Josue 8:2 - Biblia Mixe de Quetzaltepec

² Yë Aí kajpn mëët ja nyiyajkutujkpë mëti'ipë jam ënä'ämpën, jëtu'un nëjkx xyajjaty xyajkëpety tä xytyuunyën yë Jericó. Je'eyëp ko ja mëti'ipë ënäty mtukyajni'o'ktutëpën ja mëtsipëty, jyëkyäpëp miits xyjyä'ä'atëty. Tuknipëjktaakë ets tääpë kajpn ajotkumonë jëxkë'ptsow xynyitëkëty.

Biblia Dc en Mixe de Quetzaltepec

² Yë Aí kajpn mëët ja nyiyajkutujkpë mëti'ipë jam ënä'ämpën, jëtu'un nëjkx xyajjaty xyajkëpety tä xytyuunyën yë Jericó. Je'eyëp ko ja mëti'ipë ënety mtukyajni'o'ktutëpën ja mëtsipëty, jyëkyäpëp miits xyjyä'ä'atëty. Tuknipëjktaakë ets tääpë kajpn ajotkumonë jëxkë'ptsow xynyitëkëty.

Josue 8:2 ပူးပေါင်းရင်းမြစ်များ

Deuteronomio 20:14

To'oxytyëjkëty, pi'k'ëna'këty, jëyujk tsajpkaajëty miits nëjkx xyjyä'ä'atë; tëkokyë mëti'ipë ënäty yë Wintsën të tnikäjpxyën xyjyä'ä'atëty, tuk'it tukxontëmës yë'ë.

Proverbios 13:22

Yë ja'ay mëti'ipë oy määpy tajpën yajwë'ëmëp yë y'ok'u'unk yë kyuma'ayën. Yë pokyjyä'äy nëkoopë tnikoonpety yë wit meeny mëj këjää, ja wit meeny mëti'ipë nyikoonpejtypyën yë'ë wa'ats ja'ay jyä'ä'atäämpy.

2 Crónicas 20:22

Ko tyëjkëtyë ëëwpë yaxpë, ja Wintsën yë'ë ojts kë'ëm tuknipëjktaakë ets ja Moab ja'ayëty ets ja Seir ja'ayëty mëti'ipë jam tso'ontëpën, tsuu poj jyajta'atëty, jëtu'un ojts ka'ap y'ëkmëtaknëtë ma ënäty të tjanimintën ets ëxëëk tuna'antë ja Judá ja'ayëty.

Josue 6:21

Yaj'o'ktaaytyë ja ye'etyëjk, to'oxytyëjk, mëjja'ay, mutskja'ay, jëyujk, tsajpkaa, yë tsajppax ets kupixyny. Wa'ats winë tyajkutëkooytyääytyë.

Jeremias 51:12

Jam xynyikajpxtëty wi'ix yë Babilonyë kajpn yajnitëkën. Kwent'aty yajxon yaj'itë. Pëjkta'aktë yë këwent'ajtpë. Xoktë. Jä'ä ko yë Wintsën ojts tuknipëjktaakë wi'ix tuna'anyën yë Babilonyë ja'ayëty ets ojts jëtu'un tuny tä ënäty të tnikäjpxyën.

Jeremias 17:11

Mëti'ipë ja'ay nätyukyajkumeentyakëpën ja wit meeny ka'apë të tnituntën, jëtu'un yë nyäxy tä tu'uk yë pakëtseyën mëti'ipë wiink jëyujk yë tyaa nyimaajëpën. Ma ënäty yajxon të myëjaawtëkën, jää nëjkx tyëkooytyä'äy ja kyumeenyajtën, tääts nëjkx je'eyë jyaak jëtity ja'akyupojën.

Proverbios 28:20

Mëti'ipë ja'ay tëy tëtä'äky ja'ay'ajtpën, aak oyjya'awëyëp ja'ay; mëti'ipë yi'iyë myëmääpy myëtäjpyën wi'ix kyumeeny'atëtyën, nëjkxëp tkumëtoy.

Salmos 39:6

Tëkokyë yë naaxwiinyëtë ja'ay jëtu'un nyäxy poj'am tä tu'uk yë äpkën; ka'ap nijënu'un tuk'oy'atëty oy jënu'un yë wit meeny nipëjkpät nituumpätëty, jä'ä ko ni yë'ë tkanijawë pën nëjkx tmëwë'ëmy.

2 Crónicas 13:13

Jeroboam tëë ënäty t'ëne'emy ja jyä'äy ets tna'ëwtitëty ja Judá ja'ayëty mëti'ipë ënäty myëtsip'ajtëpën.

Josue 10:28

Jä'ä xëëw ojts ja Moisés tukja'ty ja Maquedá kajpn ets tyajkutëkooy, wa'ats tyaj'o'ktaay ja ja'ayëty mëti'ipë ënäty jam tsënaaytyëpën. Ni pën ojts kyawë'ëmy juuky. Ja yajkutujkpë mëti'ipë ënäty jam ënä'ämpën jëtu'un tyaj'o'ky tä tyaj'o'kyën ja Jericó yajkutujkpën.

