Romanos 5:2 - Biblia Dc en Mixe de Quetzaltepec

² Mëët ko ja Kristë të nmëpëjkëmë paaty të tjëkyepy wi'ix nmëwinko'onmëtyën ja Dios, ets xoontä'äky nyajpatmëty ko të xypya'ëyo'owëmë, mëk ja mëpëjkën nmëët'ajtmëty, ets amëj akëjxm njëjp'ijxmëty ja Dios ja myëj'ajt y'oyajtën.

Biblia Mixe de Quetzaltepec

² Mëët ko ja Kristë të nmëpëjkëmë paaty të tjëkyepy wi'ix nmëwinko'onmëtyën ja Tios, ets xoontä'äky nyajpatmëty ko të xypya'ëyo'owëmë, mëk ja mëpëjkën nmëët'ajtmëty, ets amëj akëjxm njëjp'ijxmëty ja Tios ja myëj'ajt y'oyajtën.

Romanos 5:2 ပူးပေါင်းရင်းမြစ်များ

Efesios 2:18

Kristë xypyutëjkëmëp ni'ëmukë mëët ja kënu'kxymyëk'ajtën ets npatmëty ja Dios, jëtu'un ja jutiis ja'ayëty ets näjyëtu'un mëti'ipë ka'ap jyutiisëty.

Efesios 3:12

Mëët ko ja Kristë të nmëpëjkëmë, jyëkyejpy nmëwinko'onmëty ja Dios mëët ja oy'aaw oyjyot.

1 Corintios 15:1

Mëku'uktëjkëty, ja'amyätstë miits ja oy aaw oy ayuk mëti'ipë të ntuk'ëwaanëtën, yë'ë ya'atë aaw ayuk mëti'ipë miits të xykyupëktën ets yë'ë tyam tu'ukyë myaj'ijtëtëp.

1 Pedro 3:18

Jä'ä ko ja Kristë ojts xykyu'o'k xykyutëko'oyëmë tu'k'okyë ko npokyjyä'äy'ajtëmë. Yë'ë ka'ap ijty tii poky tmëëtëty; yë'ë pokyjyä'äy ojts tku'ëyowë ets myajnëjkxa'anëtë ma Tiosën. Oy ojts ja Kristë y'ëk'ooky ko nyäpyëjktakë naaxwiinyëtë ja'ayën; ojts jyuukpyiky mëët ja juukyajtën ka'apë kyëxë'ëkyën.

Romanos 12:12

Juuky'atë jotkujk ko xyjyëjp'ixtë ja oypyë ja juukyajtën. Mëtänëtë amëk jotmëk ja ëyo'on. Nijëna'a ja Dios ja'amyäjtsk xykya'ëxmatstëty.

Hebreos 3:6

E ja Kristë, jëtu'un jä'ä ijxtëm tu'uk ja u'unkën, oy tmëtuny ja Dios ma ja jyä'äyën, ëëtsajtëm yaj'antijëm; pën nmëpëjkëm ëmuumtu'ukjot mëti'ipë njëjp'ijxëmën.

2 Tesalonicenses 2:16

Ja Wintsën Jesukristë ets Dios, mëti'ipë nteety'ajtëmën, yë'ë të xytsyojkëm ets jotkujk'ajtën të xymyo'oyëmë xëmëkyëjxm; tsojk nkukajpxëm nja'awëkyëtakëmë ko y'oywyinma'any të tyajkëxë'ëky,

Juan 10:9

Ëjts jëtu'un ijxtëm ja kemy aawën. Pën tëjkëp ma ëjtsën yë'ë nitso'okaanp. Jëtu'un nyaxa'any ijxtëm ja kupixyny tyëkëtën pyëtsëmtën ets jap jyi'kxypyaatë.

2 Corintios 4:17

Ja ëyo'on mëti'ipës yaa nmënajx nyajnajxtëpën, ka'ap yë myëjwiin kyëjääjëty, tsojk nyäxy; wäänë mëj ja mëj'ajtën jaanty'ajtën xytyukpatmëty xëmëkyëjxmëpë.

