Jeremias 33:3 - Biblia Mixe de Quetzaltepec

³ Ëjts mëkajpxk ets n'ëtsowëty ets ntuk'ixëty mëjwiinpë këjääpë ja winma'any mëti'ipë yu'utsy'ijtpën, mëti'ipë ka'ap xynyijawën.

Biblia Dc en Mixe de Quetzaltepec

³ Ëjts mëkajpxk ets n'ëtsowëty ets ntuk'ixëty mëjwiinpë këjääpë ja winma'any mëti'ipë yu'utsy'ijtpën, mëti'ipë ka'ap xynyijawën.

Jeremias 33:3 ပူးပေါင်းရင်းမြစ်များ

Jeremias 29:12

Ënät nëjkx miitsëty xymyëkajpxtës ets nëjkx xynyimintës mëët yë oyjyot oywyinma'any, nmëtoow'itäämpyës ijxtëm ënäty miitsëty m'ëna'antën.

Isaías 65:24

Ka'anëm ënäty xymyëkajpxtës koos n'ëtsoowinpitëty, ka'anëm ënäty kyajpxpëtsëmtë koos nnijawëty wi'ix y'ëna'ana'antën.

Efesios 3:20

E tyamm, mëj'äämpy ja Tios nyäxy, ko tmëët'aty ja mëk'ajtën ets winë tunëty, wäänëni'ik këtiinëm ijxtëm n'amëto'owëmën ëkë ijxtëm nmëma'ay nmëtajëmën, oy ko tmëët'aty ja kutujkën ets winë tunëty ma ëëtsajtëmën.

Isaías 48:6

Mijts tëë wa'ats xynyijawë mëti'ipë tyam yaj'ijxp yajtuunpën, ets kopkpëky ko xykyupëky ko mëtëy. E tyam yë'ë ntuk'ëwaanëjäämpy jempyë, yu'utsypë ka'apë xynyijawën,

Salmos 91:15

Koos xymyëkajpxëty, n'ëtsowäämpyës; ëjts kë'ëm yajpaataanp mëët yë'ë. Nyajpëtsëmäämpyës ma ënäty myony tyukyën etsës nyajnaxa'any kumay;

Deuteronomio 4:29

E pën miitsëty mja'amyäjtstëp jatëkok ja mWintsënëty mëti'ipë mTiosajtëpën ets winë aaw winëjot xymyëkajpxtë, nëjkxëp xypyaatë.

Salmos 50:15

Mëkajpxkës ko ënäty mijts mon tuk myajpaaty; ëjts mijts nyajnitso'okëp ets jëtu'unës mijts xy'oyjawëty.

Salmos 145:18

Yë Wintsën winkon yajpaaty ma ja'ayën mëti'ipë mëkajpxëpën, mëti'ipë mëkajpxëpën winë aaw winëjot.

Deuteronomio 4:7

Jä'ä ko ¿Ma jëtu'unpë n'ëkpatmëty wiinkpë kajpn mëti'ipë myëwinkon'ajtypyën Tios. Ets nWintsën'ajtëm Tios xëmë yajpaaty ma ëëtsajtëmën oy jëna'a ntimmyëkajpxa'anmëty tää'ajtp?

Hechos 2:21

Ets ni'ëmukë ja ja'ayëty mëti'ipë ja Wintsën ja xyëëw kyajpxpatëpën, jä'ä nëjkx nyitso'oktë. Tääts ja Pedro jyaak'ënany:

Amós 3:7

Yë Wintsën ka'ap tii tuny ajotkumonë pën ka'ap jëyëjp të tuk'ëwaanë yë tyuunpë mëti'ipë käjpxynyajxpën.

Salmos 25:14

Yë Wintsën y'oyjya'ap yë ja'ay mëti'ipë mëjpëjktakëpën, ets tyuknija'ap ja käjpxytyu'unën.

Isaías 45:3

Mijts nmooytya'ajäämpy winë: mëti'ipë tsoowpaatyën, mëti'ipë yu'utsy ijtpën ets mëti'ipë pëjkë'ëky ijtpën, ka'apë ni pën tnijawën ets xynyijawëty koos ëjts jëtu'un Wintsënajtp; mëti'ipë yë Israel ja'ay Tyios'ajtëpën ets mëti'ipë mxëëw mtukmëkajpxëpën.

