Éxodo 26:36 - Biblia Mixe de Quetzaltepec

³⁶ Oytyun näjyëtu'un tu'uk yë wit'atëëytyuk mëti'ipë mtuk'atëëytyukëpën, ma jam yajnitëkën yë tsajptëjk. Jä'ä y'ixë'atëty yë nyi'ujkën: uky, tsu'unk, tsapts ets linë wit awiity. Yajxon oy tsuj jyo'oky'atëty.

Biblia Dc en Mixe de Quetzaltepec

³⁶ Oytyun näjyëtu'un tu'uk yë wit'atëëytyuk mëti'ipë mtuk'atëëytyukëpën, ma jam yajnitëkën yë tsajptëjk. Jä'ä y'ixë'atëty yë nyi'ujkën: uky, tsu'unk, tsapts ets linë wit awiity. Yajxon oy tsuj jyo'oky'atëty.

Éxodo 26:36 ပူးပေါင်းရင်းမြစ်များ

Éxodo 36:37

Ma ja wit tëjk yajnitëkën ma ja Tios jam kyëtä'äkyën, ojts t'oytyuny yë nyi'atëëytyuk, yë'ë mëët t'oytyuuny ja wit, tsu'unkpë, ukpyë, tsaptspë ets ja linë wit awiity, jëtu'un tjo'ktë tä oy yaj'ixëtyën.

Juan 14:6

Ënät ja Jesús y'ëtsoowë: Ëjts jëtu'un tu'u'ajtp, ja tëyajtën ets ja juukyajtën. Ëjtskyëjxm je'eyë tjëkyepy pën jya'tëty ma ja Tios Teetyën.

Juan 10:9

Ëjts jëtu'un ijxtëm ja kemy aawën. Pën tëjkëp ma ëjtsën yë'ë nitso'okaanp. Jëtu'un nyaxa'any ijxtëm ja kupixyny tyëkëtën pyëtsëmtën ets jap jyi'kxypyaatë.

Salmos 78:60

ojts t'ëxmatsy ja tsyajptëjk mëti'ipë jamën Siló, mëti'ipë ënäty tyëjk'ajtypyën ma ja naaxwiinyëtë ja'ayëtyën.

2 Samuel 7:6

Ëjts tëëjës n'ijxwë'ëmy koos yë'ë ntuktsëna'ayëp wit tëjk, jëtu'unyëmës yë'ë ntuktsëënë, tyimtso'ontäky ko jap Egiptë nju'tyës yë Israel ja'ayëty.

Números 9:15

Jä'ä xëëw ma ojts tkojtën ja Tios ja jyëën tyëjk, ja wit tëjk mëti'ipë myë'ijtypyën ja käjpxytyu'unën. Ënät ojts jam nyäpyëjktä'äkyë ja yoots tëjknëkëjxy ets jëtu'un tyim xëëwnajxy. E ko tsyu'ujënë jëtu'un yaj'ijxy tä jëënën ets jëtu'un ojts tyimkuxëënyë.

Números 3:25

Ma ja wit tëjkën ma näpyaatë y'ityën mëët yë Tios, yë'ë ijty kyëwent'ajtëp ja Tios ja wyittëjk, ja wit mëti'ipë ja tëjk yajtukniyä'pën, ja po'o mëti'ipë nyipëk'ajtypyën, ja wit'atëëytyuk mëti'ipë yajtuk'atëëytyujkpën ja wit tëjk,

Éxodo 39:33

tääts ja Moisés ojts tkë'ëmooytyääynyëtë tëkokyë mëti'ipë ënäty të tyaj'o'oyëtya'atën jap ma ja Tios ja jyëën tyëjkën; ja wit tëjk ma ja näpyaatë y'ityën ets tëkokyë jënu'un ënäty jap tyuna'anyën: ja jo'kn, ja kepyjyiity, ja witsë ets ja xeny mëët ja nyi'ëjx tu'uktu'uk.

