Jeremias 30:18 - Biblia Mixe de Quetzaltepec

¹⁸ Jëtu'un yë Wintsën y'ënä'äny: Nyajtëkatsanëpës yë Jacob yë nyaax kyajpn, npa'ëyowäämpyës jatëkok tääpë naax kajpn; nëjkxëp yaj'akojëtyä'äy yë potsykyutuk ets kutujkëntëjk, jam nëjkx jatëkok nyaaxkëtä'äky ma ënäty të y'ityën.

Biblia Dc en Mixe de Quetzaltepec

¹⁸ Jëtu'un yë Wintsën y'ënä'äny: Nyajtëkatsanëpës yë Jacob yë nyaax kyajpn, npa'ëyowäämpyës jatëkok tääpë naax kajpn; nëjkxëp yaj'akojëtyä'äy yë potsykyutuk ets kutujkëntëjk, jam nëjkx jatëkok nyaaxkëtä'äky ma ënety të y'ityën.

Jeremias 30:18 ပူးပေါင်းရင်းမြစ်များ

Salmos 102:13

Pëtë'ëk ets pa'ëyow yë ja'ay mëti'ipë jam tsënaaytyëpën ma Jerusalén kajpnën, tëë yë xëëw jëmëjt kya'pxnë; tëë xëëw tpatnë ets xypyokymyä'kxëty.

Jeremias 30:3

jä'ä ko miimp ja xëëw po'o maas ja nnaax nkajpn jatëkok tpaata'anyën yë oyajtën, yë'ë n'antijpyës yë Israel ja'ayëty ets Judá ja'ayëty. Ëjts Wintsën, ëjts ënaanp. Nyajwinpitantëpës jatëkok jam ma ja naaxwiinyëtën mëti'ipës nmooytyën yë y'ap y'okëty.

Jeremias 33:7

Nyajtëkatsäämpyës yë Judá ja'ayëty ets Israel ja'ayëty yë jyuuky'ajtënëty etsës jatëkok nyaj'oyëja'any tä ijty tëëyëpën.

Jeremias 49:39

Je'eyëp ko nëjkxëpës ok jatëkok nyaj'oyë yë Elám ja'ayëty yë jyuuky'ajtënëty. Ëjts Wintsën, ëjts ënaanp.

Jeremias 23:3

Ëjts kë'ëm jatëkok nyajminäämpy yë n'u'unk n'ëna'kës mëti'ipës jëtu'un nmëët'ajtypyën tä kupixynyën ets jatëkok nyajmujkta'aja'anyës ma ja naax kajpnën ma ojts tsyoontën, jam nëjkx kyäytyë y'uuktë akujk jotkujk ets ja y'u'unk y'ëna'k tyajyääk tyajpatëty.

Zacarías 1:16

E paaty n'ëna'anyës, ëjts Wintsën: Mpa'ëyoopyës ja Jerusalén kajpn, paatyës yam nyajkutukäämpy ets ja tsajptëjk ets ja naax kajpn jatëkok yajkoj o'oyëtya'atëty.

Jeremias 46:27

Këtii mtsë'ëkëtëty, miitsëty yë Jacob y'u'unk y'ok mëti'ipës xymyëtuuntëpën, këtii mtsë'ëkëtëty miitsëty Israel ja'ayëty. Ëjts miitsëty nyajtso'onkantëp ni'ëmukë mëët yë m'u'unk m'ëna'këty oy ënäty jam muum wiink naax wiink kajpn myajpaatë tsumy matsy. Nëjkxëp jatëkok jëna'a jotkujk mjuuky'atë, ni pën mka'ëtsë'ëkëtëty.

Jeremias 49:6

Je'eyëp ko nëjkxëpës ok jatëkok nyaj'oyë ja Amón ja'ayëty ja jyuuky'ajtënëty. Ëjts Wintsën, ëjts ënaanp.

