2 Samuel 24:1 - Biblia Mixe de Quetzaltepec

¹ Ënät ojts ja Wintsën jatëkok tukjoot'anpëky ja Israel ja'ay, ko ja David tëkatsy ja winma'any tpaty ets ni'ënä'ämëy tkëxjaaytya'atëty tëkokyë jënu'un ja ja'ay jam yajpaatën ma ja Israel ets ja Judá kajpnën.

Biblia Dc en Mixe de Quetzaltepec

¹ Ënet ojts ja Wintsën jatëkok tukjoot'anpëky ja Israel ja'ay, ko ja David tëkatsy ja winma'any tpaty ets ni'ënä'ämëy tkëxjaaytya'atëty tëkokyë jënu'un ja ja'ay jam yajpaatën ma ja Israel ets ja Judá kajpnën.

2 Samuel 24:1 ပူးပေါင်းရင်းမြစ်များ

Génesis 45:5

Tuntë mëyajtën këtii ëxëëk mnäyjyawëtë ets këtii mnätyukjoot'anpëkëtëty aak miitsëty koos xytyo'ktë. Jä'ä ko Tios jëtu'unës ojts xykyexyës jëyëjp, këtiipë mijts yë mjuukyajtën tyëkoytyëty.

Génesis 50:20

Miitsëty jëtu'un ojts mjamay mjatajtë ets nyätyijyë ëxëëk xytyuna'antës e yë Tios yë'ë të tyajtëkatsy yë ëxëëkpë mëët yë oypyë ets ntunëtyës mëti'ipë tyam m'ijxtëpën mkoowtëpën: ets jëtu'un tsyo'okëty may yë ja'ay yë jyuukyajtën.

2 Samuel 12:11

Ëjts, mëti'ipë Wintsën'ajtpën ëjts yam jëtu'un nikäjpxyp: jam ma mjëën mtëjkën jämyë nëjkx kë'ëm ja m'u'unk m'ëna'k nyämyëtsiptsoonyë ets nëjkxëp kë'ëm xy'ixy ko ënäty ja mto'oxytyëjk myajpëjkë ets jä'ä tmëëtko'knëty tu'uk ja mmëku'uk.

2 Samuel 16:10

E ja ënä'ämpë tyaa y'ëtsooy: Ya'atë ka'ap myijtsëty mpaatyë, yë Sarvia y'u'unk y'ëna'k. Pën xypyojkpës wä'änxyëp yë Wintsën yë'ëjëty të y'ëne'emyë. E pën janty jëtu'unts, ¿pën mëpaat wi'ix y'ëktunyë?

2 Reyes 3:6

Ënät ja Joram, Samaria yajkutujkpë t'ijxka'pxtaay ja tsyiptuunpëtëjk mëti'ipë Israel ja'ayëtyën.

1 Crónicas 21:1

Ënät ja mëjku'u jam jyä'äjty ma ja Israel ja'ayëtyën ets mëktä'äky ja David tuktuuny ja mëti'ipë ka'ap y'oyëtyën ma ja Israel yajjaaymyuktën.

1 Crónicas 7:2

Tolá y'u'unk y'ëna'k jä'ä xyëëwajtë: Uzí, Refaías, Jeriel, Jahmai, Ibsam ets Samuel, ya'atë ojts tnikopk'atë ja myëku'uktëjkëty ma ja Tolá y'u'unk y'ëna'kën ets mëjtsiptuunpë ja'ay ijtyëty; aakjëtu'un tyimtu'ukyë ja'ay'ajtë, ma ja David jyuuky'äjtyën jä'ä ojts nyiwinë'atë i'px mäjtsk mil ja tëtujk mëko'px.

1 Crónicas 7:40

Tëkokyë ya'atë ja'ayëty aakyë'ë Aser y'u'unk'ajt y'ok'ajt. Yë'ë nyikopk'ajtë ja y'u'unk y'ëna'këty, jotmëk ijtyëty, aak tsiptuuntëp ets mëj'äämpy ja ja'ay jyëkyäjpëtë. Mëti'ipë ojts yajjaaypyätën ja xyëëw jä'ä nyiwinë'ajtë i'px tëtujk mil aak ye'etyëjk, mëti'ipë jyëkyäjpnëtëpën tsyiptuntëty.

