Éxodo 24:3 - Biblia Mixe de Quetzaltepec

³ Ënät ojts nyijkxy ets tukmëmëtyaktaay ja naax kajpn ijxtëm ënäty ja Tios të y'ënë'ëmxëtyën ets ijxtëm ënäty winë të tyuk'ëne'emyën, ënät ojts ja naax kajpn tu'ukyë y'ëtsoowta'atë: Oy ëëtsëty jëtu'un ntuntëty ijxtëm ja Tios të tni'ënä'ämën.

Biblia Dc en Mixe de Quetzaltepec

³ Ënet ojts nyijkxy ets tukmëmëtyaktaay ja naax kajpn ijxtëm ënety ja Dios të y'ënë'ëmxëtyën ets ijxtëm ënety winë të tyuk'ëne'emyën, ënät ojts ja naax kajpn tu'ukyë y'ëtsoowta'atë: Oy ëëtsëty jëtu'un ntuntëty ijxtëm ja Dios të tni'ënä'ämën.

Éxodo 24:3 ပူးပေါင်းရင်းမြစ်များ

2 Crónicas 15:14

Yajxon mëk yaxtë jyojktë ets tukmëtoowtë ja Wintsën ya'atë ja winma'any, mëët ja ëëwpë koopë ets ja xuxpë wojpë.

2 Crónicas 15:15

Tëkokyë ja Judá ja'ayëty akujk jotkujk nyäjya'awëyëtë mëët ya'atë ja aaw ayuk mëti'ipë ja Wintsën ojts tukwinwanëtën winë aaw winëjot, mëët ja tsojkën ja'awën ënäty ja Wintsën të t'ixta'atë ets Wintsën tëë ënäty jam yajpaaty mëët yë'ëjëty. Ojts tyaj'akujk'aty tyajjotkujk'aty ma mëët y'itën oy ja naax kajpn mëti'ipë mëët nyäwyinkon'atëtën.

Salmos 50:5

Niye'eypyätë miitsëty ninu'un winë oy xytyuntën, mëti'ipë yë käjpxytyu'unën të tyajwintu'upëktën mëët ëjts, ets tyaktë xëmë ja wintsë'kën ma ëjtsën.

Éxodo 19:8

Ënät ja Israel ja'ayëty nitëkokyë y'ëtsoowtaaytyë: Oyës jëtu'un ntuntëty, jëtu'un tä ja Tios të tni'ënä'ämën. Moisés ojts ya'atë ja ëtsoowinpijtën tukninëjkxy ja Tios, ijxtëm ënäty ja naax kajpn të y'ëtsoyën,

Éxodo 24:2

Je'eyëp ko mijtsyë atu'uk xymyëwinkonëpës, mëti'ipë mjämyëët'ajtëpën, këtii nëkooyë wyinkontëty, yë wiink ja'ay ka'ap mëpaat pyety mëët mijts.

Éxodo 24:7

Tä ojts tu'uk ja noky tkoonë'ëky ma jap myinyën këxja'ay ja aaw ayuk ma ja käjpxytyu'unën ojts tuntën mëët ja Tios, ojts tukwinkukajpxë ja naax kajpn ets y'ëtsoowtë. Nja'akyukëjantëp ëëtsëty mëti'ipë ja Tios të tni'ënä'ämën.

Jeremias 11:4

Yë'ë ja käjpxytyu'unën mëti'ipës mëët ntuunyën ja y'ap y'okëty koos jap nyajpëtsëëmtë Egiptë, ma ënäty yajpaatën jëtu'un tä jeexyë jyuuky'atën ma jëëntooytyaknën ma pujxn wyin'ëëtsyën. Ojtsës n'ënëëmëtë: Mëmëtoowtëkës, tuntë tu'kë'ëyë mëti'ipës ni'ënä'ämëpën ets jëtu'un nkajpnniwa'antëty etsës miitsëty xyTyios'atëty.

