Génesis 41:25 - Biblia Mixe de Quetzaltepec

²⁵ Ënät yë José ojts yë yajkutujkpë t'ëtsoy: Yë mäjtskpë mëti'ipë të xywyinkuma'ayën, tu'uk mëti'ipë nyikäjpxypën. Tios mijts të mtuk'ixyë mëti'ipë tyunäämpyën tääts xynyijawëty.

Biblia Dc en Mixe de Quetzaltepec

²⁵ Ënet yë José ojts yë yajkutujkpë t'ëtsoy: Yë mäjtskpë mëti'ipë të xywyinkuma'ayën, tu'uk mëti'ipë nyikäjpxypën. Dios mijts të mtuk'ixyë mëti'ipë tyunäämpyën tääts xynyijawëty.

Génesis 41:25 ပူးပေါင်းရင်းမြစ်များ

Génesis 40:8

Ya'atë tsu'umës të nwinkuma'atë ets ka'ap pën mëti'ipë mëpaat tyajniwijyën, jëtu'un y'ëtsoowtë. ¿Tii këtii yë'ëjëtyë Tios mëti'ipë xytyukyajniwijëmën winë? Jëtu'un ojts yë José y'ënä'äny: Tukmëmëtyaktëkës mëti'ipë të xykyuma'atën.

Génesis 41:16

Ëjts ka'apës tääpë xypyääty nkajpxwa'atsëtyës yë mkuma'ay, jëtu'un y'ëtsooy yë José. E Tios yë'ë yakäämpy yë kajpxwinpijtën mëti'ipë mijts mtuk'oy'atëpën.

Génesis 41:26

Yë wëxtujkpë tsajpkaa yë oyëtypë, wëxtujk jëmëjt yë'ë; jëtu'un ijxtëm näjyëtu'un yë tsajpmok yë oyëtypë, wëxtujk jëmëjt yë'ë. Tu'knax yë nyiwijy mäjtskpë mkuma'ay.

Génesis 41:28

Jëtu'un ijxtëm të n'ënëëmën: Tios të mtuknijawëty tii tunan jatanëpën.

Génesis 41:32

Yë nwintsënës mäjtskpëky të wyinkuma'ay; e tu'ukyë je'eyë mëti'ipë nyikäjpxypën ets wi'ix nyiwijyën, jä'ä ko Tios jëtu'un të tuknipëjktaakë yajxon mëti'ipë tyunäämpyën ets tsojk jëtu'un tuna'any.

Salmos 98:2

Yë Wintsën tëë tnikäjpxy ko myëta'aka'any, tëë tuk'ixy yë naax kajpn wi'ix oy winë tunyën ets wi'ix winë tpaye'eyën mëtëy;

Éxodo 9:14

Jä'ä ko ëjts nkäxäämpyës tu'kë'ëyë yë ëyo'on jotmay ma mijtsën mëti'ipës të ntuknipëjktaakën, näjyëtu'unës nkäxa'any ja ëyo'on ma ja mwintsëntëjkëtyën ets ma ja mja'ayëtyën, jëtu'un'äämpy xynyijawëtëty, ko ka'ap ma wiinkpë pën jëtu'unpë tä ëjtsën.

Isaías 43:9

Tu'ukmujkta'atë naax kajpnëty, tu'ukmujkta'atë mëj it mëj naaxwiinyëtë. ¿Pën ja jëtu'unpë të t'akäjpxy, ëkë pën ojts nikäjpxy tii tëëyëp tuunëp jajtëp? Wä'än tyajmintë ja jyä'äy pën të t'ixyën ets nikajpxëty wä'än tyajmëtoy ja tëyajtën.

Daniel 2:45

Yë'ë yë yajkutujkpë të twin'ixy ko të t'ixy tu'uk ja mëjtsaa të kyutëkë ma ja kopkën ets ka'ap pën të kyutijnaxyë; ja tsaa mëti'ipë ojts tyaj'awinpijta'ayën naaxwayën ja poop pujxn, pu'ts pujxn, tsuxkpujxn, juunpujxn ets ja mo'onts. Yë mëjpë Tios tëë tuknijawë yë yajkutujkpë mëti'ipë tunan jatanëpën. Yë kuma'ay tëy yë'ë ets wi'ix nyiwijyën nän mëtëy yë'ë.

Daniel 2:47

Ok t'ënëmaay yë Daniel: Tëy jaanty yë'ë mijts yë mTios, ni'ik myëjëty këtiinëm jyëtu'unëty yë wiinkëtypë tios; yë'ë nyiwintsën'ajtääpy yë yajkutujkpëtëjk ets yë'ë yäjkpy yë nija'awën ma tsipëtypë ets yu'utsypë winma'any, paaty mijts të xynyijawë wi'ix nyiwija'anyën ya'atë nkuma'ayës.

Amós 3:7

Yë Wintsën ka'ap tii tuny ajotkumonë pën ka'ap jëyëjp të tuk'ëwaanë yë tyuunpë mëti'ipë käjpxynyajxpën.

Mateo 24:40

Jam ënäty ja ye'etyëjk tyuntë nimäjtsk kyamjotm; tu'uk yajmënëjkxa'any ets tu'uk wyë'ëma'any.

Marcos 13:23

Näkyëwent'atëtë miits, tëë n'ëwaanëtë jëwyiin jëyëjp.

Efesios 1:17

N'amëtoopyës ja Tios ja myëj'ajt jyääntyajtën mëët ja Wintsën Jesukristë ets mmo'ojëtëty ja Kënu'kxymyëkajtën mëti'ipë yäjkpyën ja wijyajtën kejyajtën, ets yajxon xynyijawëtëty ja mëti'ipë Tios'ajtpën.

Josue 11:6

Yë Wintsën ojts t'ënëëmë yë Josué: Këtii mtsë'ëkëty, jä'ä ko jopy ooky ya'atë ja'ayëty kya'ata'aja'antë mijts mwintuuyëty. Yë kyëwaayëty nëjkxëp xytyektsyujkta'atë këtiipë y'ëkpëyë'knëtëty ets kyepywyintëkäämpëty mëti'ipë myëtsiptuuntëpën wa'ats xynyino'ktaayëty.

Apocalipsis 4:1

Ko jëtu'un y'ëkjajty y'ëkkëpejty, ënätës n'ijxpaty ko ja tsajp y'ëwa'atsy ijxtëm tu'uk ja tëjk'aawën; ets ja ayuk nmëtooyës janty mëk ijxtëm tu'uk ja xuxnën, mëti'ipës ënäty jëwyiin të xymyëkäjpxyën jëtu'unës xynyëmaay: Pät yam ets ntuk'ixëty mëti'ipë ok tunan jatanëpën.