Génesis 27:41 - Biblia Mixe de Quetzaltepec

⁴¹ Jä'ä xëëw jä'ä jëmëjt yë Esaú ojts tmëtsiptso'onë ja Jacob, ko ënäty të pyëjkëty ja näkyënu'kxë, mëti'ipë yë'ë patëpën ma tyeetyën. Ënäty ja Esaú ojts myäy tyäjy: Tim wäänë jëtu'un täätsës nmëët'atëty yë monyëtukyë mëët yë nteetyës, ko wiinkoonëp ma y'o'knëtyën. Ko ja jëtu'unpë kyëxëty nyaxëty, taats nyaj'ookëty yë n'uty Jacob.

Biblia Dc en Mixe de Quetzaltepec

⁴¹ Jä'ä xëëw jä'ä jëmëjt yë Esaú ojts tmëtsiptso'onë ja Jacob, ko ënety të pyëjkëty ja näkyënu'kxë, mëti'ipë yë'ë patëpën ma tyeetyën. Ënäty ja Esaú ojts myäy tyäjy: Tim wäänë jëtu'un täätsës nmëët'atëty yë monyëtukyë mëët yë nteetyës, ko wiinkoonëp ma y'o'knëtyën. Ko ja jëtu'unpë kyëxëty nyaxëty, taats nyaj'ookëty yë n'uty Jacob.

Génesis 27:41 ပူးပေါင်းရင်းမြစ်များ

Génesis 37:4

Ko ojts jëtu'un t'ixtë ja y'äjtyëjkëty, ko ja tyeety mëk ni'ik tsyokyë këtiinëm ja wiinkpë y'u'unk y'ëna'k, ënät ojts tmëtsiptsoontë ets ka'ap t'ëkmëkajpxanëtë.

Eclesiastés 7:9

Këtii joot'an mnätyukyajtëkoyëtëty, yë tsuuja'aytyëjk yë'ë ënätyë joot'anpëjktëp.

Proverbios 6:14

Ja jyot wyinma'any ëxëëk yajpaaty, aakjä'ä myääpy tyäjpy wi'ix winë ëxëëk tunëtyën ets wi'ix pën tyajjoot'anpëkëtyën.

Génesis 37:8

Ënät ja y'äjtyëjk y'ëtsoowtë: ¿Tii jä'ätën mja'ëna'any ets mijts myajkutujkpë'atëty, tääts ëëtsëty xy'ënä'ämtëtyë? Ni'ikyë ojts jyänty myëtsiptsoonëtë ko jëtu'un wyinkumaay ets ko ojts nikäjpxy wi'ix ënäty të wyinkuma'ayën.

Génesis 32:6

Ko ojts wyimpijnëtë mëti'ipë yaj'ëyukye'eytyëpën, ënät t'ënëmaaytyë ja Jacob: Tëës ojts n'ixtë ja m'ajty Esaú, jëtu'un të y'ëtsoy ko tää kë'ëm myina'any ets m'ixa'anyë mpaata'anyë mëët nimajktaxk mëko'px yë jyä'äy.

Tito 3:3

Tëëyëp näjyëtu'un ijty ntsuu'ajtëmë, ka'ap nmëmëto'owëm ja Tios, tëkoy ijty nyajpatëmë. Ja atsojkën ets mëti'ipë ni'ik ntukjotkëtakëmën yë'ë ijty xyaj'ijtëm ijxtëm ja mëtuunpën ëne'empyë y'ityën. Ëxëëk ijty nja'ay'ajtëmë, ntuk'ëxëëk'ijxëm ijty winë ja nmëku'uk'ajtëmë, ëxëëk ijty nyajpatëmë ets ëxëëk näy'ijxëmë xim yam.

Ezequiel 35:5

Mijts xëmë mëtsip të mnäyajnaxyë ma Israel ja'ayëtyën ets jää të xynyipëtë'ëky ma ënäty jam yajtëytyuntën, ma ja pyoky tkumëtowtën.

Proverbios 1:16

jä'ä ko janty näjyotkëjxëtëp ets ëxëëkpë tuntëty. Janty poj'am timtyunankojtë winë, ets ja ne'pny jä'ä tyimtäman tyimjä'ätsantëp.

