Apocalipsis 6:10 - Biblia Mixe de Quetzaltepec

¹⁰ Ets mëk y'ëna'antë: Janty oy, janty wa'ats mijts, Tios Mëti'ipë Maaytyääyëpën Winë, ¿jëna'a xytyiytyuna'any ets xypyaye'eyä'äny ja naaxwiinyëtë ja'ay mëti'ipë të y'ooktën?

Biblia Dc en Mixe de Quetzaltepec

¹⁰ Ets mëk y'ëna'antë: Janty oy, janty wa'ats mijts, Dios Mëti'ipë Maaytyääyëpën Winë, ¿jëna'a xytyiytyuna'any ets xypyaye'eyä'äny ja naaxwiinyëtë ja'ay mëti'ipë të y'ooktën?

Apocalipsis 6:10 ပူးပေါင်းရင်းမြစ်များ

Apocalipsis 19:2

jä'ä ko mëtëy ets tëyajtën yë'ë tyiytyuny ets pyaye'ey. Tëë t'ëyo'onmo'oy ja mëj ku'into'oxy mëti'ipë ja naaxwiinyëtë ja'ay të tyajma'atyën mëët ja y'ëxëëktu'unën, tëë ja Tios tëytyuny ets tpaye'ey ko të yaj'o'kxëty ja tyuunpëtëjk.

Apocalipsis 11:18

Tëë ja naaxwiinyëtë ja'ay jyoot'anpëktë ets tëë ja tiempo tpaaty ets xtyiytyunëty ja ja'ay ets xypyaye'eyëty ja pyoky ja o'kpë; ets ja mkäjpxynyajxpëtëjk xymyo'ojëty ja nyäkyumayë, ja wa'atspë ja mkajpn ets mëti'ipë myëjja'awëtëpën ja mxëëw, mëj mutskpë; jëtu'un xyajkutëkoyëty mëti'ipë yajkutëkooytyëpën ja naaxwiinyëtë.

Romanos 12:19

Miits mëku'uktëjkëty, ntsojktëp miits ni'ik. Ka'ap ja mmëtsip ëxëëk xymyëwinpitëty pën tëë tii mtukmëtuuntëkoyëtë, Tios yë'ë tukupätëtëp; jä'ä ko jëtu'un ja Tios ja y'aaw y'ayuk kyëxja'ayëty: Ëjts xypyatp npëjkta'akëty ja tëytyu'unën, ëjts ntukëpätëp, jëtu'un ja Wintsën y'ënä'äny.

Salmos 9:12

Tios jyä'ämyejtsyp yë ja'ay mëti'ipë yuujoty pa'amjoty yajpatpën ets ka'ap tja'atyëkoy ja jyi'iyën yaxën; tyiytyuunpy mëti'ipë ëxëëk ëtëtsp ënaanpën.

Apocalipsis 3:7

Nnijayë yë tsajpjotmëtë kukäjpxy jampë yajpaatyën Filadelfia: Jëtu'un y'ënä'äny mëti'ipë wa'atsën, mëtëyën, mëti'ipë myëët'ajtypyën ja David ja y'ëwatsn; ka'apë pën mëpaat tyaj'ëtukyën mëti'ipë yë'ë yaj'ëwatsypyën ets mëti'ipë yë'ë yaj'ëtujkpyën ka'ap mëpaat pën tyaj'ëwa'atsy:

Lucas 21:22

Jä'ä ko ma tääpë xëëwën ëyo'on jää itaanp, jää y'atëwa'any ijxtëm ja Tios ja y'aaw y'ayuk y'ënä'änyën.

Zacarías 1:12

Ënät ja Wintsën ja tyäjpjotmëtë kukäjpxy y'ënäny: Wintsën mëti'ipë maaytyääyëpën winë, tëkë'px majk jëmëjt tyam nyëjkxnë ma mijts xymyëtsipë'atyën yë Jerusalén kajpn ets tëkokyë yë Judá kajpn. ¿Jënaak jëmëjt jyaak naxa'any etsës xymyëët'atëty ja pa'ëyo'ow mnajts'ëyo'owën?

Apocalipsis 18:20

Mijts, tsajpjotmëpë yajpaatën, xoonta'aktë mëët ko jëtu'un të jyäty tääpë kajpn; ets miitsëty wa'ats kajpnëty, ayuk kajpxnajxpëty, käjpxynyajxpëtëjkëty xoonta'aktë jä'ä ko tëë ja Tios tuny ja paye'eyën ko të tyajkutëkoy tääpë kajpn.

Apocalipsis 18:24

Jam ma tääpë kajpnën, tam yajpaaty temy yoky ja Tios ja kyäjpxynyajxpë nye'pynyëty ets ja Tios mëpëjkpë nye'pynyëty ets ni'ëmukë nye'pyny mëti'ipë tëë ja ja'ay yaj'ookëtën naaxwiiny.

Salmos 79:10

Ka'ap tjëkyepy ets tääpë ja'ayëty mëti'ipë ka'ap të t'ëwtatyën y'ëna'antëty: ¿ma ënät ja mTios? Tuk'ijxtëk ëëtsëty näjyëtu'un wi'ix ëxëëk jyatën kyëpätën ja ja'ayëty mëti'ipë të tyaj'ooktën ja mtuunpëtëjk. Wä'än tnijawëtë ja'ayëty mëti'ipë ka'ap Tios t'ëwtatën.

