Jueces 14:6 - Biblia Dc en Mixe de Quetzaltepec

⁶ Ënet yë Sansón tyuktëjkëyë yë Wintsën yë myëk'ajtën, kë'ë'am ojts ja kaa twäjxtakta'ay, jëtu'un tä jeexyë tyaj'ookyën yë tsajppax; je'eyëp ko ka'ap ja tyaak tyeety tuk'ëwa'anëy mëti'ipë ënety të tyuny të jyätyën.

Biblia Mixe de Quetzaltepec

⁶ Ënät yë Sansón tyuktëjkëyë yë Wintsën yë myëk'ajtën, kë'ë'am ojts ja kaa twäjxtakta'ay, jëtu'un tä jeexyë tyaj'ookyën yë tsajppax; je'eyëp ko ka'ap ja tyaak tyeety tuk'ëwa'anëy mëti'ipë ënäty të tyuny të jyätyën.

Jueces 14:6 ပူးပေါင်းရင်းမြစ်များ

Salmos 91:13

Oy kaa akujky mtimye'ey mtimnyaxëty ets ma mëjjatyëtypë jëyujkën mëti'ipë kutsë'ëkëtyën, ets oy xii yaa muum yë tsa'any mjaakë'ënax mjatekynyaxëtëty.

Isaías 42:2

Ka'ap ya'axa'any jyoka'any, ka'ap nyä'äma'any, nitii tka'ëwa'any tkakajpxa'any në'ëjoty tu'ujoty,

Zacarías 4:6

Ets y'ënäny: Jëtu'un ja Wintsën t'ënëmaay ja Zorobabel: Ka'ap yë'ëkyëjxmëty ko may jyääjëty yë tsiptuunpëtëjk ëkë ko ja'ay jyotmëkëty, yë'ë tuunp ëjts yë nmëjaaw nmëk'ajtën, jëtu'un y'ënä'äny yë Wintsën mëti'ipë maaytyääyëpën winë.

Mateo 11:29

Kupëktë ëjts ja n'ijxpëjkën ets jatë ëjts ja ntu'unën, mä'kxtujkpës, ets yujy tëtä'äkyës ja nwinma'any, jëtu'unts xypyaatëty ja po'kxën.

Hebreos 11:33

Mëët ko myëpëjktë ojts tmëmëta'aktë ja myëtsip wiink kajpnëpë, ojts oy nyipaye'eytyë ijxtëm pyaat'atyën, ko të tpaatë mëti'ipë ja Dios ënety të tyukwinwanëtën, ko ja kaa të tyajmujkëtë ja y'aaw,

1 Juan 3:8

Pën xëmë pokytyuunp, ja mëjku'u jä'ä'ajtëp; jä'ä ko yë mëjku'u ojts tyajtso'ontä'äky yë pokytyu'unën. Paatykyëjxm ja Dios U'unk të myiny yaa naaxwiiny ets tyajkutëkooytya'aja'any tu'kë'ëyë ja mëjku'u ja tyuunk.

Jueces 11:29

Ënet ojts ja Jefté ja Wintsën ja myëk'ajtën tyuktëkëty ets tsyo'ony, nyijkxy jam Galaad ets jam Manasés, tukye'eyëtyääy yë Mizpá itjot, mëti'ipë yë Galaad nyitënääpyën ets jëtu'un tuknipëjktakëy wi'ix tnitëkëja'anyën ja Amón ja'ayëty ma ja nyaax kyajpnëtyën.

Jueces 13:25

E nëjkxëp tu'kxëëw tu'kjëmëjt nyijkxy yë Sansón jam ma Dan yë y'ijtaknën mëti'ipë yajpatën itkujky ma naaxwiinyëtë txëëwatyën Zorá mëët yë Estaol, ënät ojts kyëxë'ëky yë Wintsën yë myëk'ajtën ma yë'ëjën.

Jueces 14:19

Ënet ja Sansón ojts ja Wintsën ja myëk'ajtën tyukëtä'äkyë, ets ojts nyijkxy jam Ascalón, i'px majk ja ye'etyëjk ojts tyaj'ooky ets ja wyit tpëjkëtyääy mëti'ipë ënety myëët'ajtëpën. Ja wit yë'ë ojts tmo'oy ja ëna'ktëjkëty mëti'ipë ja ayuk të tni'ëtsowtën mëti'ipë yajnajtsja'apën. Ko jam tsyo'ony tä ojts nyijkxy ma ja tyeety tyaakën.

