Salmos 32:5 - Biblia Dc en Mixe de Quetzaltepec

⁵ Ënet të nmëmaaywyätsy ets ka'apës nitu'uk ja mpoky të nkuyu'utsy; tëës ja npoky nmaaywyajtsta'ay e mijts, Wintsën, tëës xypyokymye'kxy.

Biblia Mixe de Quetzaltepec

⁵ Ënät të nmëmaaywyätsy ets ka'apës nitu'uk ja mpoky të nkuyu'utsy; tëës ja npoky nmaaywyajtsta'ay e mijts, Wintsën, tëës xypyokymye'kxy.

Salmos 32:5 ပူးပေါင်းရင်းမြစ်များ

Proverbios 28:13

Mëti'ipë ja'ay kyuyu'tsypyën yë pyoky, ka'ap oy jyuuky'ata'any; e mëti'ipë nyikäjpxypën ko tyuuntëkoy nëjkxëp yajpokymye'kxy.

2 Samuel 12:13

David ojts tkupëky ja pyoky ijxtëm ënety ja Natán të y'ënë'ëmxëtyën ets y'ënäny: Ëjts nja'apës ko tëëjës njantypyokytyuny ma Wintsënën. Ets ja Natán y'ëtsoowë: Yë Wintsën ka'ap myijtsëty mtëytyuna'anyë ets ka'ap mtimyaj'ooka'anyë.

Salmos 38:18

Minës yë npoky n'ëkmaaywyätsy, ka'apës njotkujk'aty koos nkanikäjpxy.

Isaías 65:24

Ka'anëm ënety xymyëkajpxtës koos n'ëtsoowinpitëty, ka'anëm ënety kyajpxpëtsëmtë koos nnijawëty wi'ix y'ëna'ana'antën.

Oseas 6:1

Mintë ni'ëmukë ets tsojk Wintsën niwinpijtëmë. Yë'ë atëj awäxë të xytyu'unëmë nän yë'ë mayanëp ets xyajtsokmëty; ojts xyajtsëtyujtëmë je'eyëp ko ojts näjyëtu'un xyajtsokëmë.

Job 33:27

Ets y'ëna'ana'any: Tiijës ko të n'ëktuunpë ja ka'apë myëtëyëtyën, e Dios ka'ap të xytyiytyunyës;

2 Samuel 24:10

Ok ojts ja David nyäjya'awëy'ityë ko kajtëm jëtu'un y'oy'äjty, ko tëëtëm ënety tyëkoy ko ja jaaymyujkën tni'ënä'ämëy, ënät ojts ja Wintsën tjamëmaaywyajtsnë, tja'ënëmaaynyë: Mëj këjääjës të ntuuntëkoy koos ja winma'any jëtu'un të npaaty. E tyamtsës npëjktsoy ma mijtsën Wintsën ets xymyä'kxëty ja npokyës, jëtu'unës të n'ëtsë'ëty tä tu'uk yë winma'anytyukën.

Salmos 103:12

Tëë yë npoky'ajtëm xytyukmëjëkämkäkëmë, jëtu'un tä yë xëëw tmëjëkämke'ekyën ma pyëtsimyën ets ma kyëtä'äkyën.

Salmos 30:5

Yë'ë tsojk'am yë tsyip y'äkë tmëët'aty, yë'ë y'oyjyot ijtëëp xëmë maapaat njuuky'ajtëmën. Pën jë'ëyëm yaxëm koots, komjëpom jotkujk nyajpaata'anëmë.

Efesios 4:32

Oy mja'ay'atëty ets mnäpya'ëyowëtëp nixim niyam. Nänyimä'kxëtë tu'knax ijxtëm ja Dios të mnimä'kxëtën, ko ja Kristë të xymyëpëktë.

Lucas 7:47

Paaty mijts nnëëmë, ko yë to'oxytyëjk mëti'ipë ijty mëjpokymyëëtën, tëë yajkpokymye'kxy, jä'ä ko mëj ja tsojkën ja'awën tmëëtëty. Mëti'ipë wäänë yajkpokymyä'kxpën, wäänë ja tsojkën ja'awën tmëëtëty.

