Oseas 9:10 - Biblia Dc en Mixe de Quetzaltepec

¹⁰ Jëtu'un yë Wintsën y'ënä'äny: Koos mpaty yë Israel, jëtu'unës jotkujk näjya'awëy tä ja'ay tpaatyën yë tsatsym jam të'ëts'itjotm. Yë m'ap m'okëty jëtu'unës n'ijxy tä yë higos tsojk tsyaamë'ëkyën. E ko jam jyajtë Baal-peor wiink tios ojts nyätyukmëkënu'kxëtë ets ojts tuntë winë ëxëëk tä y'ëxëkëtyën yë y'awinaxëty mëti'ipë ënety tsyojkën'ajtëpën.

Biblia Mixe de Quetzaltepec

¹⁰ Jëtu'un yë Wintsën y'ënä'äny: Koos mpaty yë Israel, jëtu'unës jotkujk näjya'awëy tä ja'ay tpaatyën yë tsatsym jam të'ëts'itjotm. Yë m'ap m'okëty jëtu'unës n'ijxy tä yë higos tsojk tsyaamë'ëkyën. E ko jam jyajtë Baal-peor wiink tios ojts nyätyukmëkënu'kxëtë ets ojts tuntë winë ëxëëk tä y'ëxëkëtyën yë y'awinaxëty mëti'ipë ënäty tsyojkën'ajtëpën.

Oseas 9:10 ပူးပေါင်းရင်းမြစ်များ

Oseas 4:14

Ëjts ka'apës ntëytyuna'any yë mnëëx ko jyot nyini'kx tooky tyäky ets mxäkxytyëjk ko tyajtëkoy yë pëjkën ukën wyintsë'kën, jä'ä ko miitsëty ye'etyëjktëjk nän mninëjkxtë yë to'oxytyëjk mëti'ipë jyot nyini'kx tyo'ktëpën; ets miitsëty ko yë wintsë'kën xyaktë, myajmiintëp yë to'oxytyëjk mëti'ipë jyot nyini'kx tyo'kpy yäjkpyën. Jëtu'un ja naax kajpn nyätyunyë mëti'ipë ka'ap wyijyëtyën.

Jeremias 11:13

Yë Judá ja'ayëty may yë tios tmëët'atë, jëtu'un tä yë nyaax kyajpn myäy'atën; yë Jerusalén ja'ayëty may yë wyintsë'këntyakn tmëët'atë ma Baal tukwintoytyën yë poom, jëtu'un tä yë në'ë tu'u jam myäyëtyën.

Miqueas 7:1

Mon tukës nyajpaaty. Jëtu'unës tä tu'uk yë ja'ay t'ixtaaymyukyën yë akiink aka'ak ma ja pyëjktä'äky të tyajpëtë'ëkyën ets ka'ap tpaaty yë higos, yë tsatsym ets ujtstëëm mëti'ipë jyë'kxäämpyën.

Oseas 2:15

Etsës jatëkok nmo'oja'any yë tsatsym kam, etsës yë Acor yë nyitëjkëtyakn nyaj'awinpitanë akujk'ajt jotkujk'ajtën. Jamës xy'ëtsowa'any tääjës xy'ëtsooyën ko y'ëna'k'ajty, tääjës xy'ëtsooyën ko jap pyëtsiimy Egiptë.

Ezequiel 20:8

E yë'ëjëty je'eyë ojts xykyäjpxy kumëtoownaxtës ets ka'ap tja'akyujkëtyë ijxtëm nja'ënëmaaytyës; ka'ap t'ëxmajtstë ja y'awinaxëty mëti'ipë jap Egiptë ets nän ka'ap tyajma'taaytyë ja wyiink tyiosëty. Ojtsës njamay njatajy nyajnaxa'any ja njoot'an ma yë'ëjëtyën etsës jap Egiptë njatëytyunantë etsës jotkujk nwë'ëmëty.

Amós 4:5

Yaktë nino'oky nixämy yë mtsajpkääkyëty ma ja kukajpx ja'awëkyëtakën xyajnaxtën; xiitsow yaatsow nikajpx nimëtya'aktë ko m'ayak m'akonëtë kë'ëmtsojkën, jä'ä ko yë'ë jëtu'unpë oy mja'awëtyëp. Yë Wintsën jëtu'un ënaanp.

Oseas 11:1

Ko yë Israel kajpn ënety pyi'k'atynyëm, ntsojkpy nja'apës ijty; yë'ëkyëjxm ko ënety n'u'unk'atyës, ojtsës nyaxtsoy ets tsyoonëty jap Egiptë.

Jeremias 31:2

Jëtu'un yë Wintsën y'ënä'äny: Ëjts oyës ojts yë njot nwinma'any nyajkëxë'ëky jam të'ëts'itjotm mëët ja naax kajpn mëti'ipë kyukäktën ja o'kën. Ma ënety ja Israel kajpn t'ixta'ayën ja po'kxtakn,

Jeremias 5:31

Mëti'ipë käjpxynyajxpëtëjk jyanikajpxtëpën ka'ap myëtëyëty; yë teetytyëjkëty jëtu'un ja naax kajpn t'ënä'ämtë tä yë'ë kë'ëm wyinma'anypyaatën ets ja nnaax nkajpnës y'oy'ijxyp ja jëtu'unpë. E yë'ëts ënät, ¿tii miitsëty mtuunta'aktëp ko ënety ja jëtu'unpë kyixy nyäxy?

