Marcos 12:26 - Biblia Dc en Mixe de Quetzaltepec

²⁶ E ko xymyëmay xymyëtajtë ja o'kpë pën juukpyëjkp kajuukpyëjktëp, ¿ka'anëm xykyajpxtënëm mëti'ipë ja Moisés ojts tkuja'ayën, ma tnimëtyä'äkyën wi'ix ja Dios ojts myëkäjpxyë ma ja kepy ënety wyintoyënë? Ma ja Dios y'ënëmaayë ja Moisés: Ëjts xyTios'ajt ja Abraham, Isaac ets Jacob.

Biblia Mixe de Quetzaltepec

²⁶ E ko xymyëmay xymyëtajtë ja o'kpë pën juukpyëjkp kajuukpyëjktëp, ¿ka'anëm xykyajpxtënëm mëti'ipë ja Moisés ojts tkuja'ayën, ma tnimëtyä'äkyën wi'ix ja Tios ojts myëkäjpxyë ma ja kepy ënäty wyintoyënë? Ma ja Tios y'ënëmaayë ja Moisés: Ëjts xyTios'ajt ja Abraham, Isaac ets Jacob.

Marcos 12:26 ပူးပေါင်းရင်းမြစ်များ

Génesis 26:24

E jä'ä tsu'um ja Dios nyänyikëxë'kë ma yë'ëjën ets y'ënëmaayë: Ëjts jëtu'un xyTios'ajtp ja mteety Abraham. Paaty këtii mtsë'ëkëty, jä'ä ko ëjtsës mijts mëët n'ity. Mëët yë'ë ko ja n'u'unkës nmaayës Abraham oy të xymyëtunyës. Paaty näjyëtu'un mijts nkënu'kxa'any ets nyajmëjëja'any tyajmayëja'anyës ja m'u'unk m'ok.

Génesis 28:13

Näyjyëtu'un t'ijxy kootëm ja Dios wyintänëty ets y'ënë'ëmxëty: Ëjts jëtu'un Wintsën, mëti'ipë Tyiosajtën yë mtatwelë Abraham ets mteety Isaac. Mijts nmo'ojäämpy ya'atë naaxjot ma jam mko'knën ets m'u'unk m'ëna'k.

Génesis 31:42

Ko jeexyë ja Dios xykyani''ijxkëtä'äkyës mëti'ipë yë Abraham y'ëwtajtën, ja Dios mëti'ipës ijty ja nteety Isaac y'ëwtajtypyën, katii nija'awën wä'änxyëp jeexyë jëtu'unyë mijts të xy'ëkwinpakäjxnës. Yë Dios yë'ë të t'ixy, ko ënety ëjts mon tuk nyajpaaty ets koos ënety mëk ntuny n'ëyoy, paaty ya'atë tsu'um të mëkmëkäpxyë.

Génesis 32:9

Tää ojts tyëkë nu'kxtakpë ets ja Dios tmëpëjktsooy: Wintsën mëti'ipë y'ëwtajtën ja ntatwelës Abraham ets ja nteetyës Isaac, mijtsës të xy'ënëëmë koos nwinpitëty maas ja nnaax nkajpnën, ma tsyëënëtën jyuuky'atën ja njëëky nmëku'ukës. Mijtsës të xy'ënëëmë näjyëtu'un, ko oy tsuj xyajwinpita'anyës.

Génesis 33:20

Ënet näjyëtu'un t'oytyuuny tu'uk ja wintsë'këntyakn ets tyajxëëwpejty El-Elohé Israel.

Éxodo 3:16

Nëjkx ets woowmuk yë mëjja'aytyëjk jampë yajpaatën ma Israel ja'ayëtyën ets xy'ënëëmëty: Yë Wintsën mëti'ipë yë m'ap m'ok Tyios'atëpën, yë Abraham, Isaac ets Jacob yë Tyiosëty, yë'ë ojts nyänyikëxë'ëkyë maas ëjtsën etsës ojts xy'ënëëmë, ko tëë t'ixy tnijawë wi'ix miitsëty mjatën mkëpätën yaa Egiptë.

Marcos 12:10

Këtii xykyajpxtënëm ja Dios ja y'aaw y'ayuk këxja'aypyë mëti'ipë ënaanpën: Ja tsaa mëti'ipë ja pojtspë ojts tpäxtën, nikë jä'ä tyam të y'awinpity mëjtsaakopk ma potsy'ëjxën.

Marcos 12:25

Ko ja o'kpë jyuukpyëktëty, ni pën nëjkx jää kya'ëkpëjk kya'ëk'uknë. Jëtu'un nëjkx y'itë ja ja'ayëty ijxtëm yë Dios kukäjpxy jam tsajpjotm.

Lucas 20:37

Yë'apaat ja Moisés nija'awëy ko yë o'kpë jyuukpyëka'antë, ko ojts t'ixy ja zarsa kepy tyoy. Ma y'ënä'änyën ko yë Wintsën yë'ë Abraham, Isaac ets Jacob yë Tyios.

Juan 20:17

Tä ja Jesús y'ënëmaayë: Këtiis xymyätsy, jä'ä ko ka'anëmës nnëjkxy ma ja Dios Teetyën. Nëjkx ets xytyuk'ëwaanëty ja nmëku'uktëjkës: Ko jamës nnëjkxy maas yë nTeetyën ets ma miits yë mTeetyëtyën; maajës yë nTiosën ets ma miits yë mTiosëtyën.

Romanos 11:2

Tëëyëp ja Dios tkajpniwa'any ja Israel ja'ay, e tyampaat je'eyëm tkajpniwa'any ¿tii ko t'ëk'ëxwaanpëty? ¿Këtii xynyijawëtë wi'ix ja Dios ja y'aaw y'ayuk y'ënä'änyën ma ja Dios ja kyäjpxynyajxpë Elías yajnimëtyä'äkyën, ko ja Dios ojts tja'amyetsy ets ojts tuk'ëwaanë ja Dios wi'ix ja jutiis ja'ay y'ëtë'ëtstënë? ets y'ënäny: