Juan 7:37 - Biblia Dc en Mixe de Quetzaltepec

³⁷ Ja tu'kxëëw ënety kyakëxy ja mëj xëëw tyunyë jyätyën. Ko ja Jesús ojts wya'kukë ets mëk y'ënäny: Pën tëtsëp, wä'änës xynyiminy ets y'uukëty.

Biblia Mixe de Quetzaltepec

³⁷ Ja tu'kxëëw ënäty kyakëxy ja mëj xëëw tyunyë jyätyën. Ko ja Jesús ojts wya'kukë ets mëk y'ënäny: Pën tëtsëp, wä'änës xynyiminy ets y'uukëty.

Juan 7:37 ပူးပေါင်းရင်းမြစ်များ

Nehemías 8:18

Wëxtujk xëëw xyëëwtuuntë; tyajtso'ontaktë mëtu'kxëëw ets tyajëjpkëjxtë ma wyëxtujk xëëwpetyën, winjëpom ja Esdras ijty ja ja'ay tukwinkukajpxë ja ënä'ämën tëyajtën mëti'ipë Wintsën jyä'ä'ajtypyën; kom tuktujk xëëw jää ojts ye'eymyujkta'atë ja ja'ayëty ets tu'uk ja mëj xëëw tyaj'apatëtyë jëtu'un tä ënety tyu'unën'atyën.

Salmos 143:6

Jamës yë nkë'ë nnajtsxajë ma mijtsën koos nkajpxtä'äky, jä'ä ko nyajmëyäjtypyës yë mputëjk mpupäjtën jëtu'un tä yë naaxwiinyëtë nëë tyajmëyätyën.

Salmos 42:2

Ëjts nyajmëyäjtypyës yë Dios yë näpyutëkë, Dios juukpyë. ¿Jëna'ajës jëtää jatëkok jam nëjkxëty Dios wintum?

Salmos 63:1

Dios mëti'ipës nTios'ajtypyën, mijts nTiosniwäämpy, jëtu'un nyajmëyäty tä yë ja'ay nyëtëëtsën; tëkokyë yë njot nini'kxës mijts myajmëyajtëp, jëtu'un tä yë të'ëtsnaax nëë tyajmëyätyën.

Proverbios 1:20

Në'ëjoty tu'ujoty ets oymyaajëty, yë wijyajtën yajmëtoowëp yë y'aaw y'ayuk.

Proverbios 8:1

Yë ixpëkyajtën mëk yä'äxy jyoky, ets wijyajtën yajmëtoowëp yë y'aaw y'ayuk.

Proverbios 8:17

Ëjts ntsojkpyës mëti'ipës näjyëtu'un xytsyojkpën, mëti'ipës xy'ixtääpyën xypyatpës.

Proverbios 8:3

yaxp jojkp ma tëjk'aawën, ets ma kajpn yajnitëkën.

Proverbios 9:3

Ënet ojts tkexy ja tyuunpëtëjk jam kopkkëjxm ets tukyaax tukjokëtëty.

Cantares 5:1

Tëës ntëkë jam maas yë npëjy kyamën, to'oxytyëjk mëti'ipës ntsojkpy nja'apën. Tëës npaaty ja mirra ets ja on mëti'ipë oy xu'kp jojkpën, tëëjës njawë ja uuxpa'ak ets tëëjës n'uuky yë tsatym nyëë mëti'ipë tëë nyimaanaxyën ets tsi'tsknëë. Jëëkytyëjk mëku'uktëjkëty, kaytyë uuktë, uuktë jënu'un xytyimtsoktë.

Isaías 12:3

Näyjyëtu'un miitsëty xoontä'äky nëjkx m'uuktë mpëktë ma ja nitsokën yajpaatyën jëtu'un tä nëë muum nyaaxwinpëtsëmyën,

Isaías 40:2

Mëët ja yu'unk aaw yu'unkjot ënëëmëtë ko tëë kyixy nyäxy ma mëtuunpë ëyoopë të y'itën, ko tëë tkumëtoowta'ay ja nyëë pyoky, ko tëë tmënaxy tyajnaxy ja ëyo'on jotmay mëti'ipë ja Wintsën mmooyëtën.