Salmos 103:3

Yë'ëjës xypyokywyinmä'kxp maas winë oy nkatunyën ets yë'ëjës xyajtsokp koos jëna'ajëty npëkyë n'ixyë.

Salmos 86:15

E mijts Wintsën, jä'ä mTios'aty yujy tëtä'äky, ets pa'ëyoop, mä'kxtujkp mëët yë tsojkën ja'awën ets tëyajtën.

Salmos 86:5

Jä'ä ko mijts Wintsën, oy mTios'aty ets mpokymyä'kxp; janty'oy ja mjot mwinma'any xyajnikëxë'ëky ma ja'ayëtyën mëti'ipë mëkajpxëpën.

2 Samuel 12:9

¿E mijts wi'ix ko ënät ja n'ayukës të xykyumëtoownaxy ets të xytyuny ja ka'apë tyuunëtyën? Mijts të xyaj'ooky yë Urías, ja Hit ja'ay, je'eyë të xytyukniwoy ja Amón ja'ayëty ets yë'ë tyaj'ooktëty ets të xypyëjkë ja tyo'oxytyëjk.

Josue 7:19

Ënet ja Josué t'ënëmaay ja Acán: U'unk maay, mëjjaw jaantyjawë yë Wintsën mëti'ipë yë Israel ja'ayëty Tyios'ajtëpën; nikajpx mëti'ipë të xytyunyën ets këtii nitii xykyuyu'utsëty.

Jeremias 3:13

Yi'iyë mkupëkëp ko tëë mpokytyuny, ko yë mWintsën Dios të xykyäjpxy kyumëtoownaxy, ko ja mjot mnini'kx të xymyo'oy wiink ye'etyëjk jam kepypya'tkë'ëm ets ka'ap të xypyatuny ja n'ënä'äm ntëyajtënës. Ëjts Wintsën, ëjts ënaanp.

Jeremias 2:35

E mijts ni'ikyënëm m'ënaan'ëtë'ëtsy: Ëjts ka'apës tii poky nmëëtëty. Yë Dios ka'ap xy'ëkmëtsip'ajnës. E oy ko jëtu'un m'ëna'any, ko ënät myajnipaye'eyëty jää ënät yaj'ixëty pën ka'ap tii xytyuuntëkoy.

Jeremias 2:23

¿Wi'ix m'ëna'ana'any: Ëjts ka'apës tii poky nmëëtëty ets ka'apës wiink tios të npanëjkxyë? Mëmay mëtaj wi'ix ojts m'ëtë'ëtsy m'ëna'anyën jam joyjyotm; ja'amyäjtsta'a tiijaty të xytyunyën ko ojts mnäypyëjktä'äkyë tä jëyujk jëku'ux to'oxyën mëti'ipë xii yaa pëyë'knajx pëyë'ktëjkëpën;

Proverbios 30:20

Ja to'oxytyëjk mëti'ipë ka'ap twintsë'ëkën ja nyiye'etyëjk, jëtu'un winë tuny: kyäy pyiky je'eyë, tääts y'apujy kyë'ëpujy yajxon ets ënät y'ënä'äny ko ka'ap ma tii tuuntëkoy.

Malaquías 3:8

E ëjts tyam nyajtëyës: ¿Wä'än jëtää tu'uk yë naaxwiinyëtë ja'ay tpëjkëty winë Tiosë? Miitsëty tëëjës xypyëjkëtë mëti'ipës xypyatpën. Ets ni'ikyë mjaak timy'ëna'antë: ¿Tii të npëjkëtë? Yë'ëjës të xypyëjkëtë ma yajyäkyën tu'kpëky ja majk pëkpyë ets mëti'ipë yaj'ayajk yaj'ako'onëpën.

