Jueces 8:10 - Biblia Mixe de Quetzaltepec

¹⁰ Yë Zébah ets Zalmuná jam ënäty yajpaatë ma tu'uk yë it naaxwiinyëtë txëëwatyën Carcor mëët nimajkmokx mil ja jyä'äy. Tääpë nimajkmokx milpë yë tsiptuunpëtëjkëty, yi'iyë ënäty jaakwë'ëmtëp jampë xëëwpëtsëmtsyow yajpaatën. Jä'ä ko tëë ënäty nimay y'o'knëtë, jä'ä nyiwinë'atë i'px mil.

Biblia Dc en Mixe de Quetzaltepec

¹⁰ Yë Zébah ets Zalmuná jam ënety yajpaatë ma tu'uk yë it naaxwiinyëtë txëëwatyën Carcor mëët nimajkmokx mil ja jyä'äy. Tääpë nimajkmokx milpë yë tsiptuunpëtëjkëty, yi'iyë ënety jaakwë'ëmtëp jampë xëëwpëtsëmtsyow yajpaatën. Jä'ä ko tëë ënety nimay y'o'knëtë, jä'ä nyiwinë'atë i'px mil.

Jueces 8:10 ပူးပေါင်းရင်းမြစ်များ

Jueces 7:12

E ja Madián ja'ayëty, Amalec ja'ayëty ets tëkokyë jënu'un ënäty jam tsyoontën xëëwpëtsëmtsyow ets të nyäpyëkëtë, tu'ukyë ënäty jam joyjyotm të nyäpyëjkta'akëtë tä yë poomxots tyajwintukyën muum yë kam tu'u ko kyëtyeyä'äny. Yajxon ënäty myäy'ajnë ja jëyujk jëku'ux, jëtu'un tä nëë'ajinën.

2 Reyes 3:26

Ko ja yajkutujkpë t'ijxy mëti'ipë Moab ja'ayën ko ja Israel wäänë mëk ënäty ni'ik tsyiptuntë, ënät niwëxtujk mëko'px t'ënëmaay ja tsyiptuunpëtëjk mëti'ipë tekyye'epy tsiptuuntëpën ets tyaj'ëwa'atstëty ja äämjyot, tyaj'oyëtëty tu'uk ja tu'u mëti'ipë jam ja'tëpën ma yajpaatyën Edom yajkutujkpë. Je'eyëp ko ka'ap myääyëtë.

Jueces 20:46

Ja Benjamín ja'ayëty mëti'ipë o'ktën jä'ä xëëw, jä'ä nyiwinë'ajtë i'px mëkoxk mil, aakjä'ä ja tsiptuunpëtëjkëty mëti'ipë tsip'ixëtyën.

Jueces 20:35

Yë Wintsën yë'ë ojts tyajmëtä'äky yë nyaax kyajpn ma Benjamín ja'ayëtyën. Yë Benjamín ja'ayëty jä'ä ojts jä'ä xëëw y'ooktë, i'px mëkoxk mil ja mëko'px.

Jueces 20:25

E ja Benjamín ja'ayëty ko jatëkok tsyo'ontë jap kyajpnjotyëty, ojts yajja'ay'o'kojnëtëpë, jä'ä tyaj'o'ktë ja tsiptuunpëtëjkëty mëti'ipë Israel ja'ayëtyën majkmokx tëkëëk mil.

Jueces 20:17

E ja wiinkëtypë ja Israel ja'ayëty mëti'ipë pyaye'eytyëpën ja nëë poky, jä'ä nyimay'atë taxk mëko'px mil ets aakyë'ë tsip'ixëtypë mëti'ipë kanaak'ok muum të tsyippatnëtën.

Jueces 20:15

Ja tsiptuunpëtëjkëty mëti'ipë ojts yajxon tuknipëjktaakëtën ets tsyoona'antë tsiptuunpë mëti'ipë jyä'äy'äjtypyën yë Benjamín, jä'ä nyiwinë'ajtë ni''i'px tëtujk mil, ëpëky niwëxtujk mëko'px mëti'ipë ënäty të yajwin'ixtën jam Guibeá ets tsip'ixëty yajxon.

