Proverbios 15:8 - Biblia Dc en Mixe de Quetzaltepec

⁸ Yë Dios ka'ap nijënu'un t'oy'ixy ko yë ëxëëk ja'ay tyäky yë wintsë'kën, e ko yë wa'ats ja'ay aaw ayuk myo'oyë kyupëjkpy yë'ë.

Biblia Mixe de Quetzaltepec

⁸ Yë Tios ka'ap nijënu'un t'oy'ixy ko yë ëxëëk ja'ay tyäky yë wintsë'kën, e ko yë wa'ats ja'ay aaw ayuk myo'oyë kyupëjkpy yë'ë.

Proverbios 15:8 ပူးပေါင်းရင်းမြစ်များ

Proverbios 15:29

Yë Dios, myëjëkämkekpy yë ëxëëkja'aytyëjk; e myëtoow'ijtyp ko yë wa'ats ja'aytyëjk Dios mëkajpxtë.

Proverbios 21:27

Dios ëxëëk t'ixy ko ëxëëkja'aytyëjk tii tyoxtë. Jä'ä ko ka'ap tii ëmuumtu'ukjot tyaktë.

1 Crónicas 29:17

Ëjts nija'apës Wintsën, ko mijts wa'ats jot winma'any xy'ixy xynyijawë, yë'ë mtsojkën'ajtyp ets ja'ay winë tëyajtën tunëty. Paaty yam nmo'oy tëkokyë ya'atë winë aaw winëjot. Tyam n'ijxypyës ko yë mnaax mkajpn tyampë yaa yajpaatyën tu'ukmukyë mëët ja jot winma'any oy tsujpë, tëë mtukë'ëtëkëty tëkokyë ya'atë ayajk ako'onën.

Jeremias 6:20

¿Tiijës ko xytyuknimintë yë poom mëti'ipë jam Sabá të xymyëtsoontën ets aay ujts mëti'ipë pa'akxu'kpën, mëti'ipë tso'onpën wiink kajpn? Ëjts ka'apës yë'ëjëty n'oyjyawë ja wintsë'kën no'okpyë xämpyë ets wiinkëtypë wintsë'kën.

Proverbios 28:9

Pën jää pën mëti'ipë ka'ap tja'akyukëja'anyën yë Dios yë y'ënä'ämën tyiyajtën, Dios ka'ap nëjkx kyupëkyë ko tjamëkajpxëty.

Isaías 61:8

Jä'ä ko yë Wintsën tsyojkpy jya'ap ja oypyë nänyipaye'eyë, ets y'ëxëëk'ijxyp ja to'onën mä'tsën ets ja yajja'ay'o'kën. Yë'ë mmo'ojanëtëp ja näykyumayë, ets tyunäämpy ja käjpxytyu'unën mëët miitsëty xëmëpë y'ityën.

Juan 4:24

Dios, ka'ap yaj'ixy ets pën y'ëwtajtëpën, mëtëy t'ëwtatëty jëtu'un ijxtëm ja Kënu'kxymyëkajtën y'ënä'änyën.

Eclesiastés 5:1

Ko mnëjkxëty tsajptëkoty mkëwent'atëp yë mjot mwinma'any; mijts këtii yë'ë xymyëmay xymyëtajëty jëna'a yë mwintsë'kën xyaka'any jëtu'un tsuuja'aytyëjkën, yë'ëmës mëmay mëtaj wi'ix xymyëmëtowëtyën yë Wintsën.

Isaías 66:3

E tää yë ja'ay mëti'ipë tu'uk yë tsajpkaa yaj'o'kpyën, ets tu'uk näjyëtu'un ja'ay tyaj'ooky; ko tyaj'ooky tu'uk kupixyny, tu'uk uk tyo'kwiity; ko tyäky yë ujtspajk, näjyëtu'un tyäky yë ëtsëm ne'pny; nyo'ktëp xyaamtëp yë poom ets y'ëwtajtëp awinax. Mëti'ipë ja'ay jëtu'un ëtëtstëpën, oy nyäyjyawëtë ko jëtu'un y'ëtë'ëtstë.

Cantares 2:14

Ja muuxy tsaajotypë tsyëënën, mëti'ipës njä'ä'ajtypyën, mëti'ipë muum këjxm näpyëjktakëpën; ets yu'utsy muum yajpaaty, pëtsëm wä'änës n'ëk'ixy mwiin mjëjp, wä'änës nëkmëtoy m'aaw m'ayuk. Janty oyës näjyawëty ko n'ixy. Janty pa'akëm njawës jyotkëtä'äky koos nmëtoy m'aaw m'ayuk.

