Levitico 2:10 - Biblia Mixe de Quetzaltepec

¹⁰ E ko nyatëkëty, mëti'ipë ënäty ja Tios të yajtukmëyoxyën, ja ayajk ako'onën ja kënu'kxypyë, mëti'ipë të tyoy të jyemyën, yë'ë ja Aarón jyä'ä'atëp ets ja y'u'unk y'ok.

Levitico 2:10 ပူးပေါင်းရင်းမြစ်များ

Levitico 2:3

Ja ayajk ako'onën mëti'ipë natëjkëpën, ja natëkë mëti'ipë kënu'kxyëtyën mëti'ipë yë Wintsën yajtukmëjja'apën, yë'ë ja Aarón jyä'ä'atëp ets ja y'u'unk y'ëna'k.

Levitico 6:16

Mëti'ipë ënäty ja ayajk ako'onën natëjkëpën, yë'ë Aarón jyä'ä'atëp mëët ja y'u'unk y'ëna'k ets tsajpkääky yë'ë mëti'ipë ka'ap tsyooymyëëtëtyën, jam tjë'kxtëty tpëktëty ma wya'atsëtyën ma ja tyëja'awën ja wit tëjk ma näpyaatë y'ityën.

Esdras 2:63

Ojts näjyëtu'un ja yajkutujkpë kë'ëm y'ënä'äny ko ka'ap tyaapë ja'ay nëkoo tkaytyëty t'uuktëty ja jë'kxy pëky mëti'ipë kënu'kxy ijtpën, koonëm tëy ja teety t'ëk ijxpëtsëmëty mëët ja Urim ets Tumim täänëm yajnijawëty pën mëpaat'ajtp tii tjë'kxtë.

Levitico 5:13

Ets jëtu'un ja teety tpaatëty ja pokymyä'kxën, mëët ja ja'ay mëti'ipë ënäty të pyokytyunyën ets jëtu'un'äämpy nëjkx ja poky yajme'kxy. E pën yë'ëts ayajkën'ajtp ako'onën'ajtp ja aaypyajk ujtspajk, ko nyatëkëty ja teety ja jyä'ä'atëp.

Levitico 6:9

Tukmëtow ja Aarón ets y'u'unk y'ëna'k tii mëpaat tuntën ko ja jëyujk tno'oka'antëty, ja jëyujk mëti'ipë të wyintsë'kën'atyën tu'ktsu'um mëpaat jam tsyuunaxy ma ja jëënpajkën ets jam nyitoyëty.

Levitico 6:23

Tëkokyë ja ayajk ako'onën mëti'ipë yë teetytyëjkëty yajktëpën, yajnino'kta'ajëp, jëtu'un ni pën mëpaat tkajë'kxy.

Levitico 7:7

Ja nyiwintsë'kën ko pën tyuuntëkoy, näjyëtu'un tä ja nyiwintsë'kënën ko pën pyokytyuny ets ja nyitëyajtën tu'knax. Ja jëyujk mëti'ipë ënäty të wyintsë'kën'atyën, yë'ë ja teety jyä'ä'atëp mëti'ipë ënäty të tyunyën ma ja wintsë'kën yajyäkyën ko ja pokymyä'kxën yaj'amëtoy.

Levitico 10:12

Ënät yë Moisés t'ënëmaay yë Aarón mëët ja myaank nimäjtsk mëti'ipë xyëëwajtëpën Eleazar ets Itamar: Mijts jë'kxtë yë aaypyajk ujtspajk, mëti'ipë të nyatëkën ma ayajk ako'onën yë Israel ja'ayëty tmo'otën yë Wintsën, mëti'ipë ka'ap tsyooymyëëtëtyën jam xyjyë'kxtëty ma wintsë'këntyaknën jä'ä ko wa'ats yë'ë yajpatnë.

