Levitico 10:1 - Biblia Mixe de Quetzaltepec

¹ Ënät yë Nadab ets Abihú, Aarón yë myaank ojts tjëjpkonëtë yë jyëëntsijtkëty ets tjëënmooytyë yë poom jam ma wintsë'këntyaknën mëti'ipë ka'ap yë Tios të tni'ënä'ämën. Ajotkumonë ojts jëtu'un wyinma'anypyaatë.

Levitico 10:1 ပူးပေါင်းရင်းမြစ်များ

Números 26:61

Nadab ets Abihú ojts y'o'knëtë, mëët ko ojts kë'ëmwinma'any tyaktë ja wintsë'kën jam Wintsën wyintum.

Levitico 16:12

Tääts tyaj'utsëty jyëëntsijtkëty mëët yë jëënpajk mëti'ipë nyëpëkëpën ma wintsë'këntyaknën mëti'ipë yajpatpën Wintsën wyintum ets mäjtsk wookyën yë poom mëti'ipë oy pa'akxu'kpën ets ënät tmënëjkxëty jap ma ja wit'atëëytyukën jëxkë'ptsow ma ja kaaxë yajpaatyën.

Deuteronomio 12:32

Tiits miitsëty yë'ë xëmë mtuntëp mëti'ipë të ntuk'ënä'ämtën, këtii nitu'uk xyajni'ikëtëty ets nitu'uk xykyajëpëktëty.

Números 16:46

ets ja Moisés t'ënëmaay ja Aarón: Yajmin yë mjëëntsijtk ets xy'apëkëty yë jëënpajk mëti'ipë jamën ma wintsë'këntyaknën ets xytyukkupëkëty yë poom ets pëyi'ikyë mnëjkxëty ma jam yë ja'ayëtyën ets amëtow yë Tios yë pokymyä'kxën, wä'än yë naax kajpn tpokymye'kxy. Jä'ä ko yë'ë mëk'äämpy të jyoot'anpëky ets ja ëyo'on tëë jam nyatso'ontaknë.

Éxodo 24:1

Ënät ja Tios t'ënëmaay ja Moisés: Pät jam maas tyam nyajpaata'anyën, mëët yë Aarón, Nadab ets Abihú ets mëjja'aytyëjkëty oy nitëkë'px majkën, mëti'ipë nyimëjja'ay'ajtëpën yë Israel ja'ayëty, najëkämtëkë mtänëtëty ets mnäkyoxtënaaytya'akëtëty.

Éxodo 6:23

Yë Aarón yë'ë ojts mëët pyiky tu'uk yë to'oxytyëjk mëti'ipë xyëëwajtypyën Eliseba, yë'ë nyëëx yë Aminadab ets yë'ë yë myëkä'äx yë Nahasón, yë'ë myaank'ajt mëti'ipë ojts txëëwatën; Nadab, Abihú, Eleazar ets Itamar.

Salmos 141:2

Wä'änës yë ntsajpkäjpxy jam tja'ty ma mijtsën tä poom jyokyën, koos yë nkë'ë nxajë'ëkëty jëtu'un nyaxëty tä jeexyë wintsë'kën myajmo'oyën ko jyënäkyxyëëw'aty.

Levitico 22:9

Ënëëmëtë ets tpatuntëty ja n'aaw n'ayukës. Këtiipë tii poky tsëëmë'ëktëty, mëët ko tkumëtoownaxtë. Këtiipë y'ooktëty. Jä'ä ko ëjts Wintsën, mëti'ipë yë'ëjëty të yajwa'atsëtën.

Éxodo 28:1

Ma Israel ja'ayëtyën, yë m'ajty Aarón yë'ë xëmë winkon myaj'itëp mëët yë y'u'unk y'ëna'k mëti'ipë xyëëwajtëpën; Nadab, Abihú, Eleazar ets Itamar, yë'ëtsës xëmë xymyëtuntëp ma tsajptëjkën.

