Marcos 9:25 - Biblia Dc en Mixe de Quetzaltepec

²⁵ Ko ja Jesús t'ijxy ja mayjyä'äy ko pyëyë'kmuktë, ënät mëk twinkukajpxëy ja ku'oypyë: Ku'oypyë, uumpë natpë, tyam n'ëne'emy ets xy'ëxmatsëty tyaapë yä'äy ëna'k ets ka'ap nëkoo xy'ëkmëwanëty.

Biblia Mixe de Quetzaltepec

²⁵ Ko ja Jesús t'ijxy ja mayjyä'äy ko pyëyë'kmuktë, ënät mëk twinkukajpxëy ja ku'oypyë: Ku'oypyë, uumpë natpë, tyam n'ëne'emy ets xy'ëxmatsëty tyaapë yä'äy ëna'k ets ka'ap nëkoo xy'ëkmëwanëty.

Marcos 9:25 ပူးပေါင်းရင်းမြစ်များ

Hechos 16:18

Ko jëtu'un kanaak xëëw y'ëtitsy, yä'äxy jyoky; tää ja Pablo tsyijpënë ets tniwa'akwinpijty ets t'ënëmaay ja ku'oypyë mëti'ipë ja to'oxy'ëna'k ënety myëët'ajtypyën: Jesukristë xyëëwkyëjxm yam mijts n'ëne'emy, ëxmats yë to'oxy'ëna'k. Tääts ja to'oxy'ëna'k ënätyë y'ëxmajtsë ja ku'oypyë.

Lucas 9:42

Ko ja yujkyeeky ëna'k tyajmiintë, ënätyë ja ku'oypyë yajkëtaawë ets pyätë ja mootyë pa'am. Ënet ja Jesús twinkukajpxëy ja ku'oypyë ets tyajtsoky ja yujkyeeky ëna'k ets tukë'ëtëjkëy ja u'unkteety.

Marcos 9:15

Ko t'ijxtë ja Jesús, ni'ëmukë ja ja'ay nyëjkxtaaytyë pëyi'ikyë ets ojts tkajpxpo'kxtë mëët ja xoontakën.

Mateo 17:18

Ënet ja Jesús ojts t'ojpëtsëmy ja ku'oypyë ma ja yujkyeeky'ënakën ets ënätyë tsyoky y'akëtäky.

Judas 1:9

Yë'ëpaat ja Dios ja tyuunpë mëti'ipë xyëëwajtypyën Miguel, ko tsyiptuuny mëët ja mëjku'u ma ja Moisés ja nyi'kx kyopk tnitsiptuunyën, ka'ap ojts ëxëëkjaty t'ënëëmë, je'eyë t'ënëmaay: Wä'än ja Dios mwinkukajpxëty.

Lucas 11:14

Jam ja Jesús ënety t'ixkexy ja ku'oypyë ma tu'uk ja ja'ayën uumpë; ko ja ku'oypyë y'ëxmajtsë, tääts ja ja'ay kyajpxë'ky. Janty mëj'ixy ja ja'ay t'ijxtë.

Lucas 8:29

Yë'ë kyu'ëna'anëp ko ja Jesús ja ku'oypyë t'ëne'emy ets ja ja'ay t'ëxmatsëty. Kanaak'ok ënety ja ku'oypyë të tsyäätsytyunyë. Ko ja pujxntejpxy jyayajtuktsumy ma kyë'ëjën ma tyekyën ets ka'ap maa nyëjkxëty, yë'ë tyukpojtëtyääpy ënätyë ets nyijkxy jam muum të'ëts'itjotm.

Lucas 4:41

May ja ku'oypyë pyëtsëëmtë ma ja pa'amja'ayëtyën ets mëk jyänty ëna'antë: Dios mijts m'u'unk'ajtëp. E ja Jesús ojts twinku'ojë ja ku'oypyë ets ka'ap tkupëjky ets kyajpxtëty, jä'ä ko nyija'awëtëp ënety ko ja Jesús jyä'äjëty ja Kristë.

Lucas 4:35

Tääts ja Jesús twinkukajpxëy ja ku'oypyë ets t'ënëmaay: Amonyë, ëxmats tääpë ja'ay. Ënet ja ye'etyëjk yajkëtaawë ja ku'oypyë mayjyä'äyjoty ets y'ëxmajtsë, kä'äp ojts wi'ix y'ëktuunënë.

Zacarías 3:2

Ënet ja Dios ja kyukäjpxy të n'ënëëmë ja wiinkpë ja tsajpjotmëpë kukäjpxy mëti'ipë ni'ë'ënëpën: Ka'ap yë Wintsën mkupëkëtëty, wä'än m'ojyë jä'ä ko yë'ë tsyojkpy jya'ap yë Jerusalén kajpn. Tyaapë ja'ay jëtu'un yë'ë tä tu'uk yë jëënpajkën mëti'ipë të nyaamyajjuutyën jëënjoty.

Mateo 12:22

Ojts ja Jesús tukninëjkxtë tu'uk ja ja'ay wiintspë ets uumpë, mëti'ipë myëët'ajtyp yë ku'oypyë. Ënet ja Jesús tyaj'ijxë'ky, tyajkajpxë'ky ets jëtu'un tjëpëjky ja ku'oypyë.

Marcos 9:24

Ënet ja yä'äy ëna'k ja tyeety mëk y'ënäny: Nmëpëjkpyës; putëjkëtëkës ets njaaktimmyëpëkëtyës.

Marcos 9:26

Tääts ja ku'oypyë mëk y'ayaxtuty ets ja yä'äy ëna'k ojts tjaakyajmooty. Ënet ja ku'oypyë ojts pyëtsimy, jëtu'un yaj'ixy tëë yowë tyaj'ooky ja yä'äy ëna'k. Jëtu'un may ja ja'ay y'ënantë ko tëë y'ooky.