Levitico 20:3 - Biblia Mixe de Quetzaltepec

³ Ëjts ntëytyunäämpyës ets nyaj'ookäämpyës tääpë ja'ay, mëët ko ënäty të t'ëxëëktuny ja n'ijtaknës ets ko ënäty ja nxëëwës ja wa'atspë të tjaamteeny të tnaaxteeny. Ko ja y'u'unk të tkë'ëyajkpë ma ja wiink tiosën mëti'ipë xyëëwajtypyën Moloc.

Levitico 20:3 ပူးပေါင်းရင်းမြစ်များ

Levitico 18:21

Këtii nijëna'a yë m'u'unk xykyë'ëyakëty ma ja wiink tiosën, mëti'ipë xyëëwajtypyën Moloc, këtii yë mTios jëtu'un'äämpy xyajjotma'atëty. Ëjts jëtu'un Wintsën.

Ezequiel 5:11

Ëjts mëti'ipë Wintsën'ajtpën, ëjts ënaanp ets nkë'ëmjuukyajtënës yam ntukajpxpejtyp: Jä'ä ko miitsëty tëë yë ntsajptëjkës xyaj'ëxëëkëtë mëët yë awinax ka'apë ëxëëkpë ets aakjä'ä të xytyuunëtë, mëti'ipë yaj'ëxëëk'ijxpën, näjyëtu'un miitsëty nyajkutëkoyantëp yam ka'ap mpa'ëyowa'antë.

Levitico 17:10

Ëjts ëxëëkës n'ixa'any ko tu'uk yë Israel ja'ay ëkë jaaypyo'kxyjyä'äy, mëti'ipë tsënääpyën ma miitsëtyën, tjë'kxëty yë ne'pny, wä'än twi'ixtsowëty. Yë'ë kopkpëkyës ko nyaj'ookëty ma ja nyaax kyajpnën.

2 Corintios 6:16

Ka'ap tjëkyepy tu'ukyë yajpaatëty yë Tios yë jyëën tyëjk mëët yë awinax. Jä'ä ko jëtu'un ja Juukpyë Tios xyajwa'anëmë tsyënaaytyaknën. Jëtu'un ijxtëm ja Tios y'ënä'änyën: Tsëënëjaanpës ets juuky'ataanpës ma yë'ëjëtyën, yë'ëjës xyWyintsën'attëp, ets yë'ëjës nja'ay'attëp.

Ezequiel 20:39

Mijts Israel kajpn, mëtoow'it wi'ix yë Wintsën y'ënä'änyën: Nëjkx ëwtatë yë m'awinaxëty. Je'eyëp ko ok nëjkx xymyëmëtowtës ets ka'ap jatëkok xy'ëk'ëxëëk tuunëtëty ja nkënu'kxy xyëëwës ma ja wiink tios xymyo'otën ja wintsë'kën ets xy'ëwtatë.

Números 19:20

Pën ja ja'ay mëti'ipë ëxëëkën ka'ap nyäpyujy nyäjye'etsyë, nëjkxëp yajjo'otsy ma ja kyajpnën. Jä'ä ko ja Wintsën ja tyëjk yaj'ëxëëktëjkëyëp. Mëëtkyëjxm ko ja kënu'kxynyëë ka'ap të yajtuknixijkxy, paaty yë'ë ëxëëk yajpaaty.

Levitico 15:31

Jëtu'un'äämpy jëtu'un ja ëxëëkajtën jëkäm yajpaatëty ma Israel ja'ayëtyën, këtiipë y'ooktëty, mëët ko ënäty tyaj'ëxëëkëtë ja it naaxwiinyëtë maas ëjts n'ityën.

1 Pedro 3:12

Jä'ä ko yë Wintsën yë'ë kyëwent'ajtyp mëti'ipë oy juuky'ajtëpën ets y'amëtoow'ijtyp ko nyu'kxta'aktë; e yë ëxëëk ja'ay ëxëëk t'ixy.

Levitico 20:4

Pën ja ja'ayëty mëti'ipë kukajpnajtëpën ka'ap tuntë këwentë ja jëtu'unpë ja poky ets ka'ap tyaj'ooktë ja ja'ay,

Números 19:13

Pën tyoompy yë o'kpë ets ka'ap ja wa'atsajtën tpaaty Tios wintum, yë Tios yë wyittëjk yaj'ëxëëktëjkëp, e paaty nëjkxëp yajjo'otsy ja xyëëw ma ja Israel kajpnën, jä'ä ko ka'ap ja kënu'kxynyëë të yajtuknixijkxy.

Éxodo 30:33

Pën muum kë'ëmwinma'any yajkojpy yë on jëtu'unpë tä tyaapë y'ixëtyën, ëkë muum oypyënëty tukuja'axnëtëty; pën ënäty jëtu'un ëtëtspën, kopkpëky ko nëjkx yajjo'otsy ma ja myëkunaax myëkukajpnën.

Levitico 7:20

Pën tu'uk yë ja'ay mëti'ipë ëxëëkën tsyu'tsyp ja tsu'utsy mëti'ipë ënäty ja Tios të yajtukwintsë'ëkën mëët ko ja näy'ëëw'oyë näykyajpx'oyë y'ity, kopkpëky ko y'ookëty tyëkoyëty ma ja nyaax kyajpnën.

Levitico 7:21

Pën tu'uk yë ja'ay tyoompy mëti'ipë ëxëëkën, wä'än yë'ëjëty mëti'ipë yë ja'ay nyajtsye'ey nyasnajxëpën, ëkë wä'än yë'ëjëty mëti'ipë yë jëyujk nyajtsye'ey nyasnajxëpën, ëkë oytyiijëty mëti'ipë ëxëëkën ets ënät näjyëtu'un tsu'tspëty ja tsu'utsy, mëti'ipë të wyintsë'kën'atyën ma ja näy'ëëw'oyë näykyajpx'oyë y'ityën ets ja Tios jä'ä të yajmo'oy, jëtu'umpë ja ja'ay nëjkxëp ja yajjo'otsy ma ja nyaax kyajpnën.

Levitico 19:12

Këtii nëkoo tii xytyukwinwanëty mëët yë nxëëwkyëjxmës, jä'ä ko m'ëxëëktijpy jëtu'un ënäty yë Tios yë xyëëw mëti'ipë m'ëwtajtypyën. Ëjts jëtu'un mëj Wintsën.

Levitico 21:6

Ni'ik jëtu'un mëpaat wa'ats yajpaatë ma Tyiosëtyën, këtii ja xyëëw t'ëxëëktijëtëty. Jä'ä ko yë'ë jëtu'unëty yajktëp yë ayajk ako'onën mëti'ipë yajno'kpën ets ja tsajpkääky mëti'ipë yajmoopyën ja Tyiosëty. Paaty jä'ä jëtu'un mëpaat nyäyaj'itëtë wa'ats.