Efesios 2:8 - Biblia Mixe de Quetzaltepec

⁸ Tios të tuny ja mëyajtën ets të myajnitso'okëtë ko të mëpëktë. Ka'ap yë'ëkyëjxmëty ko miits oy tii të xytyuntë, Tios të tuny ja mëyajtën.

Biblia Dc en Mixe de Quetzaltepec

⁸ Dios të tuny ja mëyajtën ets të myajnitso'okëtë ko të mëpëktë. Ka'ap yë'ëkyëjxmëty ko miits oy tii të xytyuntë, Dios të tuny ja mëyajtën.

Efesios 2:8 ပူးပေါင်းရင်းမြစ်များ

Efesios 2:5

tëë xymyo'oyëmën ja juukyajtën ko mëët ja Kristë ma ënäty nyajpatëmën ooky ko ja nëë poky nmëët'ajtëmë. Tios ja myëyajtën të ttuny ets miits të xypyaatë ja nitsokën.

Romanos 4:16

Jëtu'un ja waantakën xëmë tsyoowpaatëty mëti'ipë ja Abraham tyuunën ets tuk'oy'atëty ja y'u'unk y'ëna'k; tyaapë oyajtën namëyajtën ojts tpaatë, yë'ëkyëjxm ko myëpëjktë. Ka'ap yi'iyëty mëti'ipë pyatuuntëpën ja ënä'ämën tëyajtën, näjyëtu'un ja mëti'ipë mëpëjktëpën jëtu'un tä ja Abrahamën. Jëtu'un'äämpy ja Abraham teety nyäjxy ma ëëtsajtëmën.

Romanos 10:17

Jëtu'unkyëjxm, ja mëpëjkën ënät yajmëët'aty ko yajmëtoow'ity, ets ja aaw ayuk jam ja tsyoony ma ja Kristë të tnimëtyä'äkyën.

Hechos 16:31

Ënät ja Pablo ets ja Silas t'ëtsoowinpijtë: Mëpëk ja Wintsën Jesukristë ets mnitso'okëty mëët ja m'u'unk mto'oxytyëjk.

Juan 6:37

Tu'kë'ëyë mëti'ipës ja nteety të xymye'eyën, ëjts xynyimiinp; ets pën xynyimiinpës, nijëna'ajës nka'ixkäxëty.

Juan 5:24

Tëy miits nëëmëtë, pën xy'amëtoow'ijtpës ets tmëpëky mëti'ipës xykyäjxpën, pyaatëp y'ixëp ja juukyajtën xëmëkyëjxmëpë ets ka'ap yajpoky'ixëty, tëë ënäty tu'knax ja o'kën ets tëë ënäty tpaaty ja juukyajtën.

Juan 4:10

Ënät ja Jesús y'ëtsoowë: Ko jeexyë mijts xy'ëknijawë mëti'ipë ja Tios yäjkpyën ets pën m'amëtoowëp yë nëë, mijts jeexyë m'amëtoopy ja nëë ma yë'ëjën ets mooyëp jeexyë ja nëë mëti'ipë yajjuuky'ajtpën.

Lucas 7:50

Tääts ja Jesús tjaaknëmaay ja to'oxytyëjk: Jä'äkyëjxm të mnitso'oky ko mijts të xymyëpekyës, oy mnëjkxnëty akujk jotkujk.

Marcos 16:16

Pën myëpëjkpy ets nyëëpety, yë'ë nëjkx nyitso'oky; e pën kamëpëjkp, yë'ë nëjkx yajkpoky'ixy.

Juan 3:36

Pën ja Tios U'unk myëpëjkpy, yë'ë myëët'ajtyp ja juukyajtën xëmëkyëjxmëpë; e mëti'ipë ka'ap tmëpëkyën Tios U'unk, ka'ap tmëët'ata'any ja juukyajtën xëmëkyëjxmëpë, yë'ë y'ëxajëjäämpy ja Tios ja tyiytyu'unën.

Romanos 4:5

E ko tu'uk yë ja'ay tmëpëky ja Tios, mëti'ipë wa'ats yajnajxypyën ja pokyjyä'äy, Tios myëjpëjktäkpy ja ja'ay ja myëpëjkën ets wa'ats tyajnaxy, oy tii tkatuny oy mëti'ipë tsoowpatpën.

Efesios 2:10

Tios të xypyëjktakëm ets ntu'unmëty ja oypyë tuunk tu'ukyë mëët ja Jesukristë, ijxtëm të tuknipëjktaakën.

Gálatas 3:22

E ja Tios ja y'aaw y'ayuk jëtu'un y'ënä'äny ko ni'ëmukë ja ja'ay pokyjotm y'ijta'atë ets tpaatëty mëti'ipë ja Tios të twinwanën ko ja Jesukristë të tmëpëktë.

Hechos 13:39

Jëtu'un miitsëty mëku'uktëjkëty xynyijawëtëty ko ja pokymyä'kxën yë'ë mëët yajnimëtyä'äky ja Jesús. Pënjaty mëpëjktëpën mëët yë'ëkyëjxm yajpokymyä'kxtë, ets ni'ëmukë ja nimä'kxën tpaatëty mëti'ipë ojts ka'ap yajnimä'kxtën mëët ja Moisés ja kyutujkën.

Gálatas 3:14

Paatykyëjxm jëtu'un tyuunë jyajtë ets ja Tios ja kyënu'kxën jya'atëty ma ja ja'ayëtyën ka'apë jyutiis'atën, mëti'ipë ja Tios tyukwinwa'anëyën ja Abraham, ets näjyëtu'un ja Kënu'kxymyëkajtën n'ëxajëmëty ni'ëmukë mëti'ipë ja Tios tëë twaantä'äkyën.