Isaías 40:6

Jëtu'un tu'uk ja aaw yo'kn të yajmëtoy y'ënä'äny: Mëk yujkya'ax, etsës të nyajtëy: ¿Wi'ixës n'ëna'anëty? Ko tëkokyë yë naaxwiinyëtë ja'ay jëtu'un yë'ëjëty tä aay ujtsën, tä pëjyën kamjotypë tu'ujotypë yajpaatyën.

Isaías 44:3

Jä'ä koos nyajpëyë'ëkäämpyës yë nëë jam të'ëts'itjotm, nyajye'eyäämpyës yë nëë jap wokjoty mëti'ipë të tyëtsnën. Nmo'ojäämpyës ja jyuukyajtën ja m'u'unk m'ok ets nkënu'kxäämpyës näjyëtu'un.

Isaías 55:1

Mintë pënjaty tëtsëpën; mintë pënjaty ka'ap wit meeny tmëëtëtyën, jë'kxtë pëktë, kaytyë uuktë namëyajtën; uuktë pëktë tsi'tsknëë, uuktë pëktë tsatym nyëë, ka'ap meeny tsyokyë.

Isaías 55:3

Nimiintëkës ets ja'akyukëtë n'aaw n'ayukës, mëtoow'ijtëkës ets mjuuky'atëty. Ëjts ntunäämpyës tu'uk käjpxytyu'unën xëmëkyëjxmëpë y'itëtyën, ets nyaj'atëwa'anyës ja waantakën mëti'ipës ja David ojts ntukwinwanën.

Isaías 58:1

Jëtu'unës yë Wintsën të xy'ënëëmë: Ya'ax jok mëk, këtii mtsë'ëkëty. Jëtu'un ya'ax jok tä ja'ay tukxu'uxyën pujxnxuxn; tuk'ënëëmë nnaax nkajpnës wi'ix tyëkoyën, tuk'ënëëmë Jacob yë pyoky ets yë nyaax kyajpn.

Jeremias 16:19

Wintsën mëti'ipës nmëk'ajtyp nmëjaaw'ajtypyën ets mëti'ipës xykyuwaanp xynyixajpën, maas tsoktakn npaatyën koos ëtsë'ëkëtuuy ntänë; mijts nëjkx mniminyë ja naax kajpn mëti'ipë yajpatëpën mapaat yë naaxwiinyëtë jyëjpkëxyën, jëtu'un myaj'ënëëmëja'any: Yi'iyë ëëts të xytyukkumaytyë ja n'ap n'okëty ja tios ka'apë myëtëyëtyën, mëti'ipë ka'ap tyunyën ets mëti'ipë ka'ap tmëët'atyën ja mëk'ajtën.

Jeremias 2:2

Nëjkx mëmëtya'ak yë Jerusalén ja'ayëty; mëk mya'axëty mjokëty ets tja'akyukëtëty, jëtu'un xy'ënëëmëty: Jëtu'un yë Wintsën y'ënä'äny: Nja'amyetsypës ko mijts m'ëna'k'ajty, xywyinkutsë'këpës ijty koos npëjky n'uky, xytsyojkpës xyjya'apës ijty, ojtsës xypyanëjkx jam të'ëts'itum, ma ja it naaxwiinyëtën ma ka'ap tii y'ity wyintëyën.

Ezequiel 47:9

Maajaty jyä'tyën ya'atë nëë jyëkyejpy jam jyuuky'atëty oymyëti'ipë jëyujkëty ets jyëkyejpy jap nëëjoty tsyëënëtëty yë nëë jëyujk. Jä'ä ko ya'atë nëë ko muum jya'tëty ma ta'ampë nëëjën, pa'ak y'awinpita'any ets jyëkyäpëp jyuuky'atëty oytyiijëyujkëty.