Isaías 44:26

E ja ntuunpës ja y'aaw y'ayuk ëjts kë'ëm ntuknipëjktakëp ets y'atëwëty, mëti'ipë myääytyëpën tyajtëpën tyunëtëty jyatëtëty ijxtëm të tuknipëjktaakëtën. Tyamës nnikäjpxy ko ja Jerusalén kajpn yajtuktsëënëjaanp jatëkok ets Judá kajpn nëjkxëp jatëkok yajkoj'oyë. Ëjts të ntuknipëjktaakë ets yajkoj'o'oyëtya'ajëty jënu'un xit ko'ow yajpaatyën.

Jeremias 31:4

Tëë jatëkok nyaj'oyës ja mnaax mkajpn. Ets mminëty jatëkok akujk jotkujk mëët ja xuxn, ak ets äjtspë pujtpë.

Jeremias 33:11

ja ëy xoontä'äky ets xuxën wojpën. Nëjkxëp ja pëjkpë ukpë yajwinxoonta'aktë ets ja ja'ay tyaka'antë ja wintsë'kën, tyajnaxa'antë ja kukajpxën.

1 Crónicas 29:19

Tun yë mëyajtën, mo'o yë n'u'unk nmaayës Salomón ja oypyë ma'ayën tajën ets ja oypyë jot winma'any, wä'än tyajtu'uye'ey oy tsuj yë tyuunk ma tpatunëtyën ja m'ënä'ämën mtëyajtën, mnë'ë mtu'u ets ja m'aaw m'ayuk ets yë'ë tkuuytyunëty, tkojëty ja mjëën mtëjk mëti'ipës të nitun të niye'eyën.

Jeremias 29:14

N'a'ixëjäämpyës ets miits xypyaatëtyës ets nyajkutukäämpyës ets y'oyëtëty ja mjuukyajtënëty: nëjkxëp nyajtsoontë muum wiink kë'ëy wiink kajpn ets oymyaajëty ma ojts nnajtswopëtën ets jatëkok nyajwinpita'antë ma ya'atë naax kajpnën ma mtso'ontën. Ëjts Wintsën, ëjts ënaanp.

Isaías 44:28

Jëtu'unës n'ënëëmë yë Ciro: Tyampaat ka'ap ënäty maa të yajnijawë'aty yë Ciro xyëëw, mëti'ipë jam Persië yajkutujkpën, oy muum pën të tjanimëtyä'äky. Mijts yë'ë mtunëp mëti'ipës ëjts ntsojkpyën xytyunëty. Yë Jerusalén kajpn jëtu'unës n'ënëëmë: mijts myajkoj'oyëjaanp jatëkok, yë mtsajptëjk nëjkxëp jatëkok yë nyipotsy ëjx tya'tspëky.

Jeremias 31:38

Jëtu'un yë Wintsën y'ënä'äny: Pyatäämpy ja xëëw maas ja nkajpn nëjkx yajkoj'oyën jatëkok, nëjkxëp yajkoj'oyë ja Hananel ja kyëjxmpotsy ets tyimja'tëty jampaat ma ja Tëjkëtyaknën ets jampaat ma y'ëwtijtë'ëkyën.

Jeremias 31:23

Yë Wintsën mëti'ipë maaytyääyëpën winë, yë Israel ja'ay yë Tyiosëty, yë'ë ënaanp: Ko ënäty nyajtëkajtsës yë Judá ja'ay yë jyuuky'ajtënëty ets ko ënäty jam jatëkok yajpaatë ma nyaax kyajpnëtyën, jëtu'un nëjkx y'ëna'antë: Yë Wintsën kyënu'kxëp ya'atë tun kopk wa'atspë ma jyää'atyën mëtëypyë nipaye'eyën.

