1 Samuel 14:24 - Biblia Mixe de Quetzaltepec

²⁴ E yë'ë tëy yë Israel ja'ayëty yajxon ënäty të y'ënu'kxëtyääynyëtë, jä'ä ko ka'ap ënäty ni pën të kyäy, jä'äkyëjxm ko ënäty yë Saúl të y'ënä'äny: Poky yë ja'ay wyë'ëmëty mëti'ipë kääpyën ma ka'anëm yë xëëw kyëtä'äkynyëmën, maas ënäty ka'ap të n'ijxnajxta'aynyën yë nmëtsipës.

Biblia Dc en Mixe de Quetzaltepec

²⁴ E yë'ë tëy yë Israel ja'ayëty yajxon ënety të y'ënu'kxëtyääynyëtë, jä'ä ko ka'ap ënety ni pën të kyäy, jä'äkyëjxm ko ënety yë Saúl të y'ënä'äny: Poky yë ja'ay wyë'ëmëty mëti'ipë kääpyën ma ka'anëm yë xëëw kyëtä'äkynyëmën, maas ënety ka'ap të n'ijxnajxta'aynyën yë nmëtsipës.

1 Samuel 14:24 ပူးပေါင်းရင်းမြစ်များ

Josue 6:26

Ënät yë Josué ojts yajxon timnyikäjpxy ya'atë aaw ayuk mëët yë Wintsën xyëëwkyëjxm ets y'ënäny: Poky nëjkx yë ja'ay wyi'imy mëti'ipë ok kyoj'o'oyëpën ya'atë Jericó kajpn. Ko tkojtsoonëty ja kajpn potsy'ëjx yë'ë nëjkx y'ooky ja kyä'äxkopk, e ko tpëjktaknëty ja nyi'akaj yë'ë nëjkx y'ooky ja kyutëëm.

Romanos 10:2

Ënaanpës ko yë'ëjëty jyatsojktëp tjamëtuna'antë ja Tios, je'eyëp ko mëti'ipë jyatsojktëpën ka'ap kyäjpxyëty ijxtëm ja mëtëypyë ja nija'awën.

1 Corintios 16:22

Pën jää jënaakën ka'apë tsokyën ja Wintsën Jesukristë, wä'än t'ity kajpxpoky. Min tsojk Wintsën Jesukristë.

Proverbios 11:9

Ko yë ëxëëk ja'ay kyäjpxy yajtëkooytyääpy yë jyiiky myëku'uk; e yë wa'ats ja'ay yë wijyajtën yë'ë jatëkok yajtsokëp.

Salmos 18:47

Yë Tios yë'ëjës të xynyitsiptuny etsës yë naax kajpn të xytyukwinkuwowë.

Jueces 5:2

Win'ëw winya'axtë yë Wintsën, jä'ä ko ma Israel kajpnën jaaktää'ajtp yë ja'ayëty, mëti'ipë ka'ap tsyë'ëkëtën ets tsiptuuntëp. Jä'ä ko jaaktää'ajtëp yë ja'ayëty, mëti'ipë jëjp'ixy timyajpatëpën oy jëna'a tyimyajmëkajpxtëty tsipjoty.

Jueces 1:28

Ko ja Israel ja'ayëty kyëjääjëtyë ets myëktaktë, ënät tuunkmooytyë yë Canaán ja'ayëty mëët yë mëkëtypë tuunk, e kä'äpyëm myääyëtë twojpëtsëmtëty.

Números 21:2

Tä ja Israel ja'ayëty t'ënëmaaytyë ja Tios, ko pën yë'ë putëkëtëp, yajkutëkooytya'atëp ja naax kajpn ets mëët tëkokyë jënu'un jam yajpaatyën.

Levitico 27:29

Näyjyëtu'un ja ja'ay mëti'ipë ënäty jä'ä të yajwaantä'äkyën ma Tiosën, ka'ap nëjkx t'ëkjëkyäjpnë yajuuypyëtsëmëty, kwanë jëtu'un ko nëjkx y'ooky.

Números 5:21

Yë Tios patëp ets mijts ijxpäjtën mwë'ëmëty. Ko ënät ëxëëk mjatëty mkëpätëty ma ja naax kajpnën. Ko ja mox nëkooyë tyuktukëty ets ja m'u'unk y'ookëty.

1 Samuel 14:25

Ënät yë tsiptuunpëtëjk jyajtë yukjotm ma jyätyën yë uuxpa'ak naaxkëjxy.

1 Samuel 14:39

Tyamës yajxon nikäjpxy mëët yë Tios yë xyëëwkyëjxn, mëti'ipë xëmë yajtsokpyën yë Israel ja'ayëty. Ko oy tyimyë'ë'atëty ja nmaankës Jonatán, pën yë'ë të pyokytyuny, kwanë ko y'ookëty. Ma ja tsiptuunpëtëjkën nitu'uk ojts kya'ëtsowtë.

1 Samuel 18:25

Saúl jä'ä ënäty wyinmay ko ja David yajka'ajäämpy ets y'ookëty ma ja filistejë ja'ayëtyën, paaty y'ëtsooy: Ënëëmëtë yë David ko jëtu'un tä jeexyë tyekyën mëti'ipë tëë yaj'ijxwë'ëmyën, ko pën pyëka'any, ëjts mëti'ipë ënä'ämpën jëtu'unës yam n'ëna'any ko ni'ikë oy yë'ë tyakëty tu'kmëko'px yë filistejë ja'ayëty, je'eyëp ko ookynyë ets tnëtsujktaayëty yë ye'etyëjk'ajtënëty yë nyi'ak, jëtu'untsës ëjts ntukjotxäämëty ja nmëtsiptëjkës.

Levitico 5:4

Ko pën tnikajpxëty ets winë oy tuna'any, ëkë ëxëëk tuna'any ets ka'ap jëyëjp tmëmay tmëtajy; je'eyëp ko ma jëtu'un y'ënä'änyën ka'ap tnijawë pën kajtëm nëjkx y'oy'äty ets ok tnija'awënëty, ko kajtëm jëtu'un y'oyëty, tä të y'ënä'änyën, pokymyëët nëjkx wyi'imy.