Isaías 28:4

Ets tääpë pëjy oypyë yaj'ixyën mëti'ipë të xyo'tsnë, mëti'ipë jam yajpatpën joyjotm ma winë y'ity wyintëyën, jëtu'un nëjkx jyäty tä tsatym tsya'amën mëti'ipë tsaamë'kpën: ko yaj'ijxpaaty tim nayajnëtujkp ets yajjë'kxy.

Salmos 81:12

Paatyës të ntimy'ëxmatsy, wä'än t'ixtë tii tyuuntëp, ets jëtu'un të jyuuky'atë ijxtëm yë'ëjëty t'oyjyawëtën.

1 Reyes 16:31

jä'ä ko yë'ë ka'ap ojts ninu'un tmëkjawë ko nän yë'ë ja poky tyuunpy mëti'ipë ja Jeroboam tyuunën, Nabat yë myaank. Ni'ik yë'ë, jä'ä ko ojts mëët pyiky ja Jezabel, yë nyëëx yë Et-baal, mëti'ipë yajkutujkpën jam Sidón ets ojts t'ëwtajnë ja Baal.

Jueces 6:32

Jä'ä xëëw ojts ja Gedeón tyajxëëwpätë Jerubaal, jä'ä ko tyaa y'ënantë: Wä'än kë'ëm yë Baal näkyuwa'anyë. E paatykyëjxm jëtu'un tyajxëëwpäjtë jä'ä ko yë Gedeón yë'ë ënety ja Baal ja wyintsë'këntyakn të tjijtë'ëky.

Deuteronomio 32:17

Ko të tmo'otë yë wyintsë'kën yë mëjku'u mëti'ipë ka'ap tyiosëtyën ets ka'ap t'ixy'atë. Ja maywyintsën mëti'ipë tyijtëpën, ko jemy, mëti'ipë ka'ap nijëna'a ja y'aptëjk t'ixyajtën.

Deuteronomio 32:10

Jam ojts tpaaty të'ëts'itjotm, ma ënety je'eyë jyëënpojyën ets naaxway je'eyë këëynyääpy, jëtu'un ojts tkëwent'aty tä u'unk maay yajpity yajmotsyën, ets yajtseeny yajkonyën, ojts yajxon tnë'ëwinwoy tu'uwinwoy, ojts mëk tkëwent'ajty, jëtu'un tä ja'ay yë wyiinsantë tkëwent'atyën, janty tii mëpaat t'ëktukpaaty.

Deuteronomio 4:3

Miitsëty ojts kë'ëm xytyim'ixtë wi'ix yë Wintsën tuunyën yë Baal-peor ets wi'ix tyajkutëkooytyääyën tëkokyë ja ja'ay jampë ënety yajpaatën ma tääpë it naaxwiinyëtën, mëti'ipë wiink wintsën y'ëwtajtëpën.

Romanos 6:21

¿E tii jap të xypyaatë? Tyam je'eyë mtsëtyuunëtë ko jëtu'un të mjuuky'atë, jä'ä ko je'eyë ja o'kën të mtukpaatëtë.

Salmos 115:8

Jëtu'un tä tääpë awinaxën, näjyëtu'un ja nyija'ay jyä'äy'äty mëti'ipë jëtu'unpë yajkojtëpën ets tëkokyë ninu'un tmëpëktën.

Jeremias 3:24

Mëët ko ëëtsëty yi'iyë awinax të n'ëwtatë mëti'ipë ok yajmëtsëtyuunpën, tëëjës nyajtëkooytya'atë mëti'ipës yë nteety ntaak të tmëët'atën koos të nmutsk'atë, ijxtëm yë kupixynyën, jëyujk tsajpkaajën ets u'unk ëna'kën.

Jeremias 24:2

Tu'kkatsy yaj'ixy oyëty ja higo tëëm, yë'ë mëti'ipë më''ëka'any tsaamë'kpën ets tu'kkatsy yaj'ixy ka'apë y'oyëty, ka'ap tjëkyepy wi'ix pën tjë'kxëty.

2 Reyes 17:11

timjëtu'un ojts winë t'atuunajxnëtë tä ja kajpnëtyën mëti'ipë ja Wintsën ënety të t'ëxëëk'ixtën ets ja naax kajpn mëti'ipë ënety të t'ëxwopyën; ojts twino'k twinxaamnëtë mëët ja poom, ka'apë wyintsënëtyën, tuunëtë tkajpxnëtë ja ka'apë tyuunëtyën ets tyajjoot'anpëktë jëtu'un ja Wintsën mëjwiin këjää.

Cantares 3:6

¿Pën ximpë myinyën të'ëts'itjotm ets jëtu'un yaj'ixy jokjoty yowë myiny, yë'ë yowë winjojkp yë on mëti'ipë pa'akxu'kpën ets jëtu'un jyoky tä yë poomën ets tä jyokyën ko yajno'oky yë on wä'än timy myëti'ipëty mëti'ipë pa'akxu'kpën?

Jeremias 3:25

Tsojk naxym nnäpyëjktakëmë ets wintsëtyu'un jëjptsëtyu'un, oy ënät pën xykya'oyjya'awëmëty, jä'ä ko ëëtsajtëm mutsknëm jëtu'unpë të npatso'ontakëmë ets tyimpety tyimku'ty jëtu'un tyampaat, yi'iyë nëë poky të ntu'un të nkajpxëmë; nän timjëtu'un tä ja n'ap'ajt n'ok'ajtëmën ets ëëts'ajtëmë tëë ja Wintsën nmëtëko'oyëmë mëti'ipë nTios'ajtëmën ets ka'ap të nmëmëto'owëmë.

Oseas 13:5

Ëjts ojts mijts nkëwent'aty jam të'ëts'itjotm ma nëkooyë y'aanën.