Jeremias 34:13

Ëjts, maas nWintsën'atyën, mëti'ipë yë Israel ja'ayëty Tyios'ajtëpën, ojtsës tu'uk ntuny yë käjpxytyu'unën mëët yë m'ap m'okëty koos jap nyajpëtsëëmtë Egiptë, ma ënäty myëtuntën y'ëyowtën. Ojtsës ntuk'ënä'ämtë

Hageo 2:5

Jëtu'un ijxtëm ojts ntukwinwanëtën ko jap Egiptë mtso'ontë, yë njot nwinma'anyës xëmë yajpaaty ma miitsëtyën. Këtii mtsë'ëkëtë.

Malaquías 2:10

¿Këtii tyu'ukyëty yë Tios teetyë, mëti'ipë të xyajkojëmë? ¿Wi'ix ko näwyin'ë'ënëmëty nixim niyam ets nkäjpxykyumëto'ownajxmëty ja Wintsën ja kyäjpxytyu'unën mëti'ipë mëët tyuunën ja n'ap'ajtëm?

Deuteronomio 11:1

Tsoktë jawëtë yë mWintsënëty ets patuntë yë y'ënä'ämën tyiyajtën, yë y'aaw y'ayuk ets kyutujkën.

Deuteronomio 4:1

Miitsëty Israel ja'ayëty mëtoow'itë ya'atë tëyajtën ets ënä'ämën mëti'ipë yam ntukni''ixëjantëpën ets xykyuuytyuntëty. Yë'ë mtukjuuky'atëp ko ënäty jam myajpaatë ma ja naax kamën mëti'ipë yë Wintsën mo'ojanëtëpën, yë Tios mëti'ipë ja m'ap m'ok Tyiosajtën.

Deuteronomio 4:45

Ja ënä'ämën tëyajtën, ja aaw ayuk ets ja jot winma'any mëti'ipë tyukmëmëtyakën, ko jap tsyo'ontë Egiptë.

Deuteronomio 4:5

Ëjts tëëjës yam nikäjpxy ja ënä'ämën tëyajtën, mëti'ipë yë Wintsën nTiosës të xytyuk'ëne'emyën ets yë'ë xykyuuytyuntëty ma ja naax kajpnën mëti'ipë mniwa'akantëpën.

Deuteronomio 5:1

Wa'ats ja Moisés tyajtu'ukmujktaay ja Israel kajpn ets t'ënëmaay: Mëtoow'itë miitsëty Israel ja'ayëty ya'atë tëyajtën ets ya'atë aaw ayuk, mëti'ipë yam ntukmëtowantëpën. Yajwë'ëmtë yajxon mkëpajkjoty mwinma'anyjoty ets mpatuntëp.

Deuteronomio 5:31

E mijts wë'ëmës yaa mëët ëjts, jä'ä ko yë'ë yam ntuk'ëwaanëjäämpy tëkokyë ja ënä'ämën tëyajtën, ja kutujkën ets ja aaw ayuk mëti'ipë ënät mnikajpx mnimëtya'akëpën ets yë'ë pyatuntëp, ko ënäty jam yajpatnëtë ma ja naax kajpnën mëti'ipës nmo'ojantëpën ets tjä'ä'atëty.

Deuteronomio 6:1

Ya'atë ënä'ämën'ajtp tëy'ajtën'ajtp ets ja aaw ayuk mëti'ipë Wintsën të xytyuk'ëne'emyënës ets ntukni''ixëtëty ets yë'ë xypyatuntëty ko ënäty jam myajpatnëtë ma ja it naaxwiinyëtën mëti'ipë mjä'ä'atantëpën.

Josue 24:21

Tä ja mayjyä'äy y'ëtsoowtë: Ka'ap jëtu'un jyata'any. Ëëtsëty Wintsënës nmëtunantëp.

Josue 24:22

Ënät ojts ja Josué y'ëtsoy: Miits yam kë'ëm m'ënantëp ko yë Wintsën xymyëtuna'antë. Jëtu'un, ëëts yam ëna'antë, jëtu'un y'ëtsoowtë.

Josue 24:24

Ets ja mayjyä'äy y'ëtsoowtë: Ëëtsëty yë Wintsën nmëtunantëpës ets ntunantëpës mëti'ipë yë'ë nyikäjpxypën.