Éxodo 24:12 - Biblia Mixe de Quetzaltepec

¹² Jëtu'un yë Tios t'ënëmaay yë Moisés: Pät jam ma kopkën, maas ëjts nyajpaatyën ets jamës xy'ëwxitëty, jam nmo'oja'any mäjtsk yë tsaatsetsy maas të nkëxja'ayën yë ënä'ämën tëyajtën mëti'ipë yë Israel ja'ayëty pyatuntëpën.

Biblia Dc en Mixe de Quetzaltepec

¹² Jëtu'un yë Dios t'ënëmaay yë Moisés: Pät jam ma kopkën, maas ëjts nyajpaatyën ets jamës xy'ëwxitëty, jam nmo'oja'any mäjtsk yë tsaatsetsy maas të nkëxja'ayën yë ënä'ämën tëyajtën mëti'ipë yë Israel ja'ayëty pyatuntëpën.

Éxodo 24:12 ပူးပေါင်းရင်းမြစ်များ

Deuteronomio 5:22

Ya'atë ja aaw ayuk mëti'ipë ja Wintsën mëk nyikajpxën jëën'akujky, ma ënäty ja yoots yëkëm kyëxë'ëkyën ets miitsëty aak mtam'ajtëp jam kopk'ëjxm. Ko myëtyaktaay, ka'ap ojts wi'ix y'ëk'ënanë, ja tëyajtën jam ojts tkëxja'ay ma ja mäjtskpë ja tsaatsetsyën etsës ojts xymyo'oy.

Éxodo 31:18

Ko yë Tios ojts myëtyakta'ay mëët yë Moisés jam ma Sinaí kopkën, mäjtsk ojts yë Moisés yajmo'oy yë tsaatsetsy, ma tkëxjaayën ja ënä'ämën tëyajtën mëti'ipë ojts yë Tios kë'ëm timy'oytyunyën.

Hebreos 9:4

jap yajpaaty tu'uk ja wintsë'këntyakn aak pu'ts pujxnëmpë ma ja poom tyoyën ets tu'uk ja kaaxë aak pu'ts pujxnëmpë mëët y'oytyunyëtyën. Japts kaaxëjoty tu'uk ja tu'ts aak pu'ts pujxnëmpë mëti'ipë myëët'ajtypyën ja maná ets nän jap kaaxëjoty ja Aarón ja tyajk mëti'ipë ojts jyi'tspëkyën ets mäjtsk ja tsaa ma kyëxja'ayëtyën ja Tios ja kyäjpxytyu'unën.

2 Corintios 3:3

Wa'ats yaj'ixy ko jëtu'un miitsëty ijxtëm ja noky tsyä'äyën mëti'ipë ja Kristë kë'ëm të tja'ayën ets ëëts të nyaktë, ka'ap oy nyatiijëty të yajtukja'ay, yë'ë të yajtukja'ay yë Juukpyë Tios yë Jya'awën; ja noky mëti'ipë ka'ap tsaakëjxy kyëxpajyëtyën, mëti'ipë të yajja'ayën ma naaxwiinyëtë ja'ay ja jyot wyinma'anyëtyën.

Jeremias 31:33

Jä'ä xëëw nëjkx ntunyës ya'atë käjpxytyu'unën mëët yë Israel kajpn: Jap jyootjoty wyinma'anyjoty npëjkta'aka'anyës ja n'ënä'ämënës ntëyajtënës ets jëtu'un jap tmëët'atëty këxja'aypyën. Ëjts nëjkx xyTyios'atë ets yë'ë nëjkx nkajpn'atës. Ëjts Wintsën, ëjts ënaanp.

2 Corintios 3:7

Yë ënä'ämën jëwyiinpë, mëti'ipë ja o'kën tukpatpën, tsaakëjxypyë kyëxja'ayëtyën mëët ja të'kxën jajën, ojts nyikëxë'ëky ma ja Israel ja'ayëtyën ets ka'ap ja Israel ja'ay myääyëtë twintë'kxtëty; jä'ä ko tääpë ja ajajk atë'kxk mëti'ipë ënäty tëkoyaanpën mëk ënäty yaj'ixy tyi'kxy.

Deuteronomio 4:14

Ëjts ojts xytyuk'ëne'emy ets ntukni''ixëtëty ya'atë ja ënä'ämën kutujkën ets yë'ë xypyatuntëty, ko ënäty jam mjajnëtë ma ja itjotmën mëti'ipë mniwa'akantëpën.

Éxodo 24:18

Tä ja Moisés ojts jap tyëjkënë yootsjoty ko jam pyajnë kopkkëjxm, jä'ä jam kopkëjxm y'ijty wëxtyikxy xyëëw wëxtyikxy tsyu'um.

Éxodo 24:15

Ko ja Moisés myëtyaktaay, ënät jam pyejty kopkkëjxm ets ja yoots nëma'a jam kyëtäky ma ja kopkupi'tsykën, mëti'ipë ojts yajnitëkoyën.

