Levitico 19:26 - Biblia Mixe de Quetzaltepec

²⁶ Këtii nitii xytsyu'utsëty mëti'ipë ne'pnymyëëtën. Këtii xytyuunk'atëty yë nasja'awën, ëkë ma ja'ay tii t'akäjpxyën tii tunan jatanëp.

Levitico 19:26 ပူးပေါင်းရင်းမြစ်များ

2 Reyes 17:17

Ojts ja y'u'unk y'ëna'k tyajnitooynyëtë, tyajknëtë ets wyintsë'kën'atëty, ojts tjajtnëtë wi'ix winë tnajtsjawëtëtyën ets ojts tnija'awënyëtë wi'ix ja kë'ë tyajmëtya'aktëtyën, tuunëtë tkajpxnëtë ja ëxëëkpë, mëti'ipë ja Wintsën ojts tukyajjoot'anpëktën.

2 Crónicas 33:6

Tä tyaj'o'ky ja y'u'unk y'ëna'k ets nino'ky nixämy mëti'ipë tyukwintsë'këyën ja Ben-hinom; ojts tyajmëjnajxnë ja näpyatoy näpyanaxë, ja najtsja'awën, ja toonkajpk ets ja kaxpojkën. Tim tëkatsy ojts winë tuunë, aakjä'ä mëti'ipë ja Wintsën y'ëxëëk'ijxypyën.

2 Reyes 21:6

Ojts ja y'u'unk y'ëna'k tyajtooy tyajjäämnë, ma tukwintsë'këyën ja ka'apë tyiosëtyën, yajtuun ja najtsja'apë, yajkutujk ets ja ja'ay tuunk'atëty ja kajpxpojkën, paatoy panajxk. Tim tëkatsy ojts winë tuny, je'eyë ja Wintsën tyajjoot'anpëjk.

Deuteronomio 12:23

Yë'ë tëy yë nye'pyny këtii xyjyë'kxëtëty, jä'ä ko yë'ë juukyajtën'ajtp. Paatykyëjxm ka'ap mëpaat yë ne'pyny mëti'ipë juukyajtën'ajtpën xy'ajë'kxmuktë mëët yë nyitsu'utsy.

Levitico 7:26

Oy tyimmaatsowëty ma ënäty mijts myajpaatën, këtii yë nye'pny xyjyë'kxëtëty yë joon ets jëyujk.

Levitico 3:17

Ya'atë ënä'ämën xëmëkyëjxm y'itëty ets u'unk ok yajpaatëty, oy jëtu'un maa mtimjyuuky'atëty, ka'ap mëpaat ja jëyujk on xyjyë'kxtë ets ni nye'pny mëpaat xykyajë'kxtë.

Jeremias 10:2

Jëtu'un yë Wintsën y'ënä'äny: Këtii jëtu'un tii xytyunëty tä wiinkëtypë naax kajpnën.

Malaquías 3:5

Yë Wintsën mëti'ipë maaytyääyëpën winë jëtu'un y'ënä'äny: Minaanpës ets miitsëty nipaye'eya'antë. Näyjyëtu'un kë'ëm n'ixa'any nmëtowa'anyës wi'ix ënäty yajtuntën ja mëti'ipë najtsja'awëtëpën, mëti'ipë ka'ap twintsë'ëkën ja nyiye'etyëjk ëkë ja tyo'oxytyëjk; mëti'ipë nanëkoo ëëwpäjn kajpxpäjn wyäämpyën yë Tios yë xyëëw; mëti'ipë ka'ap tsow tmëjuyën yë tyuunpë, je'eyë mëk tyajtuny; mëti'ipë o'ktëy tyuunpyën ja ku'ookytyo'oxy ets ja ku'ooky u'unk; mëti'ipë yaj'ëyoopyën ja jaaypyaat jaaypyo'kxy ets mëti'ipë ka'ap wyinkutsë'ëkën.