Juan 6:40

Ja nTeetyës tsyojkpy ets tpaatëty ja juukyajtën mëti'ipë ja Tios ja y'u'unk y'ijxtëpën ets myëpëjktëpën, jëtu'un tmëët'atëty ja juukyajtën xëmëkyëjxmëpë; ets oy ënäty të y'ooktë nyajjuukpyëkëpës ma ënäty xëëw jëmëjt kyixyën.

Juan 6:35

Ënät ja Jesús y'ënëmaayëtë: Ëjts jëtu'un tsajpkääky mëti'ipë ja juukyajtën yäjkpyën. Pën xynyimiinpës, nijëna'a kyayuu'ookëtëty; ets pën xymyëpëjkpës, nijëna'a kyatëëtsëty.

Efesios 1:19

ets näjyëtu'un xyjyä'äkyukëtëty ko ja Tios ja myëk'ajtën ka'ap kyixy kyäxy, yë'ë tuunp ma ëëtsajtëmën ko nmëpëjkëmë. Ya'atë mëk'ajtën nän yë'ë mëti'ipë Tios ojts tyaj'ixyën mëët ja kutujkën

Hechos 14:27

Ko jyajtë jam Antioquía, ënät ojts tyajmujkta'atë ja mëpëjkpëtëjk ets tukmëmëtyaktaaytyë wi'ix ënäty ja Tios të tyunyën ma yë'ëjëtyën ets wi'ix ja Tios ja nyë'ë tyu'u të tyaj'ëwa'atsyën ko näjyëtu'un të myëpëktë mëti'ipë ka'ap jyutiis'atën.

Juan 6:65

Ets jyaak'ënany: Paty miits nëëmëtë ko ka'ap tjëkyepy pën xynyiminëtyës pën ka'ap ja Tios Teety wyoowminyë.

Colosenses 2:12

Jëtu'un miitsëty ijxtëm ja Kristë jeexyë mëët të mnaaxtëkëtën nëëpäjtënkyëjxm ets tëë mëët mjuukpyëktë jä'ä ko të xymyëpëktë ja Tios ja myëk'ajtën, ja Tios mëti'ipë Kristë yajjuukpyëjkën.

Juan 6:44

Ja'akyukë ijxtëm nëëmëtën, ka'ap tjëkyepy pën xynyiminëtyës pën ka'ap ja Tios Teety wyoowminyë, mëti'ipës të xykexyën, etsës yë'ë nyajjuukpyëktëty ko ënäty ja xëëw jëmëjt kyä'pxy.

1 Pedro 1:5

Jä'ä ko xymyëpëktë ja Tios, paaty mkëwent'atëtë mëët ja myëk'ajtën ets xypyaatëty ja nitsokën mëti'ipë jap yaj'ëwxijtypyën ets jää yajnijawëty ko ënäty ja naaxwiinyëtë kyixy.

Filipenses 1:29

Kristë mëët ja Tios të tuny ja mëyajtën ka'ap yi'iyëty ko xymyëpëktë ja Kristë, näjyëtu'un ko Kristëkyëjxm xymyënax xyajnaxtëty ja ëyo'on jotmay.

Romanos 10:14

¿E wi'ix t'amëtowtëty pën ka'ap tmëpëktë? ¿Ets wi'ix tmëpëktëty pën ka'ap tmëtowtë ko jyääjëty? ¿Ets wi'ix tmëtowtëty pën ka'ap pën tyuk'ëwa'anxëtë?

Mateo 16:17

Ënät ja Jesús y'ënëmaayë: Akujk jotkujk mijts, Simón, Jonás yë myaank, jä'ä ko ka'ap jyä'äyëty të mtuknijawëty, Tios Teety tsajpjotmëpë yë'ë të mmo'oyë jëtu'unpë winma'any.

Hechos 16:14

Tam ënäty tu'uk ja to'oxytyëjk mëti'ipë xyëëwajtypyën Lidia, Tiatira kyukajpnëty, wit to'kp, aakjä'ä ijty tyo'kpy ja tsu'unk wit. Ya'atë to'oxytyëjk wyintsë'këp ijty ja Tios. Wintsën ojts winma'any myo'oyë ets tja'akyukëty wi'ix ja Pablo y'ënä'änyën.

2 Tesalonicenses 1:9

Yajtëytyunantëp xëmëkyëjxm ets jëkäm yajpëjkta'aka'antë ma ja Wintsën ka'ap y'ixëtëty, ma ka'ap tpaatëtyën ja Wintsën ja myëj'ajtën jyääntyajtën ets myëk'ajtën.

Hechos 15:11

Ni'ikyënëm ëëts nija'awëm ko ja Wintsën Jesús të xyajtswokëm mëët ja y'oyjyot y'oywyinma'any, nän timjëtu'un tä yë'ëjëtyën.

Romanos 9:16

Paaty ka'ap ja Tios jä'ä twin'ixy ja ja'ay mëti'ipë oy tii tyuuntëpën, yë'ë wyinwijtsyp mëti'ipë kë'ëm pya'ëyoopyën.

Hebreos 6:4

Ja ja'ay mëti'ipë të tnijawëtën ja Tios ja jyä'ä, mëti'ipë të tuntën ja Tios ja tyuunk ets nän tëë ja Kënu'kxymyëkajtën t'ëxajëtë,

Mateo 20:9

Tääts myiintë ja mëti'ipë ënäty të tyëkëtën tuunpë jënäkyxyëëw ets nitu'ukjaty kä'pxy ja myeeny t'ëxajëtyë tu'k denario.