Jeremias 48:37 - Biblia Mixe de Quetzaltepec

³⁷ Tëë ja'ay nyäkyukä'pta'ajëtë, tëë y'awaay tjäjpta'atë; tëë kyë'ë tsujkta'atë ets tëë tuktëjkëtya'atë yë wit mëti'ipë kuump u'kxpën.

Biblia Dc en Mixe de Quetzaltepec

³⁷ Tëë ja'ay nyäkyukä'pta'ajëtë, tëë y'awaay tjäjpta'atë; tëë kyë'ë tsujkta'atë ets tëë tuktëjkëtya'atë yë wit mëti'ipë kuump u'kxpën.

Jeremias 48:37 ပူးပေါင်းရင်းမြစ်များ

Jeremias 47:5

Yë Gaza ja'ayëty je'eyë nëjkx nyäkyukä'ptaayënëtë, yë Ascalón ja'ayëty uum wyë'ëma'antë. Miitsëty Anaquim ja'ayëty ¿wi'ix ko nëkoo mjot mnini'kx xyajtsëtyutë?

Jeremias 41:5

ënät jyajtë nimajkta'px yë ja'ay. Jam tsyoontë Siquem, Siló ets Samaria. Tëë je'eyë nyäy'awaayjyäjpta'ajëtë, këëts këëts ja wyit mëti'ipë myëmiintëpën ets tëë ja jyot nyini'kx tyajtsëtyujta'atë. Tam tmëmintë yë aaypyajk ujtspajk ets poom mëti'ipë tyukwintsë'ëkëjantëpën ja Wintsën.

Génesis 37:34

Ënät yë Jacob ojts yë wyit tukëëtsë ets nyätyukxojxë ja wit mëti'ipë kuumpën u'kxpën ets nyätyukniwëjtaayë naaxway; jekpyaat ojts nijë'ëy niyä'äxy ja myaank ko ënäty të y'ooky të tyëkoy.

Jeremias 16:6

Mëj mutsk nëjkx ja'ay y'ooktë ma ya'atë naax kajpnën; ka'ap pën tyajnaaxtëkëja'any ja o'kpë ets ka'ap nëjkx pën ja o'kpë tniyä'äxy ets ka'ap ma pën nyäyajtsëtyuta'anyë ëkë ja wyääy tkääpa'any mëët ko ënäty ja o'kpë tnimony tnituky.

Isaías 20:2

Jä'ä jëmëjt ojts yë Wintsën tmëkäjpxy yë Jeséas, Amós yë myaank ets t'ënëmaay: Jän tääpë wit mëti'ipë kuumpën u'kxpën, jän näjyëtu'un yë mkë'ëk. Ënät yë Jeséas tjantyjyeeny yë wyit ets nyätyuktekyjyääntutë yë kyë'ëk.

Apocalipsis 11:3

Nkäxäämpyës nimäjtsk yë ijxpë tuunpë, yë'ë wyit'ajtëp yë wit mëti'ipë u'kxpën ets kuumpën ets nikajpxa'antë mëti'ipë tunan jatanëpën tu'uk mil ja mäjtsk mëko'px ja tëkë'px xëëw.

Marcos 5:5

Xëmë muum yä'äxy jyoky xëënaxy tsunaxy, kopkëjxm ets ma ja o'kpë nyaaxtëkëtën ets ja tsaa kë'ëm nyätyukyajtsëtyutyë.

Miqueas 1:16

E mijts Sión kajpn, nëkä'pta'a yë mkuwaay ets xyaj'ixëtëty ko ëxëëk mjaty mkëpety, mëët ko të m'ëxëëktunyë yë m'u'unk m'ëna'k mëkpë xytsyokyën. Jëtu'un mnäkyukääpëtëty tä majkwejkxyën, jä'ä ko yë m'u'unk m'ëna'k wiink naax wiink kajpn tsumy matsy yajmënëjkxa'antë.

Amós 8:10

Ma ënäty ja xëëw tyunyën jää nëjkx ja'ay tyëkëtë yaxpë mëët ko ënäty t'ixtë may ja ja'ay y'o'knëtë, ja mëti'ipë ënäty ëëwtëpën nän nëjkxëp tyëjkënëtë yaxpë mëët ko ënäty may ja o'kpë; nëjkxëp ja wit xytyuktëkëtë monpë tukpë ets nëjkxëp ja mkuwaay xynyëkääptë mëët ko ënäty ja ëyo'on jotmay të y'ity. Jëtu'un nëjkx mya'axtë tä ja'ay yä'äxyën mëti'ipë ja y'u'unk të y'ookyën tu'kpajkpë t'u'unk'atyën ets jëtu'un nëjkx jyëjpkukëxë mëët ja monyëtukyë.

Ezequiel 27:31

Mëët ko ënäty o'ktëy mjaty mkëpety nëjkxëp nyäkyutë'kxn kä'pta'ajëtë, nëjkxëp tuktëkëtë wit tujkxy monpë tukpë ets nëjkx jyë'ëtë ya'axtë mëët ja pëjkën ato'onën.

