Isaías 2:11 - Biblia Mixe de Quetzaltepec

¹¹ Ja mëti'ipë ënäty amëj akëjxm të nyäjyawëtën, winta'ak naaxkow yajpaata'antë; mëti'ipë mëj'äämpy të y'itën je'eyë nëjkx yaj'atään yajtuktääntë. Yë'ënëm ja Wintsën nëjkx ja myëj'ajtën tyaj'ixyë,

Biblia Dc en Mixe de Quetzaltepec

¹¹ Ja mëti'ipë ënety amëj akëjxm të nyäjyawëtën, winta'ak naaxkow yajpaata'antë; mëti'ipë mëj'äämpy të y'itën je'eyë nëjkx yaj'atään yajtuktääntë. Yë'ënëm ja Wintsën nëjkx ja myëj'ajtën tyaj'ixyë,

Isaías 2:11 ပူးပေါင်းရင်းမြစ်များ

Salmos 18:27

Mijts myajnitsokpy yë ja'ay mëti'ipë yu'unk naxym juuky'ajtëpën, e mëti'ipë mëj këjxm näjya'awëtëpën naxym xyajnaxy.

Isaías 2:17

Ja ja'ayëty mëti'ipë nämyëjja'aw näjyääntyja'awëtëpën ets mëti'ipë amëj akëjxm ja'ay'ajtëpën je'eyë nëjkx yaj'atään yajtuktääntë. Yi'iyë yë Wintsën yë myëj'ajtën nëjkx yaj'ixy jä'ä xëëw,

Malaquías 4:1

Yë Wintsën mëti'ipë maaytyääyëpën winë, jëtu'un y'ënä'äny: Jëtu'un yë xëëw po'o wyinkony tä tu'uk jëënjutën mëti'ipë no'kpën tsääpyën, ma nyitoya'antën jëtu'un tä aay pu'uxmën mëti'ipë nämyëja'awëtëpën ets ëxëëkja'aytyëjkëty. Jä'ä xëëw wa'ats nëjkx tyooytyëkoytyë ets nitii kyawë'ëma'any.

Isaías 24:21

Jä'ä xëëw nëjkx ja Wintsën tëytyuny ja tsajpkëjxmëpë y'ënä'ämtën, ets ja naaxwiinypë yajkutuktën;

Isaías 13:11

Jëtu'un ja Wintsën y'ënä'äny: Ntëytyunäämpyës ja naaxwiinyëtë ja'ay ko tyuuntëkoytyë, ja ëxëëkja'aytyëjkëty ko yaja'ay ooktë. Nyajkutëkoyäämpyës ja ja'ay mëti'ipë nämyëja'awëyëpën ets mëti'ipë amëj akëjxm ja'ay'ajtpën, ëxëëkës ntuna'any ja ja'ay mëti'ipë tsiptuunpën ets mëti'ipë ëxëëk ëtëtsp ënaanpën.

Isaías 12:4

nëjkxëp m'ëna'antë: Kukajpxëtë ja'awëkyëta'aktë yë Wintsën ets mëkajpxtë, nikajpx nimëtya'aktë ma ja naax kajpnën mëti'ipë yë'ë të tuny të tkäjpxyën, tuk'ëwaanëtë ko yë'ë maaytyääyëp winë ets ko ni pën kyajëtu'unëty tä yë'ëjën.

Miqueas 4:6

Jëtu'un yë Wintsën tnikäjpxy: Jä'ä xëëw nëjkx nyajmujkta'ayës yë nkupixynyës, mëti'ipës ënäty të ntëytyunyën: Mëti'ipë të yaj'akajpxtuktën, mëti'ipë të y'ënu'kxëtën ets mëti'ipë të y'aye'ey të y'anaxëtën. Mëët yë'ëjëty, mëti'ipë ënäty niwäänë të wyë'ëmtën, yë'ëjës mëët tu'uk yë naax kajpn mëjpë nkoja'any. Ëjts Wintsën, ëjts n'ënä'ämäämpy yë nnaax nkajpnës jam ma Sión kopkën, tyam ets xëmëkyëjxm.

