Esdras 6:12 - Biblia Mixe de Quetzaltepec

¹² Ja Wintsën mëti'ipë wyin'ijxën ja Jerusalén kajpn ets yë'ë tjä'ä'ata'any, nëjkxëp tyajkutëkoy ja naax kajpn mëti'ipë ënäty ëxëëk tunanëpën ets mëti'ipë yajjotkëjxëpën ma ja tsajptëjk jam Jerusalén tuunk'atën. Ëjts Darío, mëti'ipë yajkutujkpën, jëtu'unës ya'atë ja ënä'ämën mpëjktä'äky. Yajpatunëp jëtu'un tääjës yam nikäjpxyën.

Biblia Dc en Mixe de Quetzaltepec

¹² Ja Wintsën mëti'ipë wyin'ijxën ja Jerusalén kajpn ets yë'ë tjä'ä'ata'any, nëjkxëp tyajkutëkoy ja naax kajpn mëti'ipë ënety ëxëëk tunanëpën ets mëti'ipë yajjotkëjxëpën ma ja tsajptëjk jam Jerusalén tuunk'atën. Ëjts Darío, mëti'ipë yajkutujkpën, jëtu'unës ya'atë ja ënä'ämën mpëjktä'äky. Yajpatunëp jëtu'un tääjës yam nikäjpxyën.

Esdras 6:12 ပူးပေါင်းရင်းမြစ်များ

1 Reyes 9:3

ets y'ënëmaayë: Tëës nmëtoy wi'ix të mkajpxtä'äkyën ets wi'ix të mjëëytyä'äky të mnu'kxtä'äkyën; tyaapë tsajptëjk mëti'ipë të xykyojyën, tëëjës yam nkënu'kxy maas ja xëëw xëmë yajja'amyätsëtyën. Xëmës nkëwent'ata'any ets xëmës nja'amyätsa'any.

Deuteronomio 12:5

Ma miits yë mja'ayëtyën, yë Wintsën nëjkxëp twin'ixy tu'uk yë it naaxwiinyëtë ma nëjkx yaj'ëwtatyën, e miitsëty jam nëjkx mnëjkxtë.

Deuteronomio 12:11

Ja it naaxwiinyëtën mëti'ipë ënäty ja Wintsën të twin'ixyën ets jam yajpaata'any, nëjkxëp ja wyintsë'kën xymyo'otë mëti'ipës yam të nikäjpxyën. Nëjkxëp xytyukwintsë'ëkëtë ja jëyujk mëti'ipë myaj'ooktëpën ets xynyino'oktëty. Nëjkxëp näjyëtu'un xymyo'otë yë ayajk ako'onën ets tu'kpëkpyë yajëpëkyën ma ja majk pëkpyën ets ayajk ako'onën mëti'ipë të xytyukwinwanëtën ets xymyo'oja'antë.

Éxodo 20:24

Paaty yam n'ënëëmëtë ets xy'oytyuntëty tu'uk yë wintsë'këntyakn, yë naax mtukpotstëp ets jamts xymyo'otëtyës yë mjëyujk mtsajpkaajëty ets xynyino'oktëty, jëtu'un'äämpy ntu'unmëty ja nay'ëëw'oy näykyajpx'oyë. Ëjts minaanpës ma miitsëtyën ets nkënu'kxa'antë, oy jëtu'un tyimmaa'atëty maas ënäty ntsokyën etsës ja nxëëw mëj jaanty y'itëty.

Hechos 9:5

Tääts ja Saulo tyajtëëy: ¿Mpën mijts, Wintsën? Ets y'ëtsooy: Jesusës ëjts, mëti'ipë m'ixjëtijtyp mpajëtijtypyën.

Abdías 1:10

Wintsëtyu'un jëjptsëtyu'un nëjkx mwë'ëmy ets xëmëkyëjxm nëjkx mkutëkoy ko ëxëëk të xytyuny ets të xyaj'ooky ja mëkä'äx Jacob.

Isaías 60:12

Ja naax kajpn mëti'ipë ënäty ka'ap mëtunyën, nëjkxëp kyutëkoy; yë'ëpaat mëjëtypë naax kajpn kyutëkoyä'äny.

