Jueces 2:13 - Biblia Mixe de Quetzaltepec

¹³ Ojts t'ëxmajtsnëtë ja Wintsën mëët ko ja wiink tios ojts tpanëjkxtëjkënyëtë tä ja tiosën mëti'ipë tyijtëpën Baal ets ja Astarté.

Biblia Dc en Mixe de Quetzaltepec

¹³ Ojts t'ëxmajtsnëtë ja Wintsën mëët ko ja wiink tios ojts tpanëjkxtëjkënyëtë tä ja tiosën mëti'ipë tyijtëpën Baal ets ja Astarté.

Jueces 2:13 ပူးပေါင်းရင်းမြစ်များ

Jueces 10:6

E yë Israel ja'ayëty ojts jatëkok t'ëxmatstë ja Wintsën ja nyë'ë'aaw tyu'u'aaw, jä'ä ojts tpanëjkxtëkëtë ja Baal ets ja Astarté, ka'apë tyiosëtyën mëti'ipë yë Siria ja'ayëty y'ëwtajtëpën; näjyëtu'un yë Sidónja'ayëty, Moab ja'ayëty, Amón ja'ayëty ets filistejë ja'ayëty. Yë Israel ja'ayëty ojts t'ëxmajtsnëtë Wintsën ets ka'ap ojts t'ëkmëjja'awënëtë.

Salmos 106:36

ojts t'ëwtajnëtë wiink tios mëti'ipë ok ëxëëk myëjajt myëkëpäjtën,

Jueces 3:7

Yë Israel ja'ayëty ka'ap ojts winë oy tuntë tkajpxtë Tios wintum ojts ja Wintsën tja'atyëkooynyëtë ets ojts t'ëwtajnëtë ja Baal ja y'awinax ets ja Astarté ja y'awinax.

1 Corintios 8:5

Oy jam tsajpjotm ets naaxwiiny tää ja tios jyajatyë, paatykyëjxm ja'ay t'ëwtatë.

2 Reyes 23:13

Ojts may tjijtë'ëky ja tsajptëjk mëti'ipë jamën awinmtsow ma ja Jerusalén kajpnën ets ëpa'tkë'ëmtsow ma ja Olivos kopkën mëti'ipë ojts ja Salomón tkojyën, jampë yajkutujkyën Israel; jä'ä tyuknikojëy ja Astarté, mëti'ipë ja Sidónja'ay ja'ayëty y'ëwtajtëpën mëti'ipë ja Wintsën ëxëëk t'ixyën; ojts tnikojë näjyëtu'un ja Quemós, mëti'ipë yë Moab ja'ayëty y'ëwtajtëpën ets tuknikojëy näjyëtu'un yë Milcom, mëti'ipë y'ëwtajtën yë Amón ja'ayëty.

1 Reyes 11:33

Jä'ä ko Salomón ixtijyës xyaj'ijtnë, wiink Wintsën të tpanëjkxtëjkënë ets të t'ëwtajnë ja Astarté yë Sidónja'ayëty nyaaxpotsyëty; näjyëtu'un ja Quemós, mëti'ipë y'ëwtajtëpën yë Moab ja'ayëty ets ja Milcom mëti'ipë Amón ja'ayëty y'ëwtajtëpën. Ëjts ka'apës oy n'ixy ijxtëm yë'ë winë tunyën ets ka'ap t'ëkuuytyuunë ja n'ënä'ämënës ntëyajtënës ets ja aaw ayuk jëtu'un tä tuunyën ja David, mëti'ipë Salomón tyeety'ajtën, mëti'ipës ojts ntukmëwë'ëmyën.

1 Reyes 11:5

Salomón ojts t'ëwtajnë ja tsaatsetsy mëti'ipë ijty tyijtëpën Astarté, mëti'ipë ja Sidónja'ayëty wyintaj'ajtëpën ets ojts näjyëtu'un t'ëwtajnë wiinkpë ja tsaatsetsy mëti'ipë tyijtëpën Milcom, yë'ë Amón ja'ayëty ijty tyijtëp Wintsën, tu'uk awinax mëti'ipë ka'ap yë Wintsën ninu'un timy'ixa'anyën.

1 Samuel 31:10

Ja Saúl ja pyujxn mëti'ipë ijty myëtsiptuunpyën jap ojts yajpëjktä'äky ma ja Astarté ja tsajptëkotën, e ja nyini'kx jam ojts yajkutëy ma ja potsykutukën ma txëëwatyën Bet-sán.

Jueces 2:11

Ja yu'unënëty kyajpxënëty ja Israel ja'ayëty wiink ojts ja Tios t'ixy, jä'ä ko ojts wiink ja tios tpanëjkxtëjkënyëtë mëti'ipë tyijtëpën Baal.