Zacarías 12:6

Jä'ä xëëw, jëtu'un tä jëënpajkën nyaj'awinpijta'aja'anyës yë wintsëntëjkëty mëti'ipë jam Judá yajpatëpën, ëkë jëtu'un tä jëënyä'änkën mëti'ipë akëxë'këpën ajktsjoty. Anajny aka'any nëjkx tyajtooytyëkoytyë yë naax kajpn mëti'ipë mëët tyu'kmëtsëpa'an'atën, e yë Jerusalén ja'ayëty jotkujk nëjkx jam kyajpnjotm jyuuky'ajtëpë.

Salmos 78:69

Ojts tu'uk yë tsajptëjk tkojy, jëtu'un kyëjxmëty tä tsajpën, jëtu'un tyaj'ita'any xëmëkyëjxm tä yë naaxwiinyëtë y'ijtëyën.

Nehemías 7:4

Mëj naax mëj kajpn ënäty tääpë Jerusalén kajpn, je'eyëp ko niwäänë ënäty jap ja'ay jä'ä ko may ënäty ja tëjk ka'ap yajkoj'oyënëm.

Salmos 85:1

Wintsën, janty'oy yë mwinma'any xyajnikëxë'ëky mëët ya'atë mnaax mkajpn. Ix tëë jatëkok xymyo'oy yë jyotkujk'ajtën yë Jacob yë nyaax kyajpn,

Zacarías 14:10

Joyjyot nëjkx yë naax kajpn y'awinpity. Tsyo'onta'akëty jam Gueba ets tyimja'tëty jam rimón ëpa'tkë'ëytsyow ma Jerusalén kajpn wyi'imyën. Këjxm nëjkx yë Jerusalén kajpn yajpaaty. Jam yë ja'ay nëjkx tsyëënëtë. Jam ma ja potsyën mëti'ipë kajpn nyapots'ajtypyën jam tsyo'onta'akëty ja tëjk'aaw mëti'ipë xyëëwajtypyën Benjamín ets tyimja'tëty jam ma Tëjk'aawën ma jam Y'ëwtityën, jam nyajxë'ëkëty ma ja potsyën mëti'ipë kujkyë tënääpyën ma txëëwatyën Hananel ets jya'tëty ma ja olivë on yajwinma'atsyën mëti'ipë ja yajkutujkpë jyä'ä'ajtypyën.

Jeremias 31:40

Jampaat ma ja joyjyotën ma nyaaxtëkëtën yë o'kpë ets ma yajwëjyën yë kuyjaam ets ja yu'uyjyot mëti'ipë jam winkon ma Cedrón wokën, tyimja'ty jam ma këwaaytyëjk'aawën, jampaat maatsow ja potsy tyäkën maatsow yë xëëw pyëtsimyën, ëjts nëjkx nyajtuknikënu'kxë. Ya'atë naax kajpn ka'ap nëjkx nijëna'a pën t'ëkyajkutëkooynyë ets t'ëkyajma'tnë.

1 Crónicas 29:1

Ok ja yajkutujkpë t'ënëmaay ja mayjyä'äy: Yë n'u'unkës Salomoon, ja tu'ukyëpë ja Wintsën të twin'ixyën, mutsknëm yë oy, e ja tuunk mëti'ipë të tyuka'ayën mëjwiin këjää yë'ë, jä'ä ko ka'ap jyëtu'unëty tä ja'ay kutujkëntëjk je'eyë tkoyën, yë'ë Wintsën jyëën tyëjk kyojanëp.

Salmos 48:3

Tios yë'ë jam yajpatp ma akujktëjkën jam Jerusalén tëë Tios nyänyikäjpxyë ko yë'ë tsoktakn'ajtp xëmëpë y'ityën.

Salmos 48:13

ixtë wi'ix nyapotsyëtyën ets ixtë yë kyëmoontëjk, ets tjëkyäpëty wi'ix xytyukmëmëtya'aktëtyën mëti'ipë juuky'atantëpnën.

Salmos 122:7

Wä'än tjam'aty yë jotkujk'ajtën ma naax kajpnën; ets wä'än tjam'aty yë jotkujk'ajtën ma ja mkutujktaknën.

