1 Samuel 7:10 - Biblia Mixe de Quetzaltepec

¹⁰ Tam ënäty yë Samuel tyäky ja wintsë'kën nino'okpyë, ko yë filistejë ja'ayëty jam tyukja'ajtëtë. E yë Wintsën ojts tu'uk yë mëk'ënääw tkukäjxnaxy ma filistejë ja'ayëtyën, yë'ëts ojts y'ëtsë'këtya'ajëtë. Jëtu'un'äämpy ojts yë Israel ja'ayëty yë'ë myëta'aktë.

Biblia Dc en Mixe de Quetzaltepec

¹⁰ Tam ënety yë Samuel tyäky ja wintsë'kën nino'okpyë, ko yë filistejë ja'ayëty jam tyukja'ajtëtë. E yë Wintsën ojts tu'uk yë mëk'ënääw tkukäjxnaxy ma filistejë ja'ayëtyën, yë'ëts ojts y'ëtsë'këtya'ajëtë. Jëtu'un'äämpy ojts yë Israel ja'ayëty yë'ë myëta'aktë.

1 Samuel 7:10 ပူးပေါင်းရင်းမြစ်များ

Salmos 18:15

Tëë ja mejy nyitëtstu'uty mëti'ipë jap pa'tkë'pën; yaj'ijxnëp mëti'ipë ja naaxwiinyëtë tsyëëm'ijtypyën, mëët ko ja Wintsën të kyäjpxy ets ko mëk të tyajpojy.

Salmos 29:3

Yë Wintsën yë y'aaw y'ayuk yajmëtoowëp näjyëtu'un mëjnëë wiinkëjxy, yë Tios mëti'ipë myëët'ajtypyën mëj'ajt oyajtën, yë'ë ënääw yaj'ënäämpy, Yë Wintsën tam näjyëtu'un yajpaaty mëjnëë wiinkëjxy.

Salmos 29:4

Yë Wintsën yë y'aaw y'ayuk mëk tyukwanë; yë Wintsën yë y'aaw y'ayuk myëët'ajtyp yë mëk'ajtën;

Salmos 78:66

ets ojts ëxëëk tyajjaty tyajkëpety ja myëtsip, ets tyajkeky tyajpujty; jëtu'un'äämpy ojts xëmëkyëjxm tyajwë'ëmnë tsëtyu'unmëët.

Zacarías 4:6

Ets y'ënäny: Jëtu'un ja Wintsën t'ënëmaay ja Zorobabel: Ka'ap yë'ëkyëjxmëty ko may jyääjëty yë tsiptuunpëtëjk ëkë ko ja'ay jyotmëkëty, yë'ë tuunp ëjts yë nmëjaaw nmëk'ajtën, jëtu'un y'ënä'äny yë Wintsën mëti'ipë maaytyääyëpën winë.

Deuteronomio 28:7

Yë'ë nëjkx myajmëtä'äkyë, ko ënäty ja mmëtsip mëët mnäpyäätyë, ëkë ko ënäty ëxëëk mjatuna'anëtë. Yë'ëjëty nëjkx janty nimay jyatsoontë ets waatswitsy jyamintëty, tääts nyätyijyë myajkutëkoya'anëtë, ko ënäty miitsëty mnäkyuwa'anëtë, yë'ëjëty jëtu'unyë nëjkx kyäkta'atë.

Josue 10:10

Wintsën ojts kë'ëm tuknipëjktaakë ets nëkooyë yajtsë'ëkëtëty ja Israel ja'ayëty, e jëtu'un'äämpy ja Josué may ja ja'ay tyaj'o'ky jam Gabaón. Ojts ja Amor ja'ayëty jyakäknëtë, e ja Josué ojts ënätyë tpatsoony, jampaat tpaja'ajty Bet-horón ets jënu'un tim pyäätyën aak yaj'o'k, tyimpanëjkx jampaat ma ja it naaxwiinyëtë txëëwatyën Azecá ets Maquedá.

Jueces 4:15

Ko jam jyajtë ma mëët tsyiptuna'antën ja Sísara ja tsyiptuunpëtëjk, Wintsën ojts kë'ëm t'ëtsë'këtyä'äy ja tsiptuunpëtëjk mëët ja pujxnwintëkäämpë mëti'ipë myëtsiptuuntëpën ets ja jëtu'unyëpë mëti'ipë ënäty ja Sísara jyä'äy'äjtypyën; ko ja Sísara jëtu'un t'ijxy, ënät ojts timtyukjënäky ja pyujxnwintëkäämpë ets ojts teky'am kye'eky.

Jueces 5:20

Jam tsajpjotm ets tëkokyë jënu'un jam winë y'ëwtityën tä yë mëtsa'ajëtyën ojts tsyiptuntë mëët yë Sísara;

Jueces 5:8

Ka'ap ojts tyëkoy'äty ja ja'ay mëti'ipë wyinkoxtënaayën ja wiink tios, ma ënäty ja tsip jam tyunyën kajpnpë'am ma kajpn yajnitëkën, je'eyëp ko ka'ap yaj'ijxy ja y'akëëytyuk ets ja ku'umën, yi'iyë këxë'ktëp ja Israel ja'ayëty ja niwëxtyikxy milpë.

1 Samuel 12:17

E tyam miitsëty wa'ats xy'ixtë xynyijawëtë ko ka'ap tyu'uy pyojy ma jeexyë ja tsajpmok yajni'ipyën ¿Këtiijë?. E tyamtsës yë Wintsën nmëkajpxa'any ets nmëpëjktsowa'anyës wä'än tyajtu'uy ets jëtu'un xynyijawëtëty ets xyjyä'äkyukëtëty, ko mëti'ipë të xytyuntën yë Wintsën ka'ap yë'ë të t'oyjyawë ko miitsëty xy'amëtoopëtë tu'uk yë yajkutujkpë.

1 Samuel 14:15

Tëkokyë ja filistejë ja'ayëty mëti'ipë ënäty jam yajpatëpën ma ja y'ijtaknëtyën ets mëti'ipë ka'apën ojts ja tsë'ëkë tyuktëjkëtya'ajëtë. Jëtu'un ja tsiptuunpëtëjkëty mëti'ipë këwent'ajtëpën ets mëti'ipë je'eyë tsiptuuntëpën ojts tsyë'ëkëtëjkëtya'atë. Jää ojts näjyëtu'un yë naaxwiinyëtë yu'kxy mëk ets ja ja'ayëty ni'ikyë tsyë'ëkëtëjkëtyääytyë.

1 Samuel 2:10

Yë Wintsën piw nuuk yë myëtsip tuna'any mëët yë ënääw mëti'ipë ënäty yajtso'ompyën jam tsajpjotm. Yë Wintsën yë'ë nëjkx tukwinmëtoowta'ay nitu'ukjaty ja naaxwiinyëtë ja'ay wi'ix jyä'äy'atën; nëjkxëp tkutujkënmo'oy ja yajkutujkpë mëti'ipë ënäty yë'ë kë'ëm të twin'ixyën ets nëjkx tyajmëj tyajkëjääjë ja kyutujkën.

1 Samuel 7:11

Yë Israel ja'ayëty ënätyë tsyo'ontë jam Mizpá ets tpatso'ontë ja filistejë ja'ayëty, ëxëëk ojts tuntë ets jëtu'un timypyaja'ajtë jam Bet-car.