Salmos 142:3

koos nyajpaaty jë'ë ya'ax, Wintsën, mijts wa'ats xynyijawë yë nnë'ë ntu'ujës. Ma ja në'ë tu'u mëti'ipës npanëjkxypyën, jam të tpëjkta'aktë tu'uk yë o'ktakn yu'utsypë.

Salmos 37:16

Yë yiinpë wäänpë tmëët'atën yë oyjyä'äytyëjk, oy yë jëtu'unpë ni'ik këtiinëm yë ëxëëkja'aytyëjk ko kyumeeny'atë.

Salmos 35:14

Mon tukës ijty njëtity, jëtu'un tä jeexyë nmëkjawënës koos yë ntaak të y'o'knë, ëkë tä jeexyë yë nmëku'ukës ëkë nmëkä'äxës të y'o'knën.

2 Crónicas 35:24

Ja tyuunpëtëjk ënätyë jam myëpëtsëëmë tsipjotm ma ja keypywyintëkäämpën mëti'ipë ënäty myëtsiptuunpyën ets yajnajxë ma wiinkpë kepy wintëkäämpën ets poj'am yajnëjkxë jam Jerusalén ma ojts y'o'kyën. Jam nyaaxtëjkëy ma ja y'aptëjk ënäty të nyaaxtëkëtën. Ja Judá ja'ayëty ets ja Jerusalén ja'ayëty jeky nyijëëy nyiyaxëtë.

Deuteronomio 34:8

Yë Israel ja'ayëty tu'kpo'o tnijëëy tniyaxtë yë Moisés ko y'oky jam Moab, i'px majk xëëw y'ijtë mon tuk, jä'ä ko jëtu'un ënäty myontë tyuktë ko pën y'ooky.

Génesis 35:29

Mëjja'ay yë Isaac ojts y'o'knë tyëkooynyë, ja nimäjtskpë ja y'u'unk ojts yajnaaxtëkëty, Esaú ets Jacob.

Génesis 32:11

Paaty tyam tun yë mëyajtën kuwaank nixajkës ma kyë'ë y'aawën yë n'ajtyës Esaú. Ntsë'këpës ko y'ëkmiinëty ets t'ëkyaj'o'ktaaynyëty ja to'oxytyëjktëjkëty mëët ja u'unk ëna'k.

Génesis 27:42

Ko ja Rebeca tnija'awëy wi'ix ja myaank myäy tyäjyën, tä ojts tmëkäjpxy ja mutskpë ja myaank mëti'ipë xyëëwajtypyën Jacob ets t'ënëmaay: Ëk'ix; yë m'ajty Esaú tëë mtukjoot'anpëkyë ets mtimyaj'ookanëp yë'ë, mëët wi'ix të xytyunyën ets jëtu'un ja tsyip y'äkë tyajnaxa'any ma mijtsën.

Génesis 32:3

Ënät yë Jacob mäjtsk tëkëëk tkejxy yë tyuunpë jam Seir ma ja nyaaxjotmën ja Edom, tääts tuk'ëwaanëja'any ja y'äjty Esaú ko tää wyinkony.

Génesis 50:2

Ojts tuk'ëne'emy ja tsooyëpëtëjk ets ja tyeety yajtukjaaxëty ja tsooy, tä ojts jëtu'un tkuuytyuntë.

Génesis 37:18

Yë'ëjëty jëkämnëm t'ijxpatë ko ja José myiny, tääts pojën ja winma'any t'ixtaaytyë, wi'ix mëpaat t'ëkyaj'ooktën.

Génesis 50:15

Ko ënäty tëë yë Jacob y'o'knë, ënät ja José ja myëkä'äxtëjk ojts myäytyë tyajtë: Wä'änxyëp jëtää yë José y'ekyë ets ënät ëxëëk xy'ëktu'unënëty, tuunwinpitëty ijxtëm ojts ëxëëk ntu'unëmën.

Proverbios 18:19

Ni'ik jyoot'anpëky yë mëkä'äx ko yajmëtëkoy, këtiinëm tu'uk yë kajpn mëti'ipë napotsyën. Yë tsiptu'un tsipkajpxën jëtu'un jyëjpmëtij jyëjpmëwa'akë tä yë pujxnën mëti'ipë këmoontëjk y'akämtuk'ajtypyën.