Levitico 1:3 - Biblia Mixe de Quetzaltepec

³ Pën yë'ë tsajpkaa yakäämpy tä tu'uk yë wintsë'kënën, yë'ë yakëp yë oypyë mëkpë ets mëti'ipë kä'pxyën, jam tyaj'ookëty ma yajnitëkën yë wit tëjk ma näpyaatë y'ityën ets jam ja wintsë'kën tyakëty ets Wintsën tkupëkëty.

Levitico 1:3 ပူးပေါင်းရင်းမြစ်များ

Génesis 22:13

Ënät yë Abraham y'ijxë'ky ets t'ijxpaty tu'uk yë kupixyny mëti'ipë ënäty të jyänën yë wyaj ma ujts xe'entyën. Ënät ojts ninëjkxy ja kupixyny, tääts yë'ë tkëxko'ky jam ma ja wintsë'këntyaknën ets jä'ä ja Tios ojts tukwintsë'ëkë ijxtëm ja y'u'unkën jeexyë.

Génesis 22:2

Tää yë Tios y'ënëmaayë: Wow yë Isaac, mëti'ipë oy xytsyokyën ets nëjkx ma ja Moriah naaxjotmën, jamës xymyo'ojëty yë nwintsë'kënës ma ja kopkën, mëti'ipë ntuk'ënä'ämäämpyën.

Génesis 22:8

Tä ja tyeety y'ëtsooy: Tios nyija'ap wi'ix tyaka'any yë jëyujk mëti'ipë yajtukwintsë'ëkëpën. E ënät jatëkok ye'eytsyo'ontë.

Génesis 8:20

Tä yë Noé ojts tnipëjktaakë ets t'oytyuuny tu'uk wintsë'këntyakn. Yë Noé ojts yë Tios tukwintsë'ëkë jëyujk ets joonëty jëyujkëty mëti'ipë wa'atsëtyën, tu'kë'ëyë jëyujk wi'ixëty y'ixë'atën.

2 Crónicas 29:32

Ja jëyujk mëti'ipë ojts ja ja'ay tyaktën ets ja Wintsën tukwintsë'këtyë nino'oky nixämy, jä'ä nyiwinë'ajty; tëkë'px majk ja tsajpkaa, mëko'px ja tsajppax ets mäjtsk mëko'px ja kupixyny. Tëkokyë ya'atë jëyujk aakyë'ë ojts Wintsën tuknimintë ets tukwintsë'këtyë nino'oky nixämy.

2 Crónicas 35:12

Ja jëyujk on ëpëky tpëjktaktë ets ja ja'ayëty këëkjä'ä tyajktë jam ma wintsë'kën yajyäkyën; jëtu'un tä ja ënä'ämën myinyën mëti'ipë ja Moisés yajwë'ëmën; näjyëtu'un tuuntë ja mëjatyëtypë ja tsajpkaa.

Salmos 110:3

Yë mnaax mkajpn mëj'äämpy mpëjkta'aka'anyë jä'ä xëëw ma ënäty ja mmëtsip xymyëmëtä'äkyën jam tsipjotm. Jëtu'un xëmë mnäjyawëtëty tä jeexyë m'ëna'kën winjëpom tä yë maanik kyä'äyën jopyëp jam tunkëjxm.

Salmos 40:8

Ëjts ntunäämpyës mëti'ipë mijts mni'ënä'ämëpën, Tios, mëti'ipës nTios'ajtypyën; Njootjoty nwinma'anyjyotyës nyaj'ity mëti'ipës mijts xytyuk'ni''ijxëpën.

Éxodo 12:5

Ja jëyujk mëti'ipë nëjkx xyaj'ooktën, yë'ë mëti'ipë ënäty ja jyëmëjt tu'uk të t'apetyën, yä'äypyë ets oypyë mëkpë; oy yë'ë'atëty yë kupixyny ëkë tsajppax.

