Levitico 7:2 - Biblia Mixe de Quetzaltepec

² Ja jëyujk mëti'ipë ja nëë poky yajtukniyajkëpën, jam y'ookëty ma jam y'ooktën yë tsajpkaa mëti'ipë nitooytyëpën ets ja nyine'pny jam yajxijkxjëtitëty ma wintsë'këntyakn yë pya'ajën ets ma nyini'kxën.

Levitico 7:2 ပူးပေါင်းရင်းမြစ်များ

Isaías 52:15

jëtu'un nëjkx may ja naax kajpn mëj'äämpy pyëjktä'äkyë ets nëjkx mëj'ixy t'ixtë; Ja yajkutujkpëtëjk ka'ap nëjkx wyinma'anypyaatë wi'ix tnimëtya'aktëtyën jä'ä ko nëjkxëp tja'akyukëtë ets twinmëtowtë mëti'ipë ënäty ka'ap nijëna'a të tmëtowtën.

Ezequiel 36:25

Mëët yë wa'ats nëë mpuja'an njä'ätsä'äntë ets nyajwatsta'aja'anyës ja ëxëëkajtën ets ntuknipëjktuta'aja'antë mëti'ipë të xypyaye'eyë'ëktën ko të xypyanëjkxtëkëtë wiink wintsën;

Ezequiel 40:39

Ma ja tëjkwiinën mëti'ipë yajpatpën ma tëjkëtyaknën taxk ja kaaypyäjn jam kyiiynyë, mäjtskjaty pa'apa'a, jamts ja jëyujk tyajkëx'ooktë mëti'ipë wintsë'kën'ataanpën ets mëti'ipë ja poky kyunaxäämpyën.

Levitico 1:11

ets xyo'kumtëty anëkëjxytsyow ma ja wintsë'këntyaknën, jam Wintsën wyintum. Yë Aarón yë y'u'unk y'ëna'këty mëti'ipë teety'ajtëpën yë'ë myënëjkxtëp ja ne'pny ets txijkxjëtitëty ma ja wintsë'këntyakn ja pya'ajën.

Levitico 1:3

Pën yë'ë tsajpkaa yakäämpy tä tu'uk yë wintsë'kënën, yë'ë yakëp yë oypyë mëkpë ets mëti'ipë kä'pxyën, jam tyaj'ookëty ma yajnitëkën yë wit tëjk ma näpyaatë y'ityën ets jam ja wintsë'kën tyakëty ets Wintsën tkupëkëty.

Levitico 1:5

Jam Tios wintum jam ja tsajpkaa tyo'kumëty, ënät ja Aarón ja y'u'unk y'ëna'k mëti'ipë teety'ajtëpën tyaktëty ja tsajpkaa ne'pny ma Tiosën ets ënät ok txijkxjëtitëty ma ja wintsë'këntyakn ja pya'ajën, mëti'ipë jamën ma ja wit tëjk yajnitëkën, mëti'ipë Tios tyëjk'ajtypyën.

Levitico 14:13

Jam mëpaat tyaj'ooky yë kupixyny ayääkë ma tu'uk yë itën wa'atspë, ma jam y'ooktën yë jëyujkëty mëti'ipë wintsë'kën'ajtëpën, ma ja poky yajtuknikëpäjtu'utyën ets mëti'ipë yajnino'kpën. E ja wintsë'kën mëti'ipë yajyajkpën, ko ënäty tii tëkatsy të yajtuny, yë'ë yë teety jyä'ä'atëp, näjyëtu'un ja wintsë'kën mëti'ipë yajyajkpën, ko ënäty ja poky yajmëëtëty. Jä'ä ko tääpë wintsë'kën wa'ats yë oy.

Levitico 3:2

Pën ja ayajk ako'onën yäjkpyën jam ja kyë'ë tkëxkonëty ma ja tsajpkaa ja kyëpajkën mëti'ipë ënäty ja Tios tyukwintsë'këpën ets jam tyo'kumëty ma ja wit tëjk yajnitëkën, ma ja Tios jap kyëtä'äkyën; ënät ja teetytyëjkëty jam txijkxjëtitëty ja tsajpkaa ne'pny ma ja wintsë'këntyakn ja pya'ajën.

Levitico 3:8

Jam ja kyë'ë tkëxkonëty ma ja kupixyny ja kyëpajkën ets ënät ok tyo'kumëty jam wintum ma ja wit tëjkën ma Tios kyëtä'äkyën, tääts ja teetytyëjkëty txijkxjëtitëty ja ne'pny ma ja wintsë'këntyakn ja pya'ajën.

Levitico 4:24

Tääts jam ja kyë'ë tpëjkta'akëty ma ja tsajppax ja kyëpajkën ets ënät tyaj'ookëty, jam ma ja Tios tukwintsë'ëkëjänyën, ma ja nyi''itjot jam yajpaatyën. Ya'atë wintsë'kën yë'ë ja nëë poky kyunaxäämpy.