Salmos 17:1

Wintsën, ëjts yë'ëjës n'amëtoopy ja mëtëypyë nipaye'eyë. Kwentëpëk maas yam ya'atë tsajpkäjpxy nyajnaxyën, ëjts mëtëyës yam nkäjpxy, ka'apës n'antä'äky.

Proverbios 10:24

Mëti'ipë ëxëëk ja'ay tsyë'këpën, yë'ë jajtëp këpäjtëp, e yë wa'ats ja'ay pyätyp mëti'ipë tsyojkën'ajtypyën.

Proverbios 15:7

Yë wijyjyä'äytyëjk yajye'eywya'kxtëp yë wijyajtën ko myëtya'aktë, e yë ëxëëkja'aytyëjk tii y'ëkyajwa'kxtëp ijxtëm myäytyën tyajtën.

Proverbios 21:3

Tun ja nipaye'eyën oypyë ets mëtëypyë, yë'ë jëtu'un yë Dios ni'ik tyukjotkëtäkpy këtiinëm yë wintsë'kën.

Miqueas 6:7

¿Tyukxoonta'akëp jëtää yë Wintsën koos ntukwintsë'ëkëty tu'uk mil yë tsajppax ayääkë ëkë may olivë onë? ¿Ëkë ko ntukwintsë'ëkëtyës yë nmaankës kä'äxkopk ets yë'ë ntukkunaxëtyës yë n'ëxëëk winma'anyës ets nnëë npokyësë?

Hageo 2:14

Ënet ja Hageo y'ënäny: Jëtu'un yë Wintsën y'ënä'äny: Ko nän timjëtu'un jyäty kyëpety ma ya'atë ja'ayëtyën, tëkokyë mëti'ipë tyuuntëpën ets mëti'ipë wyintsë'kën'ajtëpën aak ëxëëk yë'ë.

2 Samuel 15:12

Ojts näjyëtu'un yë Absalón twoy yë Ahitófel, mëti'ipë mëët yë David tyuunmukyën ets mëti'ipë yë David wyäämpyën najtskajpxëpë, jam tsyëënë Guiló ets jyämyëët'atëtëty ma ënety ja wintsë'kën tyajka'anyën. Jëtu'un ojts nyimayëtë ja Absalón ja jyä'äy ets tnipëtëka'antë ja ënä'ämpë David.

1 Reyes 3:10

Ja Wintsën, oy tmëtooy ko jëtu'unpë amëto'owën pëjktso'owën tuuny ja Salomón,

Salmos 141:2

Wä'änës yë ntsajpkäjpxy jam tja'ty ma mijtsën tä poom jyokyën, koos yë nkë'ë nxajë'ëkëty jëtu'un nyaxëty tä jeexyë wintsë'kën myajmo'oyën ko jyënäkyxyëëw'aty.

Daniel 9:23

Ko të mtëkë nu'kxtakpë, ënätyë ja Dios të xymyo'oyës ja ëtsoowinpijtën. E paaty niminy ets ntuk'ëwaanëja'any wi'ix të y'ëtsoyën, jä'ä ko yë Dios mëk mtsokyë mjawëty. Paaty yam mijts n'ënëëmë ets yajxon xyjyä'äkyukëty ets xynyijawëty mëti'ipë të xy'ixyën.

Miqueas 6:6

¿Tii mëët yë Wintsën Ni'ik këjxmëpë nwinkuwa'akëtyës koos ënety n'ëwtata'any? ¿Yë'ëjës mëët nwinkuwa'akëty yë tsajpkaajë tu'kjëmëjtpë jyëmëjtën mëti'ipës ntukwintsë'ëkëpënë?

Malaquías 1:10

Jääpëk jeexyë jam pën pyëtsimy ma miitsëtyën mëti'ipë tsajptëjk yaj'ëtukëpën, këtiipë pën tyajmëjëty jap yë jëën maas yë nwintsë'këntyaknën. Jä'ä ko ka'apës jotkujk näjyawëty mëët miitsëty ets ka'apës jëtu'un n'ëkupëkanë yë wintsë'kën mëti'ipë myajktëpën.