Éxodo 24:5

Ënät ojts tuk'ëne'emy ja ëna'ktëjkëty ets tyaj'ooktëty ja tsajpkaa ets jä'ä tukwintsë'ëkëtëty ja Tios, jëtu'un'äämpy ja nay'ëëw'oy näykyajpx'oyë tuntëty mëët yë'ë.

Éxodo 29:18

Tääts ënät ya'atë kupixyny y'ooky xynyino'okëty ma wintsë'këntyaknën, mëti'ipë yë Wintsën mtukmëjjawëpën, yë'ë ya'atë wintsë'kën nino'oky nixämpyë oypyë xyuuky jyokyën.

Éxodo 29:4

Tä ënät xywyoownëjkxëty yë Aarón mëët yë y'u'unk y'ëna'k jam ma yajnitëkën ja wit tëjk ma näpyaatë y'ityën ets xy'ënëëmëty, ko jam tsyi'iwtëty.

Éxodo 29:42

Ya'atë yojxën mëti'ipë myajktëpën nino'oky nixämpyë, u'unk ok nyëjkxëty ets jëtu'un tkë'ëyaktëty ëjts nwintuuyës jam ma yajnitëkën yë wit tëjk ma näpyaatë y'ityën, maajës näpyaata'anyë mëët mijts ets nmëkajpxa'any.

Éxodo 32:6

Ko kyomjëpom'ajty, janty ju'unëm ojts myä'äypyëtë'kojtë ets ja wintsë'kën ojts tkë'ëyajkojtë, kanaak tyajnitooytyë ja jëyujk, tuntë jëtu'un ja nämyë''ëëw'oy näymyëkajpx'oyë, wäänë y'ijty tä ojts ja mayjyä'äy tyëkëtë kääpyë ukpë. Ko jëtu'un y'ëkkaaytyääy y'ëk'uktaaytyë tääts tyëjkëtyë äjtspë pujtpë.

Éxodo 35:21

E mëti'ipë ojts ja jyot wyinma'any y'ëna'antë ets winë tyaka'antë, kanaakpëky ojts winë tjantymyëmintë ma ja Tiosën, ja mëti'ipëjaty ënäty tunaanpën ma kyoja'anyën ja wit tëjk ma ja näpyaatë y'itëtyën ets tëkokyë mëti'ipë mëyajtpën, näjyëtu'un ja wit tujkxy.

Éxodo 35:29

Tëkokyë yë ja'ayëty ye'etyëjk to'oxytyëjkpë ojts ja jyot wyinma'any y'ëwa'atstë ets pyutëkëja'antë ma ja tuunk jam y'ityën, mëti'ipë ja Moisés ojts ja Tios tyuk'ëne'emyën, mëët ja ayajk ako'onën mëti'ipë myëmiintën, jëtu'un ojts tyaktë tä ënäty ja jyot wyinma'any y'ëna'antën.

Éxodo 35:5

Pënjaty ja y'ayajk y'ako'onën kyë'ëyakäämpyën ma Tiosën, mëët ko jëtu'un ja jyot wyinma'any tyajja'ty ets ko jëtu'un tuknipëjktaakë winë aaw winëjot. Ya'atë mëpaat xyaktë: pu'ts pujxn, poop pujxn, tsuxkpujxn,

Éxodo 36:3

Ënät ojts jä'ä ja Moisés myooytya'ajëtë ja ayajk ako'onën mëti'ipë ja Israel ja'ayëty të tmëmintën ets tyajtso'onta'aktëty ja tuunk ma ja tsajptëjk kyoja'anyën. E ja Israel ja'ayëty ni'ikyë tmëmiin'ëtë'ëtstë ja ayajk ako'onën winjëpom.

Éxodo 38:1

Besalel ojts yë wintsë'këntyakn t'oytyuny, acacië kepy yajtuun, yë'ë yajtuknikojëy ma ja jëyujk yajnino'okëtyën. Taxk täk ojts t'oytyuny, jä'ä pya'a ja taxkpëkpyë tyaj'ayeny'äjty tu'kxajpk ja kujkm ets tyajkëjxm'ajty mäjtsk kë'ënux ja kujkm.

