Levitico 14:7 - Biblia Mixe de Quetzaltepec

⁷ Wëxtujk'ok tuknixijkxëty ja ja'ay mëti'ipë ënäty tso'okaanpën ma ja pu'uts pa'am pyikyën y'ixyën ets nikajpxëty, ko wa'ats yajpatnë, ja joon mëti'ipë juukyën nëjkxëp t'ëxmatsy.

Levitico 14:7 ပူးပေါင်းရင်းမြစ်များ

Ezequiel 36:25

Mëët yë wa'ats nëë mpuja'an njä'ätsä'äntë ets nyajwatsta'aja'anyës ja ëxëëkajtën ets ntuknipëjktuta'aja'antë mëti'ipë të xypyaye'eyë'ëktën ko të xypyanëjkxtëkëtë wiink wintsën;

Isaías 52:15

jëtu'un nëjkx may ja naax kajpn mëj'äämpy pyëjktä'äkyë ets nëjkx mëj'ixy t'ixtë; Ja yajkutujkpëtëjk ka'ap nëjkx wyinma'anypyaatë wi'ix tnimëtya'aktëtyën jä'ä ko nëjkxëp tja'akyukëtë ets twinmëtowtë mëti'ipë ënäty ka'ap nijëna'a të tmëtowtën.

2 Reyes 5:14

Ënät ja Naamán ojts jyänty nyijkxy tsiipë ets wëxtujk'ok tsyiiy jam ma ja Jordán mëjnëëjën, jëtu'un tä ënäty të y'ënë'ëmxëtyën ja Wintsën ja myëtuunpë, ënätyë ojts jyänty tsyo'oky, jëtu'un ja nyini'kx y'awinpijty janty u'unk tä tu'uk pi'k ëna'k yë nyini'kxën.

2 Reyes 5:10

E ja Elisejë ojts tu'uk tkexy ja kyukäjpxy ets ja ayuk tyajnaxëty, ma y'ënä'änyën: Nëjkx jam mtsi'iy wëxtujk'ok ma mëjnëëjën mëti'ipë yajtijpën Jordán, jëtu'unts ja mnini'kx wa'ats wyë'ëmëty ets ja pu'uts pa'am jyëwa'akëty ma mjot mnini'kxën.

1 Pedro 1:2

mëti'ipëjaty ja Tios Teety ojts wyinwitsëtën tëëyëp ijxtëm yë'ë të tuknipëjktaakën. Ja Tios ja myëk'ajtën miits të mwinma'anymyo'ojëtë ets xymyëmëtowtëty ja Jesukristë ets wa'ats mwë'ëmtëty mëët ja nye'pyny. Wä'än ja Tios ni'ik mmo'ojëtë ja kënu'kxën ets ja jotkujk'ajtën.

Hebreos 9:19

Ojts ja Moisés ja mayjyä'äy tuk'ëwaanë ja Tios ja y'ënä'ämën; ok ojts tu'uk ja tsapts ukpyë ja kupixyny jëmk tpëjkë'ëky mëët tu'k'ooxy ja ujts apity ets tyajxo'ky ma ja tsajpkaa ne'pynyën ets ma ja tsajppax ne'pynyën xëpinypë mëët ja nëë, ets ojts tuknixijkxy ja noky mëti'ipë myëët'ajtypyën ja ënä'ämën ets ni'ëmukë ja ja'ay näjyëtu'un.

Hebreos 9:13

Ja tsajppax ne'pyny, tsajpkaa ne'pyny ets ja tsajpkaato'oxy ayääkë ja nyijaam mëti'ipë të tyooykyëtä'äkyën ma ja wintsë'këntyaknën, tëët yajtukniwëjtë mëti'ipë pokymyëëtëtyen, jä'ä ko myëët'ajtyp ja kutujkën ets yajwa'atsëty.

1 Juan 5:6

Ko ja Jesús myiiny yaa naaxwiiny, ijxwë'ëmy ojts wyi'imy mëët ja nëë ko ojts nyëëpety ets mëët ja ne'pyny ko ojts kyëruutspety; ka'ap yi'iyëty nëë, näjyëtu'un ja ne'pyny. Kënu'kxymyëk'ajtën ya'atë yajtëytyëjkëp, jä'ä ko yë Kënu'kxymyëk'ajtën mëtëy yë'ë.

Hebreos 12:24

tëë ja Jesús xymyëwinkontë, mëët ko ja Tios të tuny ja jempyë käjpxytyu'unën ja Jesús mëti'ipë nye'pyny y'ëxmajtsën ko ojts tyäxy jyä'äy ets wäänë oy nimëtyä'äky këtiinëm ja Abel ja nye'pyny.

Hebreos 10:22

Tsojk nmëwinko'onëm ja Tios ëmuumtu'ukjot ets tsojk nmëpëjkëmë; wa'ats ja jot winma'any nmëët'ajtmëty ets ja jot nini'kx.

Hebreos 9:26

Ko jeexyë jyëtu'unëty, kanaak'ok jeexyë ja Kristë të y'o'knë maju'unëm tsyo'otä'äkyën ja naaxwiinyëtë. E tyaa ma ja xëëw jëmëjt ntuk'ijt ntuktsëna'ayëmën, tëë tu'k'ok ja Kristë myiny ets xëmëkyëjxm yajpaata'any, ko të nyäxy ijxtëm tu'uk ja wintsë'kënën mëti'ipë ja poky jyëpëkäämpyën.