Job 31:33

Ka'apës yë npoky nijëna'a të nyu'utsy, jëtu'un tä wiinkpë y'ëtë'ëtstën ets ka'apës nijëna'a yu'utsy të nmëët'aty

Lucas 16:15

Ënet ja Jesús y'ënëmaayëtë: Miits win'ë'ëmpëtëjkëty, wa'ats mnäyajnaxëtë ma ja ja'ayëtyën, e ja Dios nyija'ap ko y'ëxëëkëty ja mjot mwinma'anyëty; jä'ä ko mëti'ipë ja ja'ay myëjpëjktaktëpën, Dios y'ëxëëk'ijxyp yë'ë.

Jeremias 31:20

Yë Efraín yë nyaax kyajpn u'unk maayënës ntsoky njawë; yë'ëjës tu'uk n'u'unk'ajtyp nmaay'ajtyp mëti'ipës mëk ntsojkpyën. Oyës muum ntuk'ojy yë tyëko'oyën, ëjts ka'apës nja'atyëkoy; jëëpy yaxpës njawë n'aaw njot ets npa'ëyoopyës jatëkok. Ëjts Wintsën, ëjts ënaanp.

2 Samuel 24:17

Ko ja David t'ijxy ja Wintsën ja kyukäjpxy mëti'ipë yajja'ay'o'kpën, ënät t'ënëmaay ja Wintsën: Ëjts jëtu'un ja poky nmëët'ajtyp, ëjts të ntëkoy ¿tyaapë ja'ayëty mëti'ipë tyam nëkoo të y'ooktën, tii poky të t'ëktuntë? tyam mijts nmënu'kxtä'äky ets yë'ë xyaj'ookëty yë n'u'unk n'ëna'kës, ëkë n'u'unk nto'oxytyëjkës.

1 Reyes 8:50

Mpokymyä'kxëp ja mnaax nkajpn mëti'ipë të mëtëkoyën. Mä'kxëp ja y'ëxëëkjot y'ëxëëk winma'anyëty ma ënety të mëtëkoyën, mijts mtunëp yë mëyajtën ets xypya'ëyow xynyajts'ëyowëty, pya'ëyowëtëty näjyëtu'un ja ja'ayëty mëti'ipë ënety tsumy matsy të yajnëjkxëtën.

2 Crónicas 6:29

mëtoow'it tëkokyë ja jëëytyak nu'kxtakën mëti'ipë tyuuntëpën ja ja'ay, mëti'ipë tyuuntëpën tëkokyë ja Israel kajpn ko ënety t'ixtë mëj këjää ja ëyo'on jotmay. Ko ja kyë'ë txajë'ëktëty ets tnajtsxajëtëty ma mjëën mtëjkën. Mëtoow'it jam tsajpjotm ma myajpaatyën ets pokymyä'kx; mo'o nitu'ukjaty ja ja'ay ijxtëm pyäätyën, jä'ä ko mijts wa'ats xynyijawë wi'ixjaty nitu'ukjaty yë ja'ay ja jot wyinma'anyën.

Esdras 10:11

E tyam, yaa ma Wintsën wyintuuy, nikajpxtë ets mëmay mëtajtë wi'ix të mtëkoytyën ets xypyatuntëty mëti'ipë ja Wintsën yajkutujkpyën. Jëwa'aktë jam ma ja'ayëtyën mëti'ipë ëxëëk ja jyot wyinma'anyëtyën ets ëxmatstë tääpë to'oxytyëjkëty mëti'ipë ka'ap y'Israel ja'ay'atën, mëti'ipë wiink wintsën y'ëwtajtëpën.

Salmos 25:16

Wintsën, Wintë'kxkës, ets mëët'at pa'ëyo'owën najts'ëyo'owën mëët ëjts, atu'ukës nyajpaaty ets mon tuk.

Salmos 25:18

Ijxkës yë nmonyë ntukyë, mä'kxkës yë npoky nkëtyey.

Salmos 38:19

Yë nmëtsipës ni'ikyës n'ijxnë nyimayënëtë, nimay oynyë mëti'ipës xymyëtsip'ajtëpën.

Salmos 51:6

Tëyajtën ko mijts yë'ë mtsojkpy mja'ap yë jot winma'any mëti'ipë wa'atsën ets mëtëyën, mijtsës yë wijyajtën të xymyo'oy mëti'ipë yu'utsypyaat yajpatpën.