Levitico 4:34 - Biblia Mixe de Quetzaltepec34 Tääts ja teety nëjkx ja ne'pny wäänë tpaxajë'ëky, ja nyine'pny ja jëyujk mëti'ipë ënäty ja poky të tku'ookën ets tukuutsëty ja wintsë'këntyakn ja nyiwaj ma ja jëyujk yajnino'oktën, e ja ne'pny mëti'ipë natëjkëpën jam txijkxjëtitëty ma ja wintsë'këntyakn ja tyekyën. အခန်းကိုကြည့်ပါ။ |
Ënät nëjkx näjyëtu'un tukuutsy wäänë ja ne'pny ja wintsë'këntyakn ja nyiwajën, ma jam ja poom tyoyën, mëti'ipë jam ijtpën Tios wintum ma ja wit tëjkën ma näpyaatë y'ityën. E ja ne'pny mëti'ipë ënäty natëjkëpën jam nëjkx txijkxjëtity ma ja potsyën, ma wintsë'kën yajyäkyën, ma ja jëyujk nyitoytyën mëti'ipë jam ijtpën ma ja wit tëjkën; ma ja näpyaatë y'ityën mëët ja Tios.
Tëë ja Tios tuny mëti'ipë ja ënä'ämën ka'ap myääyën tunëty, jä'ä ko ënäty ja myëk'ajtën kyujënäkyëty ets ko ja ja'ay ëmaay paki'ix yajpaatë. Paaty ja Tios ja y'u'unk të tkexy ets yaj'ijxy ijxtëm ja pokyjyä'äyën ets wyintsë'kën'atëty, tkunaxëty ja ja'ay ja pyoky, jëtu'un tyajkutëkoy ja poky ma ëëtsajtëmën.
¿wi'ix jëtää tkapaatëty ja tëytyu'unën mëti'ipë ja Tios U'unk kyamëjpëjktäkpyën, mëti'ipë jëtu'un tyuuntëpën ijxtëm jeexyë t'atään tuktääntën; mëti'ipë pyäjxtëpën ja Jesús ko të y'ooky ets ka'ap t'oyjya'awëtë ja Kënu'kxymyëkajtën, mëti'ipë tsojkëtëpën? Tääpë ne'pny yë'ë myë'ijtyp ja käjpxytyu'unën ets yë'ë mëët të yajkënu'kxtë.
Jä'ä ko ja Kristë ojts xykyu'o'k xykyutëko'oyëmë tu'k'okyë ko npokyjyä'äy'ajtëmë. Yë'ë ka'ap ijty tii poky tmëëtëty; yë'ë pokyjyä'äy ojts tku'ëyowë ets myajnëjkxa'anëtë ma Tiosën. Oy ojts ja Kristë y'ëk'ooky ko nyäpyëjktakë naaxwiinyëtë ja'ayën; ojts jyuukpyiky mëët ja juukyajtën ka'apë kyëxë'ëkyën.