Hebreos 9:21

Näyjyëtu'un ja Moisés ojts ja ne'pyny tuknixijkxy ja tsajptëjk ets tu'kë'ëyë mëti'ipë yajtuuntëpën ko ja Tios twintsë'ëkëtë.

Juan 19:34

Ënät tu'uk ja tsiptuunpë tkatsymyëku'umëy ja Jesús ets ja kyäty y'ëwatsy ets pyëtsiimy ja ne'pyny ets ja nëë.

Miqueas 7:19

Mëët'at jatëkok ja pa'ëyo'owën najts'ëyo'owën mëët ëëtsëty ets naaxnijääp ëëts ja n'ëxëëktu'un n'ëxëëk kajpxënëty. Jap kupëjknajxta'a këkmejyjoty ëëts ja nkäjpxykyutëjënëty.

Daniel 9:24

Tëkë'px majk sëmaan nyaxa'any ets jyëwa'akëty ja ëyo'on jotmay ets ja nëë poky ma ja mnaax mkajpnën wa'atspë ets ja mnaax mkajpn tpaatëty ja poky nyimä'kxën ets jam nyaxxkëta'akëty ja oypyë ets mëtëypyë ja nipaye'eyën xëmëkyëjxm ets y'atëwëty mëti'ipë të xywyinkuma'ayën ets mëti'ipë të yaj'akäjpxyën jëtu'un'äämpy wya'atsëty jatëkok ja tsajptëkoty mëti'ipë ijty wa'ats ni'ik.

Salmos 51:7

Yajwatskës yë njot nwinma'any mëët yë po'tn ets jëtu'un wa'ats nwë'ëmëtyës, pujkës ets poop nwë'ëmëtyës tä tsajp o'pkyën.

Salmos 51:2

Pujkës jä'tskës ja n'ëxëëk'ajtën. Tukniwijtstutkës ja nnëë npoky.

Levitico 16:22

E ko ja tsajppax tyëkooynyëty jam të'ëts itjotm, yë'ë myënëjkxtaaynyëp ja nyëë pyokyëty ma ka'ap pën tsyëënë jyuuky'ätyën.

Levitico 16:19

ets mëët yë kyë'ëwa'axy wëxtujk'ok tuknixijkxëty yë ne'pny ja potsy ma ja wintsë'këntyaknën. Jëtu'un'äämpy ënäty wyä'ätsy ja wintsë'këntyakn ma ja Israel ja'ayëty ja nëë poky tmëët'atën ets ënät tkënu'kxëty.

Levitico 16:14

Tääts näjyëtu'un wäänë ja tsajpkaa ne'pny tpëjkë'ëkëty, mëti'ipë ënäty të wyintsë'kën'atyën ets jam txijkxjëtitëty ma ja Wintsën ja kyaaxë akë'ë ja pya'ajën, mëti'ipë najts'ijxëpën matsow ja xëëw pyëtsimyën. Ënät näjyëtu'un wëxtujk'ok jam txijkxjëtitëty ma ja potsyën ma ja wintsë'kën yajyäkyën.

Levitico 14:51

Tääts tkajpë'ëkëty ja ajë kepy, ja hisopo ujts, ja tsaptswit ets ja muuxy mëti'ipë juukyën. Ënät ne'pnykyutijta'ajëty ets näjyëtu'un mëët ja nëë ets txijkxëty jap tëkoty wëxtujk'ok.

Levitico 13:17

ets nëjkx yë'ë y'ixyë ets ko ja teety y'ixëtëty, tääts tnikajpxëty ko tääpë ja'ay wa'ats yë'ënë.

Levitico 13:13

Yë teety yë'ë y'ixëp, ko t'ixëty ko ja pu'uts tëë tyajnitujkta'ay ja nyini'kx ja pa'amja'ay, ënät nëjkx ja teety y'ënä'äny ko ja ja'ay wa'ats jä'änë, jä'ä ko ja pa'am tsokp jatëkok, paaty të y'awinpity poop ets tääpë yë ja'ay wa'ats jatëkok yajpaaty.

Levitico 8:11

Yë'ë ojts mëët ja kënu'kxy on tukënu'kxy ja tsajptëjk wëxtujk'ok. Ojts jam txijkxjëtity ma ja wintsë'këntyaknën ets ma ja apëjk atu'unën ets näjyëtu'un ma ja pujxn kë'ëpujtakn mëët ja nyitënaaypyäjn, jëtu'un'äämpy ojts tkënu'kxy.

Levitico 4:17

Tääts jap tpaxajë'ëkëty ets txijkxjëtitëty wëxtujk'ok jam Tios wintum, winkon ma jam wyit'atëëytyukëtyën.

Levitico 4:6

ënät ja kyë'ëjëjp näjyëtu'un tukpaatëty ja ne'pny ets yë'ë mëët jam txijkxjëtitëty Tios wintum wëxtujk'ok, jam winkon ma jam ja tsajptëjk mëët ja wit y'atëëytyukëtyën.

Números 19:12

Kom tëkëëk xëëw ets kom wëxtujk xëëw nëjkx nyäpyujy nyäjye'etsyë mëët yë kënu'kxynyëë ets wa'ats wyë'ëmëty. Pën ka'ap nyäpyujy nyäjye'etsyë kom tëkëëk xëëw ets kom wëxtujk xëëw, ka'ap nëjkx wa'ats wyi'imy.