Oseas 2:18

Jä'ä xëëw nëjkx tu'uk yë käjpxytyu'unën ntunyës mëët yë aayjëyujk ujts jëyujkëty mëët ko yë Israel ntsoky njawës ets nëjkxëp mëët ntunyës käjpxytyu'unën yë joonëty ets tsa'anyëty; ntuktëjëtya'ajäämpyës yë ti'pxn, yë tëypyujxn ets ka'apës yë tsip n'ëkupëkanë, jëtu'unës yë nnaax nkajpn jotkujk yajpaatëty.

Ezequiel 39:22

Jä'ä xëëw ets jëtu'un y'ita'any yë xëëw jëmëjt nëjkxëp yë Israel kajpn xy'ixkaptës ko ëjts Wintsën, mëti'ipë yë'ë Tyios'ajtëpën.

1 Pedro 5:5

Näyjyëtu'un miits ëna'ktëjkëty, mëmëtowtëp ja mëjja'aytyëjk ja y'ënä'ämën tyiyajtënëty. Nixim niyam mëpaat yu'unk naxym mnämyëmëtowëtë. Jä'ä ko yë Tios ka'ap t'oyjyawë mëti'ipë nämyëjja'aw näjyääntyjya'awëyëpën, yë'ë pyutëjkëp mëti'ipë yu'unk naxym ja'ay'ajtëpën.

2 Corintios 10:17

Pën jää pën nyämyëjpëjktä'äkyë, nikë oy ko ja Wintsën yë'ë tmëjpëjkta'akëty.

2 Corintios 10:5

ets tëkokyë ja mëj këjxmëpë ja winma'any mëti'ipë y'ëtujkpyën ets ka'ap tyu'uye'eyëty ja Tios ja myëk'ajtën. Tu'kë'ëyë ja ëxëëk winma'any jamës npëjktakta'atë ma ja Kristën ets yë'ë tmëmëtowtëty,

Lucas 18:14

Tääts ja Jesús y'ënäny: Jëtu'un miits nëëmëtë ko ja yajkukëpäjtpë ojts ja Tios kyupëkyë ijxtëm tu'uk ja wa'ats ja'ayën, e ja fariseë ja'ay ka'ap yajkupëjky. Jä'ä ko mëti'ipë ja ja'ay kë'ëm näkyumaayëpën naxym yajpëjkta'aka'any; e mëti'ipë naxym näpyëjktakëpën, yë'ë mëj'äämpy naxaanp.

Zacarías 9:16

Jä'ä xëëw jëtu'un nëjkx yë Wintsën tyajtso'oky yë nyaax kyajpn tä yë ja'ay tyajtso'okyën yë kyupixyny mëti'ipë kupixyny këwent'ajtpën ets nëjkx jëtu'un tä tsaajën oypyë y'atë'kx y'ajajtë ma kyë'ëm naax kyë'ëmkajpnëtyën.

Sofonías 3:16

Jä'ä xëëw nëjkx yë Jerusalén kajpn yaj'ënëëmë: Këtii mtsë'ëkë mijts Sión kajpn ets këtii xykyupëkëty ets mkë'ë m'aaw y'ënu'kxëty.

Sofonías 3:11

Jä'ä xëëw mijts naax kajpn, mëti'ipës nkajpn'ajtypyën ka'ap nëjkx xy'ëkmëtsëtyuunë ja naax kajpn ma ënäty mijts të xykyäjpxykyumëtoownaxyësën, jä'ä ko tëëjës ënäty nyajjëwa'kta'ay ja ja'ayëty mëti'ipë amëj akëjxm ja'ay'ajtëpën ets mëti'ipë yaj'ijxtëpën këtii pën myëjëty, e mijts ka'ap nëjkx amëj akëjxm m'ëk näjya'awënë maas ja ntun nkopkën.

Miqueas 5:10

Jëtu'un yë Wintsën y'ënä'äny: Jä'ä xëëw nyaj'o'kta'ajäämpyës yë mkëwaay ets nyajkutëkoyäämpyës yë mkepy wyintëkäämpë mëti'ipë mmëtsiptuumpyën.

