Josue 11:12 - Biblia Dc en Mixe de Quetzaltepec

¹² Näyjyëtu'un ja wiinkëtypë ja kajpn mëti'ipë ënety mëët ja käjpxytyu'unën të tmëët'atyën ojts tyajkutëkooytyä'äy ets tyaj'o'ktaay ja nyiyajkutujkpë ets mëët tëkokyë ja ja'ayëty jampë tsyëënëtën, jëtu'un tä ënety ja Moisés të tyuk'ëne'emyën ja Wintsën.

Biblia Mixe de Quetzaltepec

¹² Näyjyëtu'un ja wiinkëtypë ja kajpn mëti'ipë ënäty mëët ja käjpxytyu'unën të tmëët'atyën ojts tyajkutëkooytyä'äy ets tyaj'o'ktaay ja nyiyajkutujkpë ets mëët tëkokyë ja ja'ayëty jampë tsyëënëtën, jëtu'un tä ënäty ja Moisés të tyuk'ëne'emyën ja Wintsën.

Josue 11:12 ပူးပေါင်းရင်းမြစ်များ

Deuteronomio 7:2

Ko yë mWintsënëty ënety të tkë'ëyajkta'ay ya'atë ja naax kajpn ma miitsëtyën ets ko ënety tëë xyajkutëkooytya'atë, wa'ats nëjkx oytyiijëty xyajkutëkooytya'atë ets nitii aaw nitii ayuk nëjkx mëët xykyamëët'atë; nëjkxëp xyajkutëkooytya'atë, ninu'un xykyapa'ëyowtëty.

Deuteronomio 9:3

E miitsëty yë'ë mëpaat xymyëmay xymyëtajtë, ko ja Wintsën, miits yë mTiosëty yë'ë mtu'uwinye'eyëtëp. Yë'ë jëyëjp nëjkxp ma miitsëtyën, jëtu'un tä tu'uk yë mëj jëënën mëti'ipë ka'ap nitii tyajwë'ëmyën. Tyajkutëkooytyä'äy ja naax kajpn maajaty tyimnaxyën. Ko tääpë naax kajpn xynyitëkëtëty, ka'ap tsip xyajtukwa'atstëty ets xyajkutëkoytyëty ja nyija'ay. Tu'k'ijxmi'kyxyë nëjkx kyutëkooytya'atë tä ja Wintsën të tnikäjpxyën.

Josue 10:20

Ok ojts ja Josué mëët tëkokyë yë Israel ja'ayëty tjaakyaj'o'kta'atë ja Amor ja'ayëty, e mëti'ipë juuky wë'ëmtën jam ojts jyaak käktso'oktën ma kyajpnëtyën.

Josue 10:28

Jä'ä xëëw ojts ja Moisés tukja'ty ja Maquedá kajpn ets tyajkutëkooy, wa'ats tyaj'o'ktaay ja ja'ayëty mëti'ipë ënety jam tsënaaytyëpën. Ni pën ojts kyawë'ëmy juuky. Ja yajkutujkpë mëti'ipë ënety jam ënä'ämpën jëtu'un tyaj'o'ky tä tyaj'o'kyën ja Jericó yajkutujkpën.

Josue 10:30

Yë Wintsën ojts kë'ëm tim kyë'ëyäky ya'atë naax kajpn mëët yë nyiyajkutujkpë ma Israel ja'ayëtyën. Ni pën ojts jam kyawë'ëmy juuky, wa'ats y'o'ktaaytyë. Ja yajkutujkpë jampë ijty y'ëne'emyën, jëtu'un ojts tyaj'ooktë tä tyaj'o'ktën ja Jericó yajkutujkpë.

Josue 10:32

E komjëpom tääts tnitëjkëtyë ja kajpn, yë Wintsën ojts kë'ëm timkyë'ëyaky ya'atë kajpn ma Israel ja'ayëtyën, e yë'ëjëty ojts wa'ats tyaj'o'kta'atë ja ja'ayëty ets ja jëyujk tsajpkaajëty mëti'ipë ënety jam yajpatëpën.