1 Samuel 7:3

Paatykyëjxm ja Samuel t'ënëmaay tëkokyë ja naax kajpn: Pën miitsëty winë aaw winëjot yë Wintsën mnätyukë'ëtëkëtë ets pën mju'taaytyëp ja wiink tios ma mjëën mtëjkëtyën tä yë Astarté mëti'ipë wiink ja'ayëty y'ëwtajtëpën. Ets ja jyuukyajtën yë'ë Wintsën tmo'otëty ets yë'ë y'ëwtatëp. Yë Wintsën nëjkxëp myajtso'okëtë ma filistejë ja'ayëty tyam ëxëëk mtunëtën, pën mkumaaytyëp yë Wintsën ets pën mëjpëjktaktëp.

1 Samuel 12:10

E yë'ëjëty ko jëtu'un jyajtë kyëpäjtë, ënätnëm ots t'ixkaptë pën jëtu'un Wintsënajtp, ets tja'awëy'ijtë ko tëë ënäty pyokytyuntë ko t'ëxmajtstë ja wyintsën Tiosëty ets ko ja wiink tios ojts tpanëjkxtëjkënyëtë tä ja mëti'ipë xyëëwajtëpën Baal ets Astarté; e ojts mëk tmëpëjktsowtë ja Tios ets ojts pyokymyä'kxëtë ets yajtsokëtë ma ja myëtsiptëjkëtyën, ko t'ëwtajtë winë aaw winëjot yi'iyë tu'uk.

2 Crónicas 7:22

Ets nëjkx yaj'ëtsowtë, yë'ëkyëjxm jëtu'un të jyatë, jä'ä ko ojts t'ëxmatstë yë Wyintsënëty, ja Wintsën mëti'ipë ojts t'ëwtatën ja y'ap y'okëty, mëti'ipë jap Egiptë yajpëtsëëmëtën ets paaty näjyëtu'un ëxëëk të jyatë jä'ä ko wiink wintsën të tpanëjkxtëjkënëtë ets të tmëtuunëtë.

Números 25:3

jëtu'un ojts mëj'äämpy tjëkyäjpnëtë ja Baal-peor. Paaty yë Wintsën tukjoot'anpëky yë Israel ja'ayëty,

2 Crónicas 12:2

E jää ma myëmëkoxk jëmëjtpejtyën, ma ënäty ja Roboam yajkutukyën jää ojts ka'ap ja Wintsën t'ëkmëj'ijxnëtë. Ënät ja Sisac nyijajtëtë, mëti'ipë ënäty jap yajkutujkpën Egiptë ets tnitëjkëy ja Jerusalén kajpn,

2 Crónicas 28:3

ojts ja poom tyajjoky tyajwiixy jam ma ja joyjyot txëëwatyën Ben-hinom, ni'ikyë ja y'u'unk y'ëna'k ojts tnino'k tniixaamnë, tukwintsë'ëkë ja ëxëëkpë ku'oypyë, tuunë winë tä ja naax kajpnëtyën mëti'ipë ënäty ja Wintsën të t'ëxkexyën.

2 Crónicas 33:3

Ojts t'akojëtyä'äy ja nyitsajptëjk mëti'ipë jam tunkëjxm kopkkëjxm yajpatëpën, tä ja tsaa ja kepyëty, mëti'ipë ënäty ja tyeety Ezequías të tjijtë'ëkyën, ojts t'apojtsëtyä'äy ja wintsë'këntyakn ets ja Baal ja nyitëjk ets t'oytyuuny ja Aserá y'awinax. Yë'ëpaat ojts t'ëwtajnë ja xëëw po'o mëti'ipë ka'ap jyapaatyën jeexyë t'ëwtaty,

Jeremias 2:20

Tëëyëp xyajtso'ontä'äky maas je'eyë xykyäjpxykyumëtoownaxyën, maas ka'ap xymyëmëtoyën. Je'eyë m'ënany: Ëjts ka'apës tii ntuna'any. Jam muum kepypya'tkë'ëm, jam muum kopkëjxm, je'eyë ojts jam mpokytyuny, ko wiink tios xy'ëwtajty, jëtu'un tä to'oxytyëjk jyot nyini'kx tookyën ets kanaak yë ye'etyëjk tmëët'aty.

Jeremias 16:11

Ënät xy'ëtsowëty: Jëtu'un yë Wintsën y'ënä'äny: Tyaapë paaty jëtu'un jyäty kyëpety jä'ä ko ja m'ap m'okëty ojts xy'ëxmatstës ets ojts ja wiink tios tpanëjkxtëkëtë, yë'ë ojts t'ëwtajtnëtë ets tukwintooynyëtë ja poom; e ëjts jëkäm jëxkë'ëmës ojts xyajwë'ëmnëtë ets ka'ap pën t'ëktuunë ijxtëmës ënäty të ntuk'ënëëmëtën.