Isaías 48:8 - Biblia Mixe de Quetzaltepec

⁸ Mijts ka'ap ënäty ni ma jëtu'unpë xymyëtoynyëm ets ka'ap ënäty xynyijawë, jä'ä ko mijts nat xëmë të mnäypyëjktä'äkyë. Ëjts wa'atsës të nijawë ko mijts ka'ap oy të mjuuky'äty, Nija'apës ko je'eyë të mkäjpxykyumëtoownaxy, jä'ä xëmë të myajtijy ko ka'ap mja'akyukë.

Biblia Dc en Mixe de Quetzaltepec

⁸ Mijts ka'ap ënety ni ma jëtu'unpë xymyëtoynyëm ets ka'ap ënety xynyijawë, jä'ä ko mijts nat xëmë të mnäypyëjktä'äkyë. Ëjts wa'atsës të nijawë ko mijts ka'ap oy të mjuuky'äty, Nija'apës ko je'eyë të mkäjpxykyumëtoownaxy, jä'ä xëmë të myajtijy ko ka'ap mja'akyukë.

Isaías 48:8 ပူးပေါင်းရင်းမြစ်များ

Salmos 58:3

Yë ëxëëkja'aytyëjk jëtu'un tmëmëxu'unk'atëtë ëxëëk jot ëxëëk winma'any, yë antakpëtëjk ka'anëm myintë naaxwiiny ko yajpaatë jëkäm mëët ja tëyajtën.

Malaquías 2:11

Yë Judá ka'ap yë Tios twinkutsë'ëkë, nëkooyë ja'ay winë tuuntëkooynyëtë jam Jerusalén ets jam Israel. Yë Judá tëë yë wintsë'kën tyajtëkoy ma Wintsën yë tsyajptëjkën mëti'ipë mëk tsyojkpy jya'apën ets Judá ja'ayëty yë'ë mëët ja to'oxytyëjk të pyëjknëtë mëti'ipë wiink tios y'ëwtajtëpën.

Oseas 5:7

Tëë yë Wintsën tmëtëkoytyë, jä'ä ko tam yë y'u'unk tmëëtëty mëti'ipë wiinkteety tyeety'äjtypyën. Mëët ko ja pëjkën ukën të tkawinkutsë'ëkë, tu'kpo'o je'eyë nëjkx yë nyaax kyajpn kyam y'ëyo'onpata'ay.

Jeremias 6:10

Ënätës n'ëtsooy: ¿Pën jëtää y'ëkmëtowäämpy jëtu'unpë aaw ayuk koos nimëtya'akëty ets koos pën jëtu'un nja'ënëëmëty? Jëtu'un yajpaatë atsi'tstuky yowë tyatskëty. Ka'ap myëtowtë, ka'ap oy tmëtowtë yë m'aaw m'ayuk, je'eyë tnëxi'ik tukxi'iktë.

Efesios 2:3

Näyjyëtu'un ijty njuuky'ajtëm ni'ëmukë, yë'ë npatu'unëm ja nkë'ëm winma'any'ajtëm, ja poky ets ja ëxëëk atsojkën. Jëtu'un ijty n'ijtëm ijxtëm ja ja'ay oy pyënëtyën, paatykyëjxm ijty xypyaat'ajtëm ja Tios ja myëj tëytyu'unën.

Jeremias 5:11

Tëë yë Israel ets Judá xykyë'ëyäkyës maas yë nmëtsipën. Ëjts Wintsën, ëjts ënaanp.

Jeremias 3:20

E miitsëty jëtu'un të m'ëtëtsnëtë tä tu'uk to'oxytyëjkën mëti'ipë ka'ap nyiye'etyëjk tmëj'ixy tmëjpëjktä'äkyën, jëtu'un miitsëty ka'ap të xy'ëkmëj'ijx të xy'ëkmëjpëjktaknëtës. Ëjts Wintsën, ëjts ënaanp.

Isaías 50:5

Yë Wintsën yë'ëjës të xymyo'oy ijxkujk ja'aykyujkën, e ëjts käjpxykyupëjkpë të nnäpyëjktä'äkyës ets ka'apës ni'ikyë të nnäyu'ts të nnäkyiiyënë.

Isaías 48:4

Ëjts nija'apës ënäty wa'ats ko mijts nijënu'un mkakäjpxyjyä'äkyukë, tsip ets myajkajpxwijëty, jëtu'un ja mjot mwinma'any tä tsaajën tä pujxnën, ka'ap nijënu'un tii nyäkjyätyë.

Isaías 46:8

Ja'amyätstë ya'atë, pokyjyä'äytyëjkëty, këtii tii mnätyukwin'ëënëtëty, mëmay mëtajtë yajxon oy.

Isaías 26:11

Mijts Wintsën janty jëjp'ixy jam xyjyamëët'aty yë tëytyu'unën, je'eyëp ko yë ëxëëkja'aytyëjk nijënu'un mëj tkatimy'ixtë; ko ënäty t'ixtë wi'ix yë mtsojkën mja'awën xyaj'ixyën ma mwa'atsja'aytyëjkën, jää nëjkx tukxi'iky ja ëxëëkja'aytyëjkëty wyë'ëmtë. Jääpëk jeexyë ja mtsip m'äkë yajkëxëtë.