Ezequiel 7:18

Nëjkxëp tuktëkëtë ja wit mëti'ipë u'kxpën kuumpën ko ënäty pyëkëtë y'atonëtë; aak tsëtyuytyëp ja jyot nyini'kxëty; tsaptsëm ja wyiin jyëjp jyajta'aja'antë mëët ja tsëtyu'un ets aak kutë'kx nyätyuunta'aja'anëtë.

Isaías 37:1

Ko ja yajkutujkpë Ezequías tmëtoowpaty jëtu'unpë ja ayuk, ojts tkë'ëtswä'kxy ja wyit ets nyätyukxojxë ja wit mëti'ipë kuumpën u'kxpën mëët ko ëxëëk nyäjyawëty ets ojts nyijkxy ma ja Wintsën ja tsyajptëjkën.

Isaías 3:24

Je'eyë nëjkx tyokxu'knëtë ijxtëm jeexyë pya'akxuuktën, tejpxy nëjkx yajtukyo'ktsumtë tä jeexyë pyo'owëën yajkëxpëktën, ni'ikyë nëjkx wyääy yajnëkä'pta'atë ijxtëm jeexyë yenyjyäty tmëët'atën; tä jeexyë oywyit tuktëkëtën, këëts wit nëjkx tyajtuntë, tä jeexyë yaj'oytyuntën, anpujxn nëjkx yajtuktsa'atë.

2 Reyes 6:30

Ko ja yajkutujkpë tmëtoowpaty y'ënä'äny jëtu'un ja to'oxytyëjk, mëk ojts tjawë, kyë'tstaay ënätyë ja wyit mëti'ipë ënäty jam nyijän'ajtypyën mëët ja mëkjotmay ets ja äkë. E jä'ä ko jam ënäty potsykyëjxm, may ja ja'ay t'ijxtë ko ja wyit këëts tmëët'aty.

1 Reyes 21:27

Ko yë Ahab tmëtooy jëtu'unpë ja aaw ayuk mëkpë, ënät ojts tkë'tsta'ay ja wyit, aakjä'ä ëxëëk wit ojts nyätyuknijenyë ets y'ayuu'ajty y'ëxëëwajty. Jëtu'un tmëma'ay ja y'ëxëëkwit ets myony tyuk.

1 Reyes 18:28

Yë'ëjëty ni'ikyë ja jyänty ya'ax jyänty joktë, nyänyitsuk nyäkyutsukëtë, mëët yë tsujkn ëkë mëët yë ku'umën, jëtu'un tä ënäty tuunk'atën, koonëm yajxon ne'pnytyääytyë.

Levitico 19:28

Këtii yë mnini'kx nëkoo xyajtsëtyutëty ko pën y'ookëty. Ets këtii nëkoo tii ijxën xykyëxja'atëty ma mnini'kxëtyën. Ëjts jëtu'un Wintsën.

Génesis 37:29

Ko yë Rubén jatëkok wyimpijty ma ja nëëjutën, ka'ap ojts t'ëkpatnë ja y'uty José, tä ja wyit, mëti'ipë ënäty jam pyëjktäkpyën, t'akë'tsëy tyajnikëxë'ëky jëtu'un ko ënäty mëk tjajawë ko ja y'uty të tyëkoy.

Jeremias 49:3

Jë'ë ya'ax mijts Hesbón kajpn, ko tëë ja Aí kajpn kyutëkoy. Nasyaaxëtë miitsëty to'oxytyëjkëty mëti'ipë jam Rabá kukajpnajtëpën. Tuktëkëtë ja mwit mtujkxyëty mëti'ipë kuump u'kxpën ets mnäkyätykyupëtëty. Jëtu'un mpëyë'knax mpëyë'ktëkëtëty tä jeexyë mpojëtën, yajtsëtyutë mjot mnini'kxëty. Jä'ä ko ja Milcom mëti'ipë m'ëwtajtëpën, wiink naax wiink kajpn të yajmënëjkxy tsumy matsy mëët ja teetytyëjkëty ets ja ja'ayëty mëj'äämpyë y'itën.

Ezequiel 29:18

Tëë yë Nabucodonosor, yë Babilonyë yajkutujkpë, tkexy yë tsyiptuunpëtëjk jam Tirë; wa'ats të tkukä'pta'atë yë ja'ay ets may mëti'ipë kyejky të pyutsë'knën; yë Nabucodonosor ets jyä'äy nitii tkapaatë ko yë Tirë kajpn të tnipëtë'ëky.

1 Crónicas 19:4

Ënät ja Hanún ni'ënä'ämëy ets ja David ja jyä'äy yatsumtëty, tääts t'ënëmaay ja tyuunpëtëjk ets ja y'awaay tjäjpëtëty ets tkë'tsëtëty ja wyit jampaat tkë'tskëtakëtëty ma ja y'ixtuuntyën. Tääts jatëkok t'ëxmajtsy.