Éxodo 24:9

Tä ojts ja Moisés pyety jam kopkkëjxm mëët ja Aarón, Nadab ets Abihú ets mëët näjyëtu'un nitëkë'px majk ja mëjja'aytyëjkëty mëti'ipë nyimëjja'ay'ajtëpën ja Israel ja'ayëty.

Levitico 16:1

Ok ma ënäty ja Aarón nimäjtsk ja y'u'unk të y'ooktën, mëët ko kë'ëmwinma'any të tninëjkxtë ja Tios, ojts ja Tios tmëkäjpxy ja Moisés,

Levitico 9:24

Jëtu'un kyëtäky, tä tu'uk yë mëj jëënyä'änkën ets ojts tukëtä'äky ja jëyujk'ooky ets tyajtooykyëtaktaay tu'kë'ëyë jënu'un ënäty jamën ma ja wintsë'këntyaknën. Ko jëtu'un yaj'ijxy ënät yë Israel ja'ayëty tyëjkëtyë yaxjpë jojkpë mëët ja xoontakën ets tëkokyë nyäjyijtaktaayëtë naaxkëjxy ets ojts ja Tios t'ëwtatë, mëët tu'uk ja näwyintsë'ëkë.

Éxodo 27:3

Tëkokyë yë apëjk atu'unën jënu'un tyuna'anyën ma wintsë'këntyaknën aakyë'ë mëët xy'oytyunëty yë tsuxkpujxn: yë nyi'apëjkën ma nyipäta'anyën yë jaam, yë jä'pn, yë mëj a'ukën; jëënmä'tn ets jëëntooytyakn.

Hebreos 9:4

jap yajpaaty tu'uk ja wintsë'këntyakn aak pu'ts pujxnëmpë ma ja poom tyoyën ets tu'uk ja kaaxë aak pu'ts pujxnëmpë mëët y'oytyunyëtyën. Japts kaaxëjoty tu'uk ja tu'ts aak pu'ts pujxnëmpë mëti'ipë myëët'ajtypyën ja maná ets nän jap kaaxëjoty ja Aarón ja tyajk mëti'ipë ojts jyi'tspëkyën ets mäjtsk ja tsaa ma kyëxja'ayëtyën ja Tios ja kyäjpxytyu'unën.

Jeremias 44:15

Ënät ja ye'etyëjkëty mëti'ipë nyija'awëtëpën ko ja tyo'oxytyëjkëty wiink tios të tmo'otë ja wyintsë'kën ets ja to'oxytyëjkëty mëti'ipë ënäty jap Egiptë tsënaaytyëpën ëpa'tkë'ëytsyow mëët ja jutiiyë ja'ayëty, ojts t'ëtsoowtë ja Jeremías.

Jeremias 44:8

¿Wi'ixës ko xyajjoot'anpëktë mëët mëti'ipë mtuuntëpën, ko yë poom xytyukwintsë'ëkëtë wiink tios yaa Egiptë ma të mintën tsënääpyë? Ko jëtu'unpë xytyuntë, kë'ëm mnäyajkutëkoya'anëtë ets ijxpät mwa'antëty ma të myajpoktën ets o'ktëy mjatëty ma ja naax kajpnëtyën naaxwiinyëtë apëtsëmy.

Jeremias 32:35

Tëë jam näjyëtu'un yë Baal wyintsë'këntyakn tkojëtë ma Ben-hinom Joyjyotën. Jamts yë y'u'unk y'ëna'k të tyaktë kë'ëy xo'oxy ye'etyëjkpë to'oxytyëjkpë ets të tukwintsë'ëkëtë ja Moloc ets jëtu'un tyajpokytyuntë ja Judá ja'ayëty; tëë tuntë ja mëti'ipës ënäty ka'ap të ni'ënä'ämën ets mëti'ipës ënäty ka'ap të nmay të ntajyën.