Josue 10:1

Yë Adonisédec mëti'ipë ënäty jam ënä'ämpën Jerusalén, ko tnija'awëy ko yë Josué tëë tyajkutëkoy yë Aí kajpn mëët ja nyiyajkutujkpë, ijxtëm ja Jericó kajpn tyajkutëkooyën mëët ja nyiyajkutujkpë ets ko yë Gabaón ja'ayëty tëë mëët nyäpyëkëtë yë Israel ja'ayëty ets tyam tu'ukyë yajpatnëtë. Ko tnija'awëy ko yë Gabaón ja'ayëty tëë mëët nyäpyëkëtë yë Israel ja'ayëty, ni'ikyë ojts tsyë'ëkëtë, jä'ä ko nyija'awëtëp ënäty yë Gabaón ja'ayëty ko jotmëk ijtyëty ets kyajpnëty mëj'äämpy yajpaaty këtiinëm jyëtu'un'atë yë Aí kajpn.

Josue 8:24

Ko tyaj'o'ktaaytyë mëti'ipë ënäty ja Israel ja'ayëty të pyapo'ojëtën, ënät ojts wyimpitë jam kajpnjotm ma Aí kajpnën ets tyaj'o'ktaaytyë wa'ats mëti'ipë ënäty jam juuky të wyë'ëmtën.

Josue 8:19

Ja tsiptuunpëtëjkëty poj'am pyëtsëëmtë mëti'ipë ënäty jam yu'utsy yajpatëpën ko tnija'awëtyë tëë ja Josué tni'ënä'ämë ets tnitëkëtëty ja kajpn. Ko tnitëjkëtyë tää tjëënmooytyë ënätyë.

Josue 8:14

Ko ja yajkutujkpë t'ijxy mëti'ipë jam ënä'ämpën Aí, ënät ojts ënätyë twoowmujkta'ay ja tsyiptuunpëtëjk ets tnitso'ontë ja Israel ja'ayëty. Tninëjkxtë jam joyjyotm ma ja Jordán mëët nyämyëwyinkon'atyën, ni tkanijawë pën jam ja wiinkpë yu'utsy yajpaatë kajpn jëxkë'ëm.

Josue 8:12

Josué jä'ä ënäty yë tsyiptuunpëtëjk të tyu'utsy nimëkoxk mil, jam anajnytsyow ma Betel mëët yë Aí nyäpyäätyë.

Josue 8:9

Ënät ja Josué ojts tkexy ja ja'ayëty ets jam nyäyu'utsëtëty ma Betel mëët nyämyëwinkon'atyën yë Aí, anajnytsyow ma Aí yajpaatyën. E ja Josué jam ojts wyi'imy ma ja tsyënaaytyaknëtyën.

Josue 8:7

Ënät mpëtsëmtëty ënätyë ets ja kajpn xynyitëkëtëty, jä'ä ko yë Wintsën tëë tkë'ëyäky.

Deuteronomio 3:2

Ënätës yë Tios xy'ënëmaay: Këtii tääpë ja'ay xytyimtsë'ëkëty. Jä'ä ko yë'ë tëëjës nkë'ëyäky ma mijtsën, mëët tëkokyë yë tsyiptuunpëtëjk ets nyaax kyajpn. Ets jëtu'un o'ktëy xytyunëty tä xytyuunyën yë Sihón, jampë ënäty y'ëne'emyën Hesbón ma Amor ja'ayëtyën.

Josue 8:3

Ënät ja Josué ojts tyajtu'ukmujkta'ay ja tsyiptuunpëtëjk ets t'ijxka'pxtaay. Tääts tnitëkëja'antë ja Aí kajpn. I'px majk mil twin'ijxy ja tsiptuunpëtëjk mëti'ipë yajxon tsip'ixyëtyën mëti'ipë ojts koots tkexyën,

Josue 8:8

Ko ënäty të xynyitëkëtë, tääts xyjyëënmo'otëty, jä'ä ko jëtu'un ja ënä'ämën myiny.

Deuteronomio 2:35

Yi'iyë tëy yë jëyujk tsajpkaa ets winëjaty mëti'ipë tsoowpaatyën ojts njä'äpëktës, mëti'ipë ijty jyä'ä'ajtëpën ja ja'ayëty tëëpë nyajkutëkoytyënës.

Josue 9:3

E ja Heve ja'ayëty mëti'ipë tsënaaytyëpën Gabaón ojts tnijawëtë wi'ix ënäty të y'ëti'ityën ja Josué jam Jericó ets Aí.

Josue 11:14

Ojts tkupujxta'atë ja ja'ayëty jampë tsyëënëtën, nitu'uk tkayajwë'ëmtë. Yë'ë ojts tjä'ä'ajta'atë ja jëyujk tsajpkaa ets winëjaty jampë yajpaatyën kajpnjotm.