Eclesiastés 9:10

Mëti'ipë jyëkyejpyën mëpaat xytyunyën tun ets winë aaw winëjot xytyunëty; jä'ä ko jap o'kpëjutjoty ma mnëjkxa'anyën ka'ap jap tii yajtuny yajkäjpxy, ka'ap jap tii yajmëmay yajmëtajy ets ni ijxpëjkën ets ni wijyajtën jap kyä'ty.

Salmos 5:10

Tios, mëti'ipës nTios'ajtypyën, tëytyun. Mijts myajkutukëp ets jëtu'unyë mya'ta'ajëty mëti'ipë myëmaay myëët'ajtëpën. Këtii xykyupëkëty, jä'ä ko këjää pyokyëty; jä'ä ko tëë mkäjpxykyumëtoownaxëtë.

Ester 8:14

Tä ja yajkutujkpë ojts tni'ënä'ämë ets ja tyuunpëtëjk tmëtsoontëty kwaaykyijxy ja noky ets poj'am ye'eywya'kxtaaytyë kajpn kajpn, ya'atë ënä'ämën ojts jam näjyëtu'un yajkajpxwä'kxy ma Susa kajpnën.

2 Crónicas 7:16

jä'ä ko tëëjës kë'ëm ya'atë it naaxwiinyëtë nwin'ixy, tëëjës kë'ëm nkënu'kxy ya'atë njëën ntëjkës, ma y'itëtyën ja'amyetsy winë xëëw winë jëmëjt ja nxëëwës. Xëmës nmëët'ata'any, nkëwent'ata'any winë xëëw winë jëmëjt.

Deuteronomio 16:2

Ma ja ëmaayxyëëwën yë'ë nëjkx yë Tios xytyukwintsë'ëkëtë yë kupixyny ets tsajpkaato'oxy, jam nëjkx xymyënëjkxtë ma ja it naaxwiinyëtën mëti'ipë ënäty yë'ë të twin'ixyën ets jam ja xyëëw yaja'amyätsëty.

Esdras 6:13

Ënät ja yajkutujkpë Tatenai, mëti'ipë jam ënä'ämpën matsow ja xëëw kyëtä'äkyën, wiinkonpë Éufrates nëëjën ets ja Setar-boznai ets ja myëku'uktëjk, tuuntë jëtu'un tä ënäty ja Darío yajkutujkpë të tni'ënä'ämën.

Esdras 6:14

Jëtu'un'äämpy ja jutië ja'ayëty mëti'ipë ja tuunk tyu'uwinye'eytyëpën ojts tyajtu'utëkëtë ja tsajptëjktuunk, jëtu'un y'atëëy ja y'aaw y'ayuk ja Wintsën ja kyäjpxynyajxpë Hageo ets Zacarías, ja y'u'unk y'ëna'k ja Idó. Tääts y'apatëy ja tuunk jëtu'un tä ënäty ja Wintsën të tni'ënä'ämën, mëti'ipë y'ëwtajtëpën ja Israel ja'ayëty, mëti'ipë nyi'ënä'ämëtën ja yajkutujkpëtëjkëty Ciro, Darío ets Artajerjes, jampë y'ënä'ämtën Persië.

Esdras 7:15

Mënëjkx yë pu'ts pujxn ets poop pujxn mëti'ipë yë yajkutujkpë ets kyajpxwijpëtëjk myooytyëpën kë'ëmwinma'any ja Israel ja'ayëty ja Tyiosëty, jampë yajpaatyën Jerusalén,

Esdras 7:26

Pën ka'ap tpatuny ja Wintsën ets ja yajkutujkpë ja y'ënä'ämën, wä'än t'ooky, ëkë wä'än tyaj'ixkexy, wä'än tkuyäky ëkë wä'än tyajtsumy.

Esdras 7:17

Yë'ës mtukjuyëp ja tsajpkaa ets ja tsajpkaa ëna'k, ets tsajppax ets ja kupixyny, mëët ja nyi'ujts pajk tä yë tsajpmokën ets nëëjën, mëti'ipë mtukwintsë'ëkëtëpën ja Wintsën, jam ma wintsë'këntyaknën mëti'ipë jap tsajptëkoty yajpatpën jam Jerusalén.