën ko tyeety'äty, jëtu'un ojts tuny tä ënäty ja Tios të tyuk'ëne'emyën.

Levitico 8:13

Ojts näjyëtu'un tmëjwoy ja Aarón ja y'u'unk y'ëna'k ets ojts wyinkontë. Tä tukxojxtaay ja tänë xuypyë ja wit ets ojts ja wyëën tpëjktakë ets ja kyupit, jëtu'un tä ënäty ja Tios të tni'ënä'ämën.