Génesis 13:15 - Biblia Mixe de Quetzaltepec

¹⁵ Ëjts mijts nmo'ojäämpy tu'kë'ëyë ya'atë naaxwiinyëtë mëti'ipë m'ijxypyën ets xëmëkyëjxm mijts mjä'ä'atëp ets näjyëtu'un yë m'u'unk m'ok.

Biblia Dc en Mixe de Quetzaltepec

¹⁵ Ëjts mijts nmo'ojäämpy tu'kë'ëyë ya'atë naaxwiinyëtë mëti'ipë m'ijxypyën ets xëmëkyëjxm mijts mjä'ä'atëp ets näjyëtu'un yë m'u'unk m'ok.

Génesis 13:15 ပူးပေါင်းရင်းမြစ်များ

2 Crónicas 20:7

Wintsën, mëti'ipës n'ëwtajtëpën, m'ëxwojptaay ja ja'ayëty yaa, ma tyam tsyëënëtën ja Israel ja'ayëty ets yë'ë xykyë'ëmooy xëmëkyëjxm ja Abraham ja y'u'unk y'ok, mëti'ipë oy mëët mnäjya'awëyën.

Génesis 12:7

Ënät ojts jam yë Tios nyänikëxë'ëky ma Abramkën ets y'ënëmaayë: Ya'atë naaxwiinyëtë yë'ëjës yë m'u'unk m'ok nmo'ojäämpy. Ënät ojts yë Abram pojën t'oytyuny tu'uk ja wintsë'këntyakn, jä'ä ko ënäty jam yë Tios të nyänyikëxë'ëkyë.

Génesis 35:12

Yë it naaxwiinyëtë mëti'ipë të nmo'oyënës yë Abraham ets Isaac, näjyëtu'un mijts tyam nmo'oy, e nmo'ojäämpyës näjyëtu'un yë m'ok'u'unk m'ok'ëna'k.

Génesis 15:18

Jä'ä xëëw ojts ja Tios tuny tu'uk ja käjpxytyu'unën mëët yë Abram, ets t'ënëmaay: Ya'atë naax kam yë'ëjës nmo'ojäämpy yë m'u'unk m'ok. Jampaatës nmo'oja'any ma ja nëë'aawën Egiptëpë ets jampaat ma ja Éufrates mëjnëë'aawën.

Hechos 7:5

E kä'äp ojts ja Tios tii tyukumayë ma tääpë itjotmën, oyxyëp jeexyë yi'iyë'ajty ma ja tyeky tpëjkta'akëtyën. Ojts je'eyë tyukwinwanëty ko myo'oja'anyë, ets ko ënäty y'o'knë yë'ë jyä'ä'attëp ja y'u'unk y'okëty. Oy ja Abraham ka'ap ënäty nitu'uk ja y'u'unknëm.

Salmos 37:29

Yë oyjyä'äytyëjk nëjkxëp tkuma'ayën'atë yë naaxwiinyëtë, ets xëmëkyëjxm nëjkx tsyëënëtë naax wiinkëjxy.

Salmos 37:22

Pënjaty yë Wintsën të tkënu'kxyën, yë'ë jyä'ä'atantëp yë naaxwiinyëtë, e pënjaty të tpokyën nëjkxëp kyutëkooytya'atë.

Mateo 5:5

Jotkujk yë ja'ay yajpaatë mëti'ipë yu'unk naxymëtyën, jä'ä ko yë'ë naaxwiinyëtë kyuma'ayën'atantëp mëti'ipë të yajtukwinwanëtën.

Números 34:2

Tukmëmëtya'ak ya'atë aaw ayuk yë Israel ja'ayëty: Jä'ä ko wäänë tääts jam mja'ajnëtëty Canaán naaxjotm. Tääpë it naaxwiinyëtë yë'ë miits mjä'ä'atantëp ets nëjkx ja mtsëpa'an xypyëjkta'aktë.

Éxodo 33:1

Tä yë Tios t'ënëmaay yë Moisés: Nëjkx ënät tyam, tsoon yaa ma ya'atë it naaxjotmën, woownëjkx ya'atë naax kajpn mëti'ipë jap mju'tën Egiptë. Jam tyam nëjkxtë ma ja it naaxjotmën mëti'ipës ojts ja Abraham, Isaac ets Jacob ntukwinwanëtën, koos yë y'u'unk y'okëty nmo'oja'antës tääpë it naaxwiinyëtë.

Génesis 48:4

mëët ya'atë aaw ayuk: Ëk'ix, ëjtsës nyajnimayëjäämpy yë m'u'unk m'ëna'k ets m'ok'u'unk m'ok'ëna'k nyimayëtëty. Ko nyämyukëtëty, naax kajpn nëjkx mëjpë tyajkojtë ets yë'ëjës näjyëtu'un nmo'ojäämpy ya'atë it naaxwiinyëtë ets yë'ë xëmëkyëjxm tjä'ä'atëty.

Génesis 28:13

Näyjyëtu'un t'ijxy kootëm ja Tios wyintänëty ets y'ënë'ëmxëty: Ëjts jëtu'un Wintsën, mëti'ipë Tyiosajtën yë mtatwelë Abraham ets mteety Isaac. Mijts nmo'ojäämpy ya'atë naaxjot ma jam mko'knën ets m'u'unk m'ëna'k.