Abdías 1:8

Jëtu'un yë Wintsën y'ënä'äny: Ko xëëw jëmëjt tpaatëty ma ënäty ntëytyunyënës yë Edom, nyajkutëkoyäämpyës yë y'ijxpëkyjyä'äytyëjk ets njëpëkäämpyës yë wyijyjyä'äyëty mëti'ipë jam yajpatëpën ma Esaú y'itjotmën.

Amós 9:11

Pyätyp ja xëëw jëmëjt ma ja David nkoj'oyëja'anyënës yë tyëjkxo'omy mëti'ipë ojts kyëtäyën. Nyaj'ëtujkta'ajäämpyës yë jut, nyajpëtë'kta'ajäämpyës yë potsy maajaty të jyutyën ets nkoj'o'oyëtya'aja'anyës mëti'ipëjaty të jyityën ets jëtu'un nyaj'awinpita'anyës tä ijty tëëyëpën ma ënäty jyotkujk'atyën,

Joel 3:18

Jä'ä xëëw yë tsatsymnyëë ets tsi'tsknëë pyëyë'ëka'antë tä mëjnëëjën jam tunkëjxm kopkëjxm ets ma Judá y'itjotmën; komnëë jam pëyë'ëkaanp wokjotm. Jam maas yë ntsajptëjkën jam yë nëë myuuta'any mëti'ipë Sitim itjot yajxookäämpyën.

Oseas 2:21

Ëjts Wintsën, ëjts jëtu'un ënaanpës: Jä'ä xëëw nëjkxëpës yë tsajp n'ëtsoy, e yë tsajp nëjkxëp yë naaxwiinyëtë t'ëtsoowinpity.

Oseas 2:16

Ënätës xymyëkäjxa'any: Nye'etyëjkës, ets ka'ap nëjkx y'ëk'ënanë, Nwintsënës. Ëjts Wintsën, ëjts ënaanp.

Ezequiel 39:11

Ntuknikääkëjäämpyës yë Gog tu'uk yë itjot jam Israel, ma yajtijyën Jëtijtpë ja'ay ja Jyoy jot, mejywyintuuypyë yajpaatyën ets jam nyaaxtëkëty. Ma tääpë itjotmën ka'ap nëjkx jam pën nyäxy, jamts yë Gog nyaaxtëkëty mëët tu'kë'ëyë tsyiptuunpëtëjk ets nëjkx txëëwmo'otë, Gog ets Tsyiptuunpëtëjk Joy jot.

Ezequiel 38:19

Maas yam njoot'anpëkyën, jëtu'unës yam n'ëna'any nxëëwkyëjxmës ko jääjës nëjkx tu'uk yë ujx mëkpë nyajnaxy ma Israel kajpnën.

Ezequiel 38:14

E oy, ka'ap wyi'ixëty, mëmëtya'ak yë Gog ëjts nxëëwkyëjxmës ets xy'ënëëmëty: Jëtu'un yë Wintsën y'ënä'äny: Ko yë Israel kajpn ënäty jotkujk yajpaaty, ënät xynyitsoonëty.

Jeremias 9:24

Pën nämyëjjawëjanëp, yë'ë nätyukmëjjawëtëp koos ëjts xy'ixy'äty ets koos ëjts nWintsën'aty, koos ëjts winë ntuny mëët ja tsojkën ja'awën, ja nipaye'eyën ets ja tëyajtën, yë jëtu'unpë yë'ëjës ntukxoontäkpy.

Isaías 52:6

E pyatäämpy ja xëëw jëmëjt ma ja nnaax nkajpnës nijawëtëty ets tja'akyukëtëty ko maas nWintsën'atyën xëmës të njanikäjpxy.

Isaías 37:23

¿Pën xyjyëjp'ixy të xynyëxi'iky të xytyukxi'iky? ¿Pën xyjyëjp'ixy wyintsë'kën të xyajtëkooyë ets mëj këjxm mnäyajnaxyë ma yë'ëjën? Yë'ë Tios, Wa'atspë yajpaatyën ma Israel kajpnën.