Isaías 1:11

Jëtu'un yë Wintsën y'ënä'äny: ¿Tiijës nyajwa'anëty yë wintsë'kën oy jënu'un may xyajmintë? Tëës xynyatsijpnë ja wintsë'kën nino'okpyë xyaktën, tä yë kupixynyën, tsajpkaajën ets tsajppaxën, ëxëëkës n'ixy yë jëyujk ne'pny.

Ezequiel 20:40

Tëkokyë yë Israel ja'ayëty jam nëjkx xy'ëwtatës maas yë wa'atspë nkopkën, jampë yajpaatyën nkajpnjotmës. Ëjts Wintsën ëjts ënaanp. Jamts jotkujk n'ëxajëtëty; jam n'amëtowa'antë yë ayajk ako'onën ets tmëmintëty mëti'ipë më''ëka'any yajpëtë'ktëpën ma nyaax kyamëtyën ets oy tyimtiijëty tiijës xytyukmëyoxantëp.

Ezequiel 40:39

Ma ja tëjkwiinën mëti'ipë yajpatpën ma tëjkëtyaknën taxk ja kaaypyäjn jam kyiiynyë, mäjtskjaty pa'apa'a, jamts ja jëyujk tyajkëx'ooktë mëti'ipë wintsë'kën'ataanpën ets mëti'ipë ja poky kyunaxäämpyën.

Levitico 1:10

Pën Tios mtukwintsë'këtyëp yë kupixyny ëkë ja tsajppax, yë'ë myaktëp yë yä'äypyë

Levitico 14:10

Kom tëtujk xëëw mäjtsk tyakëty yë tsajppax ets tëtujk tsim yë tsajpmokway, mëti'ipë nëjkx yaj'oytyunyën mëët yë on ets jëtu'un yë Tios yajmo'ojëty, tä tu'uk yë ayajk ako'onën ets tu'k a'ukën ja on.

Levitico 16:7

Okts näjyëtu'un tukwintsë'ëkëty ja Tios mäjtskpë ja tsajppax, jam ma yajnitëkën ja wit tëjk ma näpyaatë y'ityën.

Levitico 17:4

ets ka'ap jam tmënëjkxëty ma ja wit tëjkën ma ja näpyaatë y'ityën ets jeexyë yë'ë tukwintsë'ëkë. Pokytyuunp jëtu'un ënäty, mëët ko ja ne'pny temy tje'etsy, kopkpëky ko nëjkx yajjo'otsy ma ja myëkunaax myëkukajpnën.

Levitico 17:8

Ënëëmë näjyëtu'un, ko wä'än yë'ëjëty yë Israel ja'ayëty ëkë wä'än yë'ëjëty jaaypyaat jaaypyo'kxy mëti'ipë yajpatëpën ma miitsëtyën, ko tii wintsë'kën tyaktëty nino'oky nixämy,

Levitico 17:9

ets ka'ap tmënëjkxëty jam ma ja wit tëjkën ma ja näpyaatë y'ityën ets jeexyë yë'ë tukwintsë'ëkë, kopkpëky ko nëjkx yajjo'otsy ma ja myëkunaax myëkukajpnën.

Levitico 23:12

Näy jä'ä xëëw ma ënäty ja tsajpmok yajkë'ëyäkyën tu'k'atsumy, jä'ä nëjkx yajyäky tu'uk ja kupixyny, näjyëtu'un mëti'ipë tu'ukën yë jyëmëjt oypyë mëkpë, mëti'ipë yajnino'okëpën ets ja Tios jä'ä yajtukwintsë'ëkëty.