Levitico 14:13

Jam mëpaat tyaj'ooky yë kupixyny ayääkë ma tu'uk yë itën wa'atspë, ma jam y'ooktën yë jëyujkëty mëti'ipë wintsë'kën'ajtëpën, ma ja poky yajtuknikëpäjtu'utyën ets mëti'ipë yajnino'kpën. E ja wintsë'kën mëti'ipë yajyajkpën, ko ënäty tii tëkatsy të yajtuny, yë'ë yë teety jyä'ä'atëp, näjyëtu'un ja wintsë'kën mëti'ipë yajyajkpën, ko ënäty ja poky yajmëëtëty. Jä'ä ko tääpë wintsë'kën wa'ats yë oy.

Levitico 21:22

Pën kyayäämpy jyëkyäpëp yë tkayëty, oy yë'ëjëty mëti'ipë kënu'kxyën ets mëti'ipë wa'atsën.

Números 18:9

Tëkokyë yë wintsë'kën, mëti'ipë yë Israel ja'ayëty yajktëpën nino'oky, tä yë aaypyajk ujts pajkën, mijts mjä'ä'ajta'atëp ets näjyëtu'un yë wintsë'kën, mëti'ipë yë ja'ayëty nyëë pyoky tyukunajxtëpën ko tii tuuntëkoytyë, tëkokyë ya'atë ayajk ako'onën mëti'ipë tëë yajkënu'kxyën, aak miits nëjkx xyjyä'ä'atë mëët yë m'u'unk m'ëna'k.

1 Samuel 2:28

E ma tëkokyë yë Israel ja'ayëtyën, mijts ojts nwin'ixtë etsës xymyëtuntëty ets mteety'atëty. Xyaktëty ja wintsë'kën ets xynyino'oktëty jam ma ja wintsë'këntyaknën, xyajtoytyëty ja poom ets xëmë xymyëët'atëty ja mwitëty mëti'ipë mëteety'atëpën ëjts nwintuuyës. Ojts näjyëtu'un nmo'oyës yë m'ap m'okëty ja jë'kxy pëky tä ja tsyu'utyën mëti'ipë myëmiintëpën ja Israel ja'ayëty ets yë'ë tsu'utstëty tjë'kxtëty.

2 Crónicas 31:14

Ja mëti'ipë yajtuknipëjkën ets tkëwent'atëty ja tsajptëjk'aaw matsow ja xëëw pyëtsimyën, yë'ë Coré, mëti'ipë ojts näjyëtu'un yajtuknipëkyën tkëwent'atëty ja mëti'ipë ja ja'ay nyayajktëpën jëtu'unyë ets tpëjkwa'kxëty mëti'ipë ja'ay näjyëtu'un myëmiintëpën ets nyätyukuyakëtë ets näjyëtu'un tkëwent'atëty mëti'ipë ja ja'ayëty jä'ä ja Wintsën tyukwintsë'këtyëpën.

Ezequiel 44:29

Jyëkyejpy tjë'kxtëty tpëktëty yë aaypyajk ujtspajk mëti'ipë yë Israel ja'ayëty ëjts xytyukwintsë'këtyëpën ets jyëkyejpy tsu'utstëty yë tsu'utsy mëti'ipë yë Israel ja'ayëty näjyëtu'un yajktëpën ko ja jëyujk tukunaxtë ja nyëë pyokyëty. Näyjyëtu'un tëkokyë mëti'ipë yë Israel ja'ayëty ëjts të xytyukmëyoxtën yë'ë jyä'ä'atëp.

Ezequiel 46:20

etsës të xy'ënëëmë: Yaa yë teetytyëjkëty tyajkë'ëwtëty yë tsu'utsy mëti'ipë wintsë'kën'ajtpën ko të yajpaaty yë pokymyä'kxën ets yaa näjyëtu'un tyajkë'ëwtëty yë aaypyajk ujtspajk. Jëtu'un ka'ap jap tii tmëpëtsëmtëty tëja'p ets jëtu'un ka'ap yë naax kajpn tii tonëty mëti'ipë kënu'kxyën.