Isaías 30:23

Yë Wintsën mtuknikäxanëp ja nëë tuu ma ënäty të mni'ipy të mkojyën, jam mkamwinm mtu'uwinm may jam xyajpëtë'ëkëty ja tsajpmok ets ja mjë'kxy mpëky. Jä'ä xëëw ja mtsajpkaa nëjkx jyë'kxtë pyëktë ku'uxyë.

Isaías 29:18

Jä'ä xëëw, nëjkxëp ja nat tmëtoy ko ënäty tii yajkäjpxy nokykyijxy, ets ja wiints nëjkxëp y'ixë'ëky oy ënäty jënu'un kyootsëty.

Isaías 28:5

Jä'ä xëëw ja Wintsën mëti'ipë maaytyääyëpën winë, nëjkx jëtu'un nyäxy tä tu'uk yë yajkutujkpë kyujupën janty oypyë, tä tu'uk kumä'tnën mëti'ipë to'oxytyëjk wyääy tyukmajts'ijtëp mëti'ipë nëjkx ja naax kajpn tukmëjnaxtën mëti'ipë ënäty të jyaakwë'ëmtën,

Isaías 26:1

Jä'ä xëëw nëjkxëp yaj'ëy yajyä'äxy ya'atë ëy jam Judá: Ëëtsajtëmë ta'tspëky yë nnaax'ajt nkajpn'ajtëmë, tëë yë Wintsën tkojy mëj yë potsy ets tëë ja naax kajpn tyaj'oyë mëti'ipë ta'tspëkyën.

Isaías 25:9

Jä'ä xëëw nëjkx ja aaw ayuk y'ënä'äny: Ya'atë jëtu'un Wintsënajtp mëti'ipë nTios'ajtëmën, yë'ë të ntuk'ijxpäjtëmë ets yë'ë të xyajtsokëmë. Tsojk ntukxoontakëmë ets ntukxo'on ntuk'ijtëmë, jä'ä ko yë'ë tëë xyajtsokëmë.

Isaías 12:1

Jä'ä xëëw, nëjkxëp jää m'ëna'any: Wintsën, tyamës nkukajpxë; oyës wäänë të xytyukjoot'anpëjkojy, tëë ja nyäxy. Tyam tëëjës jatëkok ja jotkujk'ajtën xymyo'oy.

Isaías 4:1

Jä'ä xëëw nëjkx ja ye'etyëjktëjk y'ëmaaytya'aktë, niwëxtujk ja to'oxytyëjk nëjkx tyajtsipta'aktë tu'ukpë ja ye'etyëjk, ets y'ëna'antëty: Kë'ëm ëëtsëty nnäy'ixëtëty ets kë'ëmës nnäyajjuuky'atëtëty, je'eyëp ko mxëëw xytyuk'ënu'kxtës, këtiipë tsëtyu'unmëët nwë'ëmtëtyës.

2 Tesalonicenses 1:10

Jëtu'un jyata'any jä'ä xëëw ko ënäty ja Wintsën myiny, ko jyä'äy myëjjaw jyääntyjawëtëty ets tyukxoonta'akëtëty ni'ëmukë. Jam miits näjyëtu'un myajpaatëty, jä'ä ko tëë xymyëpëktë mëti'ipës të nkäjpxy të nmëtya'aktën.

2 Samuel 22:28

Myajnitsokpy yë ja'ay mëti'ipë yu'unk naxym ja'ay'ajtpën, e ja mëti'ipë mëj këjxm näjya'awëyëpën ni'ikyë xyaj'ëyoowtëkë.

Salmos 20:8

Yë'ëjëty, wäänë muum tyä'äntsi'ita'antë tääts y'ojtskëta'aka'antë, e ëëtsajtëm ta'tspëky ntänëja'anëmë.

Salmos 46:10

Näkyë'ëyakëtë. Ijxkajptëkës koos ëjts nTiosëty. Ëjts mëj'äämpy ijtp ma mëjëtypë naax kajpnën, Mëj'äämpyës n'ity ma naaxwiinyëtë y'ëwtityën.

Proverbios 30:13

Tää ja'ayëty mëti'ipë mëj'äämpy näyajnajxëtëpën, ets ja jyiiky myëku'uk nijënu'un mëj tka'ixy.