Levitico 23:18

Mëët yë tsajpkääky wëxtujk xymyënëjkxtëty yë kupixyny, mëti'ipë tu'ukjatyëty yë jyëmëjtëtyën, tu'uk yë tsajpkaa u'unk ets mäjtsk yë tsajppax mëti'ipë yajnino'okëpën. Ets Wintsën yë'ë yajtukwintsë'ëkëty, mëti'ipë oy xuukëpën jokëpën, ëpëky ja ujtspajk näjyëtu'un ets ja tsatym nyëë mëti'ipë näjyëtu'un ayajkën'at ako'onën'atëpën.

Levitico 3:1

Ko pën tukwintsë'ëkëja'anëty yë tsyajpkaa wä'än yë'ëjëty yë tsajpkaato'oxy ëkë tsajpkaayä'äy, mëët ko ja nay'ëëw'oy näykyajpx'oyë tmëët'ata'any mëët ja Tios, ja jëyujk oy mëk mëpaat jyëyujk'aty ets kä'pxy

Levitico 4:15

Ma ja mëjja'aytyëjkëty tkëxkontëtyën ja kyë'ë ma ja tsajpkaa ayääkën ja kyëpajkën, jam ma ënäty yajpaatën Tios wintum, tëëjës ënäty jëtu'un tuntë, tääts jämyë tyo'kumtëty.

Levitico 4:23

E ko tja'amyätsëty ko tëëtëm pyokytyuny, yë'ë yakëp tä ayajk ako'onën tu'uk yë tsajppax mëti'ipë oy mëkën ets kä'pxyën.

Levitico 4:3

Pën yë'ë pokytyuunp yë teety wyintsën ets jëtu'un'äämpy ja naax kajpn tyaj'ëxëëktëkë, yë'ë yakëp tu'uk yë tsajpkaa u'unk, mëti'ipë oyën mëkën ets kä'pxyën jam ma Tiosën ets yë'ë ja nyëë pyoky tukunaxëty.

Levitico 4:32

Pën tääpë ja'ay yë'ë tu'uk myëmiinpy yë kupixyny ets yë'ë pyoky tyukunaxäämpy, yë'ë mëpaat tmëminy yë to'oxypyë, mëti'ipë oy mëkën ets kä'pxyën.

Levitico 5:15

Ko yë ja'ay pyokytyunëty ajotkumonë ets yajnijawëty ko tëëtëm kë'ëmwinma'any tii tnixajë, mëti'ipë ja Tios ënäty të yajtuknipëjktaakën. Yë'ë yakëp yë kupixyny yä'äy yä'kpetypë ets yë'ë nyätyukuyakëtëty, mëëtkyëjxm ko ënäty jëtu'un të pyokytyuny. Ets tukwintsë'ëkëty yë'ë yë Tios. Ja tsajpkaa ja tsyow jëtu'un mëpaat tsyoowtëkë, tä ja poop pujxn meeny tsyoowpaatyën ets ja poop pujxn meeny jëtu'un mëpaat yajkijpxy, tä ja kijpxën jap myinyën ma tsajptëjkën.

Levitico 5:18

Ya'atë mëpaat ja'ay jëtu'unpë tuny, yë'ë yakëp tu'uk yë kupixyny yä'äy yä'kpetypë mëti'ipë oyën mëkën ets kë'ëm xy'a'ixëty jënu'un ja jyëyujk tsyowpaaty. Ets tukninëjkxëty ja teety, mëti'ipë ja pyoky tyukuyäjkpyën. Ets jëtu'un'äämpy ja pokymyä'kxën tpaatëty ja ja'ay mëti'ipë ënäty të pyokytyunyën ajotkumonë ets ja nyëë pyoky nëjkxëp yajme'kxy.

Levitico 6:2

Ko pën yë myëku'uk tmäätsëty ets yë'ëkyëjxm pokymyëët wyë'ëmëty jam Tios wintum; ko ënäty ja myëku'uk të twin'ëëny ma ja wit meeny mëët tyajtuunmukyën, ëkë ko tsoky ja myëku'uk ja wyit myeeny të tpëjkë.