Jueces 14:5

Paatykyëjxm yë Sansón ojts tsyoontë mëët ja tyaak tyeety ets ojts nyëjkxtë jam Timnat. Tam ënety yë Sansón jyajnë kajpntum ko tu'uk yë mëj kaa nyipëtsëëmë jam ma tu'uk yë tsatym kyamën ets nyipëtë'kë.

Jueces 14:7

Tä ojts nyijkxy ma ja kiixy tsyëënën ets mëët myëtyäky.

Jueces 15:15

Ënet jam tkajpë'ky tu'uk yë pajk, yë krukts apak mëti'ipë ënety ka'ap pyu'utynyëmën ets mëët tyaj'o'ky nitu'kmil yë filistejë ja'ayëty.

Jueces 15:8

Ënet ojts tyëkë tsiptuunpë mëët yë'ëjëty, nitu'uk yë ja'ay ojts tkayajwë'ëmy. Ko jëtu'un kyijxy nyäjxy ja tsip, ënät tyimkeky, tyimtso'ony jampë ja itjotmën ets ojts nyijkxy ma ja aankën mëti'ipë yajtijpën Etam.

Jueces 16:30

Tä mëk yujk'ënany: O'kta'atë miits filistejë ja'ayëty tu'knax mëët ëjts. Ënet janty amëjaaw tnajtstijëy ja xeny ets nijijtpäjtaay ja mëjja'aytyëjk ets ja kutuunktëjkëty, ja niwa'atsja'ayëty, yä'äypyë to'oxypyë, mëjja'aypyë mutskja'aypyë. Ko yë Sansón y'o'ky, nimay ojts ni'ik yë ja'ay tyaj'ooky, këtiinëm ma jyuuky'äjtyën.

Jueces 3:10

Ënet ja Wintsën ja myëk'ajtën y'oyajtën tuktëjkëy ja Otoniel ets ojts yë'ë tnitsiptuny yë Israel kajpn, ko ojts tnitsoony ja yajkutujkpë mëti'ipë xyëëwajtypyën Cusan-risataim. Dios ojts tu'ukyë tuk'ijxpety ets ojts yajmëtä'äkyë.

1 Samuel 10:16

Tä ja Saúl ojts t'ëtsoy ja jyäm. Yajxonës të xytyimtukwinjawëtës ko ja krukts tëëjëk ja yajpaaty. Je'eyëp ko a Saúl, ka'ap ojts ja jyäm tukmëmëtyä'äky ko ënety ja Samuel të kyënu'kxyë ets yajkutukëty.

1 Samuel 10:6

Ënet yë Wintsën yë myëk'ajtën y'oyajtën mtuktëkëja'anyë ets näjyëtu'un myaj'ixa'any mukëp yowë, tëkatsyjyä'äy mkawinpita'any.

1 Samuel 11:6

Ko ja Saúl jëtu'un tmëtooy ja aaw ayuk, ënät tyuktëjkëyë ja Wintsën ja myëk'ajtën y'oyajtën ets yajxon jyoot'anpëjky.

1 Samuel 14:1

Tu'kxëëw tu'kjëmëjt yë Jonatán mëti'ipë myaank'ajtypyën yë Saúl, ojts t'ënëëmë yë tyuunpë: Pamiinkës, tsojk ntuknajxëmë yë mëjnëë, wä'än ntsiptu'unëmë mëët yë filistejë ja'ayëty jampë yajpaatën awinmtsow. E ja Jonatán ka'ap tuk'ëwa'anëy ja tyeety.

1 Samuel 17:46

E tyam yë'ëts yë Wintsën mkë'ëyakanëp ëjts nkë'ë'amjotmës, tyam nyaj'ookäämpy yam ets nëëpuxa'anyës yë mkëpajk. E tëkokyë yë jyot nyini'kxëty yë tsiptuunpëtëjkëty mëti'ipë filistejë ja'ayëtyën, ooykyës yam ntuk'ajëpijpëtya'aja'antë yë joon jëyujk, jëyujk ëwa'anëtypë mëti'ipë jëtijtëpën aayjoty ujtsjoty. Jëtu'unts nijawëtëty tëkokyë yë ja'ayëty naaxwiinyëtë apëtsëmy ko tää tu'uk yë Dios yajpaaty ma Israel ja'ayëtyën.