Juan 1:49 - Biblia Mixe de Quetzaltepec

⁴⁹ Ënät ja Natanael y'ënëmaayë: Wintsën, mijts ja Tios m'u'unk'ajtëp, mijts ja Israel ja'ay yajkutujkpë.

Biblia Dc en Mixe de Quetzaltepec

⁴⁹ Ënet ja Natanael y'ënëmaayë: Wintsën, mijts ja Dios m'u'unk'ajtëp, mijts ja Israel ja'ay yajkutujkpë.

Juan 1:49 ပူးပေါင်းရင်းမြစ်များ

Salmos 110:1

Jëtu'un yë Wintsën t'ënëmaay yë nWintsënës: Yaatsow u'unyë maas yë n'a'oykyë'ëjën, yaa jëtu'un m'u'unyëty koonëm yë mmëtsiptëjk xymyëmëtakta'ajëty.

Salmos 2:6

Tëës nkënu'kxy mëti'ipës nyaj'ënä'ämäämpyën ma Sión kajpnën, ma Sión kopkën wa'atspë.

Isaías 9:7

Ets jam nyaaxwäätsa'any ma ja David ja kyutujktaknën; këjääjëjaanp ja y'ënä'ämën kyutujkën, ja jotkujk'ajtën ka'ap nëjkx nijëna'a kyixy nyäxy; ja kyutujkën ta'tspëky nëjkx yajpaaty, nëjkxëp tuny ja oypyë nipaye'eyën ets ja tëypyë jaantypë winë xëëw winë kyëjxm. Mëët ko yë Wintsën tmëët'aty yë tsojkën ja'awën, mëti'ipë maaytyääyëpën winë, paaty nëjkx jëtu'un tyunyë jyätyë.

Daniel 9:25

Kopkpëky ko xynyijawëty ets xyjyä'äkyukëty ya'atë: Ma ënäty yajni'ënä'ämën ets yajkoj'oyëty jatëkok ja Jerusalén kajpn ets ma ënäty jyä'tyën ja yajkutujkpë mëti'ipë kënu'kxyën, jä'ä y'itëty wëxtujk sëmaan ets ja në'ë tu'uk ets ja potsy mëti'ipë yaj'akojëjaanpën ma Jerusalén kajpn jä'ä nëjkx pyo'oxy tëkë'px mäjtsk sëmaan, je'eyëp ko mëk nëjkx ja amay jotmay jää y'ity.

Oseas 3:5

Ok jatëkok yë Israel ja'ayëty tniwinpita'antë yë Tios ets t'ixta'aja'antë, mëti'ipë Wyintsën'ajtëpën ets ja David mëti'ipë kyutujkpë'ajtëpën. Ko ënäty tpaaty ja xëëw jëmëjt winta'ak naaxkow nëjkx tnimintë yë Wintsën ets tkukajpxëja'antë ko ënäty jotkujk yajjuuky'atëtë.

Miqueas 5:2

E mijts Belén, mëti'ipë näjyëtu'un yajtijpën Efrata, mutskpë kyajpn'atyën ma Judá kyajpnën, jam tu'uk ënä'ämpë pyëtsëma'any mëti'ipë nëjkx yajkutukyën Israel, yë'ë jyä'äy yë tëëyëpë jyuuky'atën.

Sofonías 3:15

Tëë yë Wintsën tjëpëky ja tëytyu'unën ma mijtsën ets tëë ja mmëtsip tyajjëwa'kta'ay. Yë Wintsën, mëti'ipë jam Israel yajkutujkpën, itkujky yajpaaty ma mijtsën: Mijts ka'ap tii ëxëëkpë xy'ëktsë'kënëty.

Zacarías 9:9

Xoonta'ak mëjwiin këjää mijts Sión kajpn. Akujk jotkujk m'ëwëty mya'axëty, mijts Jerusalén kajpn. Jä'ä ko tää mniminyë mëti'ipë mkutujkpë'atäämpyën, oypyë jyä'äy'ätyën ets mëti'ipë xëmë mëtakpën; je'eyëp ko yu'unk naxym myiny, krukts tyuk'ënyääpy, kyërukts këjxy myiny, yë'ë krukts mëti'ipë nän krukts të yajmëxu'unk'atyën.

Mateo 14:33

Ets pënjaty ënäty jap kepy nëëwinye'epyëjoty, ojts nyäkyoxtënaaytya'akëtë Jesús wyintuuy ets t'ënëmaaytyë: Tëy jëtu'un, Tios U'unk mijts.

Mateo 2:2

Jä'ä ojts tyajtëwtë: ¿Maa ja jutiis ja'ayëty yajkutujkpë të myiny të kye'exy? Tëës n'ixtë ja myëtsa'a xëëwpëtsëmy, paatyës nmintë yë'ëjës n'ëwtatantëp.