Levitico 6:8

Ënät ja Tios ojts tmëkäjpxy ja Moisés ets y'ënëmaay:

Levitico 7:16

E pën ja jëyujk jä'äts yajtukëpäjtp ma ënäty winë ja Tios të yajtukwinwanën, ëkë atsoky pën tyäky, jä'ä xëëw xytsyu'utstëty ja nyitsu'uty, e ja mëti'ipë natëjkëpën jyëkyejpy komjëpom tjaaktsu'utstëty.

Levitico 8:18

Moisés ojts näjyëtu'un tni'ënä'ämë ets twijtsmintëty ja kupixyny yä'äy yä'kpetypë mëti'ipë yajnino'kpën, tä ja Aarón ets ja y'u'unk y'ëna'k jam ja kyë'ë tkëxkoontë ma ja kupixynykyëpajkën.

Levitico 8:21

E ja jyot ets ja pyuuy yajxon ojts wa'ats tpujë mëët yë nëë ets jam tnino'ktaay ma ja wintsë'këntyaknën. Jëtu'un ja Tios tukwintsë'këy ja jok oypyë xyuuky jyokyën, tä ënäty ja Tios të tni'ënä'ämën.

Levitico 9:2

Ets t'ënëmaay ja Aarón: Yaj'ook tu'uk yë tsajpkaayä'äy ayääkë ets xytyukwintsë'ëkëty yë Wintsën mëti'ipë ja nëë poky kyunaxëpën ets tu'uk yë kupixyny yä'äy mëti'ipë yajnino'okëpën ets jam xymyënëjkxëty ma ja Tiosën.

Zacarías 13:7

Yë Wintsën mëti'ipë maaytyääyëpën winë, jëtu'un y'ënä'äny: Pëtë'ëk, tëypyujxn, nipëtë'ëk yë kupixyny këwent'ajtpës ets nipëtë'ëk yë ja'ay mëti'ipës xypyutëjkëpën. Yaj'ook mëti'ipë kupixyny këwent'ajtpën ets kyääkwa'kxta'atëty yë kupixyny, etsës mëtsip n'awinpita'anyës ma ja kupixynyëtyën.

Malaquías 1:14

Poky yë ja'ay wyi'imy, mëti'ipë ënaanpën ko oypyë jëyujk xytyukwintsë'ëkëja'anyës ets jä'ä xytyukwintsë'këpës mëti'ipë ka'ap y'oyëtyën myëkëtyën. Ëjts yajkutujkpë'ajtp ets aak xytsyë'këpës yë naax kajpn. Jëtu'un y'ënä'äny yë Wintsën mëti'ipë maaytyääyëpën winë.

Números 15:3

Koos xymyo'oja'antëty tu'uk yë tsajpkaa ëkë tsajppax etsës xytyukwintsë'ëkëja'antëty nino'oky ets oy xyuukëty jyokëty nwintuuyës. Mëët ko ënäty ja wyaantakën tyaj'ëtuka'antë, ëkë ko jëtu'un ja tsyojkën tpëjkta'aktë.

Números 15:8

Pën yë'ë myakantëp nino'oky tu'uk yë tsajpkaa u'unk, ëkë mwaantakën myaj'ëtukantëp mëët yë Wintsën.

Números 19:2

Ëjts mëti'ipë Wintsën'ajtpën, ya'atë ënä'ämënës yam nyäjkpy: Ënëëmë yë Israel ja'ayëty ets tu'uk tmëmintëty yë tsajpkaato'oxy mëti'ipë natsapts yë y'ujkën, mëti'ipë oy mëkën ets ka'ap yajtukuwëënyëm tyuunpäjn.

Números 23:19

Yë Tios kajëna'a yë kya'ooky kyatëkoy, yë'ë ka'ap wyin'ëëny ets ka'ap yë y'aaw y'ayuk tukxi'iky. Ko tii tnikäjpxy pyatuumpy, ets ko tii twinwanë yäjkpy.

