Nehemías 2:1 - Biblia Dc en Mixe de Quetzaltepec

¹ Tëkok, ma ënety nisán po'o y'änyën, ma y'i'px jëmëjtpetyën ma ja yajkutujkpë Artajerjes ënety tyunyën, uukyës ënety ja n'apëjkëp, koos ojts xy'ijxpaaty moonp tujkpës ënety,

Biblia Mixe de Quetzaltepec

¹ Tëkok, ma ënäty nisán po'o y'änyën, ma y'i'px jëmëjtpetyën ma ja yajkutujkpë Artajerjes ënäty tyunyën, uukyës ënäty ja n'apëjkëp, koos ojts xy'ijxpaaty moonp tujkpës ënäty,

Nehemías 2:1 ပူးပေါင်းရင်းမြစ်များ

Génesis 40:11

Ëjts nmëët'ajtyptyëmës ja yajkutujkpë ja y'a'ukën maas nkë'ëjën etsës npëjkë'ëkytyëm ja tsatymtyëëm etsës nwinma'atsy. Ënet näjyëtu'un ja yajkutujkpë ja y'a'ukën ntukë'ëkonëstëm.

Génesis 40:21

Yë mëti'ipë yë uuky nyiwintsën'ajtypyën ojts jatëkok tyuunkpaaty ets ja y'a'ukën ja yajkutujkpë tukkë'ëkonëty;

Esdras 4:7

Ma ënety ja Artajerjes yajkutukyën, jampë Persië yajkutukyën, yë Bislam, Mitrídates, Tabeel ets ja myëku'uktëjk, ojts tnijayëtë ja Artajerjes. Arameë ayuk'äämpy ojts tja'atë ja noky ets mëët wi'ix nyiwijyën.

Esdras 7:1

Kom ok, ma ënety yajkutukyën yë Artajerjes jam Persië, ojts jam jyuuky'äty tu'uk ja'ay mëti'ipë xyëëwajtypyën Esdras, yë'ë y'u'unk y'ok yë Seraías, yë Azarías ets Hilquías,

Esdras 7:7

Babilonyë tsyo'ony mëët teetytyëjkëty, Leví ja'ayëty ets ja'ayëty mëti'ipë ëëwtëpën, mëti'ipë tsajptëjktuuntëpën ets mëti'ipë tëjk këwent'ajtëpën ma ja tsajptëjkën, kom wëxtujk jëmëjt ma ënety yajkutukyën yë Artajerjes.

Nehemías 1:1

Yaa jëtu'un yajnikäjpxy yajnimëtyä'äky ja Nehemías, yë Hacalías yë myaank, ma y'i'px jëmëjtpetyën maju'unëm tyëkën yajkutujkpë yë Artajerjes, ma y'änyën yë Quisleu po'o, ëjts mëti'ipë nxëëwajtypyën Nehemías jamës ënety ntsëënë Susa

Nehemías 1:11

Paaty mijts Wintsën yam nmënu'kxtä'äky ets xymyëtoow'itëty ya'atë ja jëëytyak nu'kxtakën tyampë ntunyënës maas mijts xytyuunpë'atyën, maas yi'iyë nmëmay nmëtajyën wi'ix ntukxoonta'akëtyën ets wi'ix ntukjotkujk'atëtyën. Tyam näjyëtu'un n'amëtoy npëjktsoy ets xymyo'ojëtyës ja jot winma'any wi'ixës ja yajkutujkpë nyajjotukëtyën ets oy ja winma'any wyimpëtsëm jyëjpëtsëmëty.

Ester 3:7

Ma mëtu'kpo'o tsyo'ontä'äkyën jajëmëjt, mëti'ipë yajtijpën Nisán, ma majkmäjtsk jëmëjt y'apetyën ma ja Asuero yajkutukyën, jää t'ijxpëtsëëmtë ja xëëw po'o jëna'a mëpaat y'ëktuny y'ëkjatyë ja Amán ja wyinma'any, jää ojts mëtëy tukka'ay ma majktëkëëk y'änyën ja mëmajkmäjtsk po'opë, mëti'ipë yajtijpën Adar po'o.

Daniel 9:25

Kopkpëky ko xynyijawëty ets xyjyä'äkyukëty ya'atë: Ma ënety yajni'ënä'ämën ets yajkoj'oyëty jatëkok ja Jerusalén kajpn ets ma ënety jyä'tyën ja yajkutujkpë mëti'ipë kënu'kxyën, jä'ä y'itëty wëxtujk sëmaan ets ja në'ë tu'uk ets ja potsy mëti'ipë yaj'akojëjaanpën ma Jerusalén kajpn jä'ä nëjkx pyo'oxy tëkë'px mäjtsk sëmaan, je'eyëp ko mëk nëjkx ja amay jotmay jää y'ity.