2 Crónicas 32:25

Ko tsyoky y'akëtäky, ka'ap tkukajpxëy ko ënäty ja Wintsën të yajtso'okyë, ni'ikyë amëj akëjxm nyäjya'awëyë, paaty yë Wintsën tyukjoot'anpëjkë ets Wintsën näy tyukjoot'anpëjk yë Judá ja'ayëty ets Jerusalén ja'ayëty.

Éxodo 7:3

Ëjts kë'ëmës nëjkx n'ëwa'atsy ets mëj'ënä'ämpë ka'ap tsojk kyäjpxyjyä'äkyukëty, jëtu'un'äämpy tjëkyäpëty etsës ja nmëjajtën kanaakpëky nyaj'ixëtëty jap Egiptë ets ma tëkokyë yë it naaxwiinyëtë tnitänë.

Ezequiel 14:9

E ko tu'uk yë käjpxynyajxpë tëkatsy winë tkajpxnaxëty, ëjts Wintsën, ëjts ënäty të nwin'ëëny tääpë käjpxynyajxpë; nëjkxëpës nixajë'ëky ets ntëytyunyës ets njo'otsa'anyës maas yë nnaax nkajpnën, Israel kajpn.

Ezequiel 20:25

Ojts yë'ëpaat nmo'otës yë ënä'ämën ka'apë y'oyëtyën ets tëyajtën ka'apë yajjuuky'ätyën.

Levitico 10:6

Ënät ja Moisés t'ënëmaay ja Aarón ets ja myaankëty nimäjtskpë, mëti'ipë xyëëwajtëpën Eleazar ets Itamar: Këtii yë mwaayëty xynyajtsmatsëtëty ets ni mkanänyikëëts mkanäy'ixkëëtsëtëty ko pën y'ookëty tyëkoyëty, këtiipë yë'ë mtukjoot'anpëkëtëty ets m'ëk o'knëtëty. Mëti'ipë tëy mëpaat yë naax kajpn mëk tjawëtë yë'ë ko yë Tios të jyoot'anpëky ets të tyajkëtä'äky ya'atë jëën.

Números 1:19

Jëtu'un tä ënäty ja Tios të tni'ënä'ämën. Ya'atë jaaymyujkën jam ojts pyëti'iky ma ja të'ëts'it të'ëtsnaax txëëwatyën Sinaí.

Hechos 4:28

Jëtu'un winë të tuntë ijxtëm ënäty mijts të xytyuknipëjktaakën tyunëtëty jyatëtëty.

2 Tesalonicenses 2:11

Paaty ja Tios të t'ëwa'atsy ets yajwin'ëëntëty mëët ja tëko'oyën ets yë'ë tmëpëktëty ja ka'apë tyiyëtyën,

Jueces 2:14

Paaty ojts yë Wintsën mëk tukjoot'anpëky yë Israel kajpn ets tyajkutujky ets ja mä'tspë ëxëëk tyunëtëty ets tpëjkta'ajëty tiijaty ënäty myëët'ajtëpën ets ëxëëk tyuunëtë ja myëtsipëty mëti'ipë ënäty jam mëwinkon'ajtëtëpën.

Jueces 2:20

Paaty ojts ja Wintsën tukjoot'anpëky ja Israel kajpn ets y'ënäny: Ya'atë ja'ayëty je'eyë nëkoo tyajma'aty yë nkäjpxytyu'unënës mëti'ipës ntuunën mëët yë y'ap y'okëty ets ka'apës xymyëmëtowa'antë.

1 Samuel 26:19

Mëyajtënës yam npëjktsoopy yë mëj'ënä'ämpë ets tmëtowëty mëti'ipës yam nkajpxäämpyën. Pën yë'ë jëtu'un yë Wintsën të tyajkutuky etsës yë mëj'ënä'ämpë xy'ixjëtit xypyajëtitëty, yë'ë y'ëxajëp ko ënäty ja wyintsë'kën myo'oyë. E pën kë'ëmts jëtu'un twinma'any'äty, yë Wintsën pokëtëp yë'ë. Jä'ä ko tëëjës nyaj'ëxwojp nyaj'ixkäjxnë ma ya'atë it naaxwiinyëtën mëti'ipë yë Wintsën jyä'ä'ajtypyën etsës jam të xynyaswopëtë ma ka'ap tsyipëtyën etsës ja wiink tios n'ëwtajnëty.