Levitico 26:22 - Biblia Mixe de Quetzaltepec

²² Nkäxëpës yë jëyujkëty ma miitsëtyën, mëti'ipë nëjkx myajwë'ëmëtën u'unktuk. Nëjkxëp tyaj'o'kta'ay ja mjëyujk mtsajpkaajëty ets niwäänë nëjkx mjaakwë'ëmtë, ni pën nëjkx kya'ëknajx kya'ëktëjkënë në'ëjoty tu'ujoty.

Levitico 26:22 ပူးပေါင်းရင်းမြစ်များ

Ezequiel 14:15

E koos nkäxëty yë jëyujk ëwa'anëtypë jam kajpntum ets tyaj'o'kta'atëty yë ja'ay mëti'ipë jam tsënaaytyëpën ets tyaj'awinpitëty ja naax kajpn kutsë'ëkë ets ka'ap jam pën y'ëknaxanëty mëët ko ënäty jam ja jëyujk.

Deuteronomio 32:24

Yë jëënpa'am ets yuu yë'ë nëjkx yaj'o'kta'ajëtë, ma yë'ëjëtyën jam'atëp yë pa'am ëyo'on, jëënpa'am ets jëyujk mëti'ipë yajja'ay'ookëpën, tä yë tsa'anyën, kaa jëyujkën ets jëyujk ëwa'anëtypë.

Jueces 5:6

Ma jyuuky'äjtyën yë Samgar, yë myaank yë Anat, ma jyuuky'äjtyën yë Jael, ma ka'ap ja ja'ayëty ënäty y'ëknajx y'ëktëjkënëtën në'ëjoty tu'ujoty, ets ko ojts jam nyajxnëtë tyëjkënëtë ma ja ëxëëkpë ja në'ë'aaw tu'u'aawën;

Zacarías 7:14

Paatyës nyaj'aye'eywya'kxtaaytyë, tä jeexyë pyojwa'kxtën mëët yë pojxujtyk, xiitsow yaatsow ma ja naax kajpnëtyën mëti'ipë ënäty ka'ap t'ixy'atën ets ja nyaax kyajpnëty aanë'ëk tëëtsë'ëk y'awinpijty, ni pën jam kyatsëënëjany. Janty oy ënäty tääpë kajpn të yajpaaty e yë'ëjëty mon tuk tyaj'awinpijtë.

Lamentaciones 1:4

Mon tuk yaj'ixy yë Sión tu'u. Ka'ap pën y'ëkmiinë xëëw'ijxpë. Aanë'ëk tëëtsë'ëk yajpaaty ja tëjkëtyakn, jëëytyëp yaxtëp ja teetytyëjkëty, ëjtëp tu'ktëp ja ëna'ktëjkëty ets ja Jerusalén kajpn yajpaaty mon tuk.

Isaías 33:8

Aanë'ëk tëëtsë'ëk ja në'ë tu'u yajpaaty, nimaa pën kyanaxy kyatëkë. Ja aaw ayuk mëti'ipë ja naax kajpn tëë tjakäjpxy'ätyën ets ka'ap ja tsip tyunëtëty, ni pën tkayajtuny ets ni pën tkawinkutsë'ëkë.

2 Reyes 17:25

E jä'ä ko ya'atë ja'ayëty ka'ap ijty Wintsën t'ëwtatë, paatykyëjxm ojts yë Wintsën tyuknikäxëtë kaa ets jëyujk ëwa'anëtypë ets ojts kanaak yajtsu'utstë.

Levitico 26:6

Jotkujk nëjkx nyaj'itë ma mnaax mkajpnëtyën ets ko ma'atëty mpo'kxtëty nitii ets ni pën mka'ëtsë'ëkëtëty, tä yë mmëtsip më'atsu'uxën ets jëyujk ëwa'anëtypë nyajjëwa'kta'ajäämpyës yë'ë.

Miqueas 3:12

E paatykyëjxm, mëët ko miitsëty ka'ap tii oy xytyuntë, yë Jerusalén kajpn, mëti'ipë yajtijpën Sión kopk, jëtu'un jyata'any tä ja'ay yë kyam tnëëtu'utajta'ayën ets xit ko'ow jyata'any ets ja Sión kopk nëjkx wyinyo'onëtyä'äy, ujtsjoty nëjkx y'awinpity.

Ezequiel 33:28

Aanë'ëk tëëtsë'ëk ets axit ako'owë yë naax kajpn nyajwë'ëma'anyës, mpëjkëjäämpyës ja naax kajpn ja myëk'ajtën mëti'ipë nätyukyajmëjnajxëpën. Ja Israel ja tyun kyopk nëjkxëp tyëëtsë'kta'ay; ka'ap nëjkx jam pën y'ëknajxnë.

Ezequiel 14:21

Ëjts Wintsën, jëtu'unës n'ëna'any: Ni'ik o'ktëy nëjkx yë Jerusalén kajpn jyäty kyëpety koos ntuknikäxëty ja majktaxkpë ëyo'on: Tsip, yuu, jëyujk ets pa'am ets y'ooktëty ja ye'etyëjk to'oxytyëjk ets jëyujkpaat.

Ezequiel 5:17

Jëtu'un, nyajminäämpyës yë yuu, pa'am o'kën, jëyujk ëwa'anëtypë mëti'ipë nëjkx tsyu'utsëtën ja m'u'unk m'ëna'këty; ets may nëjkx m'ooktë tsipjotm. Ëjts, mëti'ipë Wintsën'ajtpën, ëjts ënaanp.

Jeremias 15:3

Ëjts, mëti'ipë Wintsën'ajtpën, ëjts jëtu'un ënaanp: Taxkpëkyës nkäxa'any yë ëyo'on jotmay: tam mëti'ipë tsipjotm ookaanpën, tam mëti'ipë uk nëjkx tsyu'utyën, tam mëti'ipë lut majkwejkxy nëjkx yë jyot nyini'kx yajkëjxëty ets tam mëti'ipë nëjkx kaa jëyujk myätsyën.

Isaías 24:6

Poky yë naaxwiinyëtë të y'ity, paaty o'ktëy të jyäty, Ja ja'ay mëti'ipë jam kukajpnajtëpën yë'ë ëyoowtëp paaty të nyiwäänëtë, ka'ap ja ja'ay y'ëknimay'ajnëtë.

2 Crónicas 15:5

Jä'ä xëëw jä'ä jëmëjt ka'ap ënäty maa ja akujk'ajt jotkujk'ajtën; je'eyë ja tsë'ëkë jawë yajmëëtëty xiitsow yaatsow mëët ja wiinkëtypë ja kajpn.

2 Reyes 2:24

Ja Elisejë ko tni''ijxwinpijty, yajxon t'ijxwatstaay, ets tpojky mëët yë Wintsën yë xyëëw. Tam ënäty jëtu'un yajpaatë ko nyipëtsëëmëtë jam yukjotm nimäjtsk mëj osë ets tsyuts'taayëtë, niwëxtyikxy mäjtsk y'o'ktë.

Jeremias 42:2

ets tnimiintë ja Jeremías käjpxynyajxpë ets t'ënëmaaytyë: Mëyajtën ëëts n'amëtowantëp ma mijtsën, niwaantso'ow nipëjktso'owëtëkës ma mWintsën Tiosën, këtii m'ëna'anëty ko ka'ap, maas niwäänë të nwë'ëmtën. Nimay ijty ëëtsëty tëëyëp, tyam niwäänë njaakyajpaatës, jëtu'un tä xy'ixyën.