Levitico 18:2 - Biblia Mixe de Quetzaltepec

² Jëtu'un xy'ënëëmëty yë Israel ja'ayëty: Jëtu'un y'ënä'äny ja Wintsën: Ëjts jëtu'un Wintsën, mëti'ipë miits mTiosajtëpën.

Levitico 18:2 ပူးပေါင်းရင်းမြစ်များ

Éxodo 6:7

Jëtu'un miitsëty n'ëxajëja'antë, tääjës yë ntimnyaax ntimkyajpnën etsës miits xyTios'atëp ets xynyijawëtëty, ko ëjts Wintsën, mëti'ipë miits mTiosajtëpën, mëti'ipë të myajpëtsëmëtën, ma ënäty miitsëty je'eyë mëtun m'ëyowtën, mëët ja mëkëtypë ja tuunk, mëti'ipë mooyëtëpën ja Egiptë ja'ayëty.

Levitico 11:44

Ëjts jëtu'un mWintsën Tiosëty, miitsëty wa'ats mëpaat mnäyaj'itëtë, jä'ä ko ëjts wa'atsës n'ity. Këtii mnätyukyaj'ëxëëkëtëty nimëti'ipë jëyujk mëti'ipë naaxwin'a'tspën.

Ezequiel 20:5

Jëtu'un xy'ënëëmëty: Jëtu'un yë Wintsën y'ënä'äny: Koos ojts nwin'ixy yë Israel kajpn, ojtsës mëët yë käjpxytyu'unën ntuny yë y'u'unk y'ok ets ojtsës jap Egiptë nnänyikëxë'ëkyë. Mëët tu'uk ja mëj winma'any n'ënëmaaytyës: Ëjts jëtu'un Wintsënajtp, mëti'ipë miits m'ëwtajtëpën.

Levitico 20:7

Ni'ikyë miitsëty mnäyajwa'atsëtëty ets jëtu'un itë wa'ats. Jä'ä ko ëjts Wintsën, mëti'ipë miits mTiosajtëpën.

Ezequiel 20:7

Ets n'ënëmaaytyës ko wä'än t'ëxmajtsta'atë yë tyiosëty mëti'ipës n'ëxëëk'ijxypyën ets ka'ap nëkoo tpanëjkxtëkëtëty yë awinax japë Egiptë yajpaatyën, jä'ä ko ëjts mëti'ipë Wintsën'ajtpën, ëjts yë xyTyios'ajtëp.

Salmos 33:12

Jotkujk yë naax kajpn yajpaaty mëti'ipë yë Tios Wyintsën'ajtypyën, ja naax kajpn mëti'ipë Tios të twin'ixyën ets yë'ë nyätyukjä'ätijyë.

Levitico 19:34

Jëtu'un xyjyawëtëty, tä aak miitsëty mnäjyawëtën. Tsoktë jawëtë jä'ä ko jëtu'un yë'ë jyä'äyëty tä miitsëtyën. Yë'ë ëkmëmay ëkmëtajtë ko miitsëty jaaypyaat jaaypyo'kxy ojts jap m'itë Egiptë. Ëjts jëtu'un Wintsën, mëti'ipë miits mTiosajtëpën.

Levitico 19:10

Këtii janty wa'ats xy'ijxtaaytya'ajëty ja m'aaytyëëm m'ujts tëëm, mëti'ipë ënäty muum të kyä'äyën. Ixmats wä'än yë'ë yë ëyoopëja'aytyëjk tyajmuktë ets jaaypyaat jaaypyo'kxyëty. Ëjts jëtu'un Wintsën mëti'ipë miits mTiosajtëpën.

Levitico 18:4

Yë'ë kuuytyuntë mëti'ipës të nikäjpxyën, patuntë yë n'ënä'ämën ntëyajtënës ets jëtu'un mjuuky'atëty oy tsuj, tä ja ënä'ämën tnikäjpxyën, jä'ä ko ëjts Wintsën, mëti'ipë miits mTiosajtëpën.

Éxodo 20:2

Ëjts jëtu'un Wintsënajtp, mëti'ipë mijts mTios'ajtypyën, mëti'ipë ojts mjuutyën jap Egiptë, ma ënäty mmëtuny m'ëyoyën.

Génesis 17:7

Yë käjpxytyu'unën mëti'ipës ntuunpyën mëët mijts ets mëët yë m'u'unk m'ok. Yë'ë koos jëtu'un mijts xyTios'ataanpës ets tu'kë'ëyë m'u'unk m'ok ets ja y'u'unk y'okëty näjyëtu'un.

Levitico 18:1

Ënät ja Tios ojts tmëkäjpxy ja Moisés ets t'ënëmaay:

Levitico 18:30

Paaty yë'ë jëtu'un patuntë yë n'aaw n'ayukës, këtiipë näjyëtu'un m'ëtëtstëpëty tä tääpë ja'ayëty y'ëtëtstën, mëti'ipë jam tsënaaytyën ma ënäty miitsëty ka'ap mja'tënëm. Këtii yë'ë mnätyukyaj'ëxëëkëtëty. Ëjts jëtu'un Wintsën, mëti'ipë miitsëty mTiosajtëpën.

Levitico 20:23

Këtii jëtu'un winë xytyuuntëpëty, tä ja ja'ayëty winë tuntën, mëti'ipës yam n'ëxwopäänpyën ma ja nyaax kyajpnëtyën mijts mwintuuyëty. Jä'ä ko yë'ëjëty aakyë'ë jëtu'un tyuuntëp, mëti'ipës n'ëtujkpyën, paatykyëjxm ka'ap n'ëkupëjknëtës.