Josue 10:35

Jä'ä xëëw nimay yë ja'ay tyaj'o'ktë, mëti'ipë ënety jam tsënaaytyëpën; ojts tyajkutëkooytya'atë tëkokyë winë jampë yajpaatën kajpnjotm, timjëtu'un tä y'ëtëtstën jam Laquis.

Josue 10:37

Ko tnitëjkëtyë, yajxon tim yajkutëkooytyë ja kajpn ets ja nyiyajkutujkpë tkupujxtë mëët ja tyiypyujxnëty ets tëkokyë ja ja'ayëty ets ja jëyujk tsajpkaajëty mëti'ipë ënety jam yajpatëpën ets ma ja kajpnëtyën mëti'ipë mëët nyämyëwinkon'atëtën; näjyëtu'un o'ktëy tuuntë tä ojts tuntën ja Eglón kajpn.

Josue 11:13

Jä'ä tëy ja kajpnëty jampë yajpaatën tunkëjxm ka'ap ja Israel ja'ayë tyajtooytyë, yi'iyë ojts tyajtoytyë ja Hasor kajpn.

Josue 11:15

Yë Wintsën ojts yë ënä'ämën tmo'oy yë Moisés, e yë Moisés ojts ya'atë ënä'ämën tyajknaxy ets tmooy yë Josué, Josué yë'ë ojts tkuuytyuunta'ay.

Josue 13:6

E ka'ap tääpë jyotmayëty, n'ëxwojpta'ajäämpyës yam yë sitonyë ja'ayëty ma Israel ja'ayëtyën ets tëkokyë jënu'un jam tsyëënëtën kopkjotm, tsyo'ontä'äky jam Líbano ets Misrefot-maim. Mijts yë'ëmës kijpxwa'kx yë it naaxwiinyëtë ets xytyuknikäkëtya'ajëty tu'ukjaty yë Israel ja'ayëty, jëtu'un tä të ntuk'ëne'emyën.

Josue 21:44

Yë Wintsën ojts jëtu'un tuny tä ënety të twinwanën, jotkujk ja nyaax kyajpn ojts tyajwë'ëmy ma tääpë it naaxwiinyëtën. Ja myëtsiptëjkëty ka'ap ojts myäyëtë jä'ä ko ja Wintsën ojts kë'ëm tyimkuwa'anëtë.

Josue 8:31

Jëtu'un tä ënety ja Moisés të tuk'ëne'emyën ja Israel ja'ayëty ma jyaak juuky'ätynyëmën ets tä jap myinyën ma ja ënä'ämën mëti'ipë ja Moisés jyääyën: Ja wintsë'këntyakn ka'apë wyopëtyën kyä'ätsyëtyën. Ënet ja Israel ja'ayëty jam ja wintsë'kën tyajktë, ojts ja tsajpkaa jam tnino'k tnixaamtë ets ja Wintsën tukwintsë'këtyë, jëtu'un tuuntë ja nay'ëëw'oy näykyajpx'oyë.

Josue 8:8

Ko ënety të xynyitëkëtë, tääts xyjyëënmo'otëty, jä'ä ko jëtu'un ja ënä'ämën myiny.

Josue 9:24

Ënet t'ëtsoowtë ja Josué: Ëëtsëty paatykyëjxmës jëtu'un të n'ëtë'ëtstë, jä'ä ko miits ënety ntsë'këtyëp, koos xy'ëkyaj'o'ktaaynyëtëty, jä'ä ko tëëjës nijawëtë ko yë Moisés ojts yë Dios y'ënë'ëmxëty, ko tëkokyë ya'atë it naaxwiinyëtë tniwa'kta'ajëty ets tyajkutëkoyëty tu'kë'ëyë jënu'un yaa ja'ay tsyëënëtën.