Isaías 23:9

Yë Wintsën mëti'ipë maaytyääyëpën winë yë'ë të tyajkutuky ets tyaj'amoonta'aja'any ja ja'ay mëti'ipë näjya'awëyëpën amëj akëjxm ets o'ktëy tyajjata'any ja ja'ay mëti'ipë mëj'äämpy ijtpën.

Isaías 30:18

E yë Wintsën jëjp'ixy jam yajpaaty ets jatëkok mwinpitëty; yë'ë mëk mjatsokëtë, jä'ä ko yë Wintsën nipaye'epy yë mëtëy. Akujk jotkujk ja'ay yajpaatë mëti'ipë y'ëwxijtëpën yë Tios.

Miqueas 2:3

Paaty yë Wintsën y'ënä'äny: Ëjts nmëët'ajtypyës ja jot winma'any wi'ixës ntëytyuna'anyën mëti'ipë tuuntëkooypyën. Ntuknikäxantëpës yë ëyo'on jotmay ma ka'ap nëjkx tjëkyepyën wi'ix nyäjyuutëtëtyën ets ka'ap nëjkx amëj akëjxm y'ëkye'ey y'ëknajxnëtë jä'ä ko ja ëyo'on jotmay ënäty ijtp.

Salmos 18:28

Mijts, Wintsën, xymyoopyës yë të'kxën jajën; ets mijts Tios, mëti'ipës nTios'ajtypyën xykyutë'kxpës maas nkupi'its nkukootsën.

Salmos 46:11

Yë Wintsën mëti'ipë maaytyääyëpën winë yaa tyam yajpaaty mëët ëëts'ajtëmë. Yë'ë ntsoktakn'ajtëm mëti'ipë yë Jacob y'ëwtajtën.

Salmos 94:2

Mijts nipaye'epyë naaxwiinyëtë apëtsëmy; nipëtë'ëk yë amëj akëjxmëpë, tukukëpät ijxtëm pyaat'atyën.

Proverbios 16:5

Yë Tios ka'ap t'oy'ixy yë ja'ay mëti'ipë amëj akëjxm ja'ay'ajtpën; wäänë y'ita'any ets yajtëytyunëty.

Isaías 10:12

Ko ënäty ja Wintsën të tyajnaxy ja tsyip y'äkë ma ja Jerusalén ja'ayëtyën, tääts tëytyu'una'any ja Asiria yajkutujkpë, mëët ko ënäty amëj akëjxm të jyuuky'äty.

Isaías 14:15

Mijts ni'ikyë të mnäyajjënäkyë o'këntujp ko të mmay të mtajy wäänë këjxm mja'ta'any, jaakni'ik këk të mjëjptä'äky.

Isaías 40:23

Ka'ap mëj timpyëjktä'äky ja'ay mëti'ipë mëj'äämpy yajëkyäjpën, yë'ë jëtu'unyë tyajtëkoy mëti'ipë ënä'ämtëpën yaa naaxwiiny naaxkëjxy.

Jeremias 12:9

Jëtu'unës yë nnaax nkajpn tä tu'uk yë joonën mëti'ipë janty'oy yë jyëmkën, mëti'ipë tukmëtsip'ajtëpën ja myëku'uk ko y'oyëty ja jyëmk. Miinta'atë nitëkokyë aayjëyujk ujts jëyujkëty mëti'ipë ëwa'anëtyën ets mtu'ukmuktëty ets mjë'kxtëty mpëktëty.

Daniel 4:34

Ko ojts ja kyäjpxy ja xëëw jëmëjt jënu'un ënäty të yaj'awitsyën ja tëytyu'unën, ëjts Nabucodonosor ojts mpa'at'ixy tsajpkëjxm etsës näjya'awëypyätë ko tëëtëmës ntso'oky; ënät ojts ja Tios Ni'ik mëti'ipë xëmë juukyajtpën, ojts nmëjjaw njaanty jawës ets nkukajpxës mëët ya'atë aaw ayuk: Yë myëj'ajtën xëmë y'itëty; yë kyutujkën xëmë yajpaatëty najts'ook najtskä'äxë.