Daniel 2:10

Ka'ap maa pën naaxwiinyëtë naaxkëjxy yajpaaty. Jëtu'un y'ëtsoowtë ja wijyjyä'äytyëjk, mëti'ipë nyikajpxëpën mëti'ipë Wintsën tsyojkpyën. Näyjyëtu'un ka'ap maa yajkutujkpë mëti'ipë jëtu'un ënaanp ets y'amëtoopyën tii tä mijts të xy'amëtoyën yë wiyjyä'äytyëjkëty, najtsja'apëtëjkëty ets ixpëkytyëjkëty.

1 Samuel 15:23

Mëti'ipë ka'ap tkäjpxymyëtoyën yë Wintsën, näjyëtu'un yë pyokytyuny tä najtsja'apën, ets tä yë mëti'ipë yë wiink tios y'ëwtajtypyën, mëti'ipë käjpxykyutëjpën. E komë mijts tëë xy'ijxtijë ja y'aaw y'ayuk, näjyëtu'unts ënät tyam m'ixtijyë ma m'ëne'emyën.

Éxodo 8:7

E yë'ë ënät ja xëëwmääpyëtëjkëty näjyëtu'un ojts tuntë, ojts tyajmintë näjyëtu'un ja maynyooty jap Egiptë, jëtu'un tä ënäty yë'ëjëty tnijawëtën winë tuntëty.

Éxodo 7:11

E yë mëj'ënä'ämpë ojts tnikäxë ja wyijyjyä'äytyëjk ets ja xyëëwmääpyëtëjk, yë'ëjëty jëtu'un tä ënäty winë tuntën, näjyëtu'un ojts y'ëtëtstëpë.

Hechos 15:20

Nikë oy ko ja noky nkäjxmëty ets ntuk'ëwa'anëmëty ko yi'iyë ka'ap ja jëyujk tsu'utstëty mëti'ipë ëxëëkën, mëti'ipë ja tsaamëxan të yajtukwintsë'ëkën; ets näjyëtu'un ka'ap tkupëktëty ja pëjkën ukën ka'apë myëtëyëtyën, ets ko ka'ap tsu'utstëty ja jëyujk najts'ookëpë, ëkë ja yo'kpenypë, ëkë ja mëti'ipë kë'ëm o'kpën ets ja ne'pnymyëëtpë.

Génesis 9:4

Yë'ë tëy ka'ap xyjyë'kxtëty yë ne'pny, tsu'utsy mëti'ipë ne'pnytyuk'ookën këtii yë xyjyë'kxtëty. Jä'ä ko yë ne'pny, yë'ë juukyajtën'ajtp.

Génesis 44:5

¿Mëti'ipës yë nwintsën tyuk'ukëpën ets mëti'ipë winë mëët tuknasjawën? Miitsëty ëxëëk winma'any jëtu'un mpatëp.

Levitico 19:25

E kommëkoxk jëmëjt jyëkyejpy xyjyë'kxnëtëty ja m'aaytyëëm m'ujts tëëmëty. Jëtu'un'äämpy ja mjë'kxykyepyëty mëj këjää tyëëmpätëty. Ëjts jëtu'un Wintsën, mëti'ipë miits mTiosajtëpën.

Deuteronomio 12:16

Yë tëy yë nye'pny këtii xyjyë'kxëtëty, mnitajtëp naaxkëjxy.

Deuteronomio 15:23

Yë'ë tëy yë nye'pny këtii yë xyjyë'kxëty, je'eyë xynyaaxnitajëty ëkë xy'ixtämëty tä nëëjën.

1 Samuel 14:32

paatykyëjxm ojts ka'ap t'ëkmëmëtaknëtë ja yuu ets tniwa'këtyë amëjaawtony ja mëti'ipë ënäty ja myëtsip të tukyajni'o'ktu'utën, ojts tyaj'ooktë ja tsajpkaa kupixyny ets jëtu'unyë tsu'tstë tsuxk mëët ja nyine'pny

1 Samuel 14:33

E kajts ojts tyëkoy'äty ja ja'ay mëti'ipë ojts tnikäjpxyën ma ja Saulën. Tam ja ja'ay pyokytyuntë jä'ä ko tam ja tsu'utsy tsu'tsnëtë mëët ja nyine'pny. Paaty yë Saúl y'ënäny: Miitsëty ninu'un ja oypyë xykyatsoktë. Paaty, yajmëjkëpiptë yaa tu'uk yë mëjtsaa.