Juan 5:24

Tëy miits nëëmëtë, pën xy'amëtoow'ijtpës ets tmëpëky mëti'ipës xykyäjxpën, pyaatëp y'ixëp ja juukyajtën xëmëkyëjxmëpë ets ka'ap yajpoky'ixëty, tëë ënety tu'knax ja o'kën ets tëë ënety tpaaty ja juukyajtën.

Salmos 17:15

E ëjts, yë'ëjës xykyu'uxaanp, ko mijts n'ixëty wiinxë jëjpxë, koos jam näy'ixëtëty ma mijtsën koos ënety nma'awyijy.

Romanos 15:13

Ja Dios, mëti'ipë njëjp'ijxëmën, wä'än yë'ë ni'ëmukë mmo'ojëtë ja xoontakën ets ja jotkujk'ajtën mëët ko yë'ë xymyëpëktë ets wä'än mmo'ojëtë ja jotkujk'ajtën mëët ja myëk'ajtën ja Kënu'kxymyëkajtën.

Apocalipsis 21:23

Ka'ap jam myëyäty ets ja xëëw po'o y'anëty kajpnjotm, kë'ëm ja Dios ets ja Kupixyny U'unk y'ajajy y'atë'kxy.

Apocalipsis 21:3

Ets nmëtooyës tu'uk ja ayuk mëk tsajpjotm y'ënä'äny: Jam ja Dios tyam y'ity ma ja ja'ayën ets jyuuky'ata'any mëët yë'ë. Yë'ëts ja'ay'atëtëp ets ja Dios yajpaata'any mëët yë'ëty.

Romanos 5:5

Ya'atë mëpëjkën ka'ap maa tëkatsy xyajwë'ëmëty, jä'ä ko yë Dios tëë xymyo'oyëm ja tsyojkën jya'awën ma njoot'ajt nwinma'any'ajtëmën mëët ja kënu'kxymyëk'ajtën.

Romanos 3:23

ni'ëmukë ja'ay të pyokytyunta'atë paaty tmëjëkäm'atë ja Dios ja myëj'ajt y'oyajtën.

Romanos 2:7

Myo'ojäämpy ja juukyajtën xëmëkyëjxmëpë mëti'ipë y'ijxtaaytyëpën ja mëj'ajt oyajtën, xoontakën ets ka'apë kyixy nyäxyën, ets të tuntë xëmë ja oypyë;

Juan 14:6

Ënet ja Jesús y'ëtsoowë: Ëjts jëtu'un tu'u'ajtp, ja tëyajtën ets ja juukyajtën. Ëjtskyëjxm je'eyë tjëkyepy pën jya'tëty ma ja Dios Teetyën.

Juan 10:7

Ënet ja Jesús ojts y'ënëmaaykyojënëtëpë: Tëy miits nëëmëtë, ëjts jëtu'un ijxtëm ja kemy aawën ma ja kupixyny nyaxtën.

Salmos 73:24

tëës mijts xytyu'uwinye'ey mëët yë m'ëëwij mkajpxwijën, e ko ja xëëw jëmëjt tpaatëty mijtsës xy'ëxajëjaanp mëët yë xoontakën.

Apocalipsis 21:11

Janty ajajp janty atë'kxp mëët ja Dios ja myëj'ajtën jyääntyajtën, jëtu'un y'ajajy y'atsëmämy ijxtëm ja tsaa janty oypyën, ijxtëm tu'uk ja poop tsaajën mëti'ipë yajtuk'ijxnajxpën, ijxtëm ja ijxn yajtuk'ijxnaxyën.

Apocalipsis 3:21

Pën mëtakp, yë'ëjës nmo'ojäämpy ja tëyajtën ets xymyëët'u'unyëtyës maas ja nkutujktaknën, ijxtëmës ëjts të nmëtä'äkyën ets të naaxweetyës maajës ja nTeety ja kyutujktaknën.