Miqueas 6:9

Yë'ë yë Wintsën myëkäjpxyp yë naax kajpn, wijyajtën ënety yajmëët'ajtp ko yaj'amëtoow'itëty mëët yë winkutsë'kën. Mëtoow'itë miitsëty naax kajpn ets miitsëty näs'ë'ëw mnaskajpxëtë.

Zacarías 9:15

Yë Wintsën mëti'ipë maaytyääyëpën winë yë'ë kyuwa'anäämpy mëti'ipë jyä'ä'ajtypyën ets yë'ëjëty jëtu'unyë t'atääna'an tuktääna'antë yë tsaa mëti'ipë jayajtuka'tstëpën ets myëtsip ëxëëk tuna'antë; y'uukanëtëp yë myëtsip yë jyot nye'pnyëty tä yë tsatsymnyëëjën, jëtu'un tä muum tsimjoty yaj'atämën yë ne'pny; jëtu'un tä jam yajkëxtemyën yë ne'pny ma wintsë'këntyakn yë wyajën.

Mateo 11:28

Nimiintëkës ni'ëmukë mëti'ipë të y'ënu'kxëtën mëët ja tuunk ets ja tsëmy kë'ëy, ëjts miits nyajpo'kxantëp.

Mateo 3:3

Yë'ë Juan Yajnëëpäjtpë ojts yaj'antijy, mëti'ipë yë käjpxynyajxpë Jeséas ojts tnikäjpxyën ko y'ënäny: Tu'uk ja mëto'owën yä'äxy jyoky jam të'ëts'itjotm: Nipëjktaakëtë ja Wintsën ja nyë'ë tyu'u, yaj'ëwa'atstë tu'uk ja në'ë tu'u tëypyë.

Mateo 5:6

Jotkujk yë ja'ay yajpaatë mëti'ipë tsyojkën'ajtëp ja tëypyë nipaye'eyën, jä'ä ko ku'uxyë y'ita'antë mëët ja jëtu'unpë.

Juan 1:23

Tääts ja Juan y'ëtsoowëtë: Ëjts ja aaw ayuk mëti'ipë yaxp jojkpën të'ëts'itjotm: Yaj'ëwa'atstë në'ë tu'u tëypyë ma Wintsën nyaxëtyën, jëtu'un tä yë käjpxynyajxpë Jeséas y'ënänyën.

Juan 14:6

Ënet ja Jesús y'ëtsoowë: Ëjts jëtu'un tu'u'ajtp, ja tëyajtën ets ja juukyajtën. Ëjtskyëjxm je'eyë tjëkyepy pën jya'tëty ma ja Dios Teetyën.

Juan 4:10

Ënet ja Jesús y'ëtsoowë: Ko jeexyë mijts xy'ëknijawë mëti'ipë ja Dios yäjkpyën ets pën m'amëtoowëp yë nëë, mijts jeexyë m'amëtoopy ja nëë ma yë'ëjën ets mooyëp jeexyë ja nëë mëti'ipë yajjuuky'ajtpën.

Juan 4:11

Tääts ja to'oxytyëjk y'ënëmaayë: Wintsën, ka'ap tii xymyëëtëty wi'ix yë nëë xyjyuuta'any jap jutjoty, këk yë nëëtajy, ¿maajën ja nëë xypyëka'any mëti'ipës xymyo'ojaanpën mëti'ipë yajjuuky'ajtpën?

Juan 4:14

e mëti'ipë y'uktëpën ja nëë mëti'ipës ëjts nyäjkpyën, nijëna'a kyatëëtsëja'antë jatëkok. Jä'ä ko ja nëë mëti'ipës nyakäämpyën, jëtu'un ja myuuta'any ijxtëm ja nëëkopkën mëti'ipë yajjuuky'ajtpën.

Juan 5:40

Miitsëty ka'ap mina'antë ma ëjtsën ets jeexyë xymyëët'atë ja juukyajtën xëmëkyëjxmëpë.

Juan 6:35

Ënet ja Jesús y'ënëmaayëtë: Ëjts jëtu'un tsajpkääky mëti'ipë ja juukyajtën yäjkpyën. Pën xynyimiinpës, nijëna'a kyayuu'ookëtëty; ets pën xymyëpëjkpës, nijëna'a kyatëëtsëty.