Éxodo 24:2

Je'eyëp ko mijtsyë atu'uk xymyëwinkonëpës, mëti'ipë mjämyëët'ajtëpën, këtii nëkooyë wyinkontëty, yë wiink ja'ay ka'ap mëpaat pyety mëët mijts.

Mateo 5:19

Pën yë ënä'ämën ka'ap tpatuny yiinpë wäänpë ets ka'ap pën tuk'ëwaanë wi'ix tpatunëtyën, mutsk nëjkx nyäxy ma ja tsajpjotmëpë kutujkënën; pën yë ënä'ämën pyatuumpy ets ja ja'ay tukni''ixë ets tpatuntëty, yë'ë mëj naxaanp ma ja tsajpjotmëpë kutujkënën.

Nehemías 9:13

Ko jam jyajtë ma ja tun kopk txëëwatyën Sinaí, jam xynyijënäjky ets mëët mkäjpxy mmëtyäky; ojts xymyo'oy ja aaw ayuk oypyë ets ja ijxpëjkën mëtëypyë ets ja ënä'äm ja kutujkën mëti'ipë jaantyëtypë.

Esdras 7:10

Yë Esdras tëë ënäty jyot wyinma'any tu'ukyë tpëjktä'äky ko t'ixpëka'any ets tpatuna'any ja Wintsën ja y'ënä'ämën tyiyajtën ets tukni''ixëja'any ja Israel ja'ayëty wi'ix ja Wintsën ja kyutujkën ets y'ënä'ämën tyajminyën.

Éxodo 34:1

Ënät yë Tios t'ënëmaay yë Moisés: Tsäts mijts kë'ëm yë tsaa, mäjtsk xy'oytyunëty, jëtu'un tä ojts mëjëyëjpë y'ityën etsës jam ja n'aaw n'ayuk xykyëxja'ajëty jatëkok, mëti'ipë ijty jam miinpën këxja'ay ma ja tsaatsetsyën mëti'ipë ojts xytyukpu'ujën.

Deuteronomio 5:31

E mijts wë'ëmës yaa mëët ëjts, jä'ä ko yë'ë yam ntuk'ëwaanëjäämpy tëkokyë ja ënä'ämën tëyajtën, ja kutujkën ets ja aaw ayuk mëti'ipë ënät mnikajpx mnimëtya'akëpën ets yë'ë pyatuntëp, ko ënäty jam yajpatnëtë ma ja naax kajpnën mëti'ipës nmo'ojantëpën ets tjä'ä'atëty.

1 Reyes 19:11

Ets ja Wintsën ojts y'ënë'ëmxëty: Pëtsëm jap tëja'p ets xywyinkuwa'akëtyës jam kopkkëjxm. Tam ënäty jëtu'un yajpaaty kopkkëjxm ko ja Wintsën jam nyäjxy mëët yë mëkpoj, tyimkë'ëtswa'kx ja kopk ets ja tsaa piw nuuk tuuntaay jam Wintsën wyintum; je'eyëp ko ja Wintsën ka'ap ënäty jap yajpaaty pojjoty. Ko jëtu'un y'ëknajxy ja mëkpoj tä ojts ja naaxwiinyëtë tyëkë yu'kxpë, mëk jyänty yu'kxy, je'eyëp ko ja Wintsën ka'ap ënäty jap yajpaaty.

Éxodo 19:3

Ënät jam ja Moisés pyejty kopkkëjxm ets jam nyäpyaata'anyë mëët ja Tios, jä'ä ko Tios ojts jam kë'ëm myëkäjpxyë kopkkëjxm ets y'ënëmaayë: Tukmëtow ya'atë aaw ayuk yë Jacob yë y'u'unk y'ëna'k, yë Israel ja'ayëty:

Éxodo 32:1

Ko ja Israel ja'ayëty t'ijxtë ko ja Moisés nëkooyë pyoxnë jam kopkëjxm, ënät ojts jam nyämyukëtë ma ja Aaronkën ets t'ënëmaaytyë: Jotëkoy ets xy'oytyunëty tu'uk yë nwintsënëtyës mëti'ipës xytyu'uwinwowtëpën, jä'ä ko yë Moisés ka'ap y'ëkyajnija'awënë pën tii të jyätyë, mëti'ipë ojts ëëtsëty xyjyuutën jap Egiptë.

Nehemías 9:14

Ojts xytyukni''ixë ets tpo'kxtëty ja po'kxënxëëw, ojts xymyo'oy ja ënä'ämën tëyajtën ets ijxpëjkën mëtëypyë, mëti'ipë kyë'ëyajkën ja Moisés.

Salmos 19:12

¿Pën jëtää kë'ëm y'ëkja'awëy'ijtyp ko tii oy tkatuny? Wintsën, mä'kxkës yë ntuuntëko'oy nkajpxtëko'oyën mëti'ipë yu'utsy ijtpën.