Génesis 28:4

Wä'än mo'oyë ja kënu'kxën ets näjyëtu'un ja m'u'unk m'ëna'k mëti'ipë ojts tukwinwanën ja Abraham ets yë'ë tjä'ä'atëty ya'atë naax kam ma tyam ntsëna'ayëmën ijxtëm yë jaaypyaat jaaypyo'kxyën, jä'ä ko jëtu'un ojts yë'ë tukwinwanë ja Abraham.

Génesis 24:7

Yë Wintsën, yë Tios tsajpjotmëpë, mëti'ipës ojts xyajtsoonyën maas yë nteety ntaak yë jyëën tyëjkën ma ja y'it nyaaxwiinyëtën ja njëëky nmëku'ukës. Ets ojts xytyukwinwanës ya'atë it naaxwiinyëtë, ko tmo'oja'any yë n'ok'u'unk n'ok'ëna'kës, yë'ë näjyëtu'un ënät kyäxëp ja Tios ja tsyajpjotmëtë kukäjpxy ma mijtsën. Ets xyajmin xyajja'tëty ja to'oxy'ëna'k, mëti'ipës ja nmaank Isaac tyo'oxytyëjk'atëpën.

Isaías 63:18

Tim wäänë yë mnaax mkajpn të tjä'ä'aty, yë kyajpn, mëti'ipë wa'ats mtijpyën. Yë nmëtsipëtyës jëtu'unyë të tä'änëtijta'atë ja mtsajptëjk.

Deuteronomio 34:4

Tä ja Wintsën y'ënëmaayë: Ya'atë it ya'atë naaxwiinyëtë jëtu'un ojts ntukwinwanëtës yë Abraham, Isaac ets Jacob ets n'ënëmaaytyës yë y'u'unk y'okëty yë'ë nëjkx ya'atë naaxwiinyëtë tjä'ä'atë. Täätsës të ntuknipëjktaakë, ko mijts oy je'eyë jëkäm xyjyaaknajts'ixëty, jä'ä ko ka'ap nëjkx jam m'ëk ja'ajnë.

Génesis 18:18

Jä'ä ko teety'ataanp yë'ë ma ja mëjpë ets mëkpë ja naax kajpnën. Yë'ëjës të ntukmëkënu'kxë ja'ayëty ma tu'kë'ëyë naax kajpn ets ma naaxwiinyëtë y'ëwtityën.

Génesis 13:17

Ëkpëtë'ëk ets tukye'eyëtya'a ya'atë it naaxwiinyëtë, jënu'un y'ayenyëty ets jënu'un myëjwiinëtyën. Jä'ä ko ya'atë it naaxwiinyëtë mijts yam ntukë'ëtëkëjäämpy.

Génesis 15:7

Jëtu'un y'ënëmaayë: Ëjts jëtu'un Wintsën. Ëjts mijts të nyajpëtsëmy Ur, ma nyaaxjotmën yë Caldeo ja'ayëty ets ya'atë naax kam mijts ntukkumayä'äny.

Génesis 28:14

Yë m'u'unk m'ok jëtu'un nyimay'ata'antë ijxtëm yë naaxwayën ets xiitsow yaatsow tyajwintuka'antë yë naaxwiinyëtë, jëtu'un anëkëjxy'äämpy ets ëpa'tkë'ëy'äämpy, a'oytsyow ets anajnytsyow. Tu'kë'ëyë ja'ayëty kënu'kxy y'ita'antë mëët mijtskyëjxm ets m'u'unk m'ëna'këty.

Génesis 50:24

Tu'kxëëw tu'kjëmëjt yë José t'ënëmaay yë myëkä'äxtëjk: Ëjts tsojkës n'ookanë, këtii mmaytyëty mtajtëty, yë Tios yë'ë tsojk mniminëtëp ets mputëkëtëty tä mtsoontëty ma ya'atë naax kajpnën ets myajnëjkxëtëty ma it naaxwiinyëtën mëti'ipë tyukwinwa'anëyën yë Abraham, Isaac ets Jacob.

Éxodo 32:13

Yë'ë ja'amyäts mëti'ipëjaty oy mmëtuunën tä yë Abraham, Isaac ets Jacob, mëti'ipës ojts kë'ëm xy'ënëëmë ma ja mxëëw kë'ëm xytyukkajpxpejtyën. Ëjts nyajnimayëjäämpyës yë m'u'unk m'ok, jëtu'un nyimay'atëty tä yë mëtsa'ajën, mëti'ipë jamën tsajpjotm ets ya'atë it naaxwiinyëtë, mëti'ipë yam ntukwinwa'anëtyëpën yë'ëjës nmo'ojantëp.

Deuteronomio 9:5

E paaty ka'ap yë'ëkyëjxmëty ko miitsëty oy mja'ay'atë ets ko mëtowtë myajmo'otë ja kuma'ayën; yë Wintsën paaty t'ëxwojpta'ay tääpë ja'ay jä'äkyëjxm ko ja tyu'unën kyajpxënëty ka'ap myëtëyëty ets näjyëtu'un mëët ko tniwa'aka'any ja y'ayuk, mëti'ipë tyukwinwa'anëyën ja Abraham, Isaac ets Jacob, miits ja m'ap m'okëty.

1 Crónicas 16:18

ko y'ënäny: Mijts nmo'ojäämpy yë naax kam ma txëëwatyën Canaán ets yë'ë xykyuma'ayën'atëty.