Jeremias 19:5

Ojts näjyëtu'un tyajkojtë wintsë'këntyakn ma tyaka'antë nino'oky nixämy yë y'u'unk y'ëna'këty mëti'ipë ojts tukwintsë'ëkëtën yë Baal. Ëjts ka'apës ojts jëtu'un n'ënëëmëtë ets ka'ap ojts jyëtu'unëty n'ënä'ämtës, ka'ap ojts jëtu'un nmay ntajyës y'ëtë'ëtstëty.

Jeremias 7:31

Ma ja Ben-hinom joyjotmën, jam të tkojtë yë Tofet wyintsë'këntyakn ets jam nino'oka'antë ja y'u'unk y'ëna'këty ye'etyëjkpë to'oxytyëjkpë, mëti'ipës ka'ap nijëna'a ojts ni'ënä'ämën ets ka'apës ojts nijënu'un ntimmyäy ntimtyäjy jëtu'un y'ëtë'ëtstëty.

Deuteronomio 17:3

ets t'ëwtajtnëty ja wiink wintsën, ëkë twinkoxtënaaynyëty oytyiijëty, tä yë xëëw, po'ojën, ëkë mëtsa'ajën, aakyë'ë mëti'ipë yë Wintsën ka'ap nt'oyjyawën ets ka'apë të tni'ënä'ämën.

Deuteronomio 4:2

Mëti'ipë yam ntuk'ënëëmëjantëpën, këtii kë'ëm xyajni'ikëtëty ëkë kë'ëm xyajwäänëtëty. Jëtu'un xypyatuntëty ya'atë Wintsën yë tyiyajtën tä yam ntuk'ëwaanëja'antën.

Éxodo 40:27

Ojts tyajtoopyiky ja mëti'ipë oy xu'kp jojkpën, jëtu'un ijxtëm ënäty ja Tios të tyuk'ëne'emyën.

Éxodo 38:3

Tu'kë'ëyë ja apëjk atu'unën, mëti'ipë ënäty tunaanpën ma ja wintsë'këntyaknën aakmëët yë tsuxkpujxn t'oytyuuntaay, tä ja pujx'akën ma ja jaam yaj'ako'owëtyën ets ja nyijä'pn, ja a'ukën mëjjatyëtypë ets ja wo'kn mëti'ipë ja jëënpajk mëët yajka'apë'ëkëtyën.

Éxodo 37:29

Yë Besalel ojts näjyëtu'un tyaj'oyë ja kënu'kxy on, mëti'ipë winë yajtukkënu'kxpën ets ja poom mëti'ipë janty'oy pa'akxu'kpën, jëtu'un tuunk'ajty tä yë pa'akxu'kpë oytyuunpë tyaj'oyën yë tsooy.

Éxodo 31:11

yë on mëti'ipë mëët winë yajkënu'kxyën ets ja poom mëti'ipë pa'akxu'kpën jap ma tsajptëjkën, yë'ë nëjkx tuunk'atë jëtu'un tä yam të ntuk'ëne'emyën.

1 Reyes 18:38

Tyam kyajpxta'ay, tyam ja jää kyupëmiimnaxy ma ja wintsë'kën ënäty jam y'ityën ets tyajtooytyëkooytyääy, wä'än yë'ëjëty ja kepy tsaa, pujxm naaxway, ja nëë mëti'ipë ënäty jam të kyutä'ämëtyääyën ma ja nëë'atu'ujën wa'ats ja tyajtëtstaay.

Éxodo 8:27

Paaty kopkpëky yë'ë etsës jam nëjkxtëty të'ëts'itum, tëkëëk xëëw ye'eyën jyëkämëty mëët yaajën ets jam nëjkx ja Tios ja wyintsë'kën nmo'otës, jëtu'un ijxtëm yë'ë të xytyuk'ënä'ämtësën.

Números 4:18

Këtii xy'ëwa'atstëty nijëna'a ets Quehat yë myëkunaax myëkukajpn y'atëkoytyëty ma Leví ja'ayëtyën.