Levitico 13:29 - Biblia Mixe de Quetzaltepec

²⁹ Ko tu'uk yë ye'etyëjk ëkë to'oxytyëjk tmëët'atëty yë pu'uts ma kyëpajkën ëkë ma ja y'ëtsëjtsën,

Levitico 13:29 ပူးပေါင်းရင်းမြစ်များ

Mateo 6:23

e pën ka'ap ja mwiin y'oy'ixy, akootstuuy ja mjot mnini'kx yajpaata'any. Pën ja të'kxën mëti'ipën jam ma mijtsën akootstuuy y'awinpity, nëkooyë ja kootspuknë y'ita'any.

Miqueas 3:11

Ja wintsëntëjkëty mëti'ipë winë jeexyë oy pyaye'eytyëpën y'ëxajëtëp yë meeny ets ka'ap tii oy tpaye'eytyë; yë teetytyëjkëty yi'iyë ja'ay tyuk'ijxpëjktëp wi'ix tyaktëtyën ja wit meeny may'äämpy ets käjpxynyajxpëtëjkëty tyo'knëtëp ja y'aaw y'ayukëty ko nyätyijyë winë t'akajpxtë, jä'ä ko y'ëna'antë ko yë'ë Tios mooyëtëp yë winma'any ets yë'ë të myëkajpxëtë, jä'ä myäytyë tyajtë: Yë Tios yë'ë yajpatp mëët ëëtsajtëm; tii xynyajajtmëp.

Isaías 9:15

Ja këpajk, yë'ë ja mëjja'aytyëjk ets ja kopktëjkëty yaj'antijtëp, e ja pi'ixy yë'ë ja käjpxynyajxpëtëjk yaj'antijtëp mëti'ipë je'eyë antaktëpën.

Isaías 5:20

Janty mon janty tuk miitsëty myajpaatë, jä'ä ko yë'ë mtijtëp oy mëti'ipë ëxëëkën. Koots xy'ixtë ja xëënyajtën ets ja kootsajtën xëëny xy'ixtë; ja ta'ampë pa'ak xyjyawëtë ets ja pa'akpë ta'am xyjyawëtë.

Isaías 1:5

Yi'iyë miitsëty mmëmaay mmëtajtëp wi'ix mkäjpxykyumëtoownaxtëtyën, ma mjot mnini'kxëtyën ka'ap t'ëkjëkyäjpnë ma myajwoptëty. Aak tsëtyut ja mni'kx mkopkëty, tëë mmëjaawkëjxnëtë.

Salmos 53:4

Ja'ay mëti'ipë ëxëëk winë tyuuntëp kyajpxtëpën ka'ap ja'aykyujkën tmëët'atë. Mëti'ipë yë nnaax nkajpnës nyikaaytyut nyijë'kxtutëpën tä jeexyë tsyajpkääkykyäytyën ets ka'ap ja Tios tmëkajpxtë.

2 Crónicas 6:29

mëtoow'it tëkokyë ja jëëytyak nu'kxtakën mëti'ipë tyuuntëpën ja ja'ay, mëti'ipë tyuuntëpën tëkokyë ja Israel kajpn ko ënäty t'ixtë mëj këjää ja ëyo'on jotmay. Ko ja kyë'ë txajë'ëktëty ets tnajtsxajëtëty ma mjëën mtëjkën. Mëtoow'it jam tsajpjotm ma myajpaatyën ets pokymyä'kx; mo'o nitu'ukjaty ja ja'ay ijxtëm pyäätyën, jä'ä ko mijts wa'ats xynyijawë wi'ixjaty nitu'ukjaty yë ja'ay ja jot wyinma'anyën.

1 Reyes 12:28

Ko ya'atë ja winma'any ojts yajxon tyajtëy tyajtëtä'äky, ënät ja yajkutujkpë ojts t'oytyuny mäjtsk yë tsajpkaa ayääkë, aak pu'ts pujxn mëët y'oytyunyëty ets t'ënëmaay ja naax kajpn: Miitsëty Israel ja'ayëty, tëë yowë m'ënu'kxënyëtë ko jam xëmë mnëjkxtë Jerusalén. Tyaa ja mwintsënëty, mëti'ipë ojts jap Egiptë mjuutëtën.

1 Reyes 8:38

Oy tyimtii'ëyo'onëty, pën ja ja'ay ëmuumtu'ukjot jyootwinpity ets tnajtsxajëty ja kyë'ë yaa ma ja mtëjkën,

Levitico 13:28

Pën ja tsëtyut tëkoopy kë'ëm ets ka'ap ni'ikyë kyëjääjë, ënät yajnijawëty ko je'eyë ënäty wäänjaty kyiixë'ëky ma ja tayën ets nëjkx tnikäjpxy, ko tääpë ja'ay wa'ats yë'ë, jä'ä ko mëti'ipë akëxë'këpën pu'uts yowë, tooytyëm ja tsoknëp.

Levitico 13:30

yë teety yë'ë y'ixëp ja pu'uts; pën ja pu'uts tëë nyë'ptëkë ets napu'ts kyëxë'ëky ja waay ma ja pu'uts y'ityën, ënät ja teety tnikajpxëty, ko tääpë ja'ay ëxëëk yajpaaty, jä'ä ko yë'ë myëët'ajtyp yë pu'uts pa'am.

Esdras 9:3

Ko jëtu'un nmëtooyës ënät ja nwit ntukë'tsëyës ets ja nwiinwaay n'aawaay nka'ptaayës, mëët ko jëtu'un nmëtoowpatyës, janty tim pëjkë'k ntimy ja'awëyës ja njot nini'kxës, jëtu'unyës ntimy wyä'tskëtäky mëët ja monyëtukyë.

Ezequiel 5:1

Jëtu'unës yë Wintsën xy'ënëmaay: Mijts ye'etyëjk ja'ay, koonë'ëk tu'uk yë tsujkn mëti'ipë jëjpën jëtu'un tä yë tsujknën mëti'ipë ja'ay nätyuk'awaay jyäjpëpën ets mnäkyujäpëtëty ets mnäy'awaayjyäpëtëty. Këëyë'ëk tu'uk yë kijpxën mëti'ipë mtukpëjkwa'kxëpën yë mwaay tëkëëkpëky.