Juan 6:37

Tu'kë'ëyë mëti'ipës ja nteety të xymye'eyën, ëjts xynyimiinp; ets pën xynyimiinpës, nijëna'ajës nka'ixkäxëty.

Juan 6:55

Jä'ä ko ja ni'kx nkopkës ets ja ne'pnyës, yë'ë mëtëypyë tsu'utsy ets mëtëypyë uuky.

Juan 7:28

Tam ënety ja Jesús yaj'ixpëky ma ja mëjtsajptëjkën, ënät mëk y'ënäny: Xy'ixy'ajtëpës miits ets mnija'awëtëp maas ntsoonyën. E ka'apës kë'ëmwinma'any të nminy, yë'ëjës të xykyexy mëti'ipë mëtëy winë tyuunpyën, mëti'ipë miits ka'ap xy'ixy'atën.

1 Corintios 10:21

Ka'ap tjëkyepy miits xytyuk'uukëtëty ja Wintsën ja y'a'ukën ets näjyëtu'un xytyuk'uukëtë ja ku'oypyë ja jyä'ä. Ets ka'ap tjëkyepy näjyëtu'un jam myajpaatëty ma ja Wintsën ja kyääypyäjnën ets myajpaatëty näjyëtu'un ma ja ku'oypyë ja kyääypyäjnën.

1 Corintios 10:4

nän yë'ë nëë y'uktë mëti'ipë tsaajoty pëtsëëmën. Ja tsaa yë'ë ja Kristë, mëti'ipë ënety mëët tyu'uye'eytyën.

1 Corintios 11:25

Ko ënety të y'a'ux'ajta'atë, ënät ojts tkoonë'ëky ja a'ukën ets y'ënäny: Yë'ë ya'atë jempyë ja käjpxytyu'unën koos ja ne'pny tyunëty xyä'kxëty. Ko miits tëkok tëkok xy'uuktëty, jëtu'un xyjyaamyätstëtyës.

1 Corintios 12:13

Yë'ëkyëjxm ko tëë ni'ëmukë nnëëpäjtëmë mëët ja Kënu'kxymyëkajtën paaty tu'ukyë nyajpatëmë ijxtëm ja ni'kx kopkën tu'ukyëpë, wä'än tjutiis ja'ayëty ëkë wä'än tkajutiis ja'ayëty, wä'än tmëtuunpëty ëkë tkamëtuunpëty.

Efesios 5:18

Ka'ap m'uuktëty mmu'ukëtëty, jä'ä ko yë'ë yajtëkoopy; nikë oy ko mtu'umo'ojëtëty ja Kënu'kxymyëkajtën.

Apocalipsis 21:6

Ënet xynyëmaayës: Tëë tyuunta'ay jyajta'ayë winë. Ëjts ntuktso'ontäkpy ets ëjts ntukjëjpkëxyp. Ëjts tso'ontakp, ets ëjts jëjpkëjxp. Pën tëtsëp, namëyajtënës ntuk'uuka'any ja wa'ats nëë mëti'ipë yajjuuky'ajtpën xëmëkyëjxm.

Apocalipsis 22:1

Tääts ja tsajpjotmëtë kukäjpxy xytyuk'ijxyës tu'uk ja mëjnëë wa'atspë, mëti'ipë yajjuuky'ajtpën xëmëkyëjxm ko yaj'uuky. Janty të'kxy janty wa'ats yaj'ixy ijxtëm yë ijxnën; jam pyëtsimy ma ja kyutujktaknën ja Dios ets ma ja Kupixyny U'unkën.

Apocalipsis 22:17

Ja Kënu'kxymyëkajtën ets ja Wintsën ja myëpëjkpëtëjk jëtu'un y'ëna'antë: Mintë. Pënjaty myëtoow'ijtëp, wä'än näjyëtu'un t'ëna'antë: Min. Pën tëtsëp, pën y'uukäämpy ja nëë mëti'ipë yajjuuky'ajtpën, wä'än tminy ets t'uukëty namëyajtën.