Hebreos 6:18

Ya'atë mäjtskpëkpyë mëti'ipë ka'ap tyëkatsyën ets ka'ap tjëkyepyën yë Dios wyin'ëënëty, paaty të n'ëxajëm ja jotkujk'ajtën, ko të n'ixta'ayëm ja Dios myajts'ijtën ets të ntukjotkujk'ajtëm ja ëwxijt mä'kxtujkën mëti'ipë të xymyo'oyëmën.

Romanos 8:24

Paaty ja nitsokën npatëmë ko njëjp'ijxëmë. Je'eyëp tëy ko pën tëë yaj'ijxnë ja mëti'ipë ënety yajjëjp'ijxpën, ka'ap nëkooyë y'ëktsoowpatnë ja ëwxijtën. Jä'ä ko ¿Pën y'ëwxijtyp mëti'ipë tëë t'ixyën?

Romanos 8:1

Paaty tyam ka'ap pën poky y'ëk'ijnë, mëti'ipë ja Kristë Jesús mëët tu'ukyë yajpaatyën,

Hechos 14:27

Ko jyajtë jam Antioquía, ënät ojts tyajmujkta'atë ja mëpëjkpëtëjk ets tukmëmëtyaktaaytyë wi'ix ënety ja Dios të tyunyën ma yë'ëjëtyën ets wi'ix ja Dios ja nyë'ë tyu'u të tyaj'ëwa'atsyën ko näjyëtu'un të myëpëktë mëti'ipë ka'ap jyutiis'atën.

Mateo 25:21

Tääts ja wyintsën y'ënëmaayë: Oy jëtu'un, oy ets tëy tëtä'äky winë të xytyuny të xykyäjpxy. Jä'ä ko oy tii yiin wään të myajtukë'ëtëkë, tëë oy mtuny mkäjpxy, jyëkyejpy winë mëjpë këjääpë myajtukmë'ëxmatsëty. Tëkë ma ja xoontakën yajpaatyën ets mjuuky'atëty akujk jotkujk mëët ëjts.

Efesios 6:13

Paaty miits yajxon xymyëët'atëty ja mëk'ajtën mëti'ipë Dios të mmo'ojëtën, ko tpaatëty ja xëëw ëxëëkpë myiny wyinkonyën ets xymyëmëta'aktëty, tu'ukyë ja mëpëjkën xyaj'itëty ko ënety mëk myajpaatë.

2 Corintios 3:18

Paaty ëëtsajtëm, ni'ëmukë, ka'ap n'ëkwinkujuuxë'ajtënë, jëtu'un nyajpatëmë tä tu'uk yë ijxnën ma yaj'ixyën ja Wintsën ja myëj'ajt jyääntyajtën, ni'ikyë n'awinpijt'ëtëtsëmë ijxtëm ja Wintsën y'ixëtyën. Jä'ä ko winjëpom npatëm ja Wintsën ja myëj'ajt y'oyajtën, e paaty jyëtu'unëty jä'ä ko Wintsën tyuny mëët ja Kyënu'kxymyëk'ajtën.

Romanos 14:4

¿Mpën mijts ko xypyoky'ixy ja ja'ay mëti'ipë Dios myëtuumpyën? Pën oy ëkë ëxëëk winë tuny, yë'ë kë'ëm nyija'ap. E yë'ë oy wyë'ëma'any, jä'ä ko yë Wintsën myëët'ajtyp yë mëk'ajtën ets oy yajwë'ëmëtëty.

Proverbios 14:32

Yë ëxëëk ja'ay kë'ëm ëxëëk nyätyunyë ko ëxëëk y'ëti'itsy y'ënä'äny; e yë ja'ay mëti'ipë tëy tëtä'äky winë tyuunpyën, yë'ë kuwanëp ma mëtëy tyu'uye'eyën.

Romanos 11:20

Tëy jëtu'un. Ojts jyänty yajkatspuxy je'eyëp ko yë'ë ko ka'ap myëpëjktë, e mijts paaty jam myajpaaty jä'ä ko mmëët'ajtyp ja mëpëjkën. E paaty mijts këtii mnämyëjjawëtëty, këtiipë näjyëtu'un myajkatspuxëty.