Levitico 3:11 - Biblia Mixe de Quetzaltepec

¹¹ Ënät ja teety jam tu'ukyë tnino'kta'ajëty ma ja wintsë'këntyaknën, mëti'ipë ja Tios yajmoopyën tä tu'uk yë jë'kxy pëky oypyë xyuuky jyokyën.

Levitico 3:11 ပူးပေါင်းရင်းမြစ်များ

Levitico 21:17

Ënëëmë yë Aarón, ko tyam ets tyu'uye'eyëty jëtu'un yë xëëw jëmëjt, ni pën mëpaat jap kyatëkë ma ja Tios ja jyëën tyëjkën ets tpëjkta'akëty ja tsajpkääky, pën ka'ap y'oyëty myëkëty ets pën ka'ap ja kyë'ë tyeky y'oyëty ets ja jyot nyini'kx.

Levitico 21:6

Ni'ik jëtu'un mëpaat wa'ats yajpaatë ma Tyiosëtyën, këtii ja xyëëw t'ëxëëktijëtëty. Jä'ä ko yë'ë jëtu'unëty yajktëp yë ayajk ako'onën mëti'ipë yajno'kpën ets ja tsajpkääky mëti'ipë yajmoopyën ja Tyiosëty. Paaty jä'ä jëtu'un mëpaat nyäyaj'itëtë wa'ats.

Levitico 21:8

Jä'ä jëtu'un mëpaat xymyëët'aty wa'ats. Jä'ä ko yë'ë jëtu'unëty xëmë kyë'ëyajktëp ja tsajpkääky ma Tiosën mëti'ipë mTios'ajtypyën. Paaty wa'ats jëtu'un mëpaat y'itë, jä'ä koos mëti'ipë Wintsën'ajtpën, wa'atsës yë'ë, etsës jä'äs yë'ëjëty mpëjkta'aktë wa'ats.

Levitico 3:16

Ja teety yë'ë nëjkx tnino'oky tëkokyë ya'atë ma wintsë'këntyaknën, tu'uk ja jë'kxy pëky mëti'ipë ja Tios yajtukwinno'kp yajtukwinxaanpën oypyë xyuukyën, tu'kë'ëyë ja on Tios jyä'ä'ajta'ajëp.

Levitico 3:5

Yë'ë nëjkx yë teetytyëjkëty tyajnitoytyë ya'atë ma wintsë'këntyaknën, tu'ukyë mëët ja tsajpkaa mëti'ipë jam nitoyaanpën ma ja ja'axy jam tyoyën, jëtu'un ja Tios yajtukwintsë'ëkëty ya'atë ayajk ako'onën oypyë tsujpë xyuuky jyokyën.

Malaquías 1:7

Miitsëty yë'ë mëmiintëp maas yë nwintsë'këntyaknën ja kääky uuky mëti'ipë ka'ap wya'atsëtyën ets ni'ikyë xyajtëwtë: ¿Maatën myajmëtëkoy? Miitsëty jam xymyëtëkoytyës ma mmaytyën mtajtën ko jyëkyejpy ka'ap yajmëj ixëty yë nwintsë'këntyaknës

Ezequiel 44:7

Miitsëty je'eyës yë ntsajptëjk xyaj'ëxëëkëtë ko jap xyajnaxtë jaaypyaat jaaypyo'kxy, ja ja'ay mëti'ipë ka'ap tmëët'atyën ja nkäjpxytyu'unënës ma jyot wyinma'anyën ets ma jyot nyini'kxën.

Números 28:2

Ko këtii tja'atyëkoytyëty ets tmëmintëty xëmë yë y'ayajk y'ako'onënëty, tä yë tsajpkääkyën. Ko xëëw tpaatëty jää tyaktëty yë y'ayajk y'ako'onën nino'okpyë, mëti'ipë ja'tëpën ëjts nwintuuyës tä yë xu'kën jojkën janty oypyë.

Levitico 22:25

Näy ka'ap xykyupëktëty jëtu'unpë jëyujk, mëti'ipë yë jaaypyaat jaaypyo'kxy yäjkpyën ets yë'ë Tios yajmooypyëty, Tios ka'ap jëtu'unpë tkupëky. Jä'ä ko tääpë jëyujk ka'ap yë kya'pxëty ets ka'ap y'oyëty myëkëty.

Apocalipsis 3:20

Ixtë, ëjts yamp tëjk pijkxp; pën xyyo'kmëtoopës ets tyaj'ëwa'atsy ja tëjk'aaw, tëkäjaanpës jap ma tyëjkën ets mëët n'a'ux'ata'anyës.

1 Corintios 10:21

Ka'ap tjëkyepy miits xytyuk'uukëtëty ja Wintsën ja y'a'ukën ets näjyëtu'un xytyuk'uukëtë ja ku'oypyë ja jyä'ä. Ets ka'ap tjëkyepy näjyëtu'un jam myajpaatëty ma ja Wintsën ja kyääypyäjnën ets myajpaatëty näjyëtu'un ma ja ku'oypyë ja kyääypyäjnën.

Romanos 8:32

Jä'ä ko ka'ap ja Tios të tukwintuk'ooky ja kyë'ëm U'unk, tëë ni'ëmukë xykyu'o'këmë, ¿Wi'ix ko ënät xykyamo'omyëty mëët yë'ë tu'kë'ëyë winë?

Malaquías 1:12

E miitsëty, ni'ikyës xyajjoot'anpëktë, maaytyëp mtajtëp jëtää, koos jyëkyejpy ixtijy nwë'ëmëtyës ets jyëkyejpy jä'ä nyajmo'ojëtyës ja kääky jë'kxy ka'apë pën t'ëk tsojknën.

Salmos 22:14

Jëtu'unës ëjts tä nëë nyajtstämën. Tëës yë nwaay mpajk jyäjxma'ta'ay. Jëtu'unës yë njuukyjot tä pu'unykyën tëë jap jyiiytyakta'ay njootjotyës.

Números 28:24

Jëtu'un nëjkx xytyuntë ko tii xëëw tpaatëty ma ëka'any tsyo'ontä'äkyën ja mëtu'kxëëwpë, ma ënäty wëxtujk xëëw jëtu'un ja xëëw y'ita'anyën. Ya'atë ayajk ako'onën yë'ë nëjkx jam jyä'ty Wintsën wintum, tä tu'uk yë xu'kën jojkën janty oypyë. Ya'atë ayajk ako'onën nëjkxëp näjyëtu'un mëët yajyäky ja nyi'tsatym nyëë, ëpëky ja wintsë'kën xëmëpë winjëpom yajyäkyën.