Jueces 20:2

Tëkokyë ja mëjja'aytyëjk jënu'un tnikopk'atën ja Israel kajpn, aaktam ënäty yajpaatën; ja Wintsën ja nyaax kyajpn, jä'ä niwinë nyämyujkëtë taxk mëko'px mil ets aak tsiptuunpëty, teky'am nyëjkxtë.

Isaías 37:36

Ënät ja Wintsën ja kyukäjpxy ojts tsyoony ets ojts nyijkxy jam ma ja Asiria ja'ayëtyën, tääts tyaj'o'ky nimëko'px ja majkta'px mëkoxk mil ja Asiria ja'ay. Komjëpom aak ooky ojts kyuxëënyëtë.

Isaías 9:4

Jä'ä ko mijts të xyajjëwä'äky ja nätyiytyunë, ja ëyo'owën jotëko'oyën ets ja monyëtukyë ma ënäty ja wintsëntëjkëty o'ktëy y'ëtë'ëtstën y'ëna'antën, ijxtëm jam Madián tëkok jyäjty kyëpejtyën.

2 Crónicas 28:8

Ja Israel tsiptuunpëtëjkëty ëpëky ja Judá ja'ay may tsuumtë tmajtstë, nimäjtsk mëko'px mil nyiwinë'ajtë, ye'etyëjk to'oxytyëjk ets pi'k ëna'k; ojts winë tyajpëtsëëmta'atë jam kajpnjotm ets tyajnëjkxtaaytyë jam Samaria.

2 Crónicas 28:6

Jam ijty tu'uk yë ja'ay yajpaaty, jä'ä xyëëwajtyp Pécah, jä'ä ojts yë Judá ja'ay tyaj'ooky mëko'px ja i'px mil, aakjä'ä ja mëti'ipë mëj'äämpy ijtëpën jam Judá. Jëtu'un tkëpäjtë mëët ko ënäty ka'ap ja Wintsën të tmëj'ixtën, mëti'ipë y'aptëjk y'ëwtajtën.

2 Crónicas 13:17

Abiam mëët yë jyä'äy may myëtsip tyaj'o'ktë, jä'ä nyiwinë'ajtë mëkoxk mëko'px mil aakyë'ë win'ixyëtypë ja tsiptuunpëtëjk Israel ja'ayëty.

Jueces 7:22

ja nitëkëëk mëko'pxpë ja Israel ja'ayëty ni'ikë ja jyänty xyuux'ëtë'ëtstë, mëti'ipë tyukxuxtëpën ja tsajppaxwaj, ja Wintsën ojts kë'ëm tuknipëjktaakë ets ja Madián ja'ayëty tyëkëtëty tsiptuunpë aakyë'ë, yë Wintsën yë'ë ojts tuknipëjktaakë ets kyä'äktëty jampaat ma txëëwatyën Bet-sita, matsow yajninëjkxyën ja Sererá kajpn ets jampaat ma ja tsyëpa'an nyäxyën ja Abel-meholá winkon jam Tabat.

Jueces 6:5

E komë nimay ijty yajxon myintë ets ko ja wyittëjk tpëjktakta'atë yajxon tyajwintujkta'atë ja it naaxwiinyëtë ets mëët ja jyëyujk tsyajpkaajëty, näjyëtu'un ets ja may jëyujk jëku'ux.

Jueces 8:11

Gedeón yë'ë ojts yë tu'u tkuuynyijkxy mëti'ipë pya'anajxypyën yë të'ëts'itjot, a'oytsyow, ma wyi'imyën yë Nóbah ets Jogbehá. Yë myëtsip, ajotkumonë ojts t'ëkëty tyukja'ty ma ënäty yë'ë ka'ap ninu'un timjyëjp'ixtën.

Jueces 7:13

Ko ja Gedeón tu'uk ja wit tëjk tmëwinkoony jam ma ënäty ja myëtsiptëjk yajpaatën, ënät tmëtooy wi'ix tu'uk ja tsiptuunpë tnimëtyä'äkyën ja kyëma'ay ma ja myëku'ukën, jëtu'un y'ënä'äny: Tyaajës të nwinkuma'ay: tu'ukën yë tsajpkääky janty mëjpë mëti'ipë oytyunyën mëët yë tsajpmok të kyëpijptsoony jam jëkäm, e ko tu'uk ja wit tëjk të tukja'ty tëë tjijtë'ëky.