Isaías 21:2

Mëk oy yajmëtoy mëti'ipës ja Wintsën të xytyuk'ëwaanën: Mëti'ipë ja myëku'uk kyë'ëyäjkpyën, tëë ja jëtu'un tuny; mëti'ipë yajkutëkoopyën winë, të ja jëtu'un tuny. Pëtë'ëk mijts Elám ets mijts Medë ja'ayëty, nëjkx mtsiptuntë. Ëjts ka'apës n'ëkupëkanë ets pën je'eyë nyikajpx nyimëtya'akëty.

Salmos 51:5

Tyamës yajxon nikäjpxy koos ëxëëkës nja'ay'äty, jëtu'unës ntimmyiiny ntimyjyä'äjty naaxwiiny naaxkëjxy pokyjyä'äy, koos ënäty njap'atynyëm ntaakës jyootjoty.

Salmos 40:6

Mijts ka'ap xytyukjotkëtä'äky ko ja jëyujk ooky myajtukwintsë'ëkë, ëkë ko ja aaypyajk ujtspajk myajtukwinkupëkë; ni yë'ë të xykya''amëtoy wintsë'kën ets tii myajtukmëyoxëty. Mijts ni'ikyës yë nkopk ntatsk të xyaj'ëwatsë.

Oseas 6:7

E ëjts yë nnaax nkajpnës, nän timjëtu'un të y'ëti'itsy Adankën, tëë tkäjpxykyumëtoownaxtë ja käjpxytyu'unën ets wiink winma'any të tpatnëtë.

Jeremias 5:21

Kajpn, ja ka'apë jyä'äkyukën ets ka'apë wyinma'anyën, mëti'ipë jyamëët'ajtypyën wyiin ets ka'ap y'ixy, mëti'ipë jyamëët'ajtypyën yë tyatsk ets ka'ap myëtoy.

Isaías 33:1

Janty mon janty tuk mijts myajpaaty mëti'ipë naax kajpn mye'tsypyën ets mits ka'ap myajmeetsy; mëti'ipë jyiiky myëku'uk kyë'ëyäjkpyën ets mijts ka'ap pën mkë'ëyäkyë. Ko ënäty tëë xyajkutëkooytyä'äy ja naax kajpn, tääts nëjkx mijts mkutëkoy, ko ënäty tëë ja mmëku'uk xy'ayäky xykyë'ëyäky, tääts nëjkx mijts myajkë'ëyäky.

Isaías 42:25

Paatykyëjxm tyukjoot'anpëjkëtë ets tyiytyuunëtë mëët ja tsip käjpxy mëti'ipë toopyën jëënën; e oy ëxëëk jyajajty jyakëpejty kä'äpyëm ojts jyä'äkyukëtë.

Isaías 47:11

Je'eyëp ko minaanp ja ëyo'on jotmay ma mijtsën, oy jënu'un tii xyjyatunëty ma mpatoy mpano'okyën, ka'ap tii xytyunëty. Ja ëyo'on jotmay mëti'ipë mtukëtakëpën, ka'ap tjëkyepy xykyukä'äkëty; ka'ap ënäty tii xy'aawëty xyjyotëty ko ja amay jotmay mtukja'tëtëty.

Isaías 48:7

mëti'ipë tyam naamkojpën, ka'ap yë'ëjëty tëëyëpë, mëti'ipë ënäty ka'ap maa të xymyëtoyën yajnimëtyä'äky. Këtiipë m'ëna'anëty: Tyaapë nija'apës yë'ë.

Isaías 57:4

¿Pën mtukxiktëp? ¿Pën m'ëxwa'an m'ixtijtëp? ¿Pën mwiin m'aaw mtuk'ijxtëp? Miitsëty poky të xytyukmin të xytyukkä'äxëtë, yë'ë m'u'unk'ajtëtëp mëti'ipë je'eyë win'ë'ënpën,

Oseas 7:9

Wiink ja'ay të pyëjkëty yë jyot myëjaaw ets ka'ap të tjawë. Yë'ëpaat yë kyuwaay të pyoopëtyä'äy ets ka'ap të t'ixy.

Deuteronomio 31:16

Ënät yë Wintsën t'ënëmaay yë Moisés: Wäänë y'itëty tääts m'o'knëty. E ya'atë naax kajpn ënätyë yë jyot wyinma'any tyajtëkoya'antë ets wiink wintsën ënätyë pyanëjkxantëp pën jëtu'unyë y'itë, ko ja Wintsën t'ëwtatëty mëti'ipë jam yajpatëpën ma ja naax kajpnën, mëti'ipë nyiwa'akantëpën. Ëjts nëjkxëpës xyjyä'äytyëkooynyëtë ets ja käjpxytyu'unën ka'ap nëjkx t'ëktuunëtë këwentë.

Deuteronomio 31:18

E ko ënäty jëtu'un tukja'ty ja xëëw jëmëjt, ëjts ni'ikyës näjyëëpëka'anyë, mëët yë'ë koos ënäty të xy'ixtijtë ets ko ënäty ja wiink wintsën të tpanëjkxtë.