Mateo 21:5

Ënëëmëtë yë Jerusalén ja'ayëty: Tää myajkutujkpë mniminëtë yujypyë naxymyëpë, kruktskëjxy y'u'unyë, tu'uk yë jëyujk u'unk mëti'ipë tsëmy pyatsëëmpyën.

Mateo 23:7

ko muum nyëjkxtë jä'ä tsoktë ets ja ja'ay kyajpxpo'kxëtëty wintsë'kën mëët në'ëjoty tu'ujoty ets yaj'ijxpëjkpë yajtijtëty.

Mateo 23:8

Miits këtii yë'ë xytsyojkën'atëty ets ja ja'ay mtijëtëty yaj'ijxpëjkpë, jä'ä ko miitsëty aak tu'kmëku'uk ets tu'uk je'eyë xymyëët'atë ja yaj'ijxpëjkpë.

Mateo 27:11

Tam ënäty ja Jesús twintänë ja yajkutujkpë Poncio Pilato, ko yajtëëwë: ¿Mijts jëtu'un myajkutujkpë ma jutiis ja'ayëtyënë? Tääts ja Jesús y'ëtsooy: Mijts jëtu'un m'ënaanp.

Mateo 27:42

Tëë wiinkëtypë tyajtso'oky, yë'ë kë'ëm ka'ap myäyë nyäyajtso'okëtëty. Yë'ë jutiis ja'ay yajkutujkpë, wa'an kë'ëm kruutskëjxm näyajënäkyë ets nmëpëjkmëty.

Mateo 4:3

Ënät ja mëjku'u nyimiinë ets wyinma'any ixa'anyë, ets y'ënëmaayë: Pën Tios mijts mU'unk'ajtëp, t'ënëëmë ya'atë tsaa ets y'awinpitëty tsajpkääky.

Marcos 15:32

Wä'änts ënät tyam tjënäky tääpë Kristë kruutskëjxm, yë Israel yajkutujkpë, jëtu'unts n'ijxmëty ets nmëpëjkmëty. Yë'ëpaat mëti'ipë ënäty jam mëëtën kruutskëjxm ojts nyëxi'iky tyukxi'ikyë.

Lucas 1:35

Tääts ja tsajpjotmëtë kukäjpxy y'ëtsooy: Minaanp ja Kënu'kxymyëkajtën ma mijtsën, Tios ni'ik këjxmëpë myëk'ajtën myajnitukëtëp ijxtëm tu'uk ja yootsën, paaty ya'atë mëxu'unk mëti'ipë minaanp ja'taanpën, wa'ats yë'ë, Tios U'unk yë'ë.

Lucas 19:38

Tääts y'ënantë: Kënu'kxy mëjjawë ya'atë Yajkutujkpë mëti'ipë myëmiinpyën yë Wintsën yë xyëëw. Wä'än tjam'aty ja jotkujk'ajtën tsajpjotm ets yaa naaxwiiny.

Juan 1:18

Ka'ap pën nijëna'a ja Tios të t'ixy; yë'ë tu'ukyë Tios U'unk, mëti'ipë Tios Teety mëët y'ityën, yë'ë të xytyuk'ijx të xytyuknija'awëmë wi'ix ja Tios.

Juan 1:34

Tëës n'ixy, ëjts ijxpë nija'apës je'eyë ko yë'ë Tios y'u'unk'atyë.

Juan 1:38

Tääts ja Jesús y'ijxwinpijty. Ko t'ijxy tää pyaminëtë ets tyajtëëy: ¿Tii m'ixtaaytyëp? Tääts y'ëtsoowtë: Wintsën: ¿Maa të mja'ajtä'äky?

Juan 1:50

Ets ja Jesús y'ëtsoowë: ¿Paaty mijts të xynyamëpëkyës ko të n'ënëëmë ko të n'ixy jam ma higo pa'tkë'p? Mjaaktimy'ixëp ënät tii wäänë mëj këjää këtiinëm ya'atë.

Juan 18:37

Ënät ja Pilato y'ëtsoowë: Ko jëtu'un m'ëna'any jëtu'un yajja'akyukë, yajkutujkpë yowë mijts. Ënät ja Jesús y'ëtsooy: Mijts jam m'ënaanp, ëjts yajkutujkpë. Ëjts yë'ëjës të niminy naaxwiiny etsës nimëtya'akëty ja tëyajtën. Ni'ëmukë mëti'ipë tyuk'ijtëtëp ja tëyajtën, myëtoow'ijtëp yë n'aaw n'ayukës.

Juan 4:31

Tam ënäty ja y'ijxpëjkpëtëjk myënu'kxta'akëtë: Wintsën, kay wäänë.