Números 23:27

Ënät yë Balac jatëkok y'ënäny: Min yaatsow, wä'änxyëp yë Tios ka'ap wi'ix tjawëty ko yamtsow xypyokëty yë Israel kajpn.

Números 23:3

Tääts yë Balaam t'ënëmaay yë Balac: Yaa këwent'at ya'atë wintsë'kën, ëjts nëjkxës n'ëk'ixy wi'ix yë Wintsën y'ënä'äny. Tääts yam ok ntukwinjawëty wi'ixës xy'ënëëmën. Ënät ojts yë Balaam nyijkxy ma tu'uk yë mutsk kopkën, jampë yajpaatyën të'ëts'itjotm.

Números 23:30

Balac ojts jëtu'un tuny tä Balaam y'ënëmaayën ets ma tu'ukjaty ja wintsë'këntyaknën, tu'ukjaty ja tsajpkaayä'äy ojts jam tyaj'ooky ets näjyëtu'un ja kupixyny yä'äy mëti'ipë të yä'kpetyën.

Números 28:11

Ma ëka'any y'anë'ëkyën oymyëti'ipë po'ojëty, mäjtsk yë tsajpkaayä'äy ayääkë xytyukwintsë'ëkëtëty yë Wintsën, tu'uk yë kupixyny yä'äy mëti'ipë të yä'kpetyën ets wëxtujk yë kupixyny yä'äy mëti'ipë tu'ukjaty yë jyëmëjtën ets oyëty mëkëty,

Números 28:19

Mäjtsk yë tsajpkaayä'äy ayääkë, tu'uk yë kupixyny yä'äy mëti'ipë tëë yä'kpetyën ets wëxtujk yë kupixyny yä'äy ayääkë oyëty mëkëty ets mëët näjyëtu'un xytyukmëyakëtëty yë tsatym nyëë. Yë'ë nëjkx xynyino'oktë ets ja Tios jä'ä xytyukwintsë'ëkëtëty.

Números 28:31

Ya'atë wintsë'kën mëti'ipë nino'okyën mëët ja nyi'ayajk nyi'ako'onën, mëti'ipë aaypyajk ujts pajkën ets ja nyi'tsatym nyëë. Yë'ë nëjkx xyaktë, ëpëky ja mëti'ipë winjëpom yajyajktëpën. Ja jëyujk tsajpkaa, yë'ë mëpaat xyaktë mëti'ipë oy mëkën.

Números 29:13

Ma ëka'any tsyo'ontä'äkyën ja mëët tu'kxëëwpë. Yë'ë nëjkx xyaktë yë tsajpkaa majktëkëëk, mäjtsk yë tsajpkaa u'unk ets majkmajkts yë kupixyny mëti'ipë ja jyëmëjtëtyën tu'uk ets oyëty mëkëty, yë'ë nëjkx ja Wintsën xytyukwino'ok xytyukwinxamtë ets jya'tëty yë'ë wyintuuy tä tu'uk yë xu'kën jojkën janty oypyë.

Números 29:2

Ja wintsë'kën mëti'ipë yë Tios mtukwinno'oktëpën ets jya'tëty ma yë'ëjën tä tu'uk yë xu'kën jojkën. Yë'ë myaktëp tu'uk yë tsajpkaa ayääkë, tu'uk yë kupixyny yä'äy mëti'ipë tëë yä'kpetyën ets wëxtujk yë kupixyny ayääkë mëti'ipë jyëmëjtëtyën tu'ukjaty ets oyëty mëkëty.

Lucas 1:35

Tääts ja tsajpjotmëtë kukäjpxy y'ëtsooy: Minaanp ja Kënu'kxymyëkajtën ma mijtsën, Tios ni'ik këjxmëpë myëk'ajtën myajnitukëtëp ijxtëm tu'uk ja yootsën, paaty ya'atë mëxu'unk mëti'ipë minaanp ja'taanpën, wa'ats yë'ë, Tios U'unk yë'ë.