Jeremias 29:11

Ëjts nija'ap wi'ixës nimay nitajën winë mëët miitsëty ets oy mjuuky'atëty ka'ap y'ëxëëkëty, jotkujk myajpaatëty. Ëjts Wintsën, ëjts ënaanp.

Jeremias 32:15

Jä'ä ko yë Wintsën mëti'ipë maaytyääyëpën winë, mëti'ipë yë Israel ja'ayëty Tyios'ajtëpën, jëtu'un y'ënä'äny: Ma ya'atë naax kamtëjkën nëjkxëp jatëkok yaa naax kam yajjuy yajkëpety ets nëjkx yë jëën tëjk yajkojy yajmä'kxy ets nëjkxëp yaa jatëkok ja tsatsymkyam yajpëjktä'äky.

Ezequiel 36:11

Nyajnimayëjäämpyës yë ja'ay ets jëyujk ma miitsëtyën ets may'äämpy y'awinpitëty. Nimay nëjkx ni'ik m'itë jëtu'un tä ijty tëëyëpën ets nëjkxëp mjotkujkëtë. Ënät nëjkx xynyijawëtë ko ëjts Wintsënajtp.

Amós 9:14

Ënätës nyajmina'any ja nnaax nkajpnës mëti'ipë ënäty të yajpaatyën tsumy matsy wiink naax wiink kajpn. Ets nëjkx tkoj'o'oyëtya'atë ja kajpn mëti'ipëjaty të jyityën ets jam jyuuky'atëty; nëjkxëp yë tsatym tniyu'ujëtë ets nëjkx t'uuktë yë tsatym nyëë; nëjkxëp tkojtë tpäntë yë y'ääy y'ujtsëty ets y'ääy kyepyëty mëti'ipë jyë'kxtëp pyëktëpën.

Zacarías 1:12

Ënät ja Wintsën ja tyäjpjotmëtë kukäjpxy y'ënäny: Wintsën mëti'ipë maaytyääyëpën winë, tëkë'px majk jëmëjt tyam nyëjkxnë ma mijts xymyëtsipë'atyën yë Jerusalén kajpn ets tëkokyë yë Judá kajpn. ¿Jënaak jëmëjt jyaak naxa'any etsës xymyëët'atëty ja pa'ëyo'ow mnajts'ëyo'owën?

Zacarías 12:7

Je'eyëp ko ëjts Wintsën, jëyëjpës yë Judá y'u'unk y'ëna'k nyajtso'okanë, këtiipë yë David yë y'u'unk y'ok nyämyëjawëtëty ets këtiipë yë Jerusalén ja'ayëty mëj këjxm nyäyajnaxëtëty ma ja myëku'uktëjkën mëti'ipë Judá ja'ayëtyën.

Salmos 102:14

Yë mtuunpëtëjk janty'oy nyäyjyawëtë ko t'ixtë ja tsaapotsy, e tyam je'eyë tjaakpa'ëyowtë ko t'ijxnëtë kujy ka'atsy ja tsaanë.

Jeremias 32:44

Nëjkxëp yajjuy yajkëpety yë naax kam ets nëjkx yajxon yë nyinoky yaj'oytyuny tsa'ay pëky mëët ja mëti'ipë ijxp nija'apën. Ya'atë jam jëtu'un tyuna'any jyata'anyë ma Benjamín y'itjotmën, ma Jerusalén pya'a nyuxën ets Judá nyaax kyajpnën, jëtu'un mëti'ipë tunjoty kopkjotyën ets jëtu'un mëti'ipë joyjyotyën; näjyëtu'un mëti'ipë jam Négueb yajpatpën, jä'ä ko ëjts nyajkutukäämpyës ets nëjkx tëkatsy jyuuky'ajnëtë. Ëjts Wintsën, ëjts ënaanp.