Éxodo 35:11

Yë tsajptëjk mëët yë nyiwittëjk, yë nyiyä'äp ja wit tëjk, yë jyo'knëty, yë nyikepy, yë nyikepyëty mëti'ipë yajtukpakë'ëtëpën, yë nyixeny, yë nyi'ëjx,

Éxodo 26:31

M'oytyunëp näjyëtu'un tu'uk yë wit mëjpë mëti'ipë y'atëëytyukëpën, kanaak yë y'ujkën tmëët'atëty: ukywyit, tsu'unk wit, tsaptswit ets linë wit awiity; jam xyajkëxkojëty mäjtsk yë awinax jëtu'unpë kyëxë'ëkyën, tä yë tsajpjotmëtë kukäjpxyëty y'awinax käkn mëëtpë.

Éxodo 27:16

Jäätsow ma yajnitëkën tëtujk xajpk jää tyëkëty yë wit'atëëytyuk tsu'unkpë, uky, tsapts ets awiitypë, yajxon oy tsuj jyo'oky'atëty; taxk ja nyixeny xypyëjktakëty ets näjyëtu'un ja nyi'ëjx.

Éxodo 28:39

Ma ya'atë nijän xy'oytyuna'anyën, yë'ë myajtunëp yë oywyit ets mnijo'okëp näjyëtu'un, yë nijän oywyit mtuk'oytyunëp, yë nyiwëën yajxon mëpaat yajjo'oky ijxtëm mëpaat oy kyëxë'ëkyën.

Éxodo 38:18

Ja wit'atëëytyuk mëti'ipë jam tuunën ma ja tsajptëjk ja nyitëja'aw yajnitëkën, yajxon ojts janty'oy yajjo'oky ets yajxuy, kanaak ujkën ja wit'atëëytyuk y'ijty: tam tsu'unkpë, ukpyë, tsaptspë ets ja linë wit awiity. Jä'ä y'ayenyëty tëtujk xajpk ets kyëjxmëty tu'kxajpk ja kujkm, näjyëtu'un tä ja mëti'ipë nyatëy'äjtypyën ja tëja'aw.

Éxodo 39:29

näjyëtu'un ja wëën mëti'ipë mëët y'oytyunyëtyën ja linë wit awiity ets ja wit tä'äky ukpyë, tsu'unkpë ets tsaptspë, yajxon ojts yajtä'äky oy, jëtu'un ijxtëm ënäty ja Tios të tuk'ëne'emyën ja Moisés.

Ezequiel 16:10

ojts ntukxoxy yë wit kanaak ujkën ets ojts ntukteky jyänë yë po'okë'ëk oypyë, tsowpë; ojts nmooy yë mwëën mëti'ipë linë witën ets nmooy yë mwit mëti'ipë jo'okyën ets tsowën;

Éxodo 28:15

Ja katsyjyän mëët ja mëti'ipë tuunpën ko winë yajnipaye'ey, jëtu'un xy'oytyunëty tä ja kejky yä'äpën, oyëty jyo'oky'atëty, yë'ë mëët xy'oytyunëty yë pu'ts pujxn ets ja wit mëti'ipë koyëtyën: tsu'unk, uky, tsapts ets ja linë wit awiity.

Éxodo 35:15

ja poom ja nyiwintsë'këntyakn, mëët näjyëtu'un ja nyikepy mëti'ipë yajtukëëyë'ëkëpën, ja on mëti'ipë yajtukkënu'kxpën, ja poom mëti'ipë oy pa'akxu'kpën, ja wit mëti'ipë yajtuk'atëëytyukëpën ja tsajptëjk ma yajnitëkën,

Éxodo 40:5

Pëjkta'ak näjyëtu'un ja poom ja wyintsë'këntyakn, pu'ts pujxn myajtunëp, winkon xypyëjkta'akëty mëët ja kaaxë mëti'ipë ja käjpxytyu'unën myë'ijtypyën ets xykyëxtëyëty ja wit'atëëytyuk ma yajnitëkën yë Tios yë jyëën tyëjk.