Levitico 4:29

Tääts jam ja kyë'ë tkëxkonëty ma ja tsajppax ja kyëpajkën, mëti'ipë ënäty ja pyoky tyukunajxypyën ets jam tyaj'ookëty ma y'ooktën ja jëyujkëty mëti'ipë yajnino'ktëpën.

Levitico 4:33

Tääts nëjkx ja kyë'ë jam tkëxkony ma ja tsajppax ja kyëpajkën ets tyaj'ookëty, jam ma y'ooktën ja jëyujk mëti'ipë nitooytyëpën.

Levitico 5:16

Ya'atë ja'ay kopkpëky ko jatëkok tkë'ëyakëty mëti'ipë ënäty të tonyën ets ëpëky tjaaknikëjuuypyätëty, tu'kpëky ma ja mëkoxkpën. Yë teety yë'ë nëjkx tmo'oy. Ja teety ënät nëjkx ja pokymyä'kxën tpaaty mëët ko ënäty të tyäky ja kupixyny ayääkë mëti'ipë wintsë'kën'ajtpën, mëti'ipë ja ja'ay jä'ä jyä'ä'atëpën, mëti'ipë ënäty të pyokytyunyën.

Levitico 5:7

Pën kajts ja ja'ay nëkooyë ja wit meeny tmëëtëty, mëti'ipë tyukjuyëpën ja tsajppax ëkë kupixyny. Jyëkyäpëp yë'ë tyakëty Wintsën wintum mäjtsk yë muuxy ëkë yë kuuk mëti'ipë kyunaxëpën ja pyoky. Tu'uk mëti'ipë wintsë'kën'atëpën mëëtkyëjxm ja poky ets tu'uk mëti'ipë yajnino'okëpën.

Levitico 5:9

Ets ënät ja jëyujk ne'pny mëti'ipë nëë poky kyunajxypyën xyijkxjëtitëty ma ja wintsë'këntyakn ja pya'ajën. E ja ne'pyny mëti'ipë ënäty natëjkëpën jam tjaakxijkxjëtitëty ma ja wintsë'këntyakn ja tyënaaypyäjnën. Yë'ë jëtu'un mëti'ipë ja poky kyunajxypyën.

Levitico 6:25

Tukmëmëtya'ak yë Aarón yë y'u'unk y'ëna'k ya'atë ënä'ämën; ko ënäty tyaktë ja wintsë'kën, mëët ko të pyokytyuntë, ja jëyujk tsajpkaa yo'kkumy tyaj'ooktëty Tios wintum, jam ma y'ooktën ja jëyujkëty mëti'ipë yajnino'ktëpën. Yë wintsë'kën wa'ats kënu'kxy yë'ë.

Levitico 6:7

Ja teety nëjkxëp ja pokymyä'kxën tpaaty Wintsën wintum, mëti'ipë ja ja'ay jyä'ä'atëpën, tëëpë tyuuntëkoyën, mëti'ipë mëjëyëjp të yajnikäjpxyën; jëtu'un'äämpy ja nëë poky nëjkx yajme'kxy.

Números 6:12

Jëtu'un tyajtso'onta'akëty ja xyëëw jyëmëjt, ma ja Tios tmëtunëtyën. Ja mëjëyëjpë ka'ap kyëwentëtëkëty jä'ä ko ja kyuwaay tëë ënäty y'ëxëëkë. Myënëjkxëp tu'uk yë kupixyny mëti'ipë jyëmëjtën tu'uk ets Tios tukwintsë'ëkëty, mëët ko ënäty të pyokytyëkë.

Hebreos 11:28

Mëët ko myëpëjky ja Moisés tyuun ja ëmaayxyëëw ko t'ënëmaay ja Israel ja'ayëty ets ja ne'pyny nëjkx tuknikoytyë ja tyëjk aaw ets ja yajja'ay'o'kpë mëti'ipë Tios kyäjxën ka'ap tyaj'ooktëty ja kä'äxkopk mëti'ipë Israel ja'ayëtyën.

Hebreos 12:24

tëë ja Jesús xymyëwinkontë, mëët ko ja Tios të tuny ja jempyë käjpxytyu'unën ja Jesús mëti'ipë nye'pyny y'ëxmajtsën ko ojts tyäxy jyä'äy ets wäänë oy nimëtyä'äky këtiinëm ja Abel ja nye'pyny.

1 Pedro 1:2

mëti'ipëjaty ja Tios Teety ojts wyinwitsëtën tëëyëp ijxtëm yë'ë të tuknipëjktaakën. Ja Tios ja myëk'ajtën miits të mwinma'anymyo'ojëtë ets xymyëmëtowtëty ja Jesukristë ets wa'ats mwë'ëmtëty mëët ja nye'pyny. Wä'än ja Tios ni'ik mmo'ojëtë ja kënu'kxën ets ja jotkujk'ajtën.