1 Samuel 24:12

Yë Wintsën yë'ë kyëwentëpëkëp pën pokymyëët ma ëëtsajtëmën nimäjtsk ets tnitsiptunëty yë yajkutujkpë, e ëjts nijëna'ajës yë yajkutujkpë maa nkamëtëkoyëty.

Apocalipsis 3:10

Jä'ä ko të xypyatuny ja n'ënä'ämënës xëmë, paaty miits n'ijx'ita'an nkëwent'ata'antë ko ënäty ja ëyo'on jotmay yaa myiny mapaat ja naaxwiinyëtë y'ëwëtityën ets yajwinma'any'ixa'antë mëti'ipë tsënaaytyëpën naaxwiiny.

Génesis 4:10

Jëtu'un yë Wintsën y'ënëmaayë: ¿Wi'ix ko jëtu'un të m'ëtë'ëtsy? Yë m'uty jyot nye'pny, mëti'ipë të xytyemy të xyjye'etyën naaxkëjxy. Yë'ëjës xy'amëtoop etsës nipaye'eyëty.

Hebreos 12:24

tëë ja Jesús xymyëwinkontë, mëët ko ja Tios të tuny ja jempyë käjpxytyu'unën ja Jesús mëti'ipë nye'pyny y'ëxmajtsën ko ojts tyäxy jyä'äy ets wäänë oy nimëtyä'äky këtiinëm ja Abel ja nye'pyny.

Daniel 12:6

Nitu'uk yë'ëjëty të tyajtëy ja mëti'ipë linë wit wyit'ajtypyën, mëti'ipë ënäty jam nëëwinkëjxy yajpatpën: ¿Jëna'a jëtäätën tyaapë y'atëwa'any mëti'ipë yam n'ijxëmën ka'ap nijëna'a yaj'ixynyëmën?

Isaías 61:2

ets nikajpxa'any nimëtya'aka'anyës ja xëëw jëmëjt ma ja ja'ay jotkujk y'itëtyën, ja xëëw po'o ma ja nWintsën'ajtëm tyajkutëkoyä'änyën ja nmëtsip'ajtëmë mëti'ipë ëxëëk të xytyu'un të xy'ënëma'ayëmën. Të xykyexyës etsës nyajjotkujkëtya'aja'any tëkokyë ja'ayëty mëti'ipë moontëp tujktëpën.

Salmos 35:17

Wintsën, ¿jënaak xëëw jënaak jëmëjt jëtu'un tyaapë xyaj'ita'any? Yajtsokëkës yë njuukyajtën mëti'ipës tu'kpajk njuukyajtën'ajtypyën, ma tääpë ja'ayëtyën mëti'ipë jëtijtëpën kaa yowë ni'tsp.

Salmos 13:1

Wintsën, ¿Jëna'apaat ja'atyëkoy xyaj'ita'anyës? ¿Xëmëkyëjxmën ja'atyëkoy xyaj'ita'anyësë? ¿Jëna'a je'eyë mnäyu'utsa'anyë ko mijts niminëty?

Jueces 16:28

Tääts ja Sansón tyëjkëy kajpxtaktë ets ja Tios tmëkäjpxy, t'ënëmaay: Wintsën, tyam mijts nmëkäjpxy ets nmënu'kxtä'äky, ja'amyäjtskës ets mooykyës yë mëjaaw wä'änës ntuknituny yë filistejë ja'ayëty mëët koos yë nwiiny të xyjyu'tëtë.

Daniel 8:13

Ënätës të nmëtoy ko tu'uk tsajpjotmëtë kukäjpxy tyajtëy ja myëku'uk: ¿Jëna'a jyëjpkëxa'any ya'atë mëti'ipë yaj'ijxpën ma wintsë'këntyaknën ma yajyäkyën winjëpom yë wintsë'kën? ¿Jëna'apaat pyo'oxa'any yë nëë poky ma Wintsën yë tsyajptëjkën ets mëpëjkpëtëjkëty, ets je'eyë yaj'atään yajtuktäänëty?

Salmos 119:84

¿Jënaak jëmëjtës n'ëwxitëty? ¿Jëna'ajës xynyipaye'eyä'äny ets xytyukkumëtowëty ja nyëë pyoky ja ja'ayëty mëti'ipës xy'ixjëtijt xypyajëtijtëpën?

Lucas 2:29

Tyam, Wintsën, tëë ja mwaantakën y'atëy. Oyës n'o'knëty akujk jotkujk.

2 Pedro 2:1

Ijtë näjyëtu'un ja ja'ayëty tëëyëp mëti'ipë nätyijëtën ko ja Tios kyäjpxynyajxpë'atëtë ma ja Israel ja'ayëtyën, tää tyam yaa jëtu'unpë ja'ayëty ma miitsëtyën. Yë'ë ja'ay tyuk'ijxpëkantëp ja jot winma'any mëti'ipë yajtëkoopyën, ets t'ixtijtëty ja Wintsën mëti'ipë të yajtso'okëtën; ko jëtu'un y'ëtë'ëtstë, ënätyë ëyo'on tpaata'antë.

Lamentaciones 3:64

Mijts tukukëpät ijxtëm pyaat'atyën, tëytyun ijxtëm pyaatëtën.