Apocalipsis 2:17

Pën ja tyatsk tyukmëtoopy, wä'än tmëtoowkukë wi'ix ja Kënu'kxymyëkajtën t'ënëëmën ja mëpëjkpëtëjk. Pën mëtakp, ntukjë'kxäämpyës ja maná mëti'ipë yu'utsy ijtpën ets nän nmo'ojäämpyës tu'uk ja poop tsaa ma jap myinyën kuja'ay tu'uk ja xëëw jempyë, mëti'ipë ka'ap pën nijawën, yi'iyë nyija'ap mëti'ipë y'ëxajëpën.

Mateo 13:35

Paaty ya'atë tyuunë jyajtë ets y'atëwëty mëti'ipë Tios tyukkajpxnajxën ja kyäjpxynyajxpëtëjkëty: Mëëtës yë Ijxpät nmëtya'aka'any; nikajpxëpës mëti'ipë ka'anëm yajnijawën ko naaxwiinyëtë tsyo'ontäky ets tyampaat.

Miqueas 7:15

Tuk'ix ja mëj'ajtën mëjwiinpë këjääpë, jëtu'un tä ijty tëëyëpën ko ojts jap Egiptë xyjyuuty.

Joel 2:32

E tu'kë'ëyë mëti'ipë yë Wintsën y'ëwtajtëpën, nëjkxëp tsyo'oktë o'këntuuy; jä'ä ko jam ma Sión kopkën ets ma Jerusalén kajpnën, jam'ataanp ja nitsokën tä yë Wintsën të twinwanën. Mëti'ipë të twin'ixyën nëjkxëp jyuuky'atë.

1 Corintios 1:2

Tyamës ja mëpëjkpëtëjk ntuknikäxtë ja noky mëti'ipë ye'eymyujktëpën jam Corinto ets tu'ukyë y'itë mëët ja Kristë Jesús, mëti'ipë ja Tios të yaxtsowëtën ets jyuuky'atëty wa'ats, miits ets ni'ëmukë mëti'ipë ja Jesukristë xyëëw kyajpxpatëpën, ëëts nWintsën'ajtëmë ets näjyëtu'un yë'ëjëty.

Jeremias 23:35

Ko pën tyajtëwëty yë jyiiky myëku'uk ëkë myëyääk myëkä'äx, jyëkyejpy t'ëtsowëty: ¿Tii ëtsoowinpijtën yë Wintsën yäjkpy, wi'ix yë'ë y'ënaanpë?

Jeremias 32:17

Mijts Wintsën, mëët ja mëk'ajtën ets ja kutujkën të xyajkojy ja tsajp ets naaxwiinyëtë, ka'ap nitii tsip xyjyawë.

Jeremias 32:27

Ëjts jëtu'un Wintsënajtp, mëti'ipë Tyios'ajtëpën tëkokyë juukpyë. Nitii kyatsiptä'äky mëët ëjts.

Daniel 2:18

ets t'amëtow tpëjktsowtëty ja Wintsën ets myo'ojëtëty ja wijyajtën, këtiipë yaj'ookëtëty ja yajkutujkpë mëët ja wijyjyä'äytyëjkëty mëti'ipë Babilonyë ja'ayëtyën.

Daniel 2:22

Yë'ë yaj'ijxëp ets yë'ë yajnikëxë'kpy ja jot winma'any tsipë ets yu'utsypë; nyija'ap mëti'ipë akootstuuy yajpatpën, jä'ä ko yë'ë myëët'ajtyp yë jajën të'kxën.

Daniel 2:23

Mijts Tios, mëti'ipë Tyiosajtën yë nteety n'apës, tyam nkukajpxë nja'awëkyëtä'äky ets tyam ntukxoontä'äky, jä'ä ko mijts tëëjës xyajwijtyä'äky ets tëëjës xymyo'oy yë wijyajtën; e mijts tëëjës ënät xytyuknijawë mëti'ipë të n'amëtowtën: Tëës xytyuknijawëtë mëti'ipë ënäty ja yajkutujkpë myëmääpy myëtäjpyën.