Levitico 19:12 - Biblia Mixe de Quetzaltepec

¹² Këtii nëkoo tii xytyukwinwanëty mëët yë nxëëwkyëjxmës, jä'ä ko m'ëxëëktijpy jëtu'un ënäty yë Tios yë xyëëw mëti'ipë m'ëwtajtypyën. Ëjts jëtu'un mëj Wintsën.

Levitico 19:12 ပူးပေါင်းရင်းမြစ်များ

Salmos 15:4

mëti'ipë y'ëxëëk'ijxypyën ja mëti'ipë patëp yaj'ëxëëk'ixëtyën. Ets y'oyjya'ap mëti'ipë yajmëjnajxypën yë Wintsën, mëti'ipë tyuunpyën tëëpë twinwanën oy ëxëëk tmëjatëty;

Éxodo 20:7

Ka'ap yë mWintsën Tios yë xyëëw ëëwpäjn kajpxpäjn je'eyë xywya'anëty, jä'ä ko yë'ë ka'ap jëtu'unyë tnayajninaxa'any mëti'ipë ënäty nëkoo ja xyëëw tyuk'ëyë'këpën.

Isaías 48:1

Mëtoow'it ya'atë aaw ayuk, miitsëty jënu'un yë Jacob t'u'unk'aty t'ok'atyën, mëti'ipë xyëëwajtëpën Israel, Judá y'u'unk y'ok. Mëti'ipë tii winë nyikajpxtëpën mëët yë Wintsën xyëëwkyëjxm, mëti'ipë y'ëwtajtëpën yë Tios, mëti'ipë yë Israel ja'ay Tyios'ajtëpën, wiinkë'ëy akë'ëy.

Jeremias 34:16

E ok të mwinmaaytyëkatstë ets të xytyukxi'iktë ja nxëëwës, tëë xy'atsip'atë jatëkok ja ja'ayëty mëti'ipë ënäty të xynyajtsmatsëtën ets jatëkok xy'atsip'atë ets mëtunëtëty.

Jeremias 4:2

jäänëm tëy, jyëkyäpëp xykyajpxpaatëty yë nxëëwës ko ënäty tii xynyikäjpxy mëët yë tëyajtën, mëët ja oypyë ja paye'eyën ets oypyë tu'unën kajpxën. Nëjkxëp ja ja'ay tukxoonta'aktë ja nxëëwës ma ja naax kajpnën.

Jeremias 5:2

Tää ja'ay mëti'ipë tii nyikäjpxypën yë'ë tyukkajpxpejtyp yë Tios yë jyuukyajtën, je'eyëp ko antaktëp.

Jeremias 7:9

Mmä'tstëp, myajja'ay'o'ktëp, mmëët'ajtëp wiink ye'etyëjk wiink to'oxytyëjk, ka'ap tii mëtëy xynyikajpxtë; mwintsë'këtyëp ja Baal ets wiink tios m'ëwtajtëp mëti'ipë ka'ap xy'ixy'atën,

Levitico 18:21

Këtii nijëna'a yë m'u'unk xykyë'ëyakëty ma ja wiink tiosën, mëti'ipë xyëëwajtypyën Moloc, këtii yë mTios jëtu'un'äämpy xyajjotma'atëty. Ëjts jëtu'un Wintsën.

Levitico 20:3

Ëjts ntëytyunäämpyës ets nyaj'ookäämpyës tääpë ja'ay, mëët ko ënäty të t'ëxëëktuny ja n'ijtaknës ets ko ënäty ja nxëëwës ja wa'atspë të tjaamteeny të tnaaxteeny. Ko ja y'u'unk të tkë'ëyajkpë ma ja wiink tiosën mëti'ipë xyëëwajtypyën Moloc.

Levitico 6:3

Ko y'ënta'akëty, ko ka'ap të tpaaty mëti'ipë ënäty ja wiink ja'ay të tyajtëkoyën ets Tios tukajpxpätëty, y'ëna'anëty ko ka'ap tnijawë mëti'ipë jyanija'apën, yë jëtu'unpë ja'ay,

Zacarías 5:3

Ënät xy'ënëmaayës: Yë'ë mäjtsk it miimp kuja'ay yë pojkën. Tu'kpa'a tnikäjpxy ko ka'ap jëtu'unyë nyinaxa'any nyëë pyoky mëti'ipë nëkoo je'eyë Tios tyukajpxpejtypyën ets tu'kpa'a tnikäjpxy ko yajtëytyuna'any mëti'ipë toonp mä'tspën.

Zacarías 5:4

Yë Wintsën mëti'ipë maaytyääyëpën winë jëtu'un y'ënä'äny: Jamës ya'atë pojkën nyajkëta'aka'any mëti'ipë miinpën kuja'ay ma ja'ayën mëti'ipë toonp mä'tspën ets mëti'ipë nëkoo je'eyë wyäämpyën yë nxëëwës ëëwpäjn kajpxpäjn. Ets ya'atë pojkën ënätnëm jyëwa'aka'any ko ënäty tëë kyëjxta'ay mya'ta'ay ja tëjkwitsë ets ja tsaa.

Malaquías 3:5

Yë Wintsën mëti'ipë maaytyääyëpën winë jëtu'un y'ënä'äny: Minaanpës ets miitsëty nipaye'eya'antë. Näyjyëtu'un kë'ëm n'ixa'any nmëtowa'anyës wi'ix ënäty yajtuntën ja mëti'ipë najtsja'awëtëpën, mëti'ipë ka'ap twintsë'ëkën ja nyiye'etyëjk ëkë ja tyo'oxytyëjk; mëti'ipë nanëkoo ëëwpäjn kajpxpäjn wyäämpyën yë Tios yë xyëëw; mëti'ipë ka'ap tsow tmëjuyën yë tyuunpë, je'eyë mëk tyajtuny; mëti'ipë o'ktëy tyuunpyën ja ku'ookytyo'oxy ets ja ku'ooky u'unk; mëti'ipë yaj'ëyoopyën ja jaaypyaat jaaypyo'kxy ets mëti'ipë ka'ap wyinkutsë'ëkën.

Deuteronomio 5:11

Ka'ap namaa natii xyjyawëty yë Wintsën yë xyëëw mëti'ipë mTios'ajtypyën, jä'ä ko yë'ë ka'ap jëtu'unyë tnayajninaxa'any, ko pën nëkoo xyëëw nëxik tukxikëty.

Santiago 5:12

Yë'ë tim kopkpëky mëku'uktëjkëty, ko ka'ap xykyajpxpaatëty ja Tios, tsajp, naaxwiinyëtë ets oy tyimtiijëty. Ko tii xykyajpxtëty, tim'ëna'antë oy, pën tëy ënäty; ets ka'ap pën ka'ap ënäty tyiyëty, këtiipë myajpëjkta'aktëty ëyoowtaknjoty.