Juan 1:36

Ko t'ijxy ja Jesús nyäxy ets y'ënäny: Ixtë, yë'ë ya'atë Tios wyintsë'kën, ijxtëm ja kupixyny u'unkën.

Juan 10:7

Ënät ja Jesús ojts y'ënëmaaykyojënëtëpë: Tëy miits nëëmëtë, ëjts jëtu'un ijxtëm ja kemy aawën ma ja kupixyny nyaxtën.

Juan 10:9

Ëjts jëtu'un ijxtëm ja kemy aawën. Pën tëjkëp ma ëjtsën yë'ë nitso'okaanp. Jëtu'un nyaxa'any ijxtëm ja kupixyny tyëkëtën pyëtsëmtën ets jap jyi'kxypyaatë.

2 Corintios 8:12

E pën winë aaw winëjot yoxäämpy ja myeeny, kyëwentëpëkäämpy ja Tios wi'ix pën myëtä'äkyën, Tios ka'ap pën t'amëtoy mëti'ipë ka'ap tii tmëëtëtyën.

2 Corintios 9:7

Nitu'ukjaty xyaktëty mtsojkënkyëjxm ijxtëm të xytyukniwinmayëtën, ka'ap mäjtsk aaw mäjtsk jot ëkë ka'ap y'akwanëty, jä'ä ko Tios tsyojkpy yë ja'ay mëti'ipë jotkujk tii yäjkpyën.

Efesios 2:18

Kristë xypyutëjkëmëp ni'ëmukë mëët ja kënu'kxymyëk'ajtën ets npatmëty ja Tios, jëtu'un ja jutiis ja'ayëty ets näjyëtu'un mëti'ipë ka'ap jyutiisëty.

Efesios 5:27

ets tyaj'ita'any wa'ats, oy, ka'ap xyootsëty ets ka'ap y'äämyëty.

Deuteronomio 12:27

E jam ma wintsë'këntyaknën, jam xymyo'otëty ja Wintsën tii ënäty mo'ojantëpën. Pën yë'ë jëyujk'ooky, jam nëjkx xyajnitoytyë ma ja nyipotsyën ma ja wintsë'kën yajyäkyën. Yë jëyujk ne'pny nëjkxëp xytyuknixijkxtë ja Wintsën mëti'ipë miits mTiosajtëpën ja wyintsë'këntyakn, e yë nyitsu'uty jyëkyejpy xytsyu'utstëty.

Deuteronomio 15:21

E pën tääpë jëyujk ma'at yë kyë'ë tyeky, ëkë wyiin, ëkë pëjkëp ijxëp, këtii yë wintsën xymyo'ojëty.

Deuteronomio 17:1

Këtii yë Wintsën xytyukwintsë'ëkëty yë tsajpkaayä'äy ëkë kupixyny'u'unk, mëti'ipë ka'ap y'oyëty myëkëtyën, ëkë pën ka'ap kyä'pxyëty, jä'ä ko ka'ap t'oyjyawë jëtu'unpë.

Hebreos 7:26

E jëtu'un yë Jesús, të nyäxy Mëj teety wintsën mëti'ipë ënäty nyajmëyajtëmën. Yë'ë kënu'kxy, wa'ats, ka'ap poky tmëëtëty, ka'ap pyokyjä'äyëty ijxtëm ëëtsajtëmën, wäänë këjxm yë'ë y'ity këtiinëm ja tsajp.

Hebreos 9:14

Pën jëtu'un, ni'ik ja Kristë ja nye'pyny. Jä'ä ko mëët ja Kënu'kxymyëkajtën xëmëkyëjxmëpë y'ityën, ojts ja Kristë nyäkyë'ëyäkyë ets wyintsë'kën'atëty ma Tiosën wa'ats pëk, ets ja nye'pny yë'ë yajwatsyp ja njoot'ajt nwinma'any'ajtëmë oy ënäty të njatu'unëmë mëti'ipë yaj'o